ایمز ٹی وی(ساہیوال) ساہیوال کول پاور پروجیکٹ کے لئے کوئلے کا جہاز کراچی کی بندرگاہ پہنچ گیا ہے، جہاں سے مال گاڑی کے ذریعے اسے ساہیوال منتقل کیا جائیگا۔محکمہ ریلوے نے کوئلے کی ترسیل کے لئے مال گاڑی کراچی پہنچا دی ہے
اور لوڈنگ کا کام شروع ہوگیا ہے۔ریلوے کے چیف ایگزیکٹو آفیسر جاوید انور کے مطابق 29 جنوری کو پہلی مال گاڑی کوئلہ لیکر کراچی سے ساہیوال کول پاور پلانٹ کے لئے روانہ ہوجائے گی،شروع میں ایک جبکہ بعد میں روزانہ پانچ مال گاڑیوں کے ذریعے کوئلہ پاور پلانٹ تک پہنچایا جائیگا۔
سی ای او ریلوے کے مطابق کوئلے کی ترسیل کے لئے امریکہ سے چار ہزار ہارس پاور والے انجن پاکستان پہنچنا شروع ہو گئے ہیں۔سیکرٹری انرجی پنجاب اسعد رحمن گیلانی کے مطابق تقریبا پانچ ماہ تک پاور پلانٹ پر کوئلہ ا سٹاک کیا جائے گا اور اسی سال جون میں ساہیوال کول پاور پلانٹ میں بجلی کی پیداوار شروع ہو جائے گی۔انہوں نے مزید بتایا کہ ساہیوال کول پاور پلانٹ13سو میگاواٹ بجلی پیدا کرنے کی صلاحیت رکھتا ہے