کراچی: دبئی کرکٹ کونسل کے چیئرمین عبدالرحمان فلک نازپھرسے یواے ای میں پاک بھارت کرکٹ میلہ سجانے کیلیے بے تاب ہیں۔

عبدالرحمان فلک ناز سالانہ بنیادوں پر دونوں ٹیموں کے درمیان میچز کی میزبانی کرنا چاہتے ہیں۔انھوں نے کہا کہ سب سے بہترین بات پاکستان اور بھارت کو یہاں پر پھر سے لانا ہوگی۔

حال ہی میں دبئی میں دونوں روایتی حریف ممالک کے درمیان ورلڈ کپ کا مقابلہ ہوا جسے دنیا بھرکے کروڑوں شائقین نے دیکھا۔
ماضی میں شارجہ میں دونوں ٹیموں کے درمیان مقابلے ہوا کرتے تھے تو وہاں پر جنگ کا ماحول ہوتا تھا مگر یہ کھیل کی جنگ ہوتی تھی،

فلک ناز نے کہا کہ ہم چاہتے ہیں کہ یہ سلسلہ دوبارہ شروع ہو، اگر ہم بھارت کو یہاں آنے اور پاکستان کے ساتھ کھیلنے پر راضی کرسکے تویہ بہت ہی زبردست بات ہوگی۔
یاد رہےدونوں ٹیموں کے درمیان 2013 سے باہمی کرکٹ کا سلسلہ منقطع ہے۔