ایمزٹی وی (فارن ڈیسک) تیونس کے عبوری صدر منصف مرزوقی نے ملک میں ہونے والے پہلے شفاف صدارتی انتخابات میں شکست تسلیم کرنے سے انکار کر دیا ہے۔ انھوں نے کہا ہے کہ انکے حریف کی جانب سے فتح کا اعلان ’غیر جمہوری‘ ہے۔ اس سے قبل انکے حریف الباجی قائد السبسی نے دعویٰ کیا تھا کہ انھوں نے اتوار کو ہونے والے صدارتی انتخابات میں کامیابی حاصل کی ہے جبکہ ایگزٹ پولز میں کہا گیا ہے کہ انھیں 55.5 فیصد ووٹ ملے ہیں۔ دارالحکومت تیونس میں 88 سالہ السبسی کے حامیوں نے جشن منایا۔ تاہم انکے حریف اور ملک کے نگراں صدر منصف مرزوقی کے حامیوں کا کہنا ہے کہ انتخابات اتنے کانٹے کے تھے کہ نتائج کے بارے میں حتمی طور پر کچھ نہیں کہا جا سکتا۔ عبوری صدر مرزوقی نے کہا ’جیت کا اعلان غیر جمہوری ہے۔ اگر ہم واقعی جمہوری ملک ہیں اور قانون کی پاسداری کرتے ہیں تو ہمیں انتظار کرنا چاہیے۔ ہم آپ کو یہ کہنا چاہتے ہیں کہ ہم فاتح رہے، ہم فاتح ہیں ہم فتح یاب ہوئے۔ تیونس نے جیت حاصل کی ہے اور آپ کامیاب ہوئے ہیں۔ آپ نے تیونس کے لیے، جمہوریت کے لیے اور انسانی حقوق کے لیے جیت حاصل کی ہے۔  ناقدین کا کہنا ہے کہ السبسی کی کامیابی کا مطلب بدنام نظام کی واپسی ہے جبکہ الباجی قائد کا کہنا ہے کہ وہ ٹیکنوکریٹ ہیں اور ملک میں استحکام لائیں گے۔ واضح رہے کہ تیونس پہلا ملک تھا جس نے اپنے رہنما کو حکومت سے ہٹا کر خطے میں بغاوت کی ہوا چلائی تھی جسے ’عرب سپرنگ‘ کا نام دیا گیا تھا۔ تیونس میں دوسرے مرحلے کے انتخابات میں باضابطہ نتائج کا اعلان ہونا ابھی باقی ہے تاہم ایک ایگزٹ پول میں السبسی کو 55.5 فیصد ووٹ ملنے کی پیش گوئی کی گئی ہے جبکہ دوسرے ایگزٹ پول میں بھی اسی قسم کی بات بتائی گئی ہے۔ ایسبسی کے حامیوں نے دارالحکومت تیونس میں جشن منایا۔ تیونس میں انتخابات کے پیش نظر سکیورٹی کے انتظامات سخت کیے گئے تھے اور لیبیا کی سرحد کو بند کر دیا گيا تھا۔ اتوار کو کم از کم تین افراد پر مشتمل ایک حملہ آور گروہ نے کیروان شہر کے پاس ایک پولنگ سٹیشن کو نشانہ بنایا۔ سکیورٹی فورسز کا کہنا ہے کہ اس نے ایک حملہ آور کو ہلاک جبکہ تین افراد کو گرفتار کیا۔ اتوار کو ووٹ ڈالنے کے عمل کے اختتام پر السبسی نے ایک مقامی ٹی وی چینل پر کہا ’میں اپنی کامیابی کو تیونس کے شہیدوں کے نام کرتا ہوں۔‘ انھوں نے مزید کہا ’میں مرزوقی کا شکریہ ادا کرتا ہوں اور کسی کو بھی علیحدہ کیے بغیر اب ہم دونوں مل کر کام کریںگے۔ 88 سالہ السبسی معزول صدر زین العابدین کی حکومت کا حصہ بھی رہ چکے ہیں اور ان انتخابات میں سیکیولر جماعت ندا تیونس (صدائے تیونس) کی نمائندگی کر رہے ہیں۔ انکے مخالف 67 سالہ منصف مرزوقی سنہ 2011 سے عبوری صدر ہیں۔ مرزوقی انسانی حقوق کے کارکن ہیں اور سابقہ حکومت کے دور میں وہ جلاوطنی اختیار کرنے پر مجبور ہو گئے تھے۔ السبسی نے گذشتہ ماہ ہونے والے پہلے مرحلے کے صدارتی انتخابات میں 39 فی صد ووٹ حاصل کیے تھے۔

ایمزٹی وی (فارن ڈیسک) فرانسیسی میڈیا کے مطابق فرانس کے شہر ڈیژوں میں ایک شخص نے اپنی گاڑی پیدل چلنے والے افراد پر چڑھا دی جس کے نتیجے میں گیارہ افراد زخمی ہوئے ہیں۔ فرانسیسی میڈیا کے مطابق اس شخص نے پیدل چلنے والے افراد پر گاڑی چڑھانے سے قبل ’نعرہ تکبیر‘ بلند کیا۔ اس شخص نے شہر کے پانچ مختلف حصوں میں پیدل چلنے والوں پر گاڑی چڑھائی۔ پولیس ذرائع کا کہنا ہے کہ یہ شخص ذہنی طور پر ٹھیک نہیں ہے اور وہ نفسیاتی علاج کے غرض سے ہسپتال میں داخل رہا ہے۔ عینی شاہدین نے پولیس کو بتایا کہ اس 40 سالہ شخص نے کہا کہ وہ فلسطینی بچوں کے لیے یہ قدم اٹھا رہا ہے۔ واضح رہے کہ فرانس میں دو روز میں یہ دوسرا واقعہ ہے جس میں حملہ آور نے ’نعرہ تکبیر‘ بلند کیا ہو۔ یاد رہے کہ ہفتے والے روز فرانس کے شہر ٹور میں ایک شخص کو اس وقت گولی مار کر ہلاک کر دیا گیا جب اس نے پولیس پر چاقو سے حملہ کیا۔ پولیس کے مطابق اس شخص نے ٹور کے پولیس سٹیشن میں ’نعرہ تکبیر‘ بلند کیا اور پولیس اہلکاروں پر حملہ کیا جسکے نتیجے میں تین اہلکار زخمی ہوئے۔ پولیس نے حملہ آور کو گولی مار کر ہلاک کردیا۔ فرانسیسی میڈیا کے مطابق حملہ آور افریقی ملک برنڈی میں پیدا ہوا لیکن فرانسیسی شہری تھا ۔

ایمز ٹی وی (فارن ڈیسک) نیویارک میں کرسمس کی رنگ برنگی روشنیوں نے ایمپائر اسٹیٹ بلڈنگ کو جگمگا دیا ۔کرسمس  کے آتے ہی لوگوں کی خوشیوں کا ٹھکانہ نہیں ہےاور لوگوں کا  اس کی تیاریوں میں جوش خروش اور بھی بڑھ جاتا ہے ، نیویارک میں ایمپائر اسٹیٹ بلڈنگ کو بھی رنگ برنگی لائٹوں سے روشن کر دیا گیا ہے۔ایمپائر اسٹیٹ بلڈنگ پر لائٹ شو کے دوران کئی لائٹ تھیم پیش کی جائیں گی،سب سے بہترین لائٹ تھیم کو کرسمس کے موقع پر دوبارہ روشن کیا جائے گا۔

ایمزٹی وی (فارن ڈیسک) جنوبی کوریا کے جوہری پلانٹ کے آپریٹروں نے سائبر حملوں کا مقابلہ کرنے کے لیے اپنی اہلیت جاننے کی مشق کرے گی۔ یہ مشق ڈیٹا کے افشا ہو جانے اور ایک ہیکر کی جانب سے دھمکی کے بعد کی جائے گی۔ گذشتہ ہفتے کوریا ہائیڈرو اور نیوکلئیر پاور کمپنی (کے ایچ این پی) کے اوزاروں کے استعمال کے کتابچے کو کسی گروپ یا شخص نے آن لائن پر جاری کر دیا تھا۔ اسکے ساتھ ایک انتباہ بھی جاری کیا گیا تھا کہ اگر کرسمس تک تین ری ایکٹر بند نہیں ہوتے تو لوگ ’اس سے دور ہی رہیں‘۔ کے ایچ این پی نے کہا ہے کہ افشا ہوجانے والے کتابچے سے ری ایکٹر کے تحفظ کو کوئی خطرہ نہیں ہے۔

واضح رہے کہ کے ایچ این پی کوریا میں جوہری توانائی کا واحد آپریٹر ہے اور یہ حکومتی ادارے کوریا الکٹرک پاور کارپوریشن کا حصہ ہے۔ آپریٹر نے ایک بیان میں کہا کہ وہ چار جوہری پلانٹوں میں پیر اور منگل کو وسیع پیمانے پر مشقوں کا سلسلہ شروع کر رہا ہے۔

"پریزیڈنٹ آف اینٹی نیو کلیئر ری ایکٹر گروپ" کے نام سے کسی ہیکر نے جمعے کو سوشل میڈیا پر جوہری ری ایکٹروں کا بلو پرنٹ جاری کر دیا تھا۔ جنوبی کوریا کی یون ہیپ نیوز ایجنسی کا کہنا ہے کہ 15 دسمبر کے بعد کی جانے والی اس قسم کی یہ تازہ ترین پوسٹ ہے۔

اس سے قبل انٹرنیٹ پر ڈالے جانے والے مواد میں ان جوہری ری ایکٹروں کی ایئر کنڈیشننگ اور کولنگ کے نظام کی تفصیلات شامل تھیں۔ اسکے علاوہ اس میں تابکاری کی زد میں آنے کی رپورٹ اور ملازمین کے ذاتی اعداد و شمار شامل تھے۔ حکام کا کہنا ہے کہ ہیکنگ کے سلسلے میں جانچ کی جا رہی ہے۔ کمپنی نے کہا ہے کہ ان میں شامل معلومات اصل ٹیکنالوجی کے متعلق نہیں ہے۔ سونی پکچرز نے ایک دھمکی کے بعد اپنی فلم کی ریلیز ملتوی کردی ہے۔ جنوبی کوریا کی حکومت نے بتایا کہ ری ایکٹروں کا مرکزی آپریٹنگ نظام ہیک نہیں کیا گیا ہے۔ واضح رہے کہ کے ایچ این پی ملک میں 23 جوہری ری ایکٹر چلاتا ہے اور ملک کو 30 فیصد بجلی فراہم کرتا ہے۔ یہ واضح نہیں ہے کہ گذشتہ ماہ سونی پکچرز کے ہیکنگ معاملے سے اس ہیکنگ کا کوئی تعلق ہے۔ سونی پکچرز کی ہیکنگ میں غیر ریلیز شدہ فلموں کو آن لائن ڈال دیا گیا تھا اور امریکہ کا کہنا تھا کہ شمالی کوریا ان سائبر حملوں کے پیچھے ہے جبکہ پیانگ یانگ نے ان الزامات کی تردید کی ہے اور ایک مشترکہ تفتیش کی بات کہی ہے ۔