ایمزٹی وی (تعلیم) داﺅد یونیورسٹی آف انجینئرنگ اینڈ ٹیکنالوجی نے طلباء پروجیکٹ نمائش اور مقابلہ (ایس پی ای سی ) میں پہلی پوزیشن حاصل کرلی ہے۔تفصیلات کے مطابق مقابلے کا انعقاد این ای ڈی یونیورسٹی آف انجینئرنگ اینڈ ٹیکنالوجی کراچی کے شعبہ الیکٹرونک انجینئرنگ ٹیکنالوجی میں کیا گیا ۔ مقابلے میں پاکستان بھر سے 60سے زائد یونیورسٹیز نے حصہ لیا جن میں داﺅد یونیورسٹی ، فاسٹ یونیورسٹی ، سرسید یونیورسٹی ، پی اے ایف کیٹ ، جامعہ این ای ڈی ، انڈس یونیورسٹی ، علی گڑھ یونیورسٹی ، مہران یونیورسٹی ، ڈی ایچ اے صوفا یونیورسٹی اور دیگر شامل تھیں۔ روبو میز کیٹیگری میں داﺅد یونیورسٹی کے شعبہ الیکٹرونک انجینئرنگ کی ٹیم "الیکٹرونک 15"نے پہلی پوزیشن حاصل کی ۔ ٹیم کے ارکان میں جواد جیلانی ، شیخ احمد قریشی ، سجاد حیدر ، حسن اکبر، طارق کھوسو ، عبدالرحمن شامل تھے جن کے روبوٹ "ٹیک اس بوٹ" نے میز کا فاصلہ محض 35سیکنڈ میں طے کیا جبکہ دوسری پوزیشن لینے والے روبوٹ نے یہی فاصلہ 44 سیکنڈ میں طے کیا۔ علاوہ ازیں روبو میز کیٹیگری میں بہترین ڈیزائن کا اعزاز بھی دائود یونیورسٹی کی ٹیم "الیکٹرونک 15" کو ملا۔