ایمز ٹی وی(اسپورٹس) سری لنکا کرکٹ پر اس سے زیادہ برا وقت نہیں آسکتا۔ 1996 کی عالمی چیمپئن ٹیم کو3میچز کی سیریز کے تیسرے میچ میں بنگلہ دیش کا سامنا کرنا ہے۔ 0-1کے خسارے میں ہوم سائیڈ کیلئے فتح ضروری ہے۔
اب تک ہونے والے 2میچز میں ایک بنگلہ دیش نے جیتا ہے، جبکہ دوسرا بارش کی نذر ہوگیا تھا۔ گذشتہ 31سال میں صرف 2بار ہی ایسا ہوا ہے، جب آئی لینڈرز اپنے ملک میں کھیلی گئی سیریز میں ایک ون ڈے بھی جیتنے میں کامیاب نہیں ہوسکے ہیں۔
اب یہ دیکھنا ہوگا کہ ہوم سائیڈ اس چیلنج کو کیسے پورا کرتی ہے ، تاہم ٹائیگرز کے سری لنکن کوچ ہتھورو سنگھا کو یقین ہے کہ ان کی ٹیم عمدہ کارکردگی کا سلسلہ جاری رکھے گی۔ انہوں نے کہا ہے کہ ٹیم کا مورال بلند ہے اور کھلاڑی سری لنکا کو آخری ون ڈے میں ہرا کر سیریز جیتنے کیلئے پر عزم ہیں۔
بنگلہ دیش اور سری لنکا کی ٹیمیں تیسرے اور آخری ون ڈے میں آج مد مقابل ہونگی۔ انہوں نے کہا کہ آخری ون ڈے میں آئی لینڈرز پر زیادہ دباؤ ہو گا اس لئے ہماری ٹیم کے پاس سیریز جیتنے کا سنہری موقع ہے، تاہم ہدف کے حصول کیلئے ٹیم کے ہر کھلاڑی کو کھیل کے تینوں شعبوں میں 100فیصد کارکردگی دکھانا ہو گی۔