ایمزٹی وی (اسپورٹس) پاکستان کرکٹ ٹیم کے سابق کپتان یونس خان کا کہنا ہے کہ وہ جلد سانحہ پشاور میں شہید ہونے والے بچوں کے والدین سے ملاقات کریں گے، سابق کپتان نے کہا کہ کیوی ٹیم کے کھلاڑی بھی افسوس ناک سانحہ پر افسردہ تھے۔ کراچی میں میڈیا سے گفتگو میں یونس خان کا کہنا تھا کہ پاکستانی کرکٹرز کی طرح سانحہ پشاور سے نیوزی لینڈ کی کرکٹ ٹیم کے کھلاڑیوں کو بھی دکھ اور افسوس ہوا۔ انکا کہنا تھا کہ کیوی ٹیم کے کپتان کین ولیم سن نے پانچ میچز کی پرائز منی اور فاسٹ بالر ایڈم ملن نے ایک میچ کی پرائز منی ان کے حوالے کی ہے، جسے وہ جلد پشاور جاکر پاک فوج کے حوالے کریں گے۔ورلڈ کپ 2015 کے حوالے سے بات کرتے ہوئے یونس خان کا کہنا تھا کہ انکی کوشش ہوگی کہ میگا ایونٹ میں پاکستان کو کامیابی سے ہمکنار کرائیں۔ریٹائرمنٹ کے حوالے سے پلان بنایا ہے جسکا اعلان بعد میں کریں گے۔

ایمزٹی وی   (کراچی) روسی نیوز ایجنسی Sputnik نے فیصل آباد میں پھانسی دیئے جانے والے اخلاص اخلاق روسی کے والد کے حوالے سے الزام لگایا کہ امریکا تفتیش کے لئے اخلاص کو پاکستان سے خریدنا چاہتا تھا لیکن جب اخلاص نے بتایا کہ وہ روسی شہری ہے تو امریکا پیچھے ہٹ گیا۔ اخلاص کے والد اخمند اخلاص نے الزام عائد کیا کہ پاکستانی حکام اسکے بیٹے کو امریکا کے ہاتھ فروخت کرنا چاہتے تھے جب اس نے بتایا کہ وہ روسی ہے تو پھرانہوں نے نہیں خریدا۔ اخمند کا کہنا تھا کہ امریکا باقاعدگی سے پاکستان سے غیر ملکی قیدیوں کو خریدتا ہے۔ ان قیدیوں میں سے کچھ کو پولینڈ، بلغاریہ اور مصر میں رکھا گیا ہے اور کچھ پاکستانی قیدی بھی خریدے گئے جنہیں امریکا نے گوانتا ناموبے میں رکھا ہے۔ اخلاص کے والد کا کہنا تھا کہ امریکا نے کچھ قیدیوں کو تفتیش کے بعد قتل کردیا۔ رپورٹ کے مطابق اخمند کا کہنا تھا کہ اتوار کی صبح اسے ایک پولیس انسپکٹر نے آگاہ کیا کہ فوری فیصل آباد پہنچو اور اپنے بیٹے سے آخری ملاقات کر لو، اسے پھانسی دی جانے والی ہے۔ اخلاص روسی کو 2003ء میں پاکستان کے اس وقت کے صدر پرویز مشرف کو قتل کرنے کے الزام میں سزائے موت سنائی گئی تھی۔ پھانسی پانے والے اخلاص کے والد کا کہنا ہے کہ اسکی لاش روس میں اسکے آبائی قصبے لائی جائے گی تاکہ اسکی والدہ اوربھائی اسکا چہرہ دیکھ سکیں اور روس میں اسے دفن کیا جائے گا۔ روسی وزارت خارجہ نے اپنے بیان میں اسکی پھانسی کی تصدیق کردی ہے۔ اخلاص روسی شہر و ولگو گریڈ میں 1981 میں پیدا ہوا اسکے والد پاکستانی جبکہ ماں روسی شہری تھی ۔

ایمزٹی وی (تجارت) وزیر خزانہ اسحاق ڈار نے وزیر اعظم نواز شریف کو ملاقات میں بریفنگ دیتے ہوئے بتایا کہ پاکستان کے زرمبادلہ کے ذخائر 15 ارب ڈالر سے تجاوز کر گئے ہیں۔ اسلام آباد میں وزیر اعظم نواز شریف سے وزیر خزانہ اسحاق ڈار نے ملاقات کی، جس میں وزیر خزانہ اسحاق ڈار کی وزیراعظم نواز شریف کو 15 ارب ڈالر زرمبادلہ کے بارے میں تفصیلات پر بریفنگ دی۔ بریفنگ کے مطابق پاکستان کے زرمبادلہ کے ذخائر 15 ارب ڈالر سے تجاوز کر گئے ہیں۔ زرمبادلہ ذخائر میں دس ارب اسٹیٹ بینک کے پاس اور بقایا کمرشل بینکوں کے پاس ہیں۔ وزیر اعظم نے وزیر خزانہ اسحاق ڈار اور انکی ٹیم کو کامیابی پرمبارک باد بھی دی ۔

ایمز ٹی وی (فارن ڈیسک )  مراکش میں ریال میڈرڈ نے سین لورینزو کو دو گول سے شکست دیکر کلب ورلڈ کپ کا  ٹائٹل جیت لیا،مراکش میں کھیلا گیا فائنل انتہائی دلچسپ رہا ۔ ہزاروں افراد کی گنجائش والا اسٹیڈیم تماشائیوں سے بھرا ہوا تھا۔،پہلے ہاف میں اسکور ایک صفر رہا۔دوسرا ہاف کے شروع ہی میں ریال میڈرڈ نے دوسرا گول بھی داغ دیا ۔اس کے بعد سین لورینزو نے میچ میں واپسی کی بہت کوشش کی لیکن کامیابی نہ ملی۔ریال میڈرڈ نے میچ دو صفر سے جیت کر پہلی بار کلب ورلڈ کپ ٹائٹل جیت لیا۔