Reporter SS
ایمز ٹی وی (اسپورٹس) ہنگری کا شہر بڈاپسٹ 2024 اولمپکس کی میزبانی کے عمل سے دستبردار ہو گیا ہے جس کے بعد اولمپکس کی میزبانی کیلئے اب پیرس اور لاس اینجلس میں مقابلہ ہو گا۔
ہنگری کے وزیر اعظم وکٹور اوربان نے ویب سائٹ پر اپنے بیان میں کہا کہ بڈاپسٹ میں اولپکس کے انعقاد کے حوالے سے درکار اتحاد و اتفاق نہیں لہٰذا اولمپکس کیلئے بولی کے امکانات ختم ہو گئے ہیں۔
’اسی وجہ سے ہنگری کے ملازمین نے 2024 کے اولمپکس اور پیرالمپکس سے دستبردار ہونے کی تجویز پیش کی ہے‘۔
اس بات کا اعلان حکومت کی جانب سے بلائے گئے ایک خصوصی اجلاس میں کیا گیا۔
ہنگری کے دارالحکومت بڈاپسٹ کے دستبردار ہونے کے بعد 2024 اولمپکس کیلئے اب پیرس اور لاس اینجلس کے درمیان مقابلہ ہو گا۔
انٹرنیشنل اولمپک کمیٹی رواں سال 13 ستمبر کو ہیمبرگ میں 2024 اولمپکس کے فاتح شہر کے نام کا اعلان کرے گی جبکہ روم پہلے ہی بولی کے عمل سے دستبردار ہو چکا ہے۔
ہنگری کے عوام نے اولمپکس کے انعقاد کی مخالفت کی اور دو لاکھ 66ہزار افراد نے ایک تحریک چلاتے ہوئے مخالفت میں دستخط کیے اور کہا کہ عالمی کھیلوں پر خرچ کی جانے والی رقم حکومت اسکولوں اور ہسپتالوں کی تعمیر پر خرچ کرے۔
ایمز ٹی وی(تجارت) بلڈ نگ فراڈ کیس میں ڈی جی نادرا طاہر اکرم کو گرفتار کرلیا گیا ۔میڈ یا رپورٹس کے مطابق عدالت نے بلڈ نگ فراڈ کیس میں طاہر اکرم کی ضماعت کی درخواست مسترد کردی جس پر انہیں گرفتار کر لیا گیا ۔طاہر اکرم کو کل ریمانڈ کے لیے پیش کیا جائے گا ۔
واضح رہے کہ نادر ا نے اسلام آباد کے علاقے میلوڈی مارکیٹ میں ایک بلڈنگ کرائے پر لی تھی جو کہ ابھی تک استعمال میں نہیں آئی اور یہ سارا پیسہ ضائع ہو گیا ۔اس بات پر وزیر داخلہ چوہدری نثار نے نوٹس لیا تھا اور اس کیس کو ایف آئی اے کے حوالے کردیا تھا ۔انکوائری کے دوران کرپشن اور بے ضابطگیوں کا انکشاف ہوا تھا ۔
ایمزٹی وی(اسلام آباد)جسٹس آصف سعید کھوسہ کی سربراہی میں سپریم کورٹ کے لارجر بنچ نے پاناما کیس کی سماعت کی، سماعت کے دوران درخواست گزاروں کے وکلا نے جوابی دلائل مکمل کرلئے۔ جسٹس آصف سعید کھوسہ نے کیس کی سماعت مکمل ہونے پر ریمارکس دیئے کہ یہ وہ مقدمہ نہیں جس میں مختصر حکم دیا جائے، کیس کے تمام زاویوں کو گہرائی سے دیکھا جائے گا اور پھر تفصیلی فیصلہ جاری کیا جائے گا۔
سپریم کورٹ کی اجازت پر عمران خان نے فاضل جج صاحبان کے روبرو کہا کہ ترقی یافتہ ملکوں کے ادارے مضبوط ہیں لیکن ہمارے ادارے مضبوط نہیں، میری کسی سے کوئی ذاتی دشمنی نہیں، میں کرپشن ختم کرنے کے لئے یہاں آیا ہوں، لیڈر کو عام شخص سے زیادہ ایماندار اور دیانتدار ہونا چاہئے۔ اگر میری دیانتداری ثابت نہ ہوتو مجھے بھی عوامی عہدے پر آنے کا کوئی حق نہیں، پاکستانی قوم دنیا کی ان 10 اقوام میں شامل ہوتی ہے جو سب سے زیادہ خیرات اور فلاحی کاموں میں حصہ ڈالتی ہے لیکن ہم بحیثیت قوم ٹیکس کی ادائیگی میں سب سے پیچھے ہیں۔
سماعت کے دوران عمران خان کے وکیل نعیم بخاری نے جوابی دلائل پر کہا کہ گلف اسٹیل کے واجبات 63 ملین درہم سے زیادہ تھے لیکن اس سے متعلق کوئی وضاحت نہیں آئی، جس پر جسٹس اعجاز افضل نے کہا کہ ابتدائی دلائل میں آپ نے یہ بات نہیں کی۔
نعیم بخاری نے کہا کہ مریم نواز کی دستخط والی دستاویز میں نے تیار نہیں کی۔ جسٹس عظمت سعید شیخ نے ریمارکس دیئے کہ آپ مریم کے دستخط والی دستاویز کو درست کہتے ہیں جب کہ شریف فیملی اس دستاویز کو جعلی قرار دیتی ہے، جسٹس اعجاز افضل نے ریمارکس دیئے کہ متنازعہ دستاویز کو چھان بین کے بغیر کیسے تسلیم کریں، عدالت میں دستخط پر اعتراض ہو تو ماہرین کی رائے لی جاتی ہے، ماہرین عدالت میں بیان دیں تو ان کی رائے درست مانی جاتی ہے۔ عدالت ٹرائل کورٹ نہیں جو یہ کام کرے، نعیم بخاری نے کہا کہ یوسف رضا گیلانی کیس میں عدالت ایسا کر چکی ہے۔ جسٹس اعجاز افضل نے ریمارکس دیئے کہ گیلانی کیس میں عدالت نے توہین عدالت کی درخواست پر فیصلہ کیا تھا۔ نعیم بخاری نے کہا کہ یہ بھی وزیراعظم کے ان اثاثوں کا مقدمہ ہے جو ظاہر نہیں کیے گئے۔
جسٹس اعجاز افضل نے ریمارکس دیئے کہ کیا ایسی دستاویزات کو ثبوت مانا جا سکتا ہے، عدالت نے ہمیشہ غیر متنازعہ حقائق پر فیصلے کیے، کیا ہم قانون سے بالاتر ہو کر کام کریں۔ عدالت اپنے فیصلوں میں بہت سے قوانین وضع کر چکی ہے، جسٹس گلزار احمد نے کہا کہ بنیادی حقوق کا معاملہ سن رہے ہیں، مقدمہ ٹرائل کی نوعیت کا نہیں۔
نعیم بخاری نے کہا کہ کیا دنیا میں کسی نے پاناما لیکس کو چیلنج کیا ہے، وزیر اعظم نے بھی موزیک فونیسکا کو کوئی قانونی نوٹس نہیں بھجوایا، 1980 سے 2004 تک قطری شیخ بینک کا کردار ادا کرتے رہے، سرمایہ کاری پر منافع اور سود بھی بنتا گیا، سالہا سال تک قطری مراسم کا کوئی ذکر نہیں کیا گیا، قطری نے کہہ دیا کہ قرض کی رقم اس نے ادا کی، اتنی بڑی رقم بینک کے علاوہ کیسے منتقل ہوگئی، انہوں نے اخبار میں پڑھا کہ اسی قطری کو ایل این جی کا ٹھیکہ دیا گیا، وزیر اعظم نے اپنے خطاب میں سچ نہیں بولا، انہوں نے ایمانداری کا مظاہرہ نہیں کیا، گیلانی کیس کی طرح میں بھی عدالت سے ڈیکلریشن مانگ رہاہوں، جسٹس گلزار احمد نے ریمارکس دیئے کہ قطری ٹھیکے والی بات مفادات کے ٹکراؤ کی جانب جاتی ہے۔
جسٹس آصف سعید کھوسہ نے کہا کہ ہمارے سامنے ایل این جی کے ٹھیکے کا معاملہ نہیں، دستاویزات پر نہ دستخط ہیں نہ کوئی تاریخ، ادائیگی کس سال میں کی گئی وہ بھی نہیں لکھا، غیر تصدیق شدہ دستاویزات مسترد کرنا شروع کیں تو 99.99 فیصد کاغذات فارغ ہو جائیں گے، ایسی صورت میں ہم واپس اسی سطح پر آ جائیں گے، دونوں فریقین کی دستاویزات کا ایک ہی پیمانہ پر جائزہ لیں گے۔
نعیم بخاری کی جانب سے جوابی دلائل مکمل کیے جانے کے بعد شیخ رشید نے اپنے دلائل کا آغاز کیا۔ انہوں نے کہا کہ میں باقاعدگی سے جسٹس اکیڈمی آتا ہوں،اتنے تسلسل سے میں کبھی نا تو اسکول گیا اور نہ کالج، عدالت نے سماعت کے دوران 371 سوالات پوچھے ،جن میں سے زیادہ تر شیخ عظمت کے تھے، جواب نہ ملنے پر جج صاحب کا دل زخمی ہوا، جج صاحب کا صحت یاب ہونا اللہ کا احسان ہے، میرا کیس اسمارٹ، سویٹ اور شارٹ ہے، جس پر جسٹس آصف سعید کھوسہ نے کہا کہ آج آپ نے سلگش کا لفظ استعمال نہیں کیا۔ آج کل انصاف اور فیصلے کے معنی مختلف ہو گئے ہیں، انصاف اس کو کہا جاتا ہے جو حق میں آئے، فیصلہ حق میں آئے تو کہا جاتا ہے کہ ان سے اچھا منصف کوئی نہیں، فیصلہ حق میں نہ آئے تو کہتے ہیں جج نالائق ہے، ججز پر رشوت اور سفارشی کا الزام لگتا ہے، کہتے ہیں کہ ملی بھگت ہو گئی۔
شیخ رشید نے کہا کہ میرا کیس پہلے دن سے ہی صادق اور امین کا ہے، عدالت صادق اور امین کی کئی فیصلوں میں تعریف کرچکی ہے، عدالت نے جن 20 اراکین کو نااہل کیا ان کے فیصلے سامنے رکھناہوں گے، ان 20 اراکین اسمبلی کو آرٹیکل 184 (3) کے تحت نااہل کیا گیا، قوم کو عدالت سے انصاف کی امید ہے، کرپشن پر سزا نہ ملی تو ملک خانہ جنگی کی طرف جائے گا، نواز شریف نے کہا تھا کرپشن کرنے والے اپنے نام پر کمپنیاں اور اثاثے نہیں رکھتے، دبئی فیکٹری کب اور کیسے لگی، پیسہ کیسے باہر گیا۔ تمام دستاویزات موجود ہونے کا بھی دعویٰ کیا گیا۔ کیس آپ کو سمجھ آ چکا ہےاور اب ہم وقت ضائع کر رہے ہیں۔
شیخ رشید نے کہا کہ منی لانڈرنگ اور کرپشن پر استثنیٰ نہیں ہوتا، نواز شریف کا بیان اگر اسمبلی کی کارروائی ہو تو ہی اسے استحقاق حاصل ہے، ذاتی وضاحت استحقاق کے زمرے میں نہیں آتی، مفاد عامہ کی درخواست میں سپریم کورٹ وہ ریلیف بھی دے سکتی ہے جو نہیں مانگا گیا، ایمرجنسی والے کیس میں بھی سپریم کورٹ نے استدعا سے بڑھ کرریلیف دیا، عدالت نے چوہدری نثار کی درخواست میں چیئرمین نیب کو اڑایا، جسٹس آصف سعید کھوسہ نے کہا کہ یہ کہنا مشکل ہو گا کہ تقریر کارروائی کا حصہ نہیں تھی، پتہ نہیں اس نے فیصلے پڑھے بھی ہیں یا نہیں، جس نے آپ کو لکھ کر دیا،اڑا دیا کے لفظ سے غلط فہمی پیدا ہوتی ہے، اس سے ایسا لگتا ہے جیسے کسی کا کوئی ایجنڈا ہو، ہم کسی کو اڑاتے نہیں، صرف فیصلہ کرتے ہیں۔
شیخ رشید نے کہا کہ ہمارے شہر میں ایسے ہی لفظ استعمال ہوتے ہیں، ڈاوٴن ٹاوٴن کے منشی تو ایسے ہی لکھ کردیتے ہیں، میرے شہر میں لوگ قانون کو نہیں فیصلے کو زیادہ سمجھتے ہیں کیونکہ آپ سے آ گے تو صرف اللہ ہی کی ذات ہے، میں نے رات کو تنہائی میں شریف فیملی کی دستاویزات کو دیکھا ہے، مجھے تو تمام دستاویزات جعلی لگتی ہیں، سپریم کورٹ نے تو نواز شریف کو ملک میں داخلے کی اجازت دی، تمام ادارے اور پی ایم ہاوٴس روزانہ اپنا کیس امپروو کرتے ہیں، قطری کی آمد پہلی بار نہیں ہوئی، ہیلی کاپٹر کیس میں بھی قطری آچکا ہے، طارق شفیع نے بھی اپنا پہلا بیان بہتر بنایا ہے۔ جس پر جسٹس آصف سعید کھوسہ نے ریمارکس دیئے کہ آپ نواز شریف کی انٹری نہیں ایگزٹ کا کیس لائے ہیں۔ سب لوگ اپنے کیس کی تیاری کرکے آتے ہیں۔
جسٹس آصف سعید کھوسہ نے ریمارکس دیئے کہ قانون شہادت کے مطابق چوری کا مال جس سے برآمد ہو اسی کو ثابت کرنا ہوتا ہے، شیخ رشید نے کہا کہ شریف خاندان نے تسلیم کیا ہے کہ مال ان کا ہے، جسٹس آصف سعید کھوسہ نے ریمارکس دیئے کہ مال شریف خاندان کا ہونے اور چوری کا ہونے میں فرق ہے، پہلے ثابت کرنا ہوتا ہے کہ مال چوری کا ہے۔
شیخ رشید کے بعد جماعت اسلامی کے وکیل توفیق آصف نے اپنے جوابی دلائل میں کہا کہ اللہ وزیراعظم کو صحت، زندگی اور آئین کے مطابق چلنے کی توفیق دے، وزیراعظم نے اپنی تقریرمیں کہا تھا کہ استحقاق یا استثنیٰ نہیں مانگوں گا لیکن عدالت میں آ کر استحقاق مانگا گیا، وزیراعظم نے اسمبلی میں جو ریکارڈ پیش کیا تھا وہ طلب کرنے کی درخواست کی تھی، جس پر جسٹس آصف سعید کھوسہ نے ریمارکس دیئے کہ وزیراعظم نے جو تصاویر پیش کی تھیں وہ ریکارڈ پر آ چکی ہیں، وزیراعظم شروع سے ہی بہت ہینڈسم ہیں، کیا آپ ان کی جوانی کی تصاویر دیکھنا چاہتے ہیں
ایمز ٹی وی(صحت) لاہور میں دھماکے کے بعد ینگ ڈاکٹرز نے سروسز اسپتال میں ہڑتال ختم کردی ہے۔
ینگ ڈاکٹرز کاکہنا ہے کہ دکھ کی اس گھڑی میں پوری قوم کےساتھ ہیں ، سروسز اسپتال کی ایمرجنسی کھول دی گئی ہے۔
واضح رہے کہ لاہور کے سروسز اسپتال میں ینگ ڈاکٹرز کی ہڑتال کا تیسرا روز تھا اور اسپتال میں آپریشن تھیٹر ،ایمرجنسی ، زچہ بچہ اور دیگر وارڈ سمیت ان ڈور، آؤٹ ڈور سب کچھ بند تھا۔
ایمز ٹی وی(تجارت) صوبائی دارلحکومت کے علاقے ڈیفنس میں ہونیوالے بم دھماکے میں ایئرلنک کمیونیکیشن کے چیف ایگزیکٹیوآفیسر معظم حیات پراچہ ، ایریامنیجر اور اپنے ایک ملازم جاوید اقبال سمیت شہید ہوگئے، معظم حیات پراچہ دھماکے کا نشانہ بننے والے پلازہ میں زیرتعمیر ہوٹل کی فوڈٹیسٹنگ کے لیے گئے تھے اور جیسے ہی باہر نکلے تو زوردار دھماکہ ہوگیا جبکہ اس دھماکے سے فرسٹ فلور کی ٹائلیں تک اکھڑگئیں۔
دھماکے سے 10منٹ قبل ہی معظم حیات پراچہ کے بھائی مظفرپراچہ ہوٹل سے نکلے تھے۔ایئرلنک کمیونیکیشن پاکستان میں ہواوے اور سام سنگ موبائلز کی ڈسٹری بیوٹر ہے اور اپنی کمپنی کے سی ای او کی شہادت کی تصدیق کرتے ہوئے ترجمان نے ’ معظم حیات کی شہادت کو کمیونیکیشن انڈسٹری کیلئے بڑا نقصان قراردیدیا‘۔
معظم حیات پراچہ کے ساتھ دھماکے میں شہید ہونیوالے جاوید اقبال کے خاندانی ذرائع نے بتایاکہ ڈیفنس زیڈ بلاک میں ہوٹل کھول رہے تھے اور ا س کی تزئین و آرائش کا بیشتر کام مکمل ہوچکا تھا، آج وہاں پر کھانے کی ٹیسٹنگ اور دیگر معیار کا جائزہ لیا جانا تھا ، معظم حیات پراچہ ماڈل ٹاﺅن لاہور جبکہ جاوید اقبال بندیال کے رہائشی تھے ۔
ایئرلنک کمیونیکیشن نے اپنا سفر پی ٹی سی ایل ڈیوائسز کی ڈسٹریبیوشن سے شروع کیا تھا اور اب وہ ٹورازم میں بھی کام کررہے تھے ۔ ایئرلنک کمپنی نے بھی معظم حیات پراچہ کی شہادت کی تصدیق کردی اور ان کی شہادت کو سام سنگ اور ہواوے کے لیے بھی بڑا نقصان قراردیاگیا۔
یادرہے کہ دھماکے میں مجموعی طورپر اب تک آٹھ افراد کی شہادت کی تصدیق ہوچکی ہے جن میں جاوید اقبال اور معظم کے علاوہ اسلم ، شبیر، عمران اور حبیب شامل ہیں جبکہ کم ازکم 20افرادزخمی ہوئے تھے ۔0
ایمز ٹی وی(اسپورٹس) وزیراعلیٰ پنجاب شہباز شریف کی زیر صدارت پی ایس ایل کے فائنل میچ کی حتمی منظوری کے لیے اجلاس آج ہونے کا امکان ہے۔
اس سے قبل وزیراعلی پنجاب کی صدارت میں منگل کو ہونے والے اجلاس میں پی ایس ایل فائنل کے حوالے سے کوئی حتمی فیصلہ نہیں ہو سکا تھا چیف سیکرٹری اور آئی جی پنجاب اسلام آباد میں موجود نہیں تھے۔
تاہم اجلاس میں ٹیم اوراسٹیڈیم میں میچ دیکھنے والوں کی سیکیورٹی کے بارے میں بہت سے معاملات پربحث کی گئی تھی۔
ایمز ٹی وی(تجارت) پاکستانی فضائی کمپنی شاہین ایئر انٹرنیشنل کے فضائی بیڑے میں ایک اور ایئربس اے 319 طیارہ شامل ہوگیا۔
شاہین ایئر کی جانب سے جاری بیان میں بتایا گیا کہ 'ہم انتہائی مسرت کے ساتھ اس بات کا اعلان کررہے ہیں کہ شاہین ایئر کے بیڑے میں ایک اور اے 319 طیارہ شامل ہوگیا ہے'۔
کمپنی اسی ماڈل کے مزید پانچ طیارے حاصل کرنے کے لیے کوشاں ہے۔
واضح رہے کہ اس سے قبل شاہین ایئر کے پاس صرف ایک ایئربس اے 319 طیارہ موجود تھا تاہم اب ان کی تعداد دو ہوگئی ہے۔
شاہین ایئر کی جانب سے جاری بیان کے مطابق کمپنی کے فضائی بیڑے میں شامل طیاروں کی تعداد اب 25 ہوگئی ہے۔
کمپنی کی جانب سے جاری کردہ پریس ریلیز کے مطابق ایئربس اے 319 پر کمپنی کا نیا لوگو پرنٹ کیا گیا ہے جبکہ اس کے اکانومی سیکشن میں 150 مسافروں کے بیٹھنے کی گنجائش موجود ہے۔
واضح رہے کہ گزشتہ ماہ ہی شاہین ایئر نے کمپنی کا نیا لوگو متعارف کرایا تھا۔
ایئربس طیارے بنانے والی فرانسیسی کمپنی ہے جو دنیا بھر کی فضائی کمپنیوں کو طیارے فراہم کرتی ہے۔
ایمزٹی وی(تجارت) عالمی ریٹنگ ایجنسی موڈیز نے پاکستانی بینکوں کی ریٹنگ کو مستحکم قرار دے دیا۔ معاشی نمو، منافع بخش ماحول اور بہتر فنڈنگ کے سبب ریٹنگ مستحکم رہی۔موڈیز نے یہ بھی کہا ہے کہ سی پیک منصوبوں کی وجہ سے قرض گیری بڑھے گی۔
عالمی ریٹنگ ایجنسی موڈیز نے پاکستانی بینکوں پر تفصیلی جائزہ دیا ہے جس میں بتایا گیا ہے کہ پاکستان کی معاشی نمو رواں مالی سال میں4 اعشاریہ 9 فیصدرہے گی۔معاشی نمو سے بینک منافع بخش رہیں گے۔
رپورٹ میں پیش گوئی کی گئی ہے کہ آئندہ مالی سال میں پاکستان کی معاشی نمو 5 فیصد رہنے کی توقع ہے ۔یہ بھی کہا ہےکہ آئندہ 18مہینوں میں بینکوں کی قرض گیری میں 12 سے 14 فیصد اضافہ ہوگا ۔
عالمی ریٹنگ ایجنسی کا کہنا ہے کہ سی پیک منصوبوں کی وجہ سے قرض گیری بڑھے گی ۔بینکوں کی ریٹنگ کے لیے حکومتی قرض گیری سب سے بڑا مسئلہ ہے۔
موڈیز کے مطابق پاکستانی بینکوں کے غیر فعال قرض 2016 کے اختتام پر11 اعشاریہ 3 فیصد رہے ہیں۔جبکہ2018 میں پاکستانی بینکوں کے غیر فعال قرض میں کمی ہوگی۔
ریٹنگ ایجنسی نے کہا ہے کہ ترسیلات زر سے بینکوں کے ڈپارٹس بڑھیں گے اورلیکوڈٹی بہتر ہوگی ۔
ایمز ٹی وی(لاہور) صوبائی دارالحکومت لاہور کے پوش علاقے ڈیفنس میں دھماکے کے بعد پاک فوج نے موقع پر پہنچ کر علاقے کو گھیرے میں لے لیا ۔تفصیل کے مطابق لاہور کے علاقے ڈیفنس میں زیڈ بلاک مارکیٹ میں کھانے کے ریسٹورنٹ کے باہر دھماکہ ہوا ہے جس کے نتیجے میں 7افراد شہید جبکہ متعدد زخمی ہو گئے ۔
دھماکے کے بعد پاک فوج کے دستوں نے جائے وقوعہ پر پہنچ گئی ہے اور علاقے کو اپنے گھیرے میں لے لیا ہے ۔پاک فوج اور دیگر سیکیورٹی فورسز نے موقع پر پہنچ کر تحقیقات شروع کردی ہے اور سیکیورٹی فورسز جائے وقوعہ سے شواہد بھی اکھٹے کر رہے ہیں ۔دوسری جانب سیکیورٹی فورسز نے علاقے کو گھیرے میں لے کر سرچ آپریشن بھی شروع کردیا ہے ۔
ایمزٹی وی(اسلام آباد)پاکستان عوامی مسلم لیگ کے سربراہ شیخ رشید نے کہا کہ دنیائے سیاست کی تاریخ کا اہم کیس انجام کو پہنچنے جارہا ہے۔ تفصیلات کے مطابق سپریم کورٹ میں پانامہ کیس کی سماعت سے قبل میڈیا سے بات کرتے ہوئے شیخ رشید نے کہا کہ آج دلائل دینے کی باری میری ہے اور شارٹ، سویٹ، اسمارٹ اور سمپل دلائل دوں گا اور فتح ہوگی۔ شیخ رشید کا کہنا تھا کہ کوئی منی ٹریل نہیں ہے کوئی ثبوت نہیں ہے،کیس کے 5 بنیادی افراد ملک سے باہر ہیں۔
انہوں نے کہا کہ 5 معزز جج ایک شخص کی تلاشی لینے کی کوشش کررہے ہیں،ہمارے حکمران کرپٹ ہیں اور دولت لوٹ کر باہر لے جارہے ہیں۔
شیخ رشید نے مزید کہا کہ ایسے کیس کی سماعت پاکستان کے سیاسی ڈھانچے میں دیکھنے میں نہیں آئی,ساری قوم کی نظریں پانامہ کیس پر ہیں۔ سپریم کورٹ میں پانامہ کیس کی سماعت آج مکمل ہونے کا امکان ہے جبکہ شیخ رشید ،نعیم بخاری اور سراج الحق جواب الجواب جمع کرائیں گے۔