ایمزٹی وی (اسپورٹس) ایک انٹرویو کے دوران وقار یونس نے کہا کہ ہم اس میگا ایونٹ کے لیے کافی پرجوش ہیں اور جب ہر ٹیم ٹرافی کے حصول کی خواہشمند ہے تو ہم کیوں نہیں؟ ہم ڈریسنگ روم میں اس یقین کو لے جانے کی کوشش کررہے ہیں، ہمارے پاس ٹیلنٹ اور صلاحیت موجود ہے بس انہیں منظم کرکے عالمی ایونٹ کے دوران دباﺅ کا سامنا کرنے کی ضرورت ہوگی۔ پاکستان نے آٹھ دسمبر کو پانچ ون ڈے میچز کی سیریز کے پہلے میچ میں نیوزی لینڈ کو تین وکٹوں سے شکست دی تھی اب یہ دونوں ٹیمیں دوسرے مقابلے کے لیے جمعے کو شارجہ میں مدمقابل آئینگی۔ وقار یونس نے فاسٹ باﺅلر محمد عرفان کے حوالے سے کہا کہ 7 فٹ ایک انچ لمبے یہ باﺅلر ورلڈکپ میں کامیابی کے مقصد میں پاکستان کے لیے مددگار ثابت ہوسکتے ہیں اس لیے انکا کافی خیال رکھا جا رہا ہے۔ انہوں نے کہا کہ زیادہ لمبا قد ہونے پر انجریز کا خطرہ بڑھ جاتا ہے مگر پاکستان کو اسکی ضرورت ہے کیونکہ ورلڈکپ کے لیے وہ ہمارا خفیہ ہتھیار ثابت ہوسکتا ہے۔ وقار یونس نے کہا کہ 90 کی دہائی میں کرکٹ کھیلنے والے کھلاڑیوں کو پاکستان کرکٹ کی بہتری کے لیے آگے آکر کام کرنا چاہئے۔ انکا کہنا تھا کہ معین خان، مشتاق احمد، اعجاز احمد اور محمد اکرم کی موجودگی اچھا شگون ہے، یہ سب جدید کھیل کے تقاضوں سے واقف ہیں اور قومی ٹیم کو اپنی مکمل صلاحیت کے مطابق کھیلنے میں مدد فراہم کرسکتے ہیں ۔