ایمز ٹی وی(تجارت)گزشتہ تین سال کے دوران درآمد کی گئی پرانی کاروں اور ہلکی کمرشل گاڑیوں کی فروخت میں 5 فیصد اضافہ ریکارڈ کیا گیا۔ 2013 کے دوران ملک میں تیار کی جانے والی کاروں اور ہلکی کمرشل گاڑیوں کی پیداوار کے مقابلہ میں درآمد کی گئی استعمال شدہ گاڑیوں کا تناسب 14 فیصد تھا جو سال 2016 کے دوران 19 فیصد تک بڑھ گیا۔ گزشتہ سال کے دوران 46 ہزار 500 پرانی کاریں اور ہلکی کمرشل گاڑیاں درآمد کی گئیں جبکہ مقامی صنعت نے 2 لاکھ 3 ہزار 5 سو گاڑیوں کی پیداوار حاصل کی تھی۔

پاکستان ایسوسی ایشن آف آٹو موٹیو پارٹس اینڈ اسیسریز مینوفیکچررز (پاپام) کی رپورٹ کے مطابق 2015 کے دوران 43 ہزار 4 سو استعمال شدہ گاڑیاں درآمد کی گئیں جبکہ مقامی صنعت نے 2 لاکھ 47ہزار 500 گاڑیوں کی پیداوار حاصل کی تھی جس میں پنجاب حکومت کی اپنا روزگار ا سکیم کے تحت سوزوکی بولان اور راوی کی 50 ہزار گاڑیاں بھی شامل تھیں