ایمزٹی وی وی(تعلیم/کراچی )وفاقی جامعہ اردو کے شعبہ حیاتی کیمیا کے تحت ڈی این اے ٹیکنالوجی اور اس کا ادویات کی تیاری میں استعمال کے موضوع پر ہونے والے سیمینار سے خطاب کرتے ہوئے رئیس کلیہ سائنس پروفیسر ڈاکٹر روبینہ مشتاق نے کہا کہ شعبہ حیاتی کیمیا کے تحت مختلف موضوعات پر تحقیقی سیمینارز اور لیکچرز کا اہتمام خوش آئند ہے. اس سے نہ صرف طلباء بلکہ اساتذہ کی معلومات میں بھی اضافہ ہوگا اور انہیں اپنی تحقیق کا رخ تعین کرنے میں مدد ملے گی۔ ڈاؤ یونیورسٹی آف ہیلتھ سائنسز کی ڈاکٹر فرح سعید نے کہا کہ دور جدید میں تحقیق کے شعبے میں ڈی این اے ٹیکنالوجی نے انقلاب برپا کردیا ہے اور اس کے ذریعے بہت سی بیماریوں کی تشخیص اورعلاج ممکن ہے. اس تکنیک سے بے شمار ادویات اور ویکسینز تیار کی جارہی ہیں، اس کے ذریعے جینیاتی بیماریوں کی تشخیص بھی کی جاسکتی ہے۔ افزائش کے ہارمونز اور انسولین ہارمونز کی تیاری کا کام اس جدید ٹیکنالوجی کی بدولت قابل عمل ہوسکا ہے۔ محقق اس تیکنیک کو انسانی فلاح کے لئے مزید موثر بنانے کے لئے کوشاں ہیں اور اس سلسلے میں وسیع پیمانے پر مسلسل تجربات کئے جارہے ہیں۔ پروگرام کی منتظم ڈاکٹر صفیہ حسن تھیں جبکہ نظامت کے فرائض لبنی انیس نے سرانجام دیئے۔ پروگرام کے اختتام پرصدر شعبہ ڈاکٹر صائمہ خالق نے تمام مہمانوں کا شکریہ ادا کیا۔