ایمز ٹی وی ﴿اسلام آباد﴾ پاکستان میں سائبر جرائم کی روک تھام کے لیے بنائے گئے مسودہ قانون پر انسانی حقوق اور انٹرنیٹ صارفین کے حقوق کے لیے کام کرنے والی تنظیموں کے تحفظات کے بعد قومی اسمبلی کی قائمہ کمیٹی برائے سائنس و ٹیکنالوجی نے اس پر نظر ثانی پر آمادگی ظاہر کی ہے۔الیکٹرانک جرائم کو روکنے کے بل 2015ء کو اس کمیٹی نے گزشتہ ماہ منظور کیا تھا جس کے بعد اسے قومی اسمبلی میں پیش کیے جانے کی تیاری کی جارہی تھی۔ لیکن حزب مخالف کے ارکان سمیت متعلقہ حلقوں کی طرف سے اس پر اعتراضات اٹھائے جانے کے بعد فیصلہ کیا گیا کہ اس میں ان حلقوں کے نمائندوں کو مدعو کر کے تبادلہ خیال کیا جائے۔
کمیٹی کے حالیہ اجلاس میں چیئرمین محمد صفدر کا کہنا تھا کہ یہ مسودہ قومی اسمبلی میں پیش کیے جانے کے لیے تیار تھا لیکن فریقین کی طرف سے جو خدشات سامنے آئے ہیں انھیں مدنظر رکھتے ہوئے فیصلہ کیا گیا کہ اس پر دوبارہ غور کیا جائے۔
حکومتی عہدیداروں کا اصرار ہے کہ ملک کو درپیش موجودہ حالات میں مجوزہ قانون کی اشد ضرورت ہے جس سے سائبر جرائم کے انسداد، ملکی سلامتی کا دفاع کرنے اور انٹرنیٹ کے ذریعے تجارت و ادائیگیوں کو تحفظ فراہم کیا جا سکے گا۔
ایمز ٹی وی ﴿سائنس اینڈ ٹیکنالوجی﴾ اب میدان جنگ میں دشمن سے انسان نہیں بلکہ روبوٹ لڑیں گے۔ اس سلسلے میں امریکا میں جنگجو روبوٹس کی تربیت شروع کر دی گئی ہے۔ یہ کوئی عام روبوٹ نہیں، قد 6 فیٹ 2 انچ، آنکھوں میں لیزر، اور مضبوط گرفت والے ہاتھ کے حامل یہ روبوٹ نہ صرف کسی بھی ناہموار سطح پر اپنا توازن برقرار رکھ سکتے ہیں، دوڑ سکتے ہیں اور سامنے اگر دیوار آجائے تو اسے توڑنے کے ساتھ ساتھ گاڑی چلانے کی بھی صلاحیت رکھتے ہیں۔
امریکی محکمہ دفاع کی جانب سے تیار کیے جانے والا یہ روبوٹ جلد ہی لیبارٹری سے روبوٹس کیمپ بھیج دیا جائے گا، جہاں اس کا مقابلہ دوسرے روبوٹس سے کرایا جائے گا، تاکہ اس کی جسمانی طاقت، صلاحیت اور ماحول سے آگہی کا بھی امتحان لے لیا جائے۔ رپورٹ کے مطابق اس روبوٹ کی تیاری پر محکمہ دفاع کا تحقیقی ادارے ڈارپا اب تک 10کروڑ ڈالر خرچ کرچکا ہے اور جس کا مقصد ان روبوٹس کو ایسے خطرناک مقامات اور مہمات میں بھیجنا ہے، جہاں انسانوں کا جانا ممکن نہیں یا پھر خطرات ہوتے ہیں۔
ایمز ٹی وی ﴿فارن ڈیسک﴾ برطانوی اخبار ’دی انڈی پینڈنٹ‘ کے مطابق داعش نے دعویٰ کیا ہے کہ وہ اگلے 12 ماہ میں پاکستان سے ایٹمی ہتھیار خرید سکتے ہیں۔ آئی ایس آئی ایس نے اپنے پروپیگنڈا میگزین ’دابق‘ میں یہ دعویٰ کیا ہے کہ گروپ تیزی سے پھیل رہا ہے اور وہ اپنا پہلا جوہری ہتھیار 1سال کے اندر خرید سکتا ہے۔ مبالغہ آمیز مضمون میں دعویٰ کیا گیا کہ داعش نے جڑیں وسیع پیمانے پر پھیلا دیں ہیں اور وہ جدید دنیا میں ایک دھماکہ خیز گروپ کے طور پر سامنے آئی ہے، ایک ایسی دھماکا خیز اسلامی تحریک جو اس پہلے دنیا میں نہیں دیکھی گی، جس نے 12ماہ سے کم عرصے میں اپنی جڑیں مضبوط کیں۔
اخبار کے مطابق برطانوی فوٹو جرنلسٹ جان کینٹلی کو باقاعدہ داعش کی جانب سے اپنے پروپیگنڈے کے لیے استعمال کیا جا رہا ہے۔ وہ 2سال سے داعش کا یرغمالی ہے اور کئی ایک ویڈیو میں سامنے آچکا ہے۔ رپورٹ کے مطابق حال ہی میں بوکوحرام نے بھی داعش سے وابستگی کا اظہار کیا ہے اور اس طر ح دیگر گروپوں کو ملا کر مشرق وسطیٰ، افریقہ اور ایشیا میں ایک عالمی تحریک بنائی جائے گی۔ داعش کے جنگجوؤں نے امریکی اور ایرانی فوج سے ٹینک، راکٹ، میزائل چھین لئے ہیں، مگر ابھی ان کے پاس جوہری ہتھیار نہیں ہیں۔
داعش کے پاس اربوں ڈالر موجود ہیں، ان ہتھیاروں کے حصول کے لئے خطے کے بدعنوان حکام کو ساتھ ملا کر پاکستان کے اسلحہ ڈیلرز سے جوہری ہتھیار خریدنے کی کوشش کی جائے گی۔ یہ منصوبہ بہت مشکل ہے مگر یہ کام 1سال میں ہوسکتا ہے۔ اگر جوہری ہتھیار نہ حاصل کر سکے، تو کئی ٹن نائٹریٹ دھماکہ خیز مواد تو حاصل کیا جا سکتا ہے۔ داعش کوئی بڑا کام کرنا چاہتی ہے۔ اخبار کے مطابق کسی کی طرف سے گروپ کے مالی معاملات 2ارب ڈالر تک ہیں، تاہم ان کے پاس کتنی رقم ہے، اس تک رسائی حاصل کرنا ممکن نہیں۔
ایمز ٹی وی ﴿انٹرٹینمنٹ﴾ ہدایتکار ایم جے رانا کی فلم “جٹی”سے اداکاری شروع کر نے والے برصغیر کے کامیڈی لیجنڈ رنگیلا کی آج 10 ویں برسی منائی جارہی ہے۔
اداکاررنگیلا کا اصل نام محمد سعید خان تھا اوروہ دنیا کے واحد فنکار تھے جنھوں نے عملی طور پرفلم میکنگ کے ہر شعبے میں نمایاں حیثیت سے نام کمایا،رنگیلا کا تعلق صوبہ سرحد کے پسماندہ علاقے سے تھا۔لاہورمیں انھوں نے سب سے پہلے سینما بورڈزکی تشکیل یعنی پینٹنگ آرٹ پرمحنت کی اورمشہور آرٹسٹ آزاد کی شاگردی کی۔ ان کی فلمی زندگی کا آغاز ایم جے رانا کی فلم ’’جٹی‘‘ سے ہوا۔
1969ء میں اپنی ایک فلم ’’دیا اور طوفان‘‘ پروڈیوس کی اور صرف یہی نہیں بلکہ بحثیت گلوکار بھی انھوں نے عوامی مقبولیت کی سند حاصل کی، اپنی آواز میں’’گا میرے منوا گاتا جا‘ جانا ہے ہم کا دور‘‘مشہور ہوئے۔ ہر دلعزیز فنکار رنگیلا 24 مئی 2005ء کوانتقال کرگئے۔
ایمز ٹی وی ﴿اسلام آباد﴾ وزیراعظم نواز شریف نے کہا ہے کہ موجودہ حکومت کم آمدنی والے خاندانوں کیلیے سستے رہائشی یونٹس کی تعمیر پر خصوصی توجہ دے رہی ہے۔
چیئرمین ہانس ویلمسن کی قیادت میں ایس پی ٹیک (پی وی ٹی) لمیٹڈ کے ایک وفد نے ہفتے کو وزیراعظم نواز شریف سے ملاقات کی۔ اس موقع پر وزیراعظم کو ملک میں کم لاگت کے رہائشی یونٹس کی تعمیر کے لیے تکنیکی اور مالیاتی پہلوؤں پر تفصیلی بریفنگ دی گئی۔ وزیراعظم ہاؤس کی جانب سے جاری بیان کے مطابق نواز شریف نے وفد سے گفتگو کرتے ہوئے کہا کہ گھر انسان کی سب سے اولین ضرورت ہے۔
وزیراعظم نے کہا کہ عوام کو تعلیم، روزگار، صحت، ٹرانسپورٹیشن سہولتوں کی طرح بے گھر لوگوں کو رہائشی یونٹس کی فراہمی بھی حکومت کی اولین ترجیح ہے۔ وزیراعظم کو آگاہ کیاگیا کہ ملک میں30 لاکھ ہاؤسنگ یونٹ تعمیر کرنے کی ضرورت ہے جبکہ شہری علاقوں میں ہائوسنگ کی قلت میں تیزی سے اضافہ ہو رہا ہے۔
ایمزٹی وی (ایجوکیشن) سر سید یونیورسٹی کےطلباوطالبات نے رجسٹرار سیدابرارحسین اور یونیورسٹی انتظامیہ کے خلاف دوسرےروز بھی احتجاج کیا۔ طالبعلموں کا کہناتھا کہ سینئر اور اہل اساتذہ کو برطرف کرنے کا فیصلہ واپس لیاجائےعلاوہ ازیں ان کا کہنا تھا کہ فیسوں میں اضافےکا فیصلہ نامنظور کرتے ہیں۔
مظاہرے میں شریک طلباﺀ کا مزید کہنا تھا کہ یونیورسٹی کی انتطامیہ کی جانب سے انتہائی سینئر اور قابل ٹیچر بلال علوی کی برطرفی انتہائی غیر دانشمندانہ ہے لہٰذا اس فیصلے کو فوری طور پر واپس لیا جائے بہ صورت دیگر مطالبات نہ ماننے تک ایڈمن بلاک میں احتجاج کیا جائے گا۔