ایمز ٹی وی(نئی دلی)بھارت میں مسلمانوں کے خلاف تعصب کو ہوا دینے میں انتہا پسندوں نے بھارتی کرکٹر اور فاسٹ باؤلر محمد شامی کے اہلخانہ کو گائے ذبح کرنے کے الزام پر سنگین نتائج کی دھمکیاں دینا شروع کر دیں۔ محمد شامی کے والد نے ایک بیان میں بتایا اس سے پہلے ان کے بیٹے محمد حسیب کو بھی پولیس نے گائے ذبح کرنیوالوں کی مدد کرنے کے شبہ میں گرفتار کر لیا تھا اور ضمانت پر رہائی ملی۔بھارتی پولیس کا دعویٰ ہے کہ انہیں رضوان احمد نامی شخص کے بارے میں گائے ذبح کرنے کی اطلاع ملی۔ پولیس موقع پر پہنچی تو محمد شامی کا بھائی محمد حسیب بھی وہاں موجود تھا جس نے پولیس افسر پر تشدد کیا۔ بھارت میں مودی سرکار کے زیر سایہ گائے ذبح کرنے کے الزام میں مسلمانوں پر تشدد معمول بن چکا ہے۔ واضح رہے اس سے پہلے مسلمان اداکار اور شوبز سے وابستہ افراد ہندو انتہا پسندوں کے تعصب شکار ہو چکے ہیں۔