ایمز ٹی وی (لاہور) تحریک انصاف اور ضلعی انتظامیہ کے درمیان یکم مئی کو لاہور میں مال روڑ پر جلسے کے حوالے سے آج پھر مذاکرات ہوں گے ۔ ضلعی انتظامیہ نے تین متبادل مقامات تجویز کر دیئے ۔ پی ٹی آئی مقام بدلنے کو تیار نہیں ۔ کپتان نے یکم مئی کو چیئرنگ کراس مال روڑ پر جلسہ کا اعلان کر رکھا ہے ۔ اس ضمن میں تحریک انصاف نے ضلعی انتظامیہ کو آگاہ کرتے ہوئے باضابطہ درخواست بھی دے رکھی ہے ۔ گزشتہ شب ہونےوالے مذاکرات میں انتظامیہ نے پی ٹی آئی کے رہنمائوں کو تحریری طور پر مال روڑ کی کھلی جگہ پر دہشت گردی کے خطرے سے آگاہ کردیا ہے ۔ ساتھ ہی ساتھ انتظامیہ نے بتا دیا کہ مال روڑ پر جلسوں کے حوالے سے لاہور ہائیکورٹ نے پابندی بھی لگا رکھی ہے ۔ ضلعی انتظامیہ نے سمن آباد ، ڈونگی گرائونڈ ، ناصر باغ اور فٹ بال سٹیڈیم میں جلسے کے لئے تحریک انصاف کی قیادت کو تجویز دیدی ہے تاہم پی ٹی آئی کے وفد کے سربراہ میاں اسلم اقبال کا کہنا تھا کہ جلسے کا مقام تبدیل نہیں ہوگا اور مال روڑ پر ہی جلسہ کیا جائے گا ۔ گزشتہ شب مذاکرات بے نتیجہ ختم ہونے پر آج سہ پہر دوبارہ مذاکرات کا فیصلہ کیا گیا ہے ۔