ایمزٹی وی(ٹیکنالوجی)امریکی سائنسدان مشتری کے رازوں سے پردہ اٹھا سکیں گے ، ناسا کا ایک ارب دس کروڑ ڈالر لاگت والا جہاز جونو جمعرات کو کشش ثقل کی زد میں آ کر اس کے مدار میں داخل ہو گا ، تاہم اس کے لیے جونو کو بروقت اور مناسب حد تک رفتار کم کرنا ہو گی ۔ امریکی خلائی ادارے ناسا کا خلائی جہاز جونو تیزی سے مشتری کی جانب بڑھ رہا ہے ۔ یہ جہاز جمعرات کو نظام شمسی کے سب سے بڑے سیارے کی کشش ثقل کی زد میں آکر اسکے گرد مدارمیں داخل ہو جائے گا ۔ تاہم اس مقصد کے لیے جونو جہاز کو رفتار کم کرنے کے لیے بالکل درست وقت پر بالکل درست طریقے سے بریک لگانا ہو گی اور اگر جونو مناسب حد تک رفتار کم کرنے میں ناکام رہا تو ایک ارب دس کروڑ ڈالر لاگت والا یہ جہاز مشتری کے قریب سے سیدھا آگے گزر کر خلا کی اتھاہ وسعت میں کھو جائے گا ۔ تاہم مشن کامیاب ہونے کی صورت میں جونو آئندہ ڈیڑھ سال تک مشتری پر تحقیق کرے گا جس میں مشتری کے گھنے سیاہ بادلوں کا راز اس پر ٹھوس مرکز اور سرخ دھبوں کی نوعیت کو جانچنا ہے ۔ اس جہاز کا کیمرہ دو ہزار اٹھارہ تک کام کرنا بند کر دے گا جس کے بعد جونو مشتری کی فضا کے اندر غوطہ لگا کر خودکشی کر لے گا۔