نیویارک: وزیراعظم آزاد کشمیر راجہ محمد فاروق حیدر کا کہنا ہے کہ انتہاء پسند بھارتی وزیر اعظم نے خطے کا امن خطرے میں ڈال دیا ہے، تارکین وطن مل کر مظلوم کشمیریوں کے لیے آواز اٹھائیں۔

 

اپنے ایک بیان میں وزیراعظم آزاد کشمیر کا کہنا تھا کہ مقبوضہ وادی میں انسانیت کو کچلنے کی مثال انسانی تاریخ میں نہیں ملتی، مقبوضہ کشمیر کے عوام مکمل طور پر محصور ہیں ان کو گھروں میں قید کر دیا گیا ہے، مقبوضہ کشمیر میں مکمل لاک ڈاﺅن ہے۔

 

انہوں نے کہا کہ تارکین وطن کشمیری اپنے بھائیوں کے سفیر بن کر ان کی آواز کو دنیا تک پہنچائیں، سیاسی تفریق کا بالائے طاق رکھتے ہوئے کشمیریوں کے مسئلے اور بھارتی عزائم سے دنیا کو آگاہ کریں، مقبوضہ کشمیر کی حالیہ صورتحال پر سخت تشویش ہے، 21روز سے وہاں فون اور انٹرنیٹ سمیت دیگر ذرائع ابلاغ معطل ہیں اور وہاں کھانے پینے کی اشیاء بھی ناپید ہوگئی ہیں۔

 

راجہ فاروق حیدر نے کہا کہ مسئلہ کشمیر اقوام متحدہ کی قراردادوں کے مطابق حل طلب مسئلہ ہے، جس پرسلامتی کونسل کی قراردادیں موجود ہیں، کشمیریوں کو سلامتی کونسل کی قراردادوں کے مطابق رائے شماری کا دیا جائے۔

 

کشمیر پر وزیر اعظم کے قوم سے خطاب کا خیر مقدم کرتی ہوں: مشال ملک

 

وزیر اعظم آزاد کشمیر کا کہنا تھا کہ تارکین وطن ہمارا اثاثہ ہیں جو بیرون ممالک میں ہمارے سفیر ہیں، تارکین وطن نے ہمیشہ کشمیریوں کی آواز کو بلند کیا ہے اور دنیا کے سامنے بھارتی عزائم کو بے نقاب کیا ہے، اب وقت آگیا ہے کہ کشمیر کے مسئلے کا حل کیا جائے۔

 

ان کا مزید کہنا تھا کہ مقبوضہ کشمیر میں انسانی تاریخ کے بدترین مظالم ڈھائے گئے، نوجوانوں کو پیلٹ گنوں سے اندھا کر کے ان کی بینائی چھینی گئی، عورتوں کی عصمت دریاں کی گئی۔