ایمز ٹی وی(نیوز ڈیسک) خیبر پختونخوا احتساب کمیشن نے اعلان کیا ہے کہ اگر عمران خان بھی کرپشن کے مرتکب ہوئے تو ہم ان کے خلاف بھی کارروائی کریں گے۔

یہ بات صوبائی احتساب کمیشن کے ڈائریکٹر جنرل لیفٹننٹ جنرل (ریٹائرڈ) حامد خان نے ڈان ڈاٹ کام کو خصوصی انٹرویو دیتے ہوئے کہی۔ احتساب کمیشن کے کاموں کی تفصیلات بتاتے ہوئے حامد خان نے کہا کہ بیورو تمام کیسز کو میرٹ پر دیکھتا ہے اور حکومت یا کسی اور کی جانب سے دباﺅ کو قبول نہیں کرتا۔ پاکستان تحریک انصاف کے خیبر پختونخوا میں وزیر معدنیات ضیاءاللہ آفریدی کی حراست کے حوالے سے انہوں نے بتایا کہ صوبائی وزیر کو تحقیقات کے بعد گرفتار کیا گیا " احتساب کمیشن نے ان کے خلاف کارروائی سے قبل کافی شواہد اکھٹے کرلیے تھے"۔ احتساب کمیشن کے ڈائریکٹر جنرل نے اس تاثر کو مسترد کردیا کہ کمیشن اعلیٰ شخصیات کی گرفتاری میں ہچکچاہٹ کا مظاہرہ کرتا ہے۔ ان کا کہنا تھا کہ کمیشن کرپشن کیسز کو تیز رفتاری سے نمٹاتا ہے کیونکہ اس حال میں تشکیل دیا گیا ادارہ اور پہلے سے کوئی کام التواءمیں نہیں لہٰذا معاملات کو تیزرفتاری سے نمٹایا جاتا ہے۔ حامد خان کے مطابق خیبرپختونخوا احتساب کمیشن قومی احتساب بیورو کی کمزوریوں پر قابو پانے کے لیے تشکیل دیا گیا۔ ان کے بقول نیب کے افسران بارگین کے مواقع فراہم کرنے کے ذمہ دار ہیں " مگر احتساب کمیشن قومی خزانے کو لوٹنے والے ملزمان کو اس طرح کے مواقع فراہم نہیں کرتا"۔

ایمز ٹی وی(نیوز ڈیسک) خیبر ایجنسی کی پولیٹیکل انتظامیہ نے اس ایجنسی میں مقیم اقلیتی برادری کے چار نمائندوں کو ’قبائلی عمائدین‘ کا درجہ دے دیا ہے۔ حکام کا کہنا ہے کہ یہ پہلا موقع تھا کہ فاٹا میں مقیم اقلیتوں کو قبائلی عمائدین کا درجہ دیا گیا، تاکہ یہ برادریاں قبائلی معاشرے میں باضابطہ طور پر ضم ہوسکیں۔ انہوں نے کہا کہ جن لوگوں کو ’لنگی بردار‘ کا درجہ دیا گیا ہے، ان میں آل فاٹا مائنریٹیزسوشل ویلفیئر آرگنائزیشن کے چیئرمین ولسن وزیر، جمرود چرچ کے نگران جیمس مائیکل اور سکھ برادری کے دونمائندے گرومیت سنگھ اور نرنجان سنگھ شامل ہیں۔ حکومت کے اس فیصلے کو تاریخی قرار دیتے ہوئے ولسن وزیر نے اس امید کا اظہار کیا کہ اس اقدام سے مقامی باشندوں اور قبائلی علاقوں میں مقیم اقلیتی برادری کے درمیان امتیازات کا خاتمہ ہوگا۔ انہوں نے کہا کہ پولیٹیکل انتظامیہ کے قوانین کے تحت اقلیتی برادری کے چاروں لنگی بردار تمام سرکاری مراعات کے حقدار ہوں گے اور انہیں کمپیوٹرائزڈ قومی شناختی کارڈ، ڈومیسائل اور پاسپورٹ سمیت تمام اہم قومی دستاویزات کی تصدیق کرنے کا اختیار بھی حاصل ہوگا۔ ولسن وزیر نے کہا کہ پہلے اقلیتی برادری کے لوگ قومی دستاویزات کی تصدیق کے لیے مقامی قبائلی عمائدین سے رجوع کرتے تھے۔ انہوں نے افسوس کا اظہار کرتے ہوئے کہا کہ اس طرح کے زیادہ تر کیسز میں قبائلی عمائدین یا تو ہماری دستاویز کی تصدیق سے انکار کردیا کرتے تھے، یا پھر اس کے لیے رشوت طلب کرتے تھے۔ ولسن وزیر نے کہا کہ اس نئے انتظام کے تحت اب کسی دشواری کے بغیر اس طرح کی دستاویزات کے حصول میں سہولت حاصل ہوجائے گی۔ انہوں نے کہا کہ وفاقی حکومت نے چار مہینے پہلے اصولی بنیادوں پر فاٹا کی تمام اقلیتی برادریوں کا قبائلی ڈومیسائل سرٹیفکیٹ دینے کا فیصلہ کیا تھا، اور فاٹا سیکریٹیریٹ اقلیتوں کے لیے نیا طریقہ کار وضع کررہا ہے۔ ولسن وزیر نے بتایا کہ ان کی تنظیم اب دیگر قبائلی ایجنسیوں میں اقلیتی رہنماؤں کے لیے ’لنگی بردار‘ کا درجہ حاصل کرنے کے حوالے سے پولیٹیکل انتظامیہ کے ساتھ رابطے میں ہے۔

ایمزٹی وی (نیوز ڈیسک) سندھ حکومت کی جانب سے رینجرز کے اختیارات چار ماہ کے بجائے صرف 30 روز کے لیے بڑھائے جانے کے ایک دن بعد ڈائریکٹر جنرل رینجرز نے سوشل میڈیا پر وضاحت کردی کہ کراچی آپریشن مکمل کرنے کے لیے کوئی وقت مقرر نہیں۔ ڈی جی رینجرز نے اپنے ایک ٹوئیٹ میں کہا کہ کراچی کے قانون نافذ کرنے والے ادارے آپریشن کو اس وقت تک جاری رکھیں گے جب تک یہ اپنے منطقی انجام تک نہ پہنچ جائے۔ رینجرز کے ایک ترجمان نے تصدیق کی کہ @Bilalak80 رینجرز کے ڈائریکٹر جنرل کا حقیقی اکاؤنٹ ہے۔ ٹوئیٹ میں یہ واضح نہیں کہ وہ کراچی میں رینجرز کے آپریشن کی ہی بات کررہے تھے تاہم بطور ڈی جی رینجرز اس بات کو مان لینا مناسب ہوگا۔ ٹوئیٹ میں 'منطقی انجام' کا رخ بظاہر رینجرز کے آپریشن کی مخالف متحدہ قومی موومنٹ اور پاکستان پیپلز پارٹی کی قیادت میں سندھ حکومت کی جانب تھا جس نے رینجرز کے اختیارات صرف 30 دنوں اور کراچی ڈیویژن تک محدود کردیے۔ تاہم پی پی پی رہنما سینیٹر سعید غنی نے ڈان کو بتایا کہ رینجرز کے سربراہ کا ٹوئیٹ کوئی خاص بات نہیں۔ انہوں نے محتاط انداز میں کہا ' اس (ٹوئیٹ میں) میں یہ نہیں کہا گیا کہ کارروائی صرف رینجرز نے ہی کرنی ہے۔' کچھ عرصہ قبل سندھ کے وزیراعلیٰ سید قائم علی شاہ نے ڈی جی رینجرز کا خط لکھا جس میں رینجرز پر اختیارات اور میڈیٹ سے تجاوز کرنے کا الزام عائد کیا گیا۔ وزیراعلیٰ نے حال ہی میں ایک بیان میں کہا کہ رینجرز کو دہشت گردی، ٹارگٹ کلنگ، اغوا برائے تاوان اور بھتہ خوری پر مینڈیٹ دیا گیا ہے جبکہ مالیاتی جرائم اور کرپشن اس کے دائرہ کار میں نہیں آتے۔

ایمز ٹی وی (نیوز ڈیسک) سندھ کے شہر شکار پور میں مبینہ پولیس مقابلے میں بدنام ڈاکو نذرو ناریجو ساتھی سمیت ہلاک ہوگیا۔ مقابلے میں ہلاک ہونے والے ڈاکو نذرو ناریجو کو اندرون سندھ دہشت کی علامت سمجھا جاتا تھا۔ پولیس مقابلے میں 2 پولیس اہلکار مجیب چاچڑ، حاجی چاچڑ شہید اور ایک ایس ایچ او زخمی بھی ہوئے۔ مارے جانے والے ڈاکو کی زندہ یا مردہ گرفتاری پر حکومت سندھ کی جانب سے 2 کروڑ روپے انعام مقرر کیا تھا۔ سکھر پولیس کواطلاع ملی کہ اندرون سندھ دہشت کی علا مت بدنام ڈا کو نذرو ناریجو اپنے ساتھیوں سمیت تحصیل گڑھی یاسین کےگاؤں دلاور میں چھپا ہوا ہے جس پر ایس یس پی سکھر تنویر تنیو کی سربراہی میں پولیس کی بھاری نفری گاؤں پہنچی تو ڈاکوؤں نے پولیس پارٹی پر فائرنگ کی۔ پولیس کی جوابی فائرنگ کے نتیجے میں نذرو ناریجو ساتھی سمیت ہلاک ہوا

پولیس اور ڈا کوؤں کے درمیان مقابلہ 11 گھنٹے سے زائد جاری رہا۔