ایمزٹی وی(پشاور)پاکستان میں مقیم افغان پناہ گزینوں کو ڈی پورٹ کرنے پر ان کی پاکستانی بیویوں نے پشاور میں احتجاج کردیا ،ان کا کہنا ہے کہ ہمارے شوہروں کو ڈی پورٹ کر دیا گیا اور اب نوبت فاقوں تک آگئی ہے
ذرائع کے مطابق افغان پناہ گزینوں سے شادی کرنے والی پاکستانی خواتین نے پشاور میں احتجاج کیا اور حکومت سے مطالبہ کیا کہ ہمارے افغان شوہروں کو پاکستانی شہریت دی جائے ۔

ان کا کہنا تھا کہ ہمارے شوہروں کو ڈی پورٹ کردیا گیا اور ہم بچوں سمیت یہاں ہی رہ گئے ،اب نوبت فاقوں پر آگئی ہے۔انہوں نے مزید کہا کہ ہمارے شوہروں کو پاکستانی شہریت دے کر حکومت ہمارے سہاگ اور بچوں کے مستقبل بچائے ۔

ایمزٹی وی(اسلام آباد)سپریم کورٹ کے باہر میڈیا سے بات کرتے ہوئے خواجہ سعد رفیق کا کہنا تھا کہ بدقسمتی سے ہمارے سیاسی مخالفین کی سیاست جھوٹ اور بہتان کی سیاست ہے، پنڈی کے سیاستدان کی عقل بلکل ماری گئی ہے کیونکہ اگر کوئی 40 سال کے بعد کہے کہ آپ سیاست کی جگہ کچھ اور کرلیں تو اس کا مطلب ہے کہ آپ فارغ آدمی ہیں لیکن وہ سمجھ رہے ہیں کہ ان کی تعریف کی گئی ہے، آج انہیں سند مل گئی ہے کہ وہ سیاست میں فارغ آدمی ہیں، وہ توند نکال کر کبھی کسی ادھار کے جلسے یا کسی ٹی وی شو میں آجاتے ہیں جہاں لمبی لمبی چھوڑتے ہیں لیکن ان کے اپنے حالات یہ ہیں کہ جب انہوں نے پنڈی میں جلسے کی کال دی تو صرف 4 لوگ دستیاب تھے۔

خواجہ سعد رفیق نے کہا کہ تحریک انصاف اپنے نام کی ضد ہے، جب سے وہ سیاست میں آئے ہیں اور جس طرح کی سیاست وہ کرتے ہیں اس میں لوگوں کی پگڑیاں اچھالنے اور بغیر ثبوت الزام لگانے کے کچھ نہیں، پاکستان کا ہر شخص جو پاکستان کی ترقی چاہتا ہے، ہر وہ پاکستانی جو چاہتا ہے کہ پاکستان ترقی کرے عمران خان اور اس کے ساتھی اس پاکستانی کی خواہش پر پانی پھیررہے ہیں۔

ان کا کہنا تھا کہ جلن اور حسد کا علاج تو حکیم لقمان کے پاس بھی نہیں، اب عمران خان صاحب کی جلن کے لیے کونسی برنول تیار کرنی پڑے گی اس پر غور کررہے ہیں لیکن ضرور کوئی خاص دوائی ہوگی

اس موقع پر خواجہ آصف نے کہا کہ ہمیں اس ملک کی سب سے بڑی عدالت پر پورا اعتماد اور یقین ہے، اس عدالت سے ہی ہمیں انصاف ملا ہے جب کہ بڑے اور بلند بانگ دعوے جو تحریک انصاف کی طرف سے کیے جاتے تھے سب کھوکھلے نکلے اور ان کی حقیقت سب کے سامنے ہے ۔

ان کا کہنا تھا کہ اس کیس میں تحریک انصاف اور ہمارے مخالفین نے شور مچا یا ہوا ہے لیکن اس کے باوجود وزیراعظم نے خود کو ہر فورم پر پیش کرنے کی کوشش کی تاہم شکر اداکرتے ہیں کہ عدالت کی کارروائی شروع ہوگئی ہے اور دونوں فریقین عدالت کے سامنے ہیں، ہمیں کل بھی فتح ہوئی تھی اور ایک بار پھر انصاف ملے گا اور پاکستان کے عوام کو فتح حاصل ہوگی۔

ایمزٹی وی(اسلام آباد) بنی گالا کے باہر میڈیا سے بات کرتے ہوئے پاکستان تحریک انصاف کے ترجمان نعیم الحق کا کہنا تھا کہ سپریم کورٹ نے عدالتی احاطے میں میڈیا سے بات کرنے سے منع کررکھا ہے لیکن پاناما لیکس کی ہر سماعت کے باہر حکومتی وزرا میڈیا کے سامنے کیس سے متعلق بات کرکے عدالتی احکامات کی دھجیاں بکھیر رہے ہیں اور آج بھی دونوں وزرا نے ہم پر کیچڑ اچھالنے کی کوشش کی۔
نعیم الحق کا کہنا تھا کہ وفاقی حکومت نواز شریف اور ان کے خاندان کو بچانے کے لئے تمام ہتھکنڈے آزما رہی ہے اور ایک جھوٹ چھپانے کےلئے کئی جھوٹ بول رہے ہیں، اور یہ جھوٹ بولنا شریف فیملی کو مہنگا پڑے گا وزرا نے ایک ذاتی مقدمے کو حکومت کےخلاف کیس کا تاثر دے دیا ہے، یہ کیس نواز فیملی کا ذاتی ہے، حکومتی وزرا دفاع کرکے حلف کی خلاف ورزی کر رہے ہیں۔

ترجمان پی ٹی آئی نے کہا کہ خواجہ آصف نے آج پھر کہا ہے کہ انہیں انصاف مل گیا ہے حکومت کا یہ رویہ ظاہر کررہا ہے کہ اقتدار کی کشتی کو ڈوبنے سے بچانے کی کوشش کررہے ہیں لیکن نوازشریف اور ان کے خاندان کے خلاف بہت سے ثبوت آچکے ہیں قوم بہت جلد ایک تاریخی فیصلہ دیکھے گی جس سے ملک میں کرپشن کا راستہ بند ہوجائے گا، جلد ہی حق اور سچ کا سورج طلوع ہوگا۔

ایمزٹی وی(راولپنڈی)آرمی چیف جنرل راحیل شریف آج قبائل کی دعوت پر شمالی و جنوبی وزیرستان کا دورہ کریں گے جہاں وہ ترقیاتی منصوبوں کا افتتاح بھی کریں گے۔

پاک فوج کے ترجمان ڈی جی آئی ایس پی آر لیفٹیننٹ جنرل عاصم سلیم باجوہ کی جانب سے سماجی رابطے کی ویب سائٹ پر جاری بیان میں بتایا گیا ہے کہ آرمی چیف جنرل راحیل شریف آج شمالی اور جنوبی وزیرستان ایجنسی میں دن گذاریں گے جہاں وہ مختلف ترقیاتی منصوبوں کا افتتاح بھی کریں گے۔

Op ZarbeAzb:#COAS will spend his day in South&North Waziristan today on invitation of local tribes.Significant dev projs being inaugurated

— Gen Asim Bajwa (@AsimBajwaISPR) November 15, 2016

ایمزٹی وی(اسلام آباد)سپریم کورٹ میں چیف جسٹس انور ظہیر جمالی کی سربراہی میں پانچ رکنی لارجر بینچ نے پاناما لیکس کیس کی سماعت کی جس میں وزیر اعظم کی فیملی نے اپنے دستاویزات جمع کرائے ۔اس موقع پر ایڈووکیٹ طارق اسد نے کہا کہ یہ بہت اہم کیس ہے ،تیز رفتاری سے چلانے میں انصاف کے تقاضے پور ے نہیں ہو نگے جس پر چیف جسٹس نے کہا یہ ہمارا کام ہے ،انصاف کے تقاضے پورے ہونگے ۔

سپریم کورٹ میں شریف فیملی نے کون سےدستاویزات جمع کرائے؟

انہوں نے کہا کہ اگر 1947سے تحقیقات شروع ہو ں تو 20سال لگیں گے ،کرپشن کی تحقیقات سپریم کورٹ کا کام نہیں ،کسی اے بی سی نے کرپشن کی ہے تو نیچے عدالتیں موجود ہیں ۔
انہوں نے کہا کہ 700صفحات ایک طرف سے ،1600دوسری طرف سے جمع کرائے گئے ،ہم کوئی کمپیوٹر تو نہیں کہ ایک منٹ میں کاغذات کو اسکین کر لیں ۔چیف جسٹس آف پاکستان نے کہا کہ ہم بار بار کہہ رہے ہیں سپریم کورٹ تفتیشی ادارہ نہیں ہے ،پاناما لیکس پر اتنی درخواستیں آ رہی ہیں شائد الگ سے سیل کھولنا پڑے ۔

ایمزٹی وی(اسلام آباد)وزیر اعظم نواز شریف اور انکے بچوں نے بھی دستاویزات سپریم کورٹ میں جمع کرادیں ۔
میڈیا رپورٹس کے مطابق پاناما لیکس کیس کے حوالے سے وزیر اعظم نواز شریف اور انکے بچوں نے 397صفحات پر مشتمل دستاویزات سپریم کور ٹ میں جمع کرادیں ہیں جن میں زمینوں کے انتقال نامے بھی شامل کیے گئے ہیں۔
ذرائع کا کہنا ہے کہ سپریم کورٹ میں جمع کرائے جانے والے جاب میں سال 2011ءسے ابتک کی ٹیکس ادائیگیوں کی تفصیلات بھی شامل ہیں جبکہ وزیر اعظم کی فیکٹریوں کی تفصیلات بھی دی گئی ہیں
ذرائع کےمطابق جواب میں مزید کہا گیا ہے کہ ٹرسٹ ڈیڈ کے مطابق حسین نواز بینی فشری ہیں اورمریم صفدر ٹرسٹی ہیں جبکہ ہارورڈ کینیڈی لا فرم نے ٹرسٹ ڈیڈ کے اصل ہونےکی تصدیق کی ہےاور ان کمپنیوں میں کوومبرگروپ،نیسکول لمیٹڈ،نیلسن لمیٹڈشامل ہیں۔ٹرسٹ ڈیڈ حسین نواز کےحق میں کسی بھی برطانوی عدالت میں قابل قبول ہے

دستاویزات کےمطابق ٹرسٹ کےقیام کامعاہدہ حسین نوازاورمریم صفدرکےدرمیان ہوا، یہ ٹرسٹ 3 کمپنیوں سےمتعلق قائم کیا گیااور ٹرسٹی کا یہ معاہدہ 2 فروری 2006 کو طےپایا۔دستاویزات کےمطابق مریم صفدربحیثیت ٹرسٹی بینی فشری حسین نواز کے تحت ہیں جبکہ بینی فشری حسین نواز،ٹرسٹی مریم صفدرکےکمپنی سےمتعلق اخراجات واپس کرےگا۔بینی فشری حسین نوازکےانتقال کی صورت میں ٹرسٹی مریم صفدرتمام شیئرزفروخت کرینگی اور اگرکوئی قرض ہوا توشیئرزکی رقم کی تقسیم سے پہلےبینی فشری کےقرض ادا کرےگا۔

ذرائع کے مطابق جواب میں بتایا گی اہے کہ شیئرزکی رقم کوبینی فشری اسلامی شرعی قوانین کے مطابق تناسب سےتقسیم کرےگا،تمام امورکی نگرانی کیلیےٹرسٹی کسی اہل،پیشہ ور،آزادپارٹی کاتقررکرسکتاہےتاہم ٹرسٹی مریم صفدرکےانتقال،ذہنی معذوری پرانکےشیئرزبینی فشری حسین نوازکےپاس جائینگے

ایمزٹی وی(تعلیم/لاہور)علامہ اقبال ٹاؤن میں نامعلوم افراد کی فائرنگ سے مقامی کالج کے پروفیسر جاں بحق ہوگئے۔
ذرائع کے مطابق لاہور کے علاقے علامہ اقبال ٹاؤن میں نامعلوم مسلح افراد نے فائرنگ کرکے وحدت روڈ سائنس کالج کے پروفیسر کو ہلاک کردیا ہے۔
پولیس کے مطابق راؤ الطاف جوہر ٹاؤن سے اقبال ٹاؤن بچوں کو اسکول چھوڑنے آئے تھے کہ موٹر سائیکل پر سوار 2 مسلح افراد نے فائرنگ کردی جس کے نتیجے میں پروفیسر راؤ الطاف موقع پر ہی جاں بحق ہوگئے۔
پولیس حکام کا کہنا تھا کہ راؤ الطاف سائنس کالج میں زولوجی ڈیپارٹمنٹ کے پروفیسر تھے اور ابتدائی معلومات کے مطابق واقعہ دشمنی کا شاخسانہ لگتی ہے پولیس نے لاش سرد خانے منتقل کرکے جائے وقوعہ سے شواہد اکٹھے کرلئے ہیں اور تفتیش شروع کردی گئی ہے۔

ایمزٹی وی (تعلیم)پیپلز میڈیکل یونیورسٹی فاروومن میں ایم بی بی ایس،فزیوتھراپی اور فارماسیٹوکل سائینس کی350سیٹوں کیلئے5717طالبات نے انٹری ٹیسٹ دیا۔

تفصیلات کے مطابق پیپلز میڈیکل یونیورسٹی فار وومن نوابشاہ میں سال2016,17کیلئے ایم بی بی ایس کی250،فزیوتھراپسٹ کی50اور فارماسٹیوکل سائینس کی50سیٹوں کیلئے بلاول اسپورٹس اسٹیڈیم میں این ٹی ایس کی زیر نگرانی پری انٹری ٹیسٹ کا انعقاد ہوا جس میں5717طالبات نے حصہ لیا۔وائس چانسلر پروفیسر ڈاکٹر اعظم یوسفانی، پرووائس چانسلر پروفیسر ڈاکٹر شمس شیخ،پروفیسر ڈاکٹر صالح خاصخیلی اور دیگر نے امتحانی مرکز کا دورہ کر کے انتظامات کا جائزہ لیا۔

ایمزٹی وی(تعلیم/کراچی)گورنمنٹ اسکولز ٹیچرز ایسوسی ایشن (گسٹا) کراچی کا اجلاس صدر محمداسلم کی صدارت میں منعقد ہوا ۔ اجلاس میں صوبائی وزیراعلیٰ سندھ سید مراد علی شاہ اور صوبائی وزیر تعلیم جام مہتاب حسین ڈہر کے اس اعلان کا خیرمقدم کیا گیا کہ سندھ میں تعلیم کے فروغ کیلئے جنگی بنیادوں پر اقدامات کرنے کی ضرورت ہے۔

اجلاس میں صوبائی وزیراعلیٰ سندھ سید مراد علی شاہ اور صوبائی وزیر تعلیم سندھ جام مہتاب حسین ڈہرسے اپیل کی گئی کہ وہ ہنگامی بنیادوں پر اساتذہ کے مسائل حل کرائیں تاکہ اساتذہ یکسوئی کے ساتھ اپنے تدریسی فرائض انجام دے سکیں

ایمزٹی وی(اسلام آباد)شاہ محمود قریشی کی زیر صدارت تحریک انصاف کے وفد نے ترک سفیر سے ملاقات کی اور پارلیمنٹ کے مشترکہ اجلاس کے بائیکاٹ کی وجوہات کے حوالے سے آگاہ کیا۔

اس موقع پر شاہ محمود قریشی نے ترک سفیر سے کہا کہ ترکی پاکستان کا قریبی ترین دوست ہے لیکن اصولی موقف کے باعث پارلیمنٹ کے مشترکہ اجلاس میں شرکت نہیں کرسکیں گے۔
واضح رہے کہ ترک صدر رجب طیب اردگان 16 نومبر کو 2 روزہ دورے پر پاکستان پہنچیں گے ۔ اپنے دورے کے دوران وہ پاکستان کے اعلیٰ حکام سے ملاقاتیں کرنے کے علاوہ پارلیمنٹ کے مشترکہ اجلاس سے بھی خطاب کریں گے۔