ایمز ٹی وی(کھیل)حال ہی میں آسٹریلوی شہریت پانے والے مکی آرتھر کے پاسپورٹ پر پہلا ویزہ پاکستان کا لگا ہے اور وہ قومی کرکٹ ٹیم کے ہیڈ کوچ مقرر ہونے کے بعد پہلی بار لاہور پہنچ گئے ہیں جب کہ ہیڈ کوچ نیشنل کرکٹ اکیڈمی میں قیام کریں گے جہاں ان کے لیے مختص کمرے کو آراستہ کیا گیا ہے۔ ترجمان کرکٹ بورڈ کے مطابق مکی آرتھر کل چئیرمین پی سی بی شہریارخان، چیف سلیکٹرانضمام الحق، ٹیسٹ کپتان مصباح الحق اور ون ڈے ٹیم کے قائد اظہرعلی سے الگ الگ ملاقاتیں کریں گے اور اسی روز ان کی میڈیا بریفنگ بھی رکھی گئی ہے۔ دوسری جانب مکی آرتھر نے تجویز دی ہے کہ انگلینڈ کے خلاف سیریز کے لیے مشتاق احمد کو معاون کوچ بنایا جائے جب کہ اظہر محمود بھی معاون کوچ کے امیدوار ہیں تاہم امکان ظاہر کیا جارہا ہے کہ دورہ انگلینڈ سے قبل مشتاق احمد کو معاون کوچ بنادیا جائے گا۔