ایمزٹی وی (اسلام آباد) وزیراعظم نواز شریف نے پاناما لیکس کے معاملے پر مشاورت کے لئے کابینہ کا اجلاس آج طلب کرلیا۔ ذرائع کے مطابق اپوزیشن جماعتوں کی جانب سے پاناما لیکس کی تحقیقات کے لئے انکوائری کمیشن کے ٹی او آرز پر مخالفت سامنے آنے پر وزیراعظم نے آج کابینہ کا اجلاس طلب کرلیا جس میں پاناما لیکس کی تحقیقات اور انکوائری کمیشن کے ٹی او آرز پر مشاورت کی جائے گی۔ ذرائع کے مطابق وزیراعظم اجلاس کے دوران بجٹ حکمت عملی طے کرنے کے حوالے سے بھی مشاورت کریں گے۔ واضح رہے کہ اپوزیشن جماعتوں نے پاناما لیکس کے انکوائری کمیشن کے ٹرمزآف ریفرنس مسترد کرتے ہوئے اس پر اپوزیشن جماعتوں کو بھی اعتماد میں لینے کا مطالبہ کیا ہے۔

ایمز ٹی وی (تعلیم) ورچوئل یونیورسٹی نے سندھ کے طلبہ کی سہولت کیلئے سا تواں کانووکیشن کراچی میں منعقد کیا ۔ تقریب کے مہمان خصوصی یونیورسٹی آف ویٹرنری اینڈ اینیمل سائنسز کے سابق وائس چانسلرڈاکٹرمحمد نواز تھے ۔ بیچلر ز اور ماسٹرز کرنیوالے 303گریجوایٹس میں ڈگریاں تقسیم کی گئیں اس موقع پرذہین گریجویٹس کو میرٹ سرٹیفکیٹ بھی دئیے گئے ۔

ایمزٹی وی (تعلیم) سندھ زرعی یونیورسٹی ٹنڈوجام کا 9واں کانووکیشن جمعرات 28 اپریل کو گورنر سندھ ڈاکٹر عشرت العباد خان کی زیر صدارت ہوگا۔ تفصیلات کے مطابق اس حوالے سے یونیورسٹی میں تیاریاں کی جارہی ہیں۔ یونیورسٹی میں تزئین وآرائش کا کام جاری ہے جبکہ اس سلسلے میں مختلف کمیٹیاں بھی تشکیل دی گئی ہیں، کانووکیشن میں کامیاب طلبا وطالبات کو ڈگریاں دی جائیں گی اور پوزیشن حاصل کرنے والے طلبہ میں میڈل تقسیم کیے جائیں گے جبکہ دوسری جانب وائس چانسلر ڈاکٹر مجیب الدین صحرائی کی زیر صدارت کانووکیشن کی کمیٹیوں کے سربراہان کا اجلاس ہوا، وائس چانسلر نے کانووکیشن کو کامیاب بنانے کے حوالے سے ہدایات جاری کیں۔

ایمزٹی وی (اسلام آباد)وزریراعظم نواز شریف کی مسلم لیگ(ن) کے ارکان قومی اسمبلی بابرنواز خان، ثقلین بخاری اورسلطان محمود ہانجرا سے علیحدہ علیحدہ ملاقاتیں کی۔ ملاقاتوں کے دوران ملک کے سیاسی امور، علاقائی مسائل اور ترقیاتی منصوبوں پر تفصیلی تبادلہ خیال کیا گیا۔ اس موقع پروزیراعظم نے کہا کہ کچھ لوگ حکومت پرناجائز تنقید کرکے ہمیں ترقی کے سفرسے ہٹانا چاہتے ہیں لیکن رکاوٹیں ڈالنے والے عناصر مذموم عزائم میں کامیاب نہیں ہو ں گے، ہمارا اصل مقصد عوام کی خدمت ہے، جس کے لئے ہم کوئی کسر اٹھا نہیں رکھیں گے، پاکستان جلد اندھیروں سے نکل کر ترقی یافتہ ممالک میں شامل ہو جائے گا اور پاک چین اقتصادی راہداری منصوبہ ملک میں معاشی انقلاب کا زینہ بنے گا جبکہ ارکان اسمبلی نے کہا عوام حکومت کی کارکردگی سے مطمئن ہیں۔

ایمزٹی وی (تعلیم) امریکی قونصل خانے کے تعاون سے یونیورسٹی آف میسا چوسٹس اور بلوچستان کی تین جامعات یونیورسٹی آف بلوچستان،سردار بہادر خان ویمن یونیورسٹی اور بلوچستان یونیورسٹی آف انفارمیشن ٹیکنالوجی، انجینئرنگ اینڈ مینجمنٹ سائنسز کے درمیان شراکت داری کے معاہدے پر دستخط کردیئے گئے ۔ مفاہمتی یادداشت پر دستخط کی تقریب میں کراچی میں متعین قائم مقام امریکی قونصل جنرل چاڈ پیٹرسن اور معاہدے میں شریک جامعات کے نمائندوں نے شرکت کی۔ تقریب سے خطاب کرتے ہوئے چاڈ پیٹرسن نے کہا کہ معاہدے کے تحت ان چار یونیورسٹیوں کو طلبا،اساتذہ اور دیگر عملے کے باہمی اشتراک کو فرو غ دینے کا موقع ملے گا۔

ایمز ٹی وی (تعلیم) جامعہ کراچی نے پہلے سیمسٹر کا شیڈول جاری کردیا۔ جامعہ کراچی کے رجسٹرار ڈاکٹر معظم علی خان کے اعلامیے کے مطابق پہلے سیمسٹر برائے تعلیمی سال 2016 کے امتحانات 19 مئی تا 3جون منعقد ہونگے جبکہ 6جون تا13 جولائی سیمسٹر بریک ہوگااور دوسرے سیمسٹر کا آغاز18 جولائی سے ہوگا۔

ایمزٹی وی (تعلیم)سندھ پروفیسرز اینڈ لیکچررز ایسوسی ایشن (سپلا)کے سیکریٹری تعلیم مختیار احمد سومرو سے مذاکرات کامیاب ہوگئے ہیں جس کے بعد سپلا نے اپنا احتجاج موخر کردیا۔ تفصیلات کے مطابق گزشتہ روز سندھ بھر کے لیکچررز اور پروفیسرز ڈی جے سائنس کالج میں جمع ہوئے تھے اور وہ سی ایم ہاؤس تک احتجاجی مارچ کرنا چاہتے تھے جب اس بات کا علم سیکریٹری تعلیم مختیار سومرو کو ہوا تو انہوں نے سپلا کے پانچ مرکزی عہدیداروں کو اپنے دفتر میں طلب کرلیا اس موقع پر ڈی جے سائنس کالج کو پولیس نے گھیرے میں لے لیا، تاہم کسی بھی لیکچرر یا پروفیسر کے خلاف کوئی کارروائی نہیں کی گئی، سیکریٹری تعلیم نے سپلا کے تمام مطالبات وزیر تعلیم سندھ نثار احمد کھوڑو کو ارسال کردیے اوریقین دہانی کرائی کہ تمام جائز مطالبات تسلیم کیے جائیں گے جس کے بعد سپلانے احتجاج موخر کردیا۔

ایمزٹی وی (اسلام آباد) اپوزیشن جماعت پیپلزپارٹی اور تحریک انصاف نے پاناما لیکس کی تحقیقات کے لئے 2 مئی کو مشترکہ اجلاس طلب کرلیا ۔
ذرائع کے مطابق تحریک انصاف کے سینئر رہنما شاہ محمود قریشی نے اپوزیشن لیڈر خورشید شاہ سے ملاقات کی جس میں پاناما لیکس سے متعلق حکومت کی جانب سے چیف جسٹس آف پاکستان کو لکھے گئے خط کے حوالے سے تبادلہ خیال کیا۔ پریس بریفنگ کے دوران اپوزیشن لیڈر خورشید کا کہنا تھا کہ تمام سیاسی جماعتیں اس بات پر متفق ہیں کہ ملک میں سب کا احتساب ہونا چاہیئے۔ اس حوالے سے ان کا مزید کہنا تھا کہ حکومت کی جانب سے پاناما لیکس کی تحقیقات کے لئے چیف جسٹس آف پاکستان کو لکھا گیا خط بے مقصد ہے، جوڈیشل کمیشن کے لئے ہماری مشاورت کے بغیر ٹی او آرز بھیجے جنہیں دیکھ کر شکوک و شبہات میں اضافہ ہوا ہمیں حکومتی ٹی او آرز قبول نہیں ، پانامالیکس کا فرانزک آڈٹ ہونا چاہیئے اور سب سے پہلے وزیراعظم اور ان کے خاندان کا احتساب ہونا چاہیئے۔
تفصیلات کے مطابق پوزیشن جماعتوں کا اجلاس 2 مئی کو اعتزاز احسن کے گھر پر طلب کرلیا گیا ہے جس میں آئندہ کے لائحہ عمل کا اعلان کیا جائے گا اور سپریم کورٹ بار کے ممبران اور دیگر جماعتوں کے رہنماؤں کو بھی مدعو کیا جائے گا۔
اس موقع پر تحریک انصاف کے رہنما شاہ محمود قریشی کا کہنا تھا کہ حکومت بااختیار کمیشن بنانا چاہتی ہے تو تمام جماعتوں کو ایک ساتھ بٹھا کر ٹی او آرز طے کرے، اپوزیشن کی بیشتر جماعتوں نے حکومتی ٹی او آرز کو مسترد کردیا۔
اس حوالے سے ایم کیو ایم کے سینئررہنما فاروق ستار کا کہنا تھا کہ بلا امتیاز احتساب ایم کیوایم کی بنیادی پالیسی ہے اس لیے ملک میں سب کا بلا امتیاز احتساب ہونا چاہیے، ایم کیوایم نے سب سے زیادہ کرپشن کے خلاف آواز اٹھائی ہے اور پاناما لیکس کے انکشافات انتہائی اہم ہیں اس حوالے سے کمیشن کا معاملہ ٹی او آرز پر رکا ہوا ہے لہٰذا اس معاملے پر قومی مشاورت سے راستہ نہ نکالا گیا تو عدم استحکام بڑھنے کا خدشہ ہے جس سے ملک کو نقصان ہوگا۔

ایمزٹی وی (اسلام آباد)ہارٹ آف ایشیا استنبول پراسسس کے اعلی حکام کا اجلاس آج نئی دلی میں ہوگا جس سے قبل پاک بھارت سیکرٹری خارجہ ملاقات جاری ہے۔ بھارت کے دارالحکومت نئی دلی میں ہارٹ آف ایشیا استنبول پراسس کے اعلیٰ حکام کا چھٹا اجلاس آج ہوگا جس سے قبل سیکرٹری خارجہ اعزاز چوہدری اور بھارتی ہم منصب جے شنکر کے درمیان ملاقات جاری ہے جب کہ ملاقات میں پاکستانی ہائی کمشنرعبدالباسط بھی شریک ہیں۔ ملاقات میں باہمی دلچسپی کے امور پر تبادلہ خیال کیا جارہا ہے۔ ترجمان دفتر خارجہ کا کہنا ہے کہ پاکستان نے ہارٹ آف ایشیا پراسس میں ہمیشہ فعال کردار ادا کیا جس کا پانچواں اجلاس اسلام آباد میں ہوا جب کہ ہارٹ آف ایشیا افغانستان میں امن و استحکام کے لئے بھرپور انداز میں کام کر رہی ہے۔