کراچی: سر سید یونیورسٹی آف انجینئرنگ اینڈٹیکنالوجی نےکامیاب جوان پروگرام کےبارے میں طلباء کی رائےاورتاثرات کاجائزہ لینےکےلیےایک آن لائن سیشن کا انعقاد کیا گیا ۔

طلباء اور پروگرام کے سربراہ عثمان ڈار نے سازگار ماحول میں اعلیٰ معیار کی تدریسی خدمات انجام دینے پر سرسید یونیورسٹی کے کردار کو بے حد سراہا اور کہا کہ یہاں کے اساتذہ قابل اور تجربہ کار ہیں ۔

وزیرِاعظم کے خصوصی مشیر اور کامیاب جوان پروگرام کے سربراہ عثمان ڈار نے طلباء کے ساتھ براہ راست بات چیت کی اور پروگرام اور اس کی افادیت سے متعلق سوالوں کے جوابات دئے ۔

انھوں نے بتایاکہ ہم طلباء کو وہ کورسز کرا رہے ہیں جو انہیں ملازمت کے حصول میں بہت مدد دیں گے ۔ اس پروگرام کو مزید بڑھایا جارہا ہے ۔ یہ لائیوسیشن کرنے کامقصد آپ کے مسائل کے بارے میں واقفیت حاصل کرنا تھا تاکہ اس کا حل نکالا جاسکے ۔ سفیر ہونے کے ناطے اب آپ بھی اپنا کردار ادا کریں ۔

اس موقع پر خطاب کرتے ہوئے سرسید یونیورسٹی کے چانسلر جاوید انوار نے کہا کہ معاشرے یا قوم کی ترقی ٹیکنالوجی کی ترقی سے منسلک ہے ۔ انفارمیشن ٹیکنالوجی اب ہر ادارے کی ضرورت بن گئی ہے ۔ کوئی شعبہ ایسا نہیں ہے جہاں آئی ٹی کا کوئی کردار نہ ہو ۔ وقت کا تقاضا ہے کہ جدیدیت کو فروغ دینے کے لیے ایسے ساز و سامان مہیا کئے جائیں جو نئے آئیڈیاز کو سامنے لانے کا باعث بنیں ۔
چانسلر جاوید انوار نے نشاندہی کی کہ اس قومی تعمیراتی عمل میں حکومتِ پاکستان اور NAVTTC کے ساتھ سرسیدیونیورسٹی ایک فعال شراکت دار کی حیثیت سےشریک ہے جو نوجوانوں کی ترقی کو مدنظر رکھتے ہوئے انسانی سرمایہ میں سرمایہ کاری کو یقینی بناتا ہے ۔

سرسید یونیورسٹی کے وائس چانسلرکی جانب سے مہمانوں کا خیر مقدم کرتے ہوئے رجسٹرار سید سرفراز علی نے کہا کہ یہ پروگرام نوجوانوں کے لیے ترقی کے نئے مواقع پیدا کرے گا ۔ ہنرمند پروگرام کے پہلے بیچ کے لیے11000 اور دوسرے بیچ کے لیے13000 درخواستیں موصول ہوئیں جوکہ سندھ میں ہنرمند افراد کی تربیت کرنے والے اداروں میں سب سے بڑی تعداد ہے ۔

انہوں نے بتایا کہ166 نوکریاں دی گئیں ۔ ۔ بیچ 2 میں پانچ کورسز میں 350 طلباء رجسٹرڈ ہیں ۔ بیچ 2 کے PMP کورس مکمل کرنے کے بعد 100 میں سے 67 طلباء مختلف اداروں میں کام کر رہے ہیں ۔اس موقع پر پروجیکٹ ڈائریکٹر ڈاکٹرطاہر فطانی نے پروگرام کی پروگریس کے بارے میں بتایا ۔