ایمز ٹی وی (فارن ڈیسک)

ایک نئی تحقیق کے مطابق عالمی معیشت پر موٹاپے کے اثرات دنیا بھر میں جاری مسلح تنازعات یا تمباکو نوشی کے اثرات کے برابر ہی ہیں۔

 اس وقت دنیا میں دو ارب دس کروڑ افراد یا دنیا کی تقریباً ایک تہائی آبادی، موٹاپے کا شکار افراد پر مشتمل ہے اور سنہ 2030 تک دنیا کی نصف آبادی کے موٹاپے کا شکار ہونے کا اندیشہ ہے۔

محققین کا کہنا ہے کہ دنیا بھر میں موٹاپے کی وجہ سے ہونے والی مالیاتی نقصانات بڑھ رہے ہیں جن میں موٹے افراد کے علاج معالجے پر آنے والے اخراجات اور بیماری کی صورت میں کام نہ کرنے سے ہونے والے نقصانات شامل ہیں۔

ان کے مطابق اس معاملے سے نمٹنے کے لیے دور رس پالیسیاں بنانے کی ضرورت ہے اور اس سلسلے میں انفرادی تبدیلیوں کی بجائے حالات میں تبدیلی لانے کی ضرورت ہے۔

محققین کا کہنا ہے کہ ان کی تجاویز زیادہ چکنائی اور نشاستے والی خوارک پر زیادہ ٹیکس اور صحتِ عامل کی مہم چلانے جیسی تجاویز سے کہیں زیادہ کارگر ثابت ہو سکتی ہیں۔

رپورٹ کے اختتام پر کہا گیا ہے کہ موٹاپے پر قابو پانے کے لیے اب کارگر حکمتِ عملی بنانا ضروری ہوگیا ہے کیونکہ بات اب بحرانی سطح تک پہنچ رہی ہے۔

موٹاپے کے باعث  لوگوں  کا بڑھتا رجحان، ذیابیطس، پھیپھڑوں کی بیماری اور مختلف قسم کے کینسر کی وجہ بن رہا ہے۔

ایمزٹی وی (فارن ڈیسک)

ہونڈیورس میں پولیس نے ملک کی 19 سالہ ملکۂ حسن ماریہ ہوزے الواردو اور ان کی بہن صوفیہ ٹرینڈیڈ کے قتل کے حوالے سے دو افراد کو گرفتار کیا ہے۔

ماریہ ہوزے الواردو اور ان کی بہن صوفیہ ٹرینڈیڈ کی لاشیں شمالی شہر سارنتا باربرا سے برآمد ہوئی ہیں۔

دونوں خواتین گذشتہ جمعرات سے لاپتہ تھیں اور دونوں کو آخری بار سارنتا باربرا کے علاقے میں منعقدہ ایک تقریب سے نکلتے ہوئے دیکھا گیا تھا۔

 گرفتار بوئے فرینڈ پُلوٹارکو روئیز نے انھیں گولی مارنے اور بعد ازاں دفن کرنے کا اعتراف کیا ہے۔

ماریہ اپریل میں ہونڈیورس کی ملکۂ حسن منتخب ہوئی تھیں اور انھوں نے لندن میں منعقد ہونے والے آئندہ مس ورلڈ کے مقابلۂ حسن میں شرکت کرنا تھی۔

قومی بیوریو کے سربراہ لیناردو اوساریو کا کہنا ہے کہ پُلوٹارکو روئیز نے ٹرینڈیڈ کو کسی دوسرے شخص کے ساتھ رقص کرتے دیکھا اور حسد میں آ کر انھیں گولی مار کر ہلاک کر دیا۔

ایمز ٹی وی (فارن ڈیسک)

امریکہ کی شمال مشرقی ریاستیں شدید برفانی طوفان کی زد میں ہیں اور ریاست نیویارک میں اس طوفان کی وجہ سے کم از کم سات افراد ہلاک ہوگئے ہیں۔

بفلو شہر اور اس کے گردو نواح میں گزشتہ روز  پانچ فٹ برف پڑی ہے اور اس میں مزید اضافے کی پیشنگوئی کی گئی ہے۔

نیویارک میں سات افراد کی ہلاکت کی وجہ موسم کی خرابی کو قرار دیا جا رہا ہے۔ ایک شخص کار کے حادثے میں اور ایک کار میں پھنس کر ہلاک ہوا جبکہ پانچ افراد کی موت دل کا دورہ پڑنے سے ہوئی۔

نیویارک کے علاوہ مشی گن اور نیو ہمپشائر سے بھی کم از کم دو افراد کے سخت موسم کی وجہ سے ہلاک ہونے کی اطلاع ہے۔

ایمزٹی وی:(کراچی) پیپلزپارٹی کے سینئر وزیر نثار کھوڑو نے عمران خان کے خلاف مذمتی قرارداد پیش کی جس میں کہا گیا ہے کہ سندھ کے لوگوں کو غلام کہنا قابل مذمت ہے جبکہ عمران خان کا بیان ان کی ذہنی پستی کا عکاس ہے۔ اسمبلی میں اظہار خیال کرتے ہوئے نثار کھوڑو نے کہا کہ سابق جنرل پرویز مشرف کے لئے ووٹ مانگنے والے عمران خان کا کیا کہیں انہوں نے سندھ کے عوام کے شعور پر حملہ کیا اور وہ سندھی عوام کو اپنا غلام بنانے کی کوشش کر رہے ہیں، عمران شاہ محمود قریشی سے کیوں نہیں کہتے کہ اپنے مریدوں سے کہیں کہ ہاتھ پیر نہ چھوو۔ انہوں نے کہا کہ سرمایہ داری کا طعنہ دینے والا خود جہاز کے بغیر اڑان نہیں بھرتا، سندھ کے عوام کو گالی دی جارہی ہے جو ناقابل برداشت ہے، عمران خان سندھ کے باسیوں سے فوری معافی مانگیں بصورت دیگر انہیں بنی گالہ سے نہیں نکلنے دیں گے۔

اجلاس کے دوران متحدہ قومی موومنٹ کے رہنما فیصل سبزواری نے قرارداد پر اظہار خیال کرتے ہوئے کہا کہ عمران خان کے بیان سے سندھ کے باسیوں کی دل آزاری ہوئی اس لئے ان الفاظ کو فوری واپس لیا جانا چاہیئے۔ انہوں نے کہا کہ سیاستدانوں کو برا کہنے والے ہی آج سیاست کے شہہ سوار بنے ہوئے ہیں، سیاسی مخالفت اپنی جگہ کسی کوعوام دشمن قراردینا اورالزام تراشی مناسب نہیں اس لئے سب کو احتیاط کا مظاہرہ کرنا ہوگا۔