ایمزٹی وی(تجارت)شہر قائد میں گڈزٹرانسپورٹرزکی ہڑتال ساتویں روز بھی جاری ہے جس کے باعث ایک طرف تو برآمدی عمل ٹھپ ہے اور دوسری جانب دھاڑی پر کام کرنے والے ڈرائیور کی مشکلات میں بھی اضافہ ہو گیا ہے ۔ تفصیل کے مطابق شہر قائد میں گڈز ٹرانسپورٹرز نے شہر میں بھاری گاڑیوں کے داخلے پر پابندی کے خلاف ہڑتال کی ہوئی ہے جس کے باعث برآمدی شعبے میں کام معطل جبکہ معیشت کا پہیہ جام ہو کر رہ گیاہے ۔ ہڑتال کے باعث بندرگاہوں کے تمام ٹرمینل پردرآمدی،برآمدی کنٹینرزکی آمدوروفت معطل ہے۔ ایکسپورٹرز کا کہنا ہے کہ ہزاروں کنٹینرز کا برآمدی مال فیکٹریوں میں پڑا ہے،گوداموں کی گنجائش پوری ہوگئی،حکومت نے مسئلے کا فوری حل نہ نکالا تو ناقابل تلافی نقصان ہوگا۔ادھربرآمدکنند گان کا کہنا ہے کہ پورے ملک سے یومیہ 6 ارب روپے مالیت کی برآمدات کی جاتی ہیں جو ہڑتال کے باعث رکی ہوئی ہیں۔ دوسری جانب دھاڑی پر کام کرنے والے ڈرائیور اور مزدور بھی ہڑتال کے باعث شدید پریشان ہیں ،کراچی کی شدید دھوپ میں اپنے ٹرکوں کی چھاﺅں میں بیٹھے ڈرائیور وں کا کہنا ہے کہ حکومت جلد سے جلد معاملہ حل کرے تاکہ ہم پیسے کما کر گھر بھیج سکیں اور ہمارے گھروں کو چولہا دوبارہ جلے ۔