ایمزٹی وی(گوادر) گوادر پورٹ کے باقاعدہ افتتاح کے بعد پاک بحریہ کے جہازوں کی زیر حفاظت بندرگاہ سے کارگو شپمنٹ کا آغاز ہوگیا ہے پاک۔چین اقتصادی راہداری منصوبے کا پائلٹ پروجیکٹ کا شغر سے اولین کارگوکنٹینرزکے گوادر پہنچنے کے ساتھ کامیابی سے شروع ہوگیا۔

پاک بحریہ کے اعلامیے کے مطابق 46ارب ڈالر کے پاک ۔ چین اقتصادی راہداری منصوبے (CEPEC) جس میں گوادر پورٹ مرکزی اہمیت کی حامل ہے ایک گیم چینجر کی حیثیت رکھتا ہے اور پاکستان اور چین کے مابین دیرپادفاعی اور تجارتی اشتراک کی واضح علامت ہے درپیش چیلنجز کامکمل ادراک رکھتے ہوئے پاک بحریہ اس منصوبے کے بحری معاملات یعنی گوادر پورٹ اور اس کے درمیان سمندری راستوں کی حفاظت کو اولین ترجیح دے رہی ہے۔

بعدازاں ان کارگو کنٹینرز کو مرچنٹ ویسل کاسکو ویلنگٹن اور الحسین کے ذریعے خلیج کی جانب روانہ کردیا گیا پاکستان نیوی نے راہداری منصوبے کے بحری پہلو اورگوادرپورٹ کی حفاظت کے حوالے سے اپنی ذمے داریاں پوری کرتے ہوئے اس بحری تجارتی قافلے کو مغربی راستے سے بحفاظت بین الاقوامی پانیوں تک پہنچانے کیلیے اپنے بحری اورہوائی جہازوں کوتعینات کیا۔

راہداری منصوبے اور گوادر پورٹ پروجیکٹ کی کامیابی کا دارومدار بحرہند بالخصوص بحیرہ عرب میں محفوظ تر بحری ماحول پر ہے۔ گوادر پورٹ کے آغاز کے ساتھ پاکستانی بندرگاہوں کے درمیان بحری جہازوں کی آمد ورفت کئی گنا بڑھنے کی توقع ہے لہذا راہداری منصوبے کی مکمل کامیابی کے لیے زمینی راستوں کی سیکیورٹی کے ساتھ ساتھ بحری راستوں کی سیکیورٹی بھی نہایت اہمیت کی حامل ہے حالیہ چیلنجز سے نمٹنے کے لیے پاکستان نیوی نے ہمہ جہتی طریقہ کار اپنایا ہے جس میں گوادر پورٹ کی سیکیورٹی، حفاظتی گشت اور مشقیں، بحری معاملات کا شعور اجاگر کرنے اور قانون نافذ کرنے والے دیگر اداروں کے ساتھ مل کر کام کرنے جیسے اقدامات شامل ہیں۔

اس ضمن میں پاک بحریہ پوری طرح پر عزم ہے اور پاکستان کے خصوصی اقتصادی زون(EEZ) میں بحری تجارتی قافلوں کی آزادانہ نقل و حمل کے لیے محفوظ تر بحری ماحول کی فراہمی کے لیے مکمل طور پر تیار ہے۔

ایمزٹی وی(حب)کوئٹہ سے کراچی جانے والی بس حادثے کا شکار ہو کر الٹ گئی۔ حادثے کا شکار ہونے والی بس بیلہ کے قریب الٹی۔

تفصیلات کے مطابق ایدھی ذرائع نے بتایا کہ کوئٹہ سے کراچی کے لیے جانے والی بس بیلہ کے قریب حادثے کا شکار ہوئی اور تیز رفتاری کے باعث الٹ گئی جس کے نتیجے میں اب تک 2 افراد جاں بحق ہوگئے اور 15 افراد کے زخمی ہونے کی اطلاعات ہیں۔

ایمزٹی وی(اسلام آباد) الیکشن کمیشن نے نااہلی ریفرنس میں چیرمین تحریک انصاف عمران خان اور درخواست گزار محمد خان ڈاہا کو نوٹس جاری کردیا۔

الیکشن کمیشن میں عمران خان اور جہانگیرترین کی نااہلی سے متعلق ریفرنسوں کی سماعت ہوئی۔ اس موقع پر جہانگیر ترین کے وکیل نے مواقف اختیار کیا کہ اسپیکرقومی اسمبلی سردار ایاز صادق نے میرے موکل کو سنے بغیر ریفرنس الیکشن کمیشن کو بھجوایا جب کہ درخواست گزار بھی غیر حاضر ہے اس لئے ریفرنس کو مسترد کیا جائے۔

۔چیف الیکشن کمشنرنے درخواست گزار محمد خان ڈاہا کی دوسری سماعت پر بھی عدم حاضری پر برہمی کا اظہار کرتے ہوئے تمام درخواستوں کی سماعت 22 نومبر تک ملتوی کردی اور عمران خان سے جواب طلب کر لیا۔

اس کے علاوہ الیکشن کمیشن میں تحریک انصاف کے سینیٹر لیاقت ترکی کی نااہلی سے متعلق درخواست
پر بھی سماعت ہوئی۔ درخواست گزار بشریٰ گوہر کا کہنا تھا کہ لیاقت ترکئی نے کاغذات نامزدگی اور ایف بی آر میں جمع کروائی گئی دستاویزات پر مکمل نام نہیں لکھا۔ چیف الیکشن کمشنر نے سینیٹر لیاقت ترکئی سے جواب طلب کرتے ہوئے سماعت 29 نومبر تک ملتوی کردی۔

ایمزٹی وی(اسلام آباد/تعلیم) قراقرم انٹرنیشنل یونیورسٹی کے شعبہ ایگرکلچراینڈ فوڈ ٹیکنالوجی کے زیر اہتمام یونیسف اور ہیلتھ ڈیپارٹمنٹ گلگت بلتستان کے تعاون سے آئیو ڈین ‘ اس کے فوائد اور کمی کے نقصانات پر سیمینار کا انعقاد کیا گیا۔

سیمینار کے مہمان خصوصی سیکر ٹری ہیلتھ اینڈ پاپولیشن ویلفیئر سعیداللہ خان نیازی تھے۔ ،سیکر ٹری خوراک رشید علی خان اور کثیر تعداد میں طلبہ و طالبات نے بھی شرکت کی ۔

ایمزٹی وی(اسلام آباد/تعلیم)قائد اعظم یونیورسٹی انتظامیہ نے جامعہ کی اراضی پر قبضہ مافیا کا تسلط ختم کرانے کے لئے سی ڈی اے سے مل کر جوائنٹ ورکنگ گروپ تشکیل دینے کا فیصلہ کر لیاہے۔
اس حوالے سے وائس چانسلر قائد اعظم یونیورسٹی نے چیئرمین سی ڈی اے و میئر اسلام آباد کو باقاعدہ طور پر یونیورسٹی کی قبضہ شدہ اراضی دکھانے اور قانونی کارروائی عمل میں لانے کے لئے دعوت نامہ ارسال کر دیا، یہ فیصلہ وزیر مملکت تعلیم و پیشہ ورانہ تربیت انجینئر بلیغ الرحمن اور چیئرمین ایچ ای سی ڈاکٹر مختار احمد سے ملاقات کے بعد کیا گیا جبکہ اراضی واگزار کرانے کے لئے اسلام آباد پولیس اور ضلعی انتظامیہ سے بھی مدد مانگ لی گئی ہے ۔

ذرائع کے مطابق وی سی کی جانب سے شیخ انصر عزیز کو بھیجے گئے دعوت نامہ میں ان سے یونیورسٹی کی دو سو ایکڑ اراضی واگزار کرانے کی درخواست کی گئی ہے اور کہا گیا ہے کہ وہ اپنی ٹیم کے ہمراہ آئندہ چند روز میں یونیورسٹی کا دورہ کریں تاکہ انہیں تفصیلات سے آگاہ کیا جا سکے ، ڈاکٹر جاوید اشرف نے یہ بھی بتایا ہے کہ قائد اعظم یونیورسٹی 1709ایکڑ اراضی کی ادائیگی کر چکی ہے مگر دو سو ایکٹر اراضی اس سے چھین لی گئی ہے ۔

ایمزٹی وی (تعلیم/ سندھ) سندھ بھر کی جامعات اور تعلیمی بورڈز کے رجسٹرار، ناظم امتحانات، سیکرٹریز اور دیگر عہدوں کیلئے وزیر اعلیٰ سندھ کو تین ناموں کا پینل اب نمبروں کے بجائے حروف تہجی کے اعتبار سے بھیجا جائیگا۔

ذرائع کے مطابق سکھر بورڈ اور لاڑکانہ میں میرٹ کے مطابق نمبروں کے لحاظ سے اول نمبر پر آنے والے امیدوار کے بجائے تیسرے نمبر کے سفارشی امیدواروں کی تقرری کر دی گئی اور یہ خبر میڈیا میں آگئی جس کے بعد اصولی طور پر یہ طے کر لیا گیا کہ اب نمبروں کے بجائے نام حروف تہجی کے اعتبار سے بھیجے جائیں گے

اس سلسلے میں سب سے پہلے سندھ یونیورسٹی کے وائس چانسلرز کے امیدواروں کے نام حروف تہجی کے اعتبار سے بھیج دیئے گئے ہیں جن میں سندھ یونیورسٹی کے ڈین فارمیسی عبداللہ ڈایو، جامعہ کراچی کے شعبہ جرمیات کے سربراہ فتح محمد برفت اور بدین کیمپس کے پرو وائس چانسلر محمد صدیق کلہوڑو شامل ہیں تاہم انتہائی قریبی ذرائع نے میڈیا کو بتایا ہے کہ نمبروں کے لحاظ سے صدیق کلہوڑو پہلے نمبر پر، فتح محمد برفت دوسرے اور عبداللہ ڈایو تیسرے نمبر پر ہیں۔

تلاش کمیٹی نے حاصل کردہ نمبروں کی فہرست بھی وزیر اعلیٰ ہائوس کو فراہم کر دی ہے تاہم وزیر اعلیٰ ہائوس کی جانب سے ناموں کی فہرست حروف تہجی کے اعتبار سے بھیجی جا چکی ہے

۔ ذرائع نے مزید بتایا کہ گزشتہ ماہ قائم کی گئی نئی تلاش کمیٹی کے نوٹیفکیشن میں بھی یہ درج کرایا گیا تھا کہ تلاش کمیٹی حروف تہجی کے اعتبار سے نام بھیجے گی تاکہ وزیر اعلیٰ سندھ اپنی مرضی سے کسی بھی ایک نام کی بطور وائس چانسلر منظوری دے سکیں ۔

ذرائع نے مزید بتایا کہ جامعہ کراچی پر اس شرط کا اطلاق نہیں ہو گا اور پرانی تلاش کمیٹی کے قواعد کے مطابق نمبروں کے ساتھ نام وزیر اعلیٰ کو بھیجے جائینگے یہ علیحدہ بات ہے کہ وزیر اعلیٰ ہائوس نے تاحال جامعہ کراچی کے وائس چانسلر کے ناموں کی سمری وزیراعلیٰ کے پاس نہیں بھیجی ہے اور جامعہ کراچی فروری سے قائم مقام وائس چانسلر کے رحم و کرم پر ہے

ایمزٹی وی(تعلیم/ کراچی)آغا خان یونیورسٹی ایگزامینیشن بورڈ (اے کے یوای بی) نے میٹرک اور انٹر کے امتحانات میں شاندار کارکردگی کا مظاہرہ کرنے والے 162طلبا کے لیے تقریب ستائش ʼہائی اچیورز ایوارڈʼ منعقد کی۔
اے کے یو کے صدر فیروز رسول نے اس موقعے پر خطاب کرتے ہوئے کہا، "ہمیں اے کے یوای بی سے فارغ التحصیل طلبا پر فخر ہے المرتضی اسکول، کراچی کی علینہ فاطمہ اور آغا خان ہائر سیکنڈری اسکول، کراغ، چترال کی حرا ناز نے مشترکہ طور پر اول پوزیشن حاصل کی۔ ناصرہ اسکول، کراچی کی روحینہ ندیم نے دوسری پوزیشن حاصل کی۔ تیسری پوزیشن بھی مشترکہ طور پر دو طالبات نے حاصل کی جن میں مریم صدیقہ گرلز ہائر سیکنڈری اسکول، چنیوٹ کی شہلا تنویر اور نصرت جہاں اکیڈمی گرلز ہائی اسکول، چنیوٹ، پنجاب کی مریم احسان شامل ہیں۔

اول پوزیشن حاصل کرنے والی طالبہ حرا ناز نے اس موقع پر بات کرتے ہوئے کہا "اے کے یوای بی کے طلبا کے پاس تخلیقی صلاحیت کا مظاہرہ کرنے کا بھرپور موقع ہوتا ہے آغا خان ہائر سیکنڈری اسکول، کریم آباد، کراچی کی اریج المدینہ نے مجموعی طور پر اول پوزیشن حاصل کی جبکہ حبیب گرلز اسکول، کراچی کی اریبہ ایم امین نے دوسری پوزیشن حاصل کی۔ آغا خان ہائر سیکنڈری اسکول، کریم آباد، کراچی سے ہی فاطمہ ایم اسد خان نے مجموعی طور پر تیسری پوزیشن حاصل کی

پاکستان کے مختلف علاقوں سے تعلق رکھنے والے ان طلبا کے والدین، صدور مدرس اور اساتذہ کی ایک بڑی تعداد نے اس تقریب ستائش میں شرکت کی۔

ایمزٹی وی(تعلیم/ کراچی)وفاقی جامعہ اردو کراچی کیمپسز میں بی ایس اور ماسٹرز (صبح) کے پروگرام میں داخلہ برائے2017جاری ہیں ۔

طلبا و طالبات کی سہولت مد نظر رکھتے ہوئے جامعہ اردو نے بی ایس اور ماسٹرز میں داخلوں کی تاریخ میں30نومبرتک توسیع کردی ہے۔

ایمزٹی وی(تعلیم/ سکھر) ثانوی و اعلیٰ ثانوی تعلیمی بورڈ سکھرنے نویں جماعت کے سالانہ امتحانات کے نتائج کا اعلان کردیا، ناظم امتحانات عبدالسمیع سومرو نے تعلیمی بورڈ سکھر میں سائنس اور جنرل گروپ کے نتائج کا اعلان کیا۔

نتائج کے مطابق ایس ایس سی پا رٹ ون نویں جماعت کے سالانہ امتحانات کے سائنس گروپ میں 48665 امیدواروں نے حصہ لیا جس میں سے 35135 امیدواروں نے پانچوں مضامین میں کامیابی حاصل کی، 3399 امیدوار تین پرچوں میں، 1362 دو پرچوں میں اور 360امیدوار ایک پرچے میں کامیاب ہوئے ،171 امیدوار فیل قرار پائے اور 50 امیدواروں کے نتائج مختلف وجوہات کی بناپر روک دیئے گئے ہیں۔

جبکہ جنرل گروپ میں2779 امیدواروں نے حصہ لیا جس میں سے 1353 پانچوں مضامین میں کامیاب ہوئے ، 853 چارپرچوں، 368تین پرچوں، 112دو پرچوں اور 54امیدوار ایک پرچے میں کامیاب ہوئے جبکہ 11امیدوارفیل قرار پائے اور 8امیدواروں کے نتائج مختلف وجوہات کی بناء پر روک دیئے گئے۔

ایمزٹی وی(اسلام آباد) ترک صدر رجب طیب اردوان 16 سے 17 نومبر تک پاکستان کا دورہ کریں گے ۔انھیں صدر پاکستان ممنون حسین کی جانب سے اس دورے کی دعوت دی گئی تھی۔دورہ میں ترک صدر کی وزیر اعظم نواز شریف سے بھی ملاقات ہوگی جس میں اہم علاقائی ، بین الاقوامی، تجارتی امور سمیت دیگر کئی اہم امور پر مذاکرات بھی ہوں گے۔

ترک صدر رجب طیب اردوان پاکستانی پارلیمنٹ کے مشترکہ اجلاس سے خطاب بھی کریں گے ۔ دفتر خارجہ کے مطابق ترک صدر طیب اردگان اس سے پہلے بھی کئی بار پاکستان آ چکے ہیں۔

صدر ممنون حسین ترک صدر کے اعزاز میں آج ظہرانہ دیں گے۔ طیب اردوان 17 نومبر کو لاہور بھی جائیں گے جہاں وزیر اعظم نواز شریف ان کے اعزاز میں شاہی قلعے میں ظہرانہ دیں گے ۔
دورے میں ترک صدر کےہمراہ وزراء ، اعلیٰ حکام اور تاجروں کا اعلیٰ سطح کا وفد بھی پاکستان آئے گا