Reporter SS
ایمز ٹی وی(صحت) کینیڈا کے ماہرین نے سمندری گھونگھے کے زہر میں ایک ایسا مادّہ دریافت کیا ہے جو نہ صرف درد ختم کرتا ہے بلکہ اس کا اثر لمبے عرصے تک برقرار بھی رہتا ہے۔
یہ مادہ ایک پیپٹائیڈ ہے جو ’’کونس ریگیئس‘‘ نامی چھوٹے سمندری گھونگھے کے زہر میں قدرتی طور پر موجود ہوتا ہے۔ خاص بات یہ ہے کہ اپنی درد کش خصوصیات کے باوجود یہ مادّہ درد ختم کرنے والی مروجہ دواؤں سے یکسر مختلف ہے جن میں عام طور پر ’’اوپیوئیڈ‘‘ (opioid) نامی مرکبات استعمال کیے جاتے ہیں۔
اوپیوئیڈ مرکبات ہمارے اعصاب کو سُن کرتے ہوئے درد کی شدت میں کمی لاتے ہیں لیکن ان کے اثرات صرف ایک دن تک ہی رہتے ہیں جب کہ اگر ان کی زیادہ مقدار استعمال کرلی جائے تو یہ موت کی وجہ بھی بن سکتے ہیں۔ صرف امریکا میں اوپیوئیڈز کی زائد مقدار لینے کے باعث روزانہ 90 افراد ہلاک ہوجاتے ہیں اور اسی وجہ سے ماہرین چاہتے ہیں کہ ان کا کوئی بہتر متبادل تلاش کیا جائے جو ان جان لیوا اثرات سے پاک بھی ہو۔
ان ہی کوششوں کے دوران یونیورسٹی آف یوٹاہ میں ماہرین کی ایک ٹیم نے جب چھوٹی کون جیسی شکل والے ننھے منے گھونگھے کے زہر کا تجزیہ کیا تو اس میں RgIA پیپٹائیڈ دریافت ہوا جو درد ختم کرنے والی خصوصیات کا حامل تھا۔ چوہوں پر آزمائشوں کے دوران اس پیپٹائیڈ نے زبردست کارکردگی کا مظاہرہ کیا جب کہ اس کے مفید اثرات بھی تین دن تک برقرار رہے۔ اوپیوئیڈز کے برعکس اس کے استعمال میں بظاہر کوئی خطرہ بھی سامنے نہیں آیا۔
ابتدائی کامیابی کے بعد اب اس پیپٹائیڈ پر مزید تحقیق کی جارہی ہے جس سے معلوم ہوسکے گا کہ یہ انسانوں میں کس حد تک مفید و مؤثر ہے اور یہ کہ انسانوں پر بھی اس کے دیرپا اثرات ویسے ہی مرتب ہوتے ہیں جیسے چوہوں میں دیکھے گئے ہیں یا نہیں۔ اس تحقیق کے نتائج ’’پروسیڈنگز آف دی نیشنل اکیڈمی آف سائنسز‘‘ کی تازہ اشاعت میں آن لائن شائع ہوئے ہیں۔
ایمز ٹی وی(مانیٹرنگ ڈیسک) سام سنگ کا نیا فلیگ شپ فون گلیکسی ایس 8 سامنے آنے میں ابھی ایک ماہ یا اس سے زائد وقت باقی ہے مگر اس کی تصاویر اور فیچرز مسلسل سامنے آرہے ہیں۔
تاہم یہ جنوبی کورین کمپنی کا ایسا فون ثابت ہونے والا ہے جس کا تجربہ صارفین کو پہلے کبھی نہیں ہوا ہوگا، جبکہ آئی فون میں بھی یہ فیچرز موجود نہیں۔
اب گلیکسی ایس 8 پلس کے فیچرز سامنے آئے ہیں جس سے ثابت ہوتا ہے کہ یہ سام سنگ کا اب تک کا سب سے بڑا اسمارٹ فون ہوگا۔
گلیکسی ایس 8 پلس 6.2 انچ کی سپر امولیڈ اسکرین سے لیس ہوگا جو کہ بارڈر لیس ہوگی۔
سام سنگ کی اس ڈیوائس میں پہلی بار یہ کمپنی ڈوئل رئیر کیمرہ متعارف کرائے گی جس کے دونوں سنسر 12 میگا پکسلز کے ہوں گے جبکہ 8 میگا پکسل کا فرنٹ کیمرہ ہوگا۔
یہ فون بھی گلیکسی ایس سیون کی طرح ڈسٹ اور واٹر ریزیزٹنٹ ہوگا جبکہ اسے آنکھوں کی مدد سے ان لاک کیا جاسکے گا۔
64 جی بی اسٹوریج جس میں مائیکرو ایس ڈی کارڈ کی مدد سے اضافہ کیا جاسکے گا جبکہ فور جی بی ریم بھی اس کا حصہ ہوگی۔
یہ فون وائرلیس چارجنگ کی صلاحیت رکھتا ہوگا جبکہ اینڈرائیڈ نوگیٹ آپریٹنگ سٹم کے ساتھ ہوگا۔
اور ہاں گلیکسی ایس ایٹ اور ایس ایٹ پلس دونوں کوالکوم اسنیپ ڈراگون 835 پراسیسر کے حامل ہوں گے جبکہ اس ماڈل میں پہلی بار سام سنگ کے اپنے ورچوئل اسسٹنٹ کا ڈیبیو ہوگا۔
یہ فون مارچ کے آخر میں متعارف کرایا جاسکتا ہے جبکہ اسے اپریل کے وسط میں فروخت کے لیے پیش کیا جائے گا۔
ایمز ٹی وی(مانیٹرنگ ڈیسک) چین کی مشہور کمپنی ہیواوے نے اپنا نیا اسمارٹ فون آنر وی نائن متعارف کرا دیا ہے۔
5.7 کیو ایچ ڈی ڈسپلے والا یہ اسمارٹ فون اینڈرائیڈ نوگیٹ سے لیس ہے جبکہ 2.4 گیگا ہرٹز کیرین 960 چپ بھی اس کا حصہ ہے۔
یہ 4 اور 6 جی بی ریم کے دو ورژن کے ساتھ ہوگا جبکہ اسی طرح اسٹوریج میں بھی 64 اور 128 جی بی کے آپشنز دسیتاب ہوں گے۔
اسٹوریج میں اضافہ ایس ڈی کارڈ سلاٹ سے ممکن ہوگا۔ 12، 12 میگا پکسل کے دو کیمرے اس کی بیک پر دیئے گئے ہیں جبکہ فرنٹ پر 8 میگا پکسل کا کیمرہ دیا گیا ہے۔
اس فون پر فور کے ویڈیو بنانا ممکن ہے جبکہ اس کا لیزر آٹو فوکس اچھی تصاویر لینے میں مدد دیتا ہے۔
یو ایس بی ٹائپ سی اور دیگر فیچرز سے لیس یہ فون چار رنگوں میں دستیاب ہوگا۔
اس فون کو پہلے چین میں فروخت کے لیے پیش کیا گیا ہے اور بتدریج اسے دنیا کے دیگر ممالک میں بھی متعارف کرا دیا جائے گا۔
4000 ایم اے ایچ بیٹری والے اس فون کی قیمت 377 سے 510 ڈالرز کے درمیان ہے جو کہ اس کی اسٹوریج اور ریم کے ورژن کے مطابق ہوگی۔
واضح رہے کہ ہیواوے کا نیا فلیگ شپ فون پی 10 بھی 26 فروری کو بارسلونا میں موبائل ورلڈ کانگریس کے موقع پر متعارف کرایا جائے گا۔
ایمز ٹی وی(تجارت) پاکستان میں دہشت گردی کے حالیہ واقعات کے بعد افغانستان کی سرحد بند ہے، راستے بند ہونے سے بارڈر کے دونوں جانب تجارتی سامان لے جانے والے ٹرکوں کی طویل قطاریں لگ گئی ہیں۔
واضح رہے کہ حالیہ ہلاکت خیز بم دھماکوں کی منصوبہ بندی کے لیے پڑوسی ملک افغانستان کی زمین استعمال ہونے کی اطلاعات سامنے آئی تھیں، جس کے بعد دہشت گردوں کی سرحد پار سے داخلے کو روکنے کے معاملے میں کئی اقدامات کیے گئے جبکہ دو اہم سرحدی راستے بند ہونے پر سیکڑوں ٹرک بھی پھنس گئے، جس سے دونوں ممالک کے تاجروں اور ٹرانسپورٹرز کے لاکھوں روپے ڈوب جانے کا خدشہ ہے، کیوں کہ ان ٹرکوں میں جلد خراب ہوجانے والے مال سمیت دیگر تجارتی سامان موجود ہے۔ ٹرانسپورٹرز کے مطابق گزشتہ ہفتے لعل شہباز قلندرکے مزار میں ہونے والے دھماکے میں 90 افراد کی ہلاکت کے بعد فوج کی جانب سے سرحد بند کی گئی، جس سے پاکستان سے افغانستان جانے والے 5 ہزار جبکہ سرحد کی دوسری جانب سے آنے والے 3 ہزار ٹرک پھنس گئے ہیں۔
ٹرانسپورٹرز اور تاجروں کے نمائندوں نے سرحد کو بند کیے جانے کے اقدامات پر تحفظات کا اظہار کرتے ہوئے کہا کہ بحران کو حل کرنے کے لیے فوری اقدامات کیے جائیں۔ آئل ٹینکرز اور مال بردار گاڑیوں کے ٹرانسپورٹرز کی انجمن کے ترجمان اسرار احمد شنواری کے مطابق ہم طورخم اورچمن سرحد سے افغانستان یومیہ 700 ٹرک روانہ کرتے ہیں، جبکہ 300 ٹرک وہاں سے آتے ہیں۔
اسرار احمد شنواری کا کہنا تھا کہ لوگ گزشتہ ایک ہفتے سے سرحد بند ہونے کے باعث پیدا ہونے والی خراب صورتحال کا اندازہ لگا سکتے ہیں، ہم انتظامیہ کی جانب سے سیکیورٹی سے متعلق اٹھائے گئے تمام اقدامات کی حمایت کرتے ہیں، مگر ہم حکام سے درخواست کرتے ہیں کہ اس مسئلے کا کوئی حل نکالا جائے، کیوں کہ اس سے 2 لاکھ افراد کا روزگار منسلک ہے۔
واضح رہے کہ درگاہ لعل شہباز قلندر میں دھماکے کے بعد رات گئے 16 فروری کو فوج کے شعبہ تعلقات عامہ (آئی ایس پی آر) کے ڈائریکٹر جنرل (ڈی جی) میجر جنرل آصف غفور نے ٹوئیٹ کیا تھا کہ سیکیورٹی خدشات کے باعث دیگر احکامات جاری ہونے تک پاک-افغان سرحد فوری طور پر بند کردی گئی ہے۔ یہ فیصلہ ایک ایسے وقت میں کیا گیا جب آرمی چیف جنرل قمر جاوید باجوہ نے مہمند اور باجوڑ ایجنسی کے دورے کا دوران کہا کہ دہشت گرد افغانستانمیں موجود محفوظ پناہ گاہوں میں دوبارہ منظم ہو رہے ہیں۔
ایسے بیانات پاکستان میں حالیہ دہشت گردی کی لہر میں افٖغانستان کے دہشت گرد گروپ کے ملوث ہونے کے سول و ملٹری قیادت کے اتفاق رائے کے بعد سامنے آئے ۔ پاک-افغان سرحدبند کرنا کوئی نئی بات نہیں ہے، مگر جب بھی سرحد بند ہوتی ہے تو دونوں اطراف موجود لوگوں کے لیے معاشی اور سماجی مسائل پیدا ہوتے ہیں، جب کہ موجودہ صورتحال میں مختلف وجوہات کے باعث تاجر پریشانی کا شکار ہیں۔
پاکستان-افغانستان کے مشترکہ چیمبر آف کامرس اینڈ انڈسٹریز کے شریک چیئرمین اور معروف تاجر محمد زبیر موتی والا کے مطابق گزشتہ چند ماہ کے دوران پاک-افغان تجارت 2.5 بلین ڈالر سے کم ہو کر 1.5 بلین تک پہنچ گئی ہے۔ یاد رہے کہ پاک-افغان چیمبر آف کامرس اینڈ انڈسٹریز دونوں حکومتوں کی جانب سے تسلیم شدہ باڈی ہے اور اس کے ممبران میں دونوں ممالک کے سیکڑوں تاجران شامل ہیں۔ محمد زبیر نے مزید کہا کہ دونوں ممالک کے تاجر مزید نقصان برداشت نہیں کرسکتے، مگر ساتھ ہی ہم اپنے ملک اور عوام کی سیکیورٹی کو یقینی بنانے کے لیے تمام اقدامات کی حمایت بھی کرتے ہیں۔
انہوں نے کہا کہ ہم صرف دونوں حکومتوں کو درخواست کرسکتے ہیں کہ محفوظ تجارت اور سیکیورٹی کو یقینی بنانے کے لیے ایک میکانزم ترتیب دیا جائے۔ محمد زبیر موتی والا نے بتایا کہ انہوں نے اس معاملے سے متعلق متعلقہ حکام سے ملاقاتیں کی ہیں، انہوں نے سب سے پہلے پاکستان میں تعینات افغانستان کے سفیر سے ملاقات کی جبکہ انہیں اپنے تحفظات سے آگاہ کرنے سمیت مسئلے کو حل کرنے کے لیے تجاویز پیش کیں۔
ایمز ٹی وی(اسپورٹس) پاکستان سپر لیگ(پی ایس ایل) میں مبینہ طور پراسپاٹ فکسنگ میں ملوث قومی کرکٹرز شرجیل خان اور خالد لطیف نے مشکوک شخصیت سے ملنے کا اعتراف کر لیا ہے تاہم اسپاٹ فکسنگ میں ملوث ہونے سے صاف انکار کر دیا ہے۔
تفصیلات کے مطابق اسپاٹ فکسنگ میں مبینہ طور پر ملوث ہونے کے الزام پر پاکستان کرکٹ بورڈ (پی سی بی) نے دونوں کھلاڑیوں کو عبوری طور پر معطل کر کے وطن واپس بھیج دیا تھا اور بعد ازاں انہیں چارج شیٹ بھی دیدی گئی جس کے جواب میں دونوں کھلاڑیوں نے فکسنگ میں ملوث ہونے سے انکار کر دیا ہے۔
ذرائع کے مطابق دونوں کھلاڑیوں نے اپنے جواب میں مشکوک شخص سے ملاقات کا اعتراف کرتے ہوئے کہا ہے کہ ناصر جمشید کے کہنے پر جس شخص نے ان کیساتھ ملاقات کی وہ مداح کی حیثیت سے آیا اور جب فکسنگ کی بات شروع ہوئی تو ہم نے فوراً ملاقات ختم کر دی۔
خالد لطیف نے بھی ایسا ہی موقف اختیار کیا ہے کہ وہ قومی ٹیم کے اوپنر ناصر جمشید کے کہنے پر مذکورہ شخص سے ملے تاہم انہیں اور شرجیل دو اس کے بکی ہونے کا علم نہیں تھا۔ دونوں کھلاڑیوں نے کہا ہے کہ جب اس شخص نے فکسنگ کی آفر کی تو ہم اٹھ کر چلے گئے اور اس بات کا اعتراف کرتے ہیں کہ بورڈ حکام کو اس ملاقات کا نہ بتانا غلطی تھی لیکن ہم نے فکسنگ نہیں کی۔
ایمز ٹی وی(اسپورٹس) نیوزی لینڈ کے کرکٹر اور پاکستان سپر لیگ (پی ایس ایل) میں لاہور قلندرز کی نمائندگی کرنے والے گرانٹ ایلیٹ نے فائنل میچ کھیلنے کیلئے لاہور آمد کو فیڈریشن آف انٹرنیشنل کرکٹ ایسوسی ایشنز (فیکا) کی اجازت سے مشروط کر دیا ہے۔
تفصیلات کے مطابق گرانٹ ایلیٹ سے ایک انٹرویو کے دوران جب یہ سوال پوچھا گیا کہ اگر لاہور قلندرز فائنل میں پہنچ گئی تو کیا آپ میچ کھیلنے کیلئے لاہور آئیں گے؟ تو گرانٹ ایلیٹ نے جواب دیا کہ ” اگر فیڈریشن آف انٹرنیشنل کرکٹ ایسوسی ایشنز (فیکا) نے گرین سگنل
دیدیا تو میں فائنل میچ کھیلنے کیلئے لاہور جاﺅں گا۔“
دیدیا تو میں فائنل میچ کھیلنے کیلئے لاہور جاﺅں گا۔“
واضح رہے کہ پی ایس ایل 2 کا فائنل میچ 5 مارچ کو لاہور میں ہونا ہے اور اس سلسلے میں غیر ملکی کھلاڑیوں کی رضامندی جاننے کا سلسلہ جاری ہے جبکہ انکار کی صورت میں متبادل کھلاڑیوں کی فہرست بھی تیار کر لی گئی ہے۔
ایمز ٹی وی ( انٹر ٹینمنٹ )انوشکا شرما کی نئی بالی ووڈ رومانٹک کامیڈی فلم 'پھلوری 'کے نئے گانے کی ویڈیو جاری کردی گئی ہے۔ 'واٹس اپ کے بول پر مبنی یہ گانامیکا سنگھ اور جسلین رائل کی آواز میں ریکارڈ کیا گیا ہے جبکہ اس گانے کے بول آدتیہ شرما نے تحریر کئے ہیں۔اس فلم میں انوشکا ایک بھوت کے روپ میں جلوہ گر ہوتی دکھائی دے رہی ہیں۔
انشائی لال کی ہدایت کاری میں بننے والی اس فلم میں انوشکا کے علاوہ دلجیت ڈوسانجھ،سورج شرما اور مہرین پیرزادہ بھی مرکزی کردار میں اپنی اداکاری کے جوہر دکھاتے نظر آئیں گے۔ واضح رہے کہ مزاح سے بھرپور یہ فلم رواں سال24مارچ کو سنیما گھروں کی زینت بنے گی۔
ایمز ٹی وی(اسپورٹس) پاکستان سپر لیگ کا فائنل لاہور میں ہو گا یا نہیں ، وزیر اعلیٰ پنجاب شہبازشریف نے اہم اجلاس طلب کر لیا ۔
زرائع کے مطابق لاہور میں پاکستان سپر لیگ کے فائنل میچ کا حتمی فیصلہ کرنے کیلئے اہم اجلاس وزیر اعلیٰ پنجاب شہبازشریف کی زیر صدارت آج لاہور میں ہو گا جس میں شرکت کیلئے نجم سیٹھی بھی لاہور پہنچ گئے ہیں۔
ذرائع کا کہنا ہے کہ پاکستان سپر لیگ کے فائنل میچ کی سیکیورٹی کے حوالے سے یہ اجلاس گزشتہ روز ہونا تھا مگر ڈیفنس دھماکے کے بعد اسے ایک روز کیلئے موخر کیا گیا تھا ۔ سیہون شریف میں دھماکے کے بعدبین الاقوامی کھلاڑیوں نے پاکستان سپر لیگ کے فائنل میچ کیلئے پاکستان آنے کے حوالے سے تحفظات کا اظہار کر رکھا ہے اور کسی بھی بڑے کھلاڑی نے فائنل میچ کیلئے تاحال لاہور آنے کی حامی نہیں بھری۔
ایمز ٹی وی (صحت /سکھر )کمشنر سکھر ڈویژن محمد عباس بلوچ کی جانب سے پولیو کے خاتمے کے سلسلے میں سکھرٹاسک فورس کا اجلاس 24فروری بروزجمعہ صبح 10:30بجے ڈی سی آفس میں منعقد کیاجائے گا
ایمز ٹی وی (صحت /حیدرآباد ) انسداد پولیو مہم کی ٹیموں کو مکمل تحفظ فراہم کیا جائیگا،یہ بات ڈپٹی کمشنر حیدرآباد معتصم عباسی نے شہباز ہال حیدرآباد میں ضلع حیدرآباد میں 6 سے 9مارچ تک سہ روزہ شروع ہونے والی قومی پولیو مہم کے انتظامات کا جائزہ لینے کے متعلق پولیو خاتمے کی ضلعی کمیٹی کے اجلاس کی صدارت کرتے ہوئے کہی۔
انہوں نے کہا کہ جنوری کے بعد صرف پنجاب میں ایک پولیو کا کیس ظاہر ہوا ہے جبکہ سندھ میں جنوری کے بعد کوئی بھی پولیو کا کیس ظاہر نہیں ہوا ہے یہ تمام اداروں اور عوام کی کاوشوں اور محنت کا نتیجہ ہے ۔انہوں نے کہا کہ ضلع حیدرآباد جنوری 2012سے پولیو سے پاک ضلع ہے اورضلع انتظامیہ اور محکمہ صحت حیدرآد کی یہ کوشش ہے کہ آئندہ بھی ضلع حیدرآباد پولیو سے پاک رہے۔