ایمز ٹی وی (موسم) شمالی اور شمال مشرقی سرد اور خنک ہواؤں کی وجہ سے کراچی میں سردی بڑھنے لگی ،آج جمعرات کو شہر کا کم سے کم درجہ حرارت 10 ڈگری سینٹی گریڈ تک گرنے کا امکان ہے۔
محکمہ موسمیات کے مطابق سمندری ہوائیں ماند پڑنے اور دوسری سمت سے مسلسل سرد ہوائیں چلنے کے باعث صبح کے اوقات میں گزشتہ چندروز کے مقابلے میں سردی کی شدت مزید بڑھ گئی ہے، بدھ کے روز شہر کا کم سے کم درجہ حرارت 11 ڈگری سینٹی گریڈ ریکارڈ کیا گیا جبکہ آج مزید ایک ڈگری کمی سے شہر کا درجہ حرارت 10 ڈگر ی سینٹی گریڈ تک گرسکتا ہے۔ محکمہ موسمیات کے مطابق بلوچستان اور ایران کی جانب سے شمالی اور شمال، مشرقی ہواؤں کی وجہ سے شہر ہلکی پھلکی سردی کی لپیٹ میں ہے جس میں صبح اور رات کے وقت شدت دیکھی جارہی ہے،
گزشتہ روز کی طرح آج بھی مطلع صاف اور خشک رہنے کی توقع ہے،دوسری جانب صبح کے وقت ہوا میں نمی کا تناسب 47 فیصد کے قریب ریکارڈ کیا گیا ہوا میں نمی کا تناسب کم ہونے کی وجہ سے شہر کی فضا پر دھند کی کیفیت طاری نہیں ہورہی۔ محکمہ موسمیات کے ریجنل ڈائریکٹر شاہد عباس کے مطابق 2 روز بعد سردی کی موجودہ لہر کا خاتمہ ہوجائے گا اور سمندری ہوائیں جزوی طورپر بحال جبکہ شمالی سرد ہوائیں ماند پڑجائیں گی جس کی وجہ سے خنکی اور سردی کا موجودہ زور ٹو ٹ جائے گا دو روز بعد موسم میں 2 سے 3 ڈگری سینٹی گریڈ اضافے کا امکان ہے معتدل موسم کا سلسلہ ایک سے ڈیڑھ ہفتے تک جاری رہے گا تاہم مغرب کی جانب سے آئندہ بارشوں کا کوئی دوسرا نظام پاکستان میں داخل ہونے کے بعد ایک بار پھر موسم سرد اور خشک ہوجائے گا۔