ایمزٹی وی(کراچی) کراچی میں موسم گرما کی طرح سمندری ہوائیں رکنے کے باعث سردی میں اسموگ کا خدشہ ہے،آلودہ ہوائیں شہر کوخطرے کی جانب دھکیل رہی ہیں تاحال کراچی میں اسموگ کا خدشہ نہیں اگر 3سے4 گھنٹے سمندری ہوائیں تواتر سے چلیں تو ہوائیں فضائی آلودگی کو صاف کردیتی ہیں، اس کے برعکس موسم گرما کی طرح سمندری ہوائیں کچھ دن رک جائیں تو شہر میں بھی اسموگ کا خدشہ ہے۔

اس بات کا انکشاف محکمہ موسمیات کے سابق چیف میٹرولوجسٹ توصیف عالم اورماہرین ماحولیات نے کیا سروے کے دوران انھوں نے بتایا کہ کراچی میں سمندری ہوائیں رک جانے سے اسموگ کا خدشہ ہے جس طرح گزشتہ سال موسم گرما میں سمندری ہوائیں رک جانے کے باعث کراچی میںگرمی کی لہر (ہیٹ ویو ) آئی تھیں اور درجہ حرارت 49ڈگری تک جا پہنچا تھا جس سے 2ہزار سے زائدافراد جاں بحق ہوگئے تھے اسی طرح موسم سرما میںسمندری ہوائیں رک جانے یا ہواؤں کا رخ تبدیل ہوجانے کی صورت میں اسموگ کا خطرہ ہے۔

عالمی ادارہ صحت کی رپورٹ کے مطابق دنیا بھر میں20سر فہرست آلودہ ترین شہروں میں پاکستان کے 3 شہروں میں پانچویں نمبر پر کراچی ہے جبکہ چھٹے نمبر پر پشاوراور ساتویں نمبر پرراولپنڈی شہرشامل ہے بھارت کا شہر دہلی پہلے نمبر پر ہے، گزشتہ دنوںلاہور اور وسطی پنجاب کے متعدد شہر اسموگ یا آلودہ دھند کی لپیٹ میں رہے اور بھارت کا شہر دہلی میں تاریخ کی بدترین فضائی آلودگی کا شکار رہا ،امریکی خلائی ادارے ناسا کے مطابق بھارتی پنجاب میں کسانوں کی جانب سے جلائی جانے والی فصلوں کی باقیات اور گھاس پھوس نذرآتش کرنے سے کثیف دھواں فضا میں جاتا ہے جو سرد موسم میں منجمد ہوکر گاڑھے دھوئیں یا اسموگ کا باعث بنتا ہے جس سے پاکستان و بھارت کے دونوں اطراف زہریلی دھند میں اضافہ ہوتا ہے۔

تاہم ماہرین ماحولیات کا کہنا ہے کہ اسموگ کا سبب صرف بھارت نہیں بلکہ پاکستان میں بھی زرعی فضلات کوجلایا گیا ہے اس کے علاوہ ہواؤں کا رخ تبدیل ہونے سے بھی لاہور سمیت دیگر شہروں میں اسموگ رہا، پاکستان میں اسموگ بطور ایک نئی اصطلاح استعمال کی جارہی ہے جو Fog(دھند)اورsmock(دھواں)کا مجموعی لفظ ہے،ماہر ماحولیات کے مطابق موسم سرما میں درجہ حرارت کی شدت کم ہوجاتی ہے اور فضا میں80فیصد رطوبت بڑھ جاتی ہے،عموماً سرد علاقوں میں صبح کے وقت دھند رہتی ہیںاور جیسے جیسے فضا میں نمی کا تناسب کم ہوجاتا ہے تو دھند بھی کم ہوتی جاتی ہے۔

اسموگ میں سلفرڈائی آکسائیڈ،نائٹروجن آکسائیڈ کاربن ڈائی آکسائیڈ،میتھین اور دیگر ذرات شامل ہوتے ہیں، اسموگ کے موسم میں بلا ضرورت گھر سے باہر نکلنے سے گریز کیا جائے اور گھر سے باہر جانے سے قبل چشمہ اور ماسک لگانا ضروری ہے،پانی زیادہ پئیں ،گھروں کی کھڑکیاں اور دروازے مضبوطی سے بند رکھیں،ٹھنڈے پانی سے آنکھوں کو دھوئیں ، اسموگ سے آنکھوں میں سوزش، گلے کی خراش،شدید کھانسی اور دمے و الرجی کے مریض بلخصوص بچے شدید متاثر ہوتے ہیں،چین میں ہر سال17 فیصد اموات اسموگ کی وجہ سے ہوتی ہیں۔

ایمز ٹی وی ( کوئٹہ) کوئٹہ میں غیر اعلامیہ لوڈ شیڈنگ سے تنگ عوام سڑکوں پر نکل آئے ، مظاہرین نے بجلی کی بل پھاڑ کر بلب اور ٹیوب لائٹ توڑ دئیے۔ ہزارہ ٹاون میں اہل علاقہ کا دو ماہ سے خراب ٹرانسفارمر اور طویل لوڈ شیڈنگ کے خلاف احتجاج کرتے ہوئے حکومت کے خلاف شدید نعرے بازی کی ۔

مظاہرین نے بجلی کے بل پھاڑ کے بلب توڑ دئیے ، انہوں نے مطالبہ کیا کہ وزیر اعظم کی ہدایات کے باوجود کوئٹہ میں جاری لوڈ شیڈنگ کا خاتمہ نہیں کیا گیا ۔

غیر اعلامیہ لوڈ شیڈنگ کے باعث مختلف علاقوں میں پانی کا بحران شدت اختیار کر گیا ہے ۔ غیر اعلامیہ لوڈ شیڈنگ کا نوٹس لیتے ہوئے صوبائی حکومت مسائل کا نوٹس لے، بصورت دیگر احتجاج کو وسعت دیں گے۔

ایمز ٹی وی(کراچی) ابراہیم حیدری کے علاقے میں نامعلوم افراد کی فائرنگ سے حساس ادارے کا اہلکار جاں بحق ہوگیا۔

کراچی کے علاقے ابراہیم حیدری میں نامعلوم موٹرسائیکل سواروں کی فائرنگ سے ایک شخص زخمی ہوگیا جسے ریسکیو ٹیموں نے فوری طور پر قریبی اسپتال منتقل کیا جہاں وہ زخموں کی تاب نہ لاتے ہوئے جاں بحق ہوگیا۔

پولیس کے مطابق نامعلوم افراد کی فائرنگ سے جاں بحق ہونے والا حساس ادارے کا اہلکار ہے جس کی شناخت زاہد کے نام سے ہوئی ہے۔

ایمز ٹی وی ( لاہور )لاہور ہائیکورٹ کے چیف جسٹس سید منصور علی شاہ نے نیوز لیکس کی انکوائری کے لیے کمیشن کے قیام کے خلاف دائر درخواست کی سماعت کی۔

درخواست گزار عوامی تحریک کے رہنما خرم نواز گنڈا پور کے وکیل نے مؤقف اختیار کیا کہ وفاقی حکومت نے متنازعہ خبر کے لیک ہونے کے معاملے پر انکوائری کے لیے جسٹس ریٹائرڈ عامر رضا کی سربراہی میں کمیشن تشکیل دیا ہے جن کے شریف خاندان کے ساتھ قریبی تعلقات ہیں، اس وجہ سے شفاف تحقیقات ممکن نہیں۔

درخواست گزار کے مطابق کمیٹی کی تشکیل سے متعلق نوٹیفیکیشن قانونی ضابطے کے بغیر جاری کیا گیا۔ نوٹیفیکیشن جاری کرتے ہوئے کمیشن اینڈ انکوائریز ایکٹ 1956 کا حوالہ بھی نہیں دیا گیا جو حکومتی بدنیتی کو ظاہر کرتا ہے۔ عدالت نیا کمیشن تشکیل دینے کا حکم دےڈپٹی اٹارنی جنرل نے بیان دیا کہ کمیشن کی تشکیل میں تمام قانونی تقاضے پورے کیے گئے ہیں۔ درخواست غیر ضروری طور پر دائر کی گئی ہے۔

عدالت نے وکلا کے دلائل مکمل ہونے کے بعد درخواست ناقابل سماعت قرار دیتے ہوئے مسترد کردی۔

واضح رہے کہ قومی سلامتی سے متعلق خبر شائع ہونے سے متعلق انکوائری کمیٹی تشکیل دی گئی تھی جس کی سربراہی جسٹس ریٹائرڈ عامر خان رضا کریں گے۔

تحقیقاتی کمیٹی قومی سلامتی سے متعلق خبر لیک ہونے پر اس میں ملوث افراد سے تفتیش کرے گی۔ شفاف تحقیقات کے لیے حکومت پہلے ہی اپنے وفاقی وزیر اطلاعات و نشریات پرویز رشید کو عہدے سے فارغ کر چکی ہے جب کہ کمیٹی کی تحقیقات کی روشنی میں مزید کارروائی بھی کی جائے گی۔

کمیٹی میں حساس اداروں آئی ایس آئی، آئی بی اور ایم آئی سے تعلق رکھنے والے ایک ایک افسر کو بھی شامل کیا گیا ہے جو کہ انٹیلی جنس کی بنیاد پر تحقیقات میں معاونت کریں گے اور کمیٹی کو حقائق پیش کریں گے۔

اس کے علاوہ کمیٹی میں سیکریٹری اسٹیبلشمنٹ طاہر شہباز، ڈائریکٹر ایف آئی اے عثمان انور اور محتسب اعلیٰ پنجاب نجم سعید بھی بہ طور رکن کمیٹی خدمات انجام دیں گے اور حساس نوعیت کے معاملے پر اپنی پیشہ ورانہ تجاویز اور رائے دیں گے۔

ایمزٹی وی(اسلام آباد)وزیراعظم کے مشیر برائے امور خارجہ سرتاج عزیز نے بھارت میں ہونے والی ہارٹ آف ایشیا کانفرنس میں شرکت کرنے کا اعلان کیا ہے۔

اسلام آباد میں فاٹا اصلاحاتی کمیٹی سے متعلق سیمینار سے خطاب کرتے ہوئے مشیر خارجہ سرتاج عزیز کا کہنا تھا کہ بھارت نے سارک کانفرنس کو سبوتاژ کیا لیکن پاکستان کا ایسا کوئی ارادہ نہیں، پاکستان ذمہ داری کا مظاہرہ کرتے ہوئے ہارٹ آف ایشیا کانفرنس میں شرکت کرے گا اور میں خود اس کانفرنس میں شرکت کروں گا جب کہ بھارت جا کر بھارتی ہم منصب سے سائیڈ لائن ملاقات پرابھی کچھ کہنا قبل ازوقت ہے۔ ان کا کہنا تھا کہ پاکستان ایک ذمہ دار ملک ہے جو اپنی ذمہ داری بخوبی جانتا ہے اس لئے کل کی شہادتوں اور سرحدی خلاف ورزی کے باوجود ہارٹ آف ایشیا کانفرنس میں شرکت کر کے اپنا موقف پیش کریں گے۔

مشیر خارجہ کا کہنا تھا کہ فاٹا کو قومی دھارے میں لانے کے لئے یہاں ملکی قوانین کے نفاذ کو دیکھنا ہوگا، فاٹا میں اصلاحات سے تعمیر اور ترقی کا نیا سورج طلوع ہوگا جب کہ یہاں اربن سینٹرز کا قیام عمل میں لانے کے علاوہ تعلیم، صحت اور آبپاشی سے متعلق کئی منصوبے شروع کریں گے۔ ان کا کہنا تھا کہ فاٹا میں جرگے کی جگہ رواج ایکٹ متعارف کرایا جائے گا جو جرگہ کا نعم البدل ہوگا جس میں انسانی حقوق کا خیال رکھا جائے گا جب کہ معاملے کو پارلیمان بھیج کر اس حوالے سے آرا بھی طلب کی جائے گی۔

مشیر خارجہ نے یقین دلایا کہ 20 ہزار افراد کو لیویز میں بھرتی کیا جائے گا اور اگر فاٹا کا اسٹیٹس بدلنا ہوگا تو صدر مملکت جرگے سے بات کریں گے۔

ایمزٹی وی(اسلام آباد) پاکستان مسلم لیگ (ن) کے رہنما دانیال عزیز کا کہنا ہے کہ وزیر اعظم نواز شریف نہیں بلکہ عمران خان قومی سلامتی کے لیے خطرہ ہیں ۔

الیکشن کمیشن کے باہر میڈیا سے بات کرتے ہوئے پاکستان مسلم لیگ (ن) کے رہنما دانیال عزیز کا کہنا تھا کہ وزیر اعظم نواز شریف نہیں بلکہ عمران خان قومی سلامتی کے لیے خطرہ ہیں، گزشتہ 7 ماہ سے کہہ رہے ہیں کہ ہم احتساب کے لیے ہر فورم پر پیش ہونے کو تیار ہیں لیکن عمران خان بتائیں کہ وہ 2 سال سے غیر ملکی فنڈنگ کیس میں الیکشن کمیشن میں کیوں تلاشی نہیں دیتے، آج بھی الیکشن کمیشن نے عمران خان سے جواب مانگا جب کہ وہ سپریم کورٹ سے بھی بھاگ گئے ہیں لہذا عمران خان اداروں کی پاسداری کریں اور جواب دیں۔

ان کا کہنا تھا کہ عمران خان پارٹی فنڈنگ کیس میں تلاشی کیوں نہیں دیتے، کرپشن کی نشاندہی کرنے پر انہوں نے اپنا احتساب کمیشن خود ختم کر دیا اور آج ایک بار پھر عدالتوں سے بھاگ رہے ہیں جب کہ افضل خان نے عدالت سے معافی مانگی تھی اور عمران خان نے بھی معافی مانگنی ہے۔

اس موقع پر رہنما مسلم لیگ (ن) طلال چوہدری کا کہنا تھا کہ عمران خان (ن) لیگ کی دشمنی میں پاکستان سے دشمنی کیوں کررہے ہیں، ہم لوگ عمران خان کی طرح الف لیلی کی کہانیاں نہیں ثبوت لیکر آئے ہیں، 20 سال سے بیروزگار انسان جہاز میں گھومتا ہے اور 300 کنال کا گھر کالے دھن سے خریدا۔
ان کا کہنا تھا کہ آف شور کمپنیوں سے لیکر بچوں اور جائیدادوں تک عمران خان نے غلط بیانی کی ہے، عمران خان دوسروں کی تلاشی کی بات کرتے ہیں لیکن چور تو آپ ثابت ہوگئے لہذا اب تلاشی ہوکر رہے گی۔