وفاقی حکومت نے وفاقی جامعات کے ایکٹ میں ترمیم کا فیصلہ کرلیا ہے

جس کے بعد صدر مملکت کے بطور چانسلر تمام اختیارات وزیر اعظم کو منتقل ہوجائیں گے۔

گزشتہ روز قومی نصاب کونسل کی تقریب میں میڈیا سےگفتگو کرتے ہوئے وفاقی وزیر تعلیم رانا تنویر نے بتایا کہ جامعہ اردو سمیت تمام وفاقی جامعات کے قانون میں ترمیم کی جائے گی کیونکہ ان جامعات کے ایکٹ پیچیدہ ہیں جس سے مسائل پیدا ہورہے ہیں۔

انہوں نے بتایا کہ جامعات کے ایکٹ کے باعث وفاقی اردو یونیورسٹی میں مستقل وائس چانسلر لگانا مسئلہ بنا ہوا ہے۔

وفاقی وزیر نے کہا کہ IBCC کا ایکٹ تیار ہوچکا ہے اور اسے جلد اسمبلی میں پیش کردیا جائے گا۔

انہوں نے یہ بھی بتایا کہ سکریٹری آئی بی سی سی غلام علی ملاح کی اچھی کارکردگی کے پیش نظر ان کی مدت ملازمت میں توسیع کی جارہی ہے۔

نئی دہلی: چیئرمین پی سی بی کے سخت ردعمل پربھارتی وزیر کھیل انوراگ ٹھاکربلبلااٹھے۔

تفصیلات کے مطابق بھارتی کرکٹ بورڈ (بی سی سی آئی) کی جانب سے ایشیاکپ 2023 میں پاکستان کا دورہ کرنے سے انکار پر چیئرمین پی سی بی رمیز راجہ کے سخت ردعمل پر بھارتی وزیر کھیل انوراگ ٹھاکر کا کہنا ہے کہ کیونکہ ہماری ٹیم کو وہاں سیکیورٹی خدشات ہیں اسی وجہ سےپاکستان میں بھارتی ٹیم کے جانے کے حوالے سے فیصلہ وزارت داخلہ کرے گا

انہوں نے کہاکہ ون ڈے ورلڈکپ اگلے سال بھارت میں ہی ہوگا جس میں دنیا کی تمام بڑی ٹیمیں شرکت کریں گی۔کرکٹ کے کھیل میں بھارت کی شراکت داری بہت زیادہ ہے جسے کوئی نظر انداز نہیں کرسکتا۔

پاکستان نے موقف اپنایا ہے کہ آسٹریلیا، انگلینڈ کی ٹیمیں پاکستان کا دورہ کرچکی ہیں جبکہ نیوزی لینڈ کی ٹیم رواں سال کے اختتام پر دورہ کرے گی، بھارت بلاوجہ سیکیورٹی کا بہانہ بنارہا ہے۔

پاکستان کرکٹ بورڈ (پی سی بی) کے چیئرمین رمیز راجہ نے سیکریٹری بی سی سی آئی اور ایشین کرکٹ کونسل کے سربراہ جے شاہ کے بیان پر ردعمل دیتے ہوئے کہا تھا کہ ایشیا کپ یو اے ای منتقل نہیں کیا جائے گا، بھارت سب کچھ نہیں ہم بھی بہت کچھ ہیں۔

سوات: کہ سوات میں اسکول وین پر فائرنگ کا واقعےکےمعاملے پرتحقیقات سامنے آگئی۔

سوات: خیبر پختونخوا کے آئی جی معظم جاہ انصاری کا کہنا ہے کہ سوات میں اسکول وین پر فائرنگ کا واقعہ دہشتگردی نہیں ذاتی دشمنی تھا۔

سوات میں میڈیا بریفنگ میں آئی جی کے پی نے کہا کہ دیر کے واقعے میں دہشت گردی نہیں تھی بلکہ واقعہ دو فریقین کے درمیان تھا، اتفاق سے اس دن لوئر دیر میں بھی بچوں پر فائرنگ کا واقعہ ہوا۔

آئی جی کے پی نے کہا کہ مقتول حسین احمد کو غیرت کے نام پر سالے نے قتل کیا جبکہ واقعے میں حسین احمد کو مارنے کے وجہ سے دو بچے زخمی بھی ہوئے۔

واقعے کے بعد عوام نے احتجاج بھی کیا اور واقعے سے سوات کے حالات خراب کرنے کی سازش کی گئی لیکن سوات میں امن کی فضاء قائم ہے۔

انہوں نے کہا کہ حملے میں ایک شخص کو گرفتار کیا گیا جبکہ دو افراد فرار ہیں، منصوبے میں ملوث ایک ملزم دبئی فرار ہوگیا ہے جس کو انٹر پول کے ذریعے لانے کے لیے رابطے میں ہیں۔ واقعے میں ملوث آلہ قتل اور موٹر سائیکل برآمد کرلیا گیا۔

آئی جی کے پی معظم جاہ انصاری نے واضح کیا کہ سوات کے حالات کسی کو بھی خراب کرنے نہیں دیں گے۔

واضح رہے کہ 10 اکتوبر کو سوات کے علاقے گلی باغ میں اسکول وین پر نامعلوم موٹر سائیکل سواروں کی فائرنگ سے ڈرائیور جاں بحق اور دو بچے شدید زخمی ہوگئے تھے۔

کراچی: جامعہ کراچی ڈاکٹر پنجوانی سینٹر برائے مالیکیولرمیڈیسن اور ڈرگ ریسرچ کےتحت ”چھوٹی تجربہ گاہوں کےجانوروں سے پیش آنے کی تیکنیک“ کے موضوع پر ایک قومی ورکشاپ 21تا22 اکتوبر ڈاکٹر پنجوانی سینٹرجامعہ کراچی میں ہوگی۔

بین الاقوامی مرکز برائے کیمیائی و حیاتیاتی علوم(آئی سی سی بی ایس) جامعہ کراچی کے ترجمان کے مطابق ملک بھر کے37تعلیمی و تحقیقی اداروں سے تعلق رکھنے والے تقریباً100سے زیادہ محققین اس ورکشاپ میں شرکت کریں گے، شرکت آن لائن اورجسمانی حاضری دونوں صورتوں میں ممکن ہوگی۔

اس قومی ورکشاپ کا انعقاد ڈاکٹر پنجوانی سینٹر اور سندھ انوویشن، ریسرچ اینڈ ایجوکیشن نیٹ ورک (سائرن) کے باہمی تعاون سے ہوگا۔

آئی سی سی بی ایس جامعہ کراچی کے سربراہ اور کامسٹیک کے کوارڈینیٹر جنرل پروفیسر ڈاکٹر محمد اقبال چوہدری قومی ورکشاپ کا افتتاح کریں گے۔ اس ورکشاپ کے انعقاد کا مقصدچھوٹی تجربہ گاہوں کے جانوروں سے پیش آنے کی تیکنیک کے عنوان سے محققین اور طالب علموں کو عملی تربیت فراہم کرنا ہے۔

برسبین: فاسٹ بولر شاہین شاہ آفریدی کے یاکرسےزخمی ہونے والے افغان اوپنررحمان اللہ گربازکےحوالےسےافغانستان کرکٹ بورڈ نے بیان جاری کردیا۔

افغان کرکٹ بورڈ کے مطابق اوپنر رحمان اللہ گُرباز کے تمام ٹیسٹ کلیئر ہیں اور انہیں ڈاکٹرز نے صحت مند قرار دیا ہے جبکہ ان کے پاؤں کی کوئی ہڈی فریکچر نہیں ہوئی ہے اور توقع ہے کہ انگلیینڈ کے خلاف ورلڈکپ اوپننگ میچ میں کرکٹر دستیاب ہوں گے۔

قبل ازیں گزشتہ روز کھیلے گئے وارم اپ میچ میں قومی کرکٹ ٹیم کے فاسٹ بولر شاہین شاہ آفریدی نے رحمان اللہ گرباز کو یارکر کروایا تھا جو بیٹر کے پاؤں میں لگا تھا جس کے باعث انہیں فوری طبی امداد فراہم کرتے ہوئے اسپتال منتقل کردیا گیا تھا۔

افغان کرکٹر کے علاج کے لیے فزیو فوری طور پر گراؤنڈ میں آئے تھے تاہم گرباز کو چلنے میں مشکل درپیش تھی جس کے باعث انہیں متبادل فیلڈر نے میدان سے باہر لے جایا گیا۔

بارش سے متاثرہ میچ کے اختتام پر شاہین آفریدی افغان بیٹر کی خیریت دریافت کرنے ڈریسنگ روم بھی گئے تھے۔

واضح رہے کہ وارم اپ میچ میں افغانستان پہلے بیٹنگ کرتے ہوئے مقررہ 20 اوورز میں 6 وکٹوں کے نقصان پر 154 رنز بنائے تھے جبکہ شاہین آفریدی اور حارث رؤف نے 2،2 وکٹیں حاصل کی تھیں۔

ہدف کے تعاقب میں پاکستان کے اوپنرز نے 2.2 اوورز میں 19 رنز بنائے تھے تاہم مسلسل بارش کی وجہ سے کھیل روک دیا گیا تھا۔

لاہور : صوبائی وزیر تعلیم پنجاب ڈاکٹرمرادراس نےلاہور چیمبرآف کامرس اینڈانڈسٹری میں منعقدہ سیمینار میں شرکت کی۔

سیمینار کےانعقاد کا بنیادی مقصد ٹیکنالوجی کے مثبت اور جامع استعمال سے طلبا کے لئے تعلیم فراہمی میں آسانی پیدا کرنا تھا۔

سیمینا ر سے خطاب کرتے ہوئے وزیر تعلیم پنجاب مراد راس کا کہنا تھا کہ مسائل کی باقاعدہ نشاندہی کے بغیر ان کامستقل بنیادوں پر حل ممکن نہیں۔بدقسمتی سے ہمارے ملک میں تعلیم کبھی بھی حکمران ان جماعتوں کی ترجیح نہیں رہی۔سرکاری اسکولوں کے نظام کو گزشتہ حکومتوں کی جانب سےدانستہ طور پر نجی سیکٹر کے فروغ کےلئے پیچھے دھکیلا گیا۔1984سے اب تک پرائیوٹ اسکول ایکٹ میں ترمیم نہیں کی گئی۔

30سے 40سال میں کمزور ہونے والا تعلیمی نظام چند سالوں میں ٹھیک نہیں ہوسکتا۔جب حکومت ملی تو اساتذہ کو پڑھانے کی بجائے محکمے کے انتظامی امور میں پھنسا کررکھاجاتاتھا۔آج محکمہ اسکول ایجوکیشن پنجاب میں اساتذہ کے تمام امور آن لائن سسٹم پر پیں۔آج محکمہ تعلیم پنجاب میں اساتذہ کے تبادلے، چھٹیاں، اےسی آرز، پینشن ، ریٹائرمنٹ و دیگر امور آن لائن سسٹم کےتحت چل رہے ہیں

محکمہ تعلیم پنجاب میں ٹیکنالوجی کے مثبت استعمال کی بدولت سالانہ قریب 10ارب روپوں کی بدعنوانی کا خاتمہ ہوا آج اساتذہ کی مکمل توجہ ہمارے بچوں کو پڑھانے پر مرکوز ہےآج یکساں نصاب تعلیم پر عمل درآمد ہورہاہے نجی اسکولوں کی رجسٹریشن بھی آں لائن ہوتی ہے۔حال ہی میں نویں سے بارہویں جماعت کے طلبا کےلئے انصاف اکیڈمی کا قیام عمل میں لایا گیا۔انصاف اکیڈمی پورٹل پر طلبا جدید ٹیکنالوجی کی مدد سے مفت آن لائن تعلیم حاصل کررہے ہیں۔سیاست کو تعلیم سے ہمیشہ دور رہنا چاہیئے، یہ ہمارے بچوں کےمستقب؛ معاملہ ہے۔

منعقدہ سیمینار میں مینجنگ ڈائریکٹرپی سی ٹی بی، سیکریٹری پی سی ٹی بی، پریزیڈنٹ ایل سی سی آئی کاشف انور، ممبران ایل سی سی آئی ودیگر موجود تھے ۔

کراچی: صدر پاکستان عارف علوی نےشیخ الجامعہ این ای ڈی پروفیسر ڈاکٹر سروش حشمت لودھی کو "پی ای سی ایکسی لینسی ایوارڈ" سے نوازا.

ایوانِ صدر اسلام آباد میں منعقدہ اس تقریب کے میزبان پاکستان انجینئرنگ کونسل (پی ای سی) کے چئیرمین نجیب ہارون تھے. تقریب میں انجینئرنگ کی دنیا کے بڑے افراد نے شرکت کی.

جامعہ ترجمان کے مطابق پی ای سی نے اکیڈمی ااینڈ ریسرچ کٹیگری میں شیخ الجامعہ این ای ڈی پروفیسر ڈاکٹر سروش حشمت لودھی کو انجینئرنگ ایکسی لینسی ایوارڈ اور میڈل سے نوازا.

یاد رہے کہ پی ای سی ایکسی لینسی ایوارڈ، انجینئرز کی پذیرائی کے لیے دیا جانے والا سب سے بڑا ایوارڈ مانا جاتا ہے.

لندن: گینیز ورلڈ ریکارڈز نے بالآخر ’پیر‘ کادن بدترین دن قرار دے دیا۔

گینیز ورلڈ ریکارڈزکے مطابق دنیا بھر میں زیادہ تر افراد کی چاہے وہ ملازمین ہوں یا طلبا، ہفتہ اور اتوار کے روز چھٹی ہوتی ہےاور دو دن آرام کے بعد پیر کے روز دوبارہ معمولاتِ زندگی کا شروع ہونا لوگوں کو ناگوار گزرتا ہے۔

دنیا بھر میں ’پیر‘ کے دن کے لیے لوگوں کے ملے جلے احساسات کے پیشِ نظر گینیز ورلڈ ریکارڈز نے اس دن کو ہفتے کا بدترین دن قرار دے دیا۔

گینیز ورلڈ ریکارڈز کی جانب سے یہ اعلان ٹوئٹر پر ایک پوسٹ میں کیا گیا۔

پوسٹ کے بعد ٹوئٹر صارفین کی جانب بھرپور ردِ عمل کا اظہار کیا گیا۔ ایک صارف نے لکھا ’پیر کا دن اس ہی لائق ہے۔‘

پشاور: وزیراعلیٰ خیبرپختونخوا نےسرکاری جامعات کے کنٹریکٹ ملازمین کے مسائل کے حل کے لیے 7 رکنی کمیٹی قائم کر دی۔

وزیر علیٰ سیکریٹریٹ خیبرپختونخوا نے اعلامیہ جاری کر دیا جس کے مطابق صوبائی وزیر خزانہ تیمور سلیم جھگڑا کمیٹی کے چیئرمین مقرر کیے گئے ہیں۔

کمیٹی اراکین میں چار وزراء اور تین سیکریٹریز شامل ہیں جبکہ وزیر برائے اعلیٰ تعلیم کامران بنگش اور وزیر بلدیات فیصل امین گنڈاپور بھی کمیٹی میں شامل ہیں۔

کمیٹی کو کنٹریکٹ ملازمین کے بارے میں معلومات اکٹھا کرنے احکامات دیے گئے ہیں، کمیٹی ملازمین کو مستقل کرنے کے لیے اخراجات کا تخمینہ لگائے گی۔ کمیٹی کو تفصیلی رپورٹ بنا کر ایک مہینے میں جمع کروانے کی ہدایت کی گئی ہے۔

واضح رہے کہ سرکاری جامعات کے کنٹریکٹ ملازمین نے مسائل کے حل کے لیے بنی گالا کے سامنے دھرنا دیا تھا۔

لاہور: بھارتی رویے پر پاکستان کرکٹ بورڈ نے ایشین کرکٹ کونسل کوخط لکھ دیا۔

ذرائع کے مطابق پاکستان کرکٹ بورڈ نے ایشین کرکٹ کونسل کا ہنگامی اجلاس بلانے کا مطالبہ کیا ہے جبکہ خط میں بھارتی کرکٹ بورڈ کے سیکرٹری جے شاہ کے ایشیاکپ کیلئے ٹیم پاکستان نہ بھجوانے کے بیان کا بھی ذکر کیا ہے۔

اگلے برس 2023 میں ایشیاکپ کی میزبانی پاکستانی کو کرنی ہے تاہم بھارتی کرکٹ بورڈ کے سیکرٹری نے بیان دیا ہے کہ بھارتی ٹیم ایونٹ کے لیے پاکستان کا دورہ نہیں کرے گی جبکہ ایشیا کپ کے نیوٹرل ونیو پر بھی کرانے کا بیان بھی سامنے آیا ہے۔

دوسری جانب آئندہ سال ورلڈ کپ کیلیے گرین شرٹس کو پڑوسی ملک بھیجنے کے فیصلے پر بھی ازسرنو غور کرنے کی تجویز سامنے آئی ہے جبکہ ایشین کرکٹ کونسل کی بورڈ میٹنگ میں ہونے والا فیصلہ سیکریٹری کے خود ہی کر لینے پر سوالات پیدا ہوگئے ہیں۔

سیکریٹری بی سی سی آئی جے شاہ کے بیان نے 2 آئی سی سی ایونٹس کے حوالے سے بھی خدشات کا راستہ کھول دیا ہے، پاکستان کو ون ڈے فارمیٹ کے ایشیا کپ کی میزبانی آئندہ برس ستمبر میں کرنا ہے، اس کے بعد آئی سی سی ورلڈکپ کا انعقاد بھارت میں ہوگا، چیمپئنز ٹرافی 2025کی میزبانی بھی پاکستان کو ملی ہے، اگر بھارتی ٹیم ایشیا کپ کیلیے نہیں آئی، اور جواب میں پاکستانی ٹیم بھارت جاکر نہیں کھیلتی تو آئی سی سی کیلیے بھی مسائل پیدا ہوں گے جس کی کمائی کا ایک بڑا حصہ پاک بھارت مقابلوں سے حاصل ہوتا ہے۔

یاد رہے کہ ٹی20 ورلڈکپ 2016 میں پاکستان ٹیم کی شرکت حکومت کی اجازت کے بعد ہی ممکن ہوئی تھی۔ بھارتی ٹیم آخری بار 2008 میں ایشیا کپ کیلیے ہی پاکستان آئی تھی، اس کے بعد صرف ایک باہمی سیریز 2012/13 میں ہوئی جب گرین شرٹس نے بھارت جاکر وائٹ بال میچز کھیلے تھے۔