ایمز ٹی وی (لاہور) پنجاب کی پولیس نے سیکیورٹی وجوہات کی بنا پر مختلف مذہبی، سیاسی اور سماجی اجتماعات کی نگرانی کے لیے چار ڈرون کیمروں کا استعمال شروع کردیا ہے۔ پولیس ہیڈ کوارٹرز کے سپرنٹنڈنٹ (ایس پی) عمر سعید کے مطابق دہشت گردی کے خطرات اور عوامی اجتماعات کی نگرانی کے لیے مختلف طریقہ کار اور سیکیورٹی آلات کے ساتھ ڈرون کیمروں کا استعمال بھی شروع کردیا گیا ہے.
انہوں نے بتایا کہ اب تک ان کیمروں کو داتا دربار کے عرس، چہلم حضرت امام حسین، این اے 122 میں ضمنی انتخاب اور 21 رمضان کو یوم حضرت علی کے موقع پر نکالے گئے جلوسوں کے دوران فضائی نگرانی کے لیے کامیابی سے استعمال کیا گیا. عمر سعید نے بتایا کہ یہ کیمرے 100 سے 200 فٹ کی بلندی پر پرواز کرسکتے ہیں اور ان میں 20 منٹ تک کام کرنے والی ریچارج ایبل بیٹریز استعمال ہوتی ہیں۔
ان کا کہنا تھا کہ ایچ ڈی کیمروں سے لیس یہ ڈرونز انسانی آنکھ، سی سی ٹی وی کیمروں یہاں تک کہ ہیلی کاپٹر سے بھی فضائی نگرانی سے زیادہ طاقتور اور کارآمد ہیں، جو کسی بھی مشکوک سرگرمی اور شخص کی کڑی نگرانی کر سکتے ہیں بلکہ مشکوک شخص ڈرونز سے نگرانی سے بے خبر رہتا ہے اور بلندی پر پرواز کے باعث یہ نہیں معلوم کیا جاسکتا کہ ڈرون کس کی نگرانی کر رہا ہے۔
انہوں نے بتایا کہ یہ کیمرے رات میں بھی استعمال کیے جاسکتے ہیں۔ ان کا مزید کہنا تھا کہ یہ کیمرے خودکش حملے کے اہم شواہد اکھٹے کرنے اور حملہ آور کی پہچان میں بھی اہم کردار ادا کرسکتے ہیں، جبکہ سی سی ٹی وی کیمرے ایسی صورتحال میں یا تو تباہ ہوجاتے ہیں یا پھر صحیح ریکارڈنگ نہیں کرپاتے جس سے کیس حل کرنے میں تاخیر ہوتی ہے۔
ایمز ٹی وی (انٹرٹینمنٹ) ہنگر گیمز موکنگ جے پارٹ ٹو نے اس ویک اینڈ پر مزید ایک کروڑ تیرہ لاکھ ڈالر کما لئے۔ فلم نے اب تک امریکا میں چوبیس کروڑ پینتالیس لاکھ ڈالر کا بزنس کر چکی ہے لیکن فلم پارٹ ون کا چار ہفتوں میں بزنس کا ریکارڈ نہیں توڑ سکی۔ دوسری جانب وہیل کے کشتی پر حملے پر بنی فلم اِن دی ہارٹ آف دی سی صرف ایک کروڑ دس لاکھ ڈالر کما سکی۔
ایمز ٹی وی (فارن ڈیسک) چین کے دیہات میں ایک ٹانگ سے مکمل معذور ڈاکٹر گزشتہ 10 سال سے مریضوں کا علاج خود ان کے گھر جاکر کررہا ہے جو خدمت کی ایک اعلیٰ مثال ہے۔
چین کے جنوب مغربی صوبے چونگ کنگ کا رہائشی ڈاکٹر روزانہ مریضوں کو علاج اور ادویات فراہم کرتا ہے وہ 14 برس کی عمر میں ایک ٹانگ سے محروم ہوگیا تھا جس کے بعد اس نے خود ڈاکٹر بن کر لوگوں کی خدمت کا ارادہ کیا اور اب گزشتہ 10 سال سے معذوری کے باوجود خود مریضوں کے گھرجاکران کا علاج کرتا ہے۔
چینی ڈاکٹر بارش اور دھوپ میں بھی اپنا بیگ اٹھائے بیساکھیوں کے سہارے گھر گھر جاکر لوگوں کا علاج کرتا ہے، 2003 سے اب تک چلتے چلتے بیساکھیوں کے 45 جوڑے گھس کرٹوٹ چکے ہیں لیکن ڈاکٹر کے عزم میں کوئی کمی نہیں آئی اور وہ پوری قوت سے اپنا مشن انجام دے رہا ہے۔ عزم وہمت کی مثال قائم کرنے والا یہ ڈاکٹر ایسے مریضوں کا مفت علاج کرتا ہے جو غربت کے باعث دوائیں خریدنے کی استطاعت نہیں رکھتے۔
ایمزٹی وی(لاہور)قصور کے علاقے الٰہ آباد میں ورکشاپ میں کام کرنے والے تین کمسن بچے زہریلا کھانا کھانے سے جاں بحق ہوگئے جبکہ ایک کی حالت تشویش ناک ہے۔تفصیلات کے مطابق قصور کے نواحی علاقہ الہ آباد میں ایک ورکشاپ میں کام کرنے والے چار بچوں نے قریبی ہوٹل سے کھانا خریدا تھااور کھا کرسو گئے۔ رات گئے ان کی حالت خراب ہوگئی جس کے باعث 10سالہ ابرار، 11سالہ صادق اور 15سالہ کاشف موقع پر جاں بحق جبکہ کاشف نامی بچے کی حالت تشویشناک تھی۔اس واقعہ کا علم صبح اس وقت ہوا جب فیکٹری کا مالک جاوید فیکٹری میں پہنچا تو تینوں بچے جاں بحق ہوچکے تھے جبکہ فیصل کو نازک حالت کے پیش نظر مقامی اسپتال منتقل کر دیا گیا ہے۔
ایمزٹی وی(کراچی)جسٹس سجاد علی شاہ نے سندھ ہائیکورٹ کے چیف جسٹس کا حلف اٹھا لیا۔ نئے چیف جسٹس کا کہنا ہے کہ عدلیہ میں کرپشن برداشت نہیں کی جائےگی۔ تقریب میں ہائیکورٹ اور ماتحت عدالتوں کے ججز کے علاوہ آئی جی سندھ اور ڈی جی رینجرز سمیت دیگر اعلیٰ حکام بھی شریک ہوئے۔ حلف برداری کے بعد میڈیا سے گفتگو میں چیف جسٹس جسٹس سجاد علی شاہ کا کہنا تھا کہ عدلیہ میں کرپشن برداشت نہیں کی جائےگی۔ 1966 سے 2000 تک کے تمام مقدمات کو آئندہ سال جون تک نمٹا دیا جائےگا‘ سابق چیف جسٹس کی پالیسی برقرار رہے گی۔ چیف جسٹس سندھ ہائیکورٹ کی تقریب حلف برداری ارود میں ہوئی۔ تقریب میں ڈی جی رینجرز پہلی بار شریک ہوئے۔
ایمز ٹی وی (فارن ڈیسک) مصر میں گدھے کے گوشت کی بڑھتی ہوئی فروخت کو روکنے اور اس مکروہ کاروبار میں ملوث افراد کے گرد گھیرا تنگ کرنے کے لیے گدھوں کے شناختی کارڈز بنانے کا فیصلہ کرلیا گیا۔
گزشتہ کچھ عرصے سے مصر کے مختلف حصوں میں گدھے کے گوشت کی فروخت ہونے کی خبریں منظر عام پر آنے کے بعد عوامی حلقوں میں سنسنی پھیل گئی۔ مصر کی حکومت نے اس حوالے سے عوام کو متنبہ کرنے کے لیے الیکٹرانک میڈیا کے ذریعے آگہی مہم اور خاکے بھی چلائے۔
پولیس نا صرف جگہ جگہ چھاپے مار کر قصابوں اور دکانداروں کو گرفتار کر رہی ہے بلکہ گدھوں کی گنتی کر کے ان کے شناختی کارڈز جاری کیے جارہے ہیں۔ یوں اب جس شخص کا گدھا بھی غائب نظر آیا۔ پولیس پوچھ گچھ کرسکتی ہے کہ کہیں اْسے ذبح کر کے قصاب کی دکان پر تو نہیں پہنچا دیا گیا۔