ایمز ٹی وی(یپشاور) بڈھ بیر ائیربیس حملے کے دوران دہشتگردوں کی آنکھوں میں آنکھیں ڈال کر شہادت نوش کرنے والے کیپٹن اسفند یار نے بہادری کی نئی مثال قائم کر دی۔ کیپٹن اسفند یار اپنے دستے کی قیادت کر رہے تھے انھوں نے بہادری کا مظاہرہ کرتے ہوئے دہشتگردوں کو بیس کے اندر جانے سے روکا اور مسلسل سیسہ پلائی دیوار بنے رہے ۔ کیپٹن اسفند یار شہید نے صبح صادق ہی اپنی بہادری کی مثال قائم کر کے شہادت نوش کی۔ کیپٹن اسفند یار بخاری کو 118ویں لانگ کورس میں اعزازی شمشیر سے نوازا گیا تھا۔ کیپٹن اسفند یار کو پاسنگ آؤٹ پریڈ میں وار ٹیکٹکس میڈل بھی دیا گیا تھا۔ کیپٹن اسفند یار شہید کا تعلق جناح ونگ سے تھا ، کیپٹن اسفند یار شہید جناح ونگ 48 اینٹری کے ونگ کمانڈر بھی تھے ، کیپٹن اسفند یار شہید نے پنجاب انڈر19 ہاکی ٹیم کی جانب سے میچ بھی کھیلے۔

ایمز ٹی وی(پشاور) آج صبح 5 سے 6 بجے کے درمیان پشاور بڈھ بیر میں ائیر بیس پر دہشت گردوں نے حملہ کیا، لیکن پاک فوج کی کوئک رسپونس فورس نے دہشت گردوں کے ناپاک عزائم کو ناکام بنا دیا۔ کالعدم تحریک طالبان نے ایئرفورس کیمپ پر حملے کی ذمہ داری قبول کر لی ہے۔ تحریک طالبان کے ترجمان محمد خراسانی نے صحافیوں کو بھیجی گئی ای میل میں اس حملے کی ذمہ داری قبول کرنے کا دعویٰ کیا ہے۔ تحریک طالبان کی جانب سے جاری کردہ ای میل میں کہاگیا ہے کہ ایئر کیمپ پر حملہ فوجی آپریشن کا جوابی حملہ ہے ۔ اس کاروائی کے لئے 14 افراد کو بھیجا گیا تھا۔ واضح رہے کہ فوج کیمپ حملے میں کیپٹن اسفند یار بخاری سمیت 17افراد شہید ہوئے ہیں جبکہ پاک فوج کی جانب سے تما م دہشتگردوں کو ہلاک کر دیاہے ۔

ایمز ٹی وی (نوشہرہ) پاکستان تحریک انصاف کے چیئرمین عمران خان نے کہا ہے کہ فاٹا کو خیبر پختونخوا کا حصہ بنانا چاہیے، فاٹا کے عوام کو صوبے میں شامل کرنے سے پہلے ان کی رائے لیں گے۔نوشہرہ میں ایم این اے عمران خٹک سے ملاقات کے بعد میڈیا سے گفتگو میں تحریک انصاف کے سربراہ کا کہنا تھا کہ اب وقت آ گیا ہے کہ انگریزوں کے زمانے کا نظام ختم کر دیا جائے، وہاں کے قانون میں مقامی سطح پر عوامی شمولیت کی خوبی موجود تھی مگر گزشتہ 10 سال میں یہ نظام مکمل طور پر تباہ ہو چکا ہے۔ان کا کہنا تھا کہ فاٹا افغان سرحد کے ساتھ ساتھ ہے اس لیے اس کا الگ صوبہ بننا ممکن نہیں،اس کو پختونخوا کا حصہ بننا چاہیے۔ فاٹا کو کے پی کے میں شامل کرنے کے حوالے سے ان کا مزید کہنا تھا کہ وہاں کی عوام سے پہلے بات کرنی پڑے گی کہ کیسے آہستہ آہستہ ان کو صوبے میں ضم کیا جائے یا اگر وہ الگ صوبہ چاہتے ہیں تو وہ کیسے ہو گا اور اگر وہ پرانا نظام ہی چاہتے ہیں تو اس میں کس قسم کی تبدیلی کی ضرورت ہے۔

ایمز ٹی وی(پشاور) پاک فوج کا دہشت گردوں کیخلاف آپریشن کے درست نتائج برآمد ہوئے ہیں،گزشتہ سالوں کی نسبت رواں سال پشاور میں دہشت گردی کے واقعات میں نمایاں کمی واقع ہوئی ہے۔ ایک رپورٹ کے مطابق رواں سال قومی ایکشن پلان پر عملدرآمد سے پشاور میں دہشت گردی کے واقعات میں نمایاں کمی ہوئی تھی۔اس سال خیبرپختوانخوا میں دہشت گردی کے ایک سو تیرہ واقعات رپورٹ ہوئے۔جن میں ستتر افراد جاں بحق اور 133 زخمی ہوئے۔جبکہ اس کے مقابلے میں گزشتہ سال دو سو چالیس، دو ہزار تیرا میں دو سو پنتالیس اور دو ہزار بارہ میں ایک سو ستر واقعات ہوئے تھے۔ جن میں چھ سو چھیالیس افراد جاں بحق اور ایک ہزار آٹھ سو سترہ افراد زخمی ہوئے تھے۔ محکمہ انسداد دہشت گردی نے رواں سال صوبے بھر میں نوسو سات سرچ آپریشن کرکے ایک ماہ میں دہشت گردی کے ساٹھ واقعات کو ناکام کردیا دہشت گردوں کو گرفتار کیا جن کے سروں کی قیمت مقرر تھی۔