ایمزٹی وی(کھیل) یورو فٹبال کپ کا ناک آؤٹ مرحلہ اپنے اختتام کو پہنچا اور سیمی فائنل لائن اپ مکمل ہو گئی۔ اہم میچ میں میزبان فرانس اورآئس لینڈ کی ٹیمیں میدان میں اتریں۔ فرانس کی ٹیم نے میچ کے پہلے ہاف میں ہی جارحانہ کھیل کا مظاہرہ کیا اور اوپر تلے چار گول داغ کر حریف ٹیم پر اپنی برتری قائم کر لی۔ اولیویر جیروڈ نے بارہویں منٹ میں پہلا اور پال پوگبا نے انیسویں منٹ میں دوسرا گول کیا۔ ہاف کے آخری تین منٹ میں دمتری پیت اور انتوین گریزمین نے گیند کو جال کی راہ دکھائی۔ آئس لینڈ کی جانب سے کولبین ستھرسن نے 55 ویں منٹ میں پہلا گول کیا۔ جیروڈ نے انسٹھویں منٹ میں پانچواں گول کر کے فرانس کی لیڈ ایک بار پھر بڑھا دی۔ آئس لینڈ کے بیرکریارنسن نے 84 ویں منٹ میں دوسرا گول کیا۔ یورو کپ کا پہلا سیمی فائنل سات جولائی کو پرتگال اور ویلز اور دوسرا آٹھ جولائی کو فرانس اور جرمنی کے درمیان کھیلا جائے گا۔