ایمزٹی وی(آزاد کشمیر)لائن آف کنٹرول کے عوام کا حوصلہ بلند کر نے کے لیے وزیراعظم آزاد کشمیر راجہ محمد فاروق حیدر خان اپنے آبائی حلقہ انتخاب کے سرحدی قصبہ چکوٹھی پہنچ گئے چکوٹھی کے مقام پر عوام کی جانب سے وزیراعظم آزاد کشمیر کا شاندار استقبال کیا گیا پاکستان

وزیراعظم نے عوام سے خطاب کرتے ہوئے کہا کہ آزاد کشمیر سے کوئی دراندازی نہیں ہورہی ، مقبوضہ کشمیر میں بھارت نے مظالم کی انتہا کردی ، سرحدی علاقوں کے عوام کسی بھی بھارتی جارحیت کی صورت میں ماضی کی طرح اپنے گھروں کو مورچوں میں تبدیل کرتے ہوئے پاک فوج کے شانہ بشانہ دشمن کا مقابلہ کریں گے ، بھارت کو یہاں سے آگے بڑھنے کیلئے ہماری لاشوں سے گزرنا ہو گا، ایل او سی پر آباد سویلین آباد ی کو خراج تحسین پیش کرتے ہیں، عوام بہادری سے بھارت کا مقابلہ کررہے ہی۔

سول ڈیفنس کمیٹیوں کے اراکین سے خطاب کرتے ہوئے وزیراعظم راجہ فاروق حیدر نے کہا کہ بھارت کے انتہا پسند حکمران جنگی جنو ن میں مبتلا ہیں ۔ ایل او سی کے اس پار بسنے والے ہمارے وجود کا حصہ ہیں انہیں تنہائی کا احساس نہیں ہونے دیں گے ۔ وہ وقت دور نہیں جب سری نگر کے لا ل چوک میں پاکستانی پرچم لہرایا جائے گا۔

بھارت نے اگر تحریک سے سبق نہ سیکھا تو بھارت کے اندر ایک اور پاکستان بن کر رہے گا ۔وزیراعظم میاں نواز شریف نے اقوام متحدہ میں کشمیریوں کی جس طرح جرات مندانہ انداز میں ترجمانی کی اس نے بھارتی اقتدار کے ایوانوں کو ہلا کر رکھ دیا ہے ، قبل ازیں سپریم کورٹ بار کے وفد سے گفتگو کرتے ہوئے راجہ فاروق حیدر نے کہاکہ قانون کی حکمرانی اور انصاف کی بالادستی قائم کریں گے ۔غریب اور مظلوم عوام کو فوری اور سستا انصاف انکی دہلیز پر فراہم کیا جائے گا ، وکلا نے اس عزم کا اظہارکیا کہ مقبوضہ جموں وکشمیرکے مظلوم عوام کی آواز کو ہر سطح پر بلند اور تحریک آزادی کی کامیابی تک اپنا بھر پور رول ادا کرتے رہیں گے

ایمزٹی وی(تعلیم)سٹی تھانہ بھمبر کی حدود میں پراسرار طور پرمیٹرک کی طالبہ کو قتل کردیاگیا۔ جبکہ ورثاء کی طرف سے خلیل نامی نوجوان کے خلاف مقدمہ درج کروا دیا گیا،پولیس ذرائع سے معلوم ہوا ہے کہ نواحی گائوں مچھوڑہ کی میٹرک کی طالبہ(د)دختر اللہ دتہ کو گزشتہ دنوں اپنے ہی گائوں کاخلیل نامی نوجوان لے کر فرار ہوگیا تھا جسے گزشتہ روز تلاش کرکے گھر واپس لایا گیا۔

ذرائع کے مطابق رات کو لڑکی کوپراسرار طور پرگولی مار کر قتل کر دیا گیا،ورثاء نے پولیس کو دی گئی درخواست میں خلیل کو ملزم نامزد کیا ہے ، سٹی تھانہ پولیس نے مقدمہ درج کر کے تفتیش شروع کر دی ۔

ایمزٹی وی(اسلام آباد)الیکشن کمیشن کی ویب سائٹ پر متحدہ کے کنوینیر کا نام پھر تبدیل کر دیا گیا ۔ذرائع کے مطابق الیکشن کمیشن کی ویب سائٹ پر ایک بار پھر کنوینیر کے خانے میں فاروق ستار کی جگہ ندیم نصرت کانام دیدیا گیا ہے تاہم خبر منظر عام پر آنے کے بعد الیکشن کمیشن نے کوتاہی کی تحقیقات شروع کردی ہیں۔

الیکشن کمیشن حکام کا کہنا ہے کہ ندیم نصرت کا نام غلطی سے ڈالاگیا ہے تاہم اب ڈپٹی کنوینیر کے خانے مین فاروق ستار کا نام درج کر دیا گیاہے تاہم فاروق ستار کی جگہ ندیم نصرت کا نام کیسے آیا اس کی تحقیقات شروع کر دی گئی ہیں ۔
حکام کا مزید کہنا ہے کہ متحدہ کے اصل کنوینیر فاروق ستار ہیں تاہم نسرین جلیل بھی ایم کیو ایم پاکستان کی کنوینیر ہیں

ایمزٹی وی(اسلام آباد) سپریم کورٹ نے اسلام آباد ہائیکورٹ میں سال2013 کے دوران کی گئی 74تقرریوں کو کالعدم قرار دیتے ہوئے حکم دیا ہے کہ جو لوگ اہل نہیں وہ عہدے چھوڑ دیں۔ جسٹس امیر ہانی مسلم کی سربراہی میں عدالت

عظمی کے تین رکنی بینچ نے اسلام آباد ہائی کورٹ میں خلاف ضابطہ تقرریوں پر مئی میں فیصلہ محفوظ کیا تھا جسے آج سنادیا گیا۔فیصلے میں اسلام آباد ہائی کورٹ میں 2011 سے2013کے دوران کی گئی74 بھرتیوں کو خلاف ضابطہ قرار دیتے ہوئے کالعدم قرار دے دیا گیا۔

یاد رہے کہ آڈیٹر جنرل نے اپنی رپورٹ میں ان چوہتر بھرتیوں کو خلاف میرٹ قرار دیا تھاجبکہ سابق وائس چیرمین پنجاب بارکونسل نےدسمبر 2013 میں ان بھرتیوں کے خلاف اسلام آباد ہائی کورٹ کا فیصلہ سپریم کورٹ میں چیلنج کیا تھا۔

ایمزٹی وی(چارسدہ) چارسدہ میں پولیس موبائل پر حملے سے 3 اہلکاروں سمیت 6افرد زخمی ہوگئے۔ ذرائع کے مطابق پولیس موبائل پر ریموٹ کنٹرول سے حملہ کیا گیا تھا جس میں 3 اہلکاروں سمیت 6 افراد زخمی ہو گئے۔ زخمیوں کو فوری طور پر شبقدر کے اسپتال منتقل کیا گیا جہاں انہیں طبی امداد دی جا رہی ہے۔

پولیس حکام کا کہنا ہے کہ حملہ ریموٹ کنٹرول ڈیوائس کے ذریعے کیا گیا جو سڑک کنارے نصب کی گئی تھی، پولیس نے علاقے کا محاصرہ کر کے تخریب کاروں کی تلاش کے لئے سرچ آپریشن شروع کردیا

ایمزٹی وی(خیبر پختونخواہ)صوبہ سندھ ملک میں گیس جب کہ خیبر پختونخوا تیل کی پیداوار میں پہلے نمبر پر آگیا۔
میڈیا کو موصول ہونے والی دستاویزات کے مطابق ملک بھر میں تیل کی 3 کروڑ16 لاکھ بیرل سے زائد کی پیداوار ہو رہی ہے جس میں کے پی کے 50 فیصد تیل کی پیداوار والا صوبہ ہے، سندھ 32.53فیصد، پنجاب 17.27 فیصد اور بلوچستان سے 0.12فیصد تیل کی پیداوار ہو رہی ہے۔
دستاویزات کے مطابق ملک میں گیس کی مجموعی پیداوار 14 لاکھ 81ہزار سے زائد ایم ایم سی ایف ڈی ہے جس میں سندھ 65.97 فیصد گیس پیدا کر کے سرفہرست ہے، دوسرے نمبر پر بلوچستان آتا ہے جہاں سے 21 فیصد سے زائد گیس پیدا ہو رہی ہے،کے پی کے میں 9.40فیصد جبکہ پنجاب سے صرف 3.55فیصد گیس پیدا ہو رہی ہے۔

دستاویزات کے مطابق رواں سال جون تک 986 کنویں تیل اور گیس کی دریافٹ کے لیے کھودے گئے جن میں سے77 کنوؤں سے تیل کی برآمد ہوئی ہے جبکہ 268 کنوؤں سے گیس کی دریافت ہوئی جس سے ملک کا قیمتی غیر ملکی زرمبادلہ بچانے میں مدد ملی۔

ایمز ٹی وی (کھیل) پاکستانی ٹی 20 کرکٹ ٹیم کے کپتان ویسٹ انڈیزکے خلاف دوسرے ون ڈے میں مین آف دا میچ رہے۔سرفراز احمد کہتے ہیں پاکستانی کرکٹ کے لیے اچھا اشارہ ہے کہ نئے لڑکے پرفارم کررہے ہیں۔ویسٹ انڈیز کے خلاف دوسرے ٹی ٹوئنٹی میں سرفراز احمد چھاگئے۔

عمدہ کپتانی سے نہ صرف ٹیم نے لگاتار تیسری بار فتح حاصل کی،بلکہ مین آف میچ بھی قرار پائے۔اس موقع پر سرفراز احمد کا کہنا تھا کہ جیت کا کریڈٹ سب پلیئرز کو جاتا ہے جنہوں نے اچھا کھیل پیش کیا۔پاکستان کے لیے اچھا اشارہ ہے کہ نئے لڑکے اوپر آرہے ہیں۔

میچ کے بعد پریس کانفرنس کرتے ہوئے سرفراز احمد نے کہا کہ اچھی کرکٹ کھیلنےپرتوجہ ہے۔ون ڈے کی کپتانی کا بالکل بھی نہیں سوچ رہا۔ گرین شرٹس 27 تاریخ کو آخری ٹی 20 میچ میں کالی آندھی کا وائٹ واش کرنے میدان میں اتریں گی۔

ایمز ٹی وی (کھیل) شعیب اختر کا کہنا ہے پاکستانی بیٹسمینوں نے اچھی کارکردگی دکھائی ،مگر اس سے اچھا کھیل بھی پیش کیا جا سکتا تھا۔ محمد یوسف کہتے ہیں سب بلے بازوں خصوصاً سرفراز نے زبردست بیٹنگ کی۔ شعیب اختر کہتے ہیں سیریز جیت کر دکھانا تھی جیت کر دکھادی۔سکندر بخت کہتے ہیں وہاب ریاض کو بولنگ بہتر بنانا ہوگی۔

محمد یوسف کا کہنا تھا کہ ٹیم نے اچھی بیٹنگ پرفامنس دی مگر اس سے اچھی ہوسکتی تھی۔بیٹنگ بہتر کرنی پڑے گی کیونکہ اچھی ٹیمیں ٹف ٹائم دیں گی شعیب اختر نے کہا اصل ہدف سیریز جیتنا تھااورپاکستانی بالرز نے بہتر بالنگ کی۔

ایمز ٹی وی (کھیل) انڈر 18 ایشیا ہاکی کپ میں قومی ٹیم کی فتوحات کا سلسلہ جاری رہا، گرین شرٹس نے چین کو بھی یکطرفہ مقابلے میں6-0 سے شکست دیدی، قومی ٹیم کی طرف سے امجد علی اور افراز نے2، 2 بار گیند کو جال میں پہنچایا، خیراللہ اور علی عزیز نے ایک، ایک گول کیا، پاکستانی ٹیم ایک دن آرام کے بعدمنگل 27 ستمبر کو ہانگ کانگ کیخلاف فتوحات کی ہیٹ ٹرک کرنے کا عزم لیے میدان میں اتریگی۔
ادھر پاکستانی ٹیم کے منیجر کامران اشرف کھلاڑیوں کی کارکردگی سے خاصے مطمئن ہیں اور امید کرتے ہیں کہ گرین شرٹس عمدہ پرفارمنس کا سلسلہ ایونٹ کے اگلے میچوں میں بھی جاری رکھیں گے۔ تفصیلات کے مطابق انڈر 18ایشیا ہاکی کپ میں پاکستانی ٹیم کی فتوحات کا سلسلہ جاری ہے۔
گذشتہ روز شیڈول مقابلے میں چین کو بھی صفر کے مقابلے میں 6گول سے زیرکرکے ایونٹ میں ناقابل شکست رہنے کا اعزاز برقرار رکھا، یاد رہے کہ گرین شرٹس نے ایشیا کپ کے افتتاحی میچ میں چائینز تائپے کو ایک کے مقابلے میں 6 گول سے زیر کیا تھا۔ بنگلہ دیش کے دارالحکومت ڈھاکا کے مولانا بھاشانی ہاکی اسٹیڈیم میں ہونیوالے میچ کے دوران پاکستانی ٹیم نے عمدہ کارکردگی کا سلسلہ چین کیخلاف بھی جاری رکھا اور حریف سائیڈ کو تمام شعبوں میں آؤٹ کلاس کرتے ہوئے بازی اپنے نام کی۔
کھیل کے آغاز میں دونوں ٹیموں نے مایوس کن کھیل کا مظاہرہ کیا اور فاروڈز نے گول کرنے کے متعدد مواقع ضائع بھی کیے تاہم پہلے ہاف کے اختتامی لمحات میں پاکستانی ٹیم نے گیند کو جال کا راستہ دکھا کر اسکور 1-0 کر دیا۔ دوسرے ہاف میں پاکستانی کھلاڑی خطرناک موڈ میں نظر آئے اور انھوں نے حریف ٹیم کو تمام شعبوں میں بے بس کرتے ہوئے35 منٹ کے کھیل میں5گول کر کے میچ کا نتیجہ اپنے نام کیا، پاکستان کی طرف سے امجد علی اور افراز سب سے کامیاب کھلاڑی رہے ، دونوں نے 2، 2 بار گیند کو جال میں پھینک کر قومی ٹیم کی فتح آسان بنا دی۔
خیر اللہ اور علی عزیز ایک ایک گول کرنے میں کامیاب رہے۔ ایک دن کے آرام کے بعد27 ستمبر کو ایشیا کپ کے مزید تین میچز ہوں گے، پاکستانی ٹیم پہلے راؤنڈ کا آخری میچ 27 ستمبر کو ہانگ کانگ کیخلاف کھیلے گی۔ چائینز تائپے کی ٹیم چین کیخلاف ایکشن میں دکھائی دیگی جبکہ بنگلہ دیش کا مقابلہ اومان سے ہوگا، ادھر پاکستانی ٹیم کے منیجر کامران اشرف کھلاڑیوں کی کارکردگی سے خاصے مطمئن ہیں اور امید کرتے ہیں کہ گرین شرٹس عمدہ پرفارمنس کا سلسلہ ایونٹ کے اگلے میچوں میں بھی جاری رکھیں گے۔
میڈیا سے بات چیت میں ان کا کہنا تھا کہ پی ایچ ایف کی کاوشوں سے اومان کی ٹیم کے پاکستان آنے سے نہ صرف ملک میں ہاکی کی رونقیں بحال ہوئیں بلکہ ہمارے کھلاڑیوں کو بھی پریکٹس کا بھر پور موقع ملا،ان کا کہنا تھا کہ دو میچوں کے دوران ہم نے مجموعی طور پر بارہ گول کیے جبکہ ہمارے خلاف صرف ایک گول ہوا، اس نتائج سے بخوبی اندازہ لگایا جا سکتا ہے کہ ہم درست سمت کی جانب گامزن ہیں۔کامران اشرف نے امید ظاہر کی کہ کھلاڑی عمدہ کارکردگی کا سلسلہ نہ صرف ہانگ کانگ کیخلاف جاری رکھیں گے بلکہ ایونٹ کے فیصلہ کن راؤنڈ میں بھی شاندارکھیل کے ذریعے فتوحات حاصل کرنے میں کامیاب رہیں گے۔