اسلام آباد: وزیر مملکت داخلہ شہریار آفریدی نے کہا ہے کہ بہادر سپوتوں کے اہلخانہ کی دیکھ بھال حکومت کی ذمہ داری ہے، وزیر اعظم نے ٹوٹل7کروڑ روپے کا پیکج دیا ہے جب کہ شہید ایس پی کے بھائی کے ایک بیٹے کو بھی کسی ڈپارٹمنٹ میں لگایا جائیگا۔
وزیر مملکت داخلہ شہریار آفریدی کا کہنا ہے کہ بعض عناصر اپنے مذموم مقاصد کے لیے ملک میں انتشار پھیلا رہے ہیں۔ پریس کانفرنس میں انھوں نے کہا پاکستان ایک جمہوری ملک ہے اور سیاست کرنے کا سب کوحق ہے، سوشل میڈیا پرحکومت کیخلاف منفی پروپیگنڈا کیا جا رہا ہے۔ شہیدایس پی طاہرداوڑ نڈر افسر تھے اور ان کی فیملی پر بھی قاتلانہ حملے ہوئے، ریاست شہید ایس پی طاہرداوڑ کے ورثا کے ساتھ ہے، بہادر سپوتوں کے اہلخانہ کی دیکھ بھال حکومت کی ذمہ داری ہے، وزیر اعظم نے طاہر داوڑکے اہلخانہ کیلئے 5 کروڑامدادی رقم کا اعلان کیا ہے۔
شہریار آفریدی نے کہا کہ اس واقعے پر وزیر اعظم نے فوری نوٹس لیا اورجے آئی ٹی قائم کی، اس کے علاوہ حکومتی اور اپوزیشن کے نمائندوں پرمشتمل پارلیمنٹیرینز کمیٹی بنائی جائیگی جوجے آئی ٹی کیساتھ ملکرکام کرے گی، وزیر اعظم نے ٹوٹل7کروڑ روپے کا پیکج دیا ہے، شہید ایس پی کے بھائی کے ایک بیٹے کو بھی کسی ڈپارٹمنٹ میں لگایا جائیگا۔
وزیر مملکت کاکہنا تھا کہ کراچی میں تجاوزات کیخلاف آپریشن سے وفاقی حکومت کاکوئی تعلق نہیں تاہم آپریشن میں غریبوں کوتنگ نہیں کیاجائیگا۔ اس سے قبل وزیرمملکت داخلہ شہریارآفریدی نے اسلام آباد ماڈل کالج فارگرلزایف سیون ٹومیں گرین اینڈکلین پاکستان نمائش کادورہ کیا۔