ایمزٹی وی (کھیل)  قومی ٹیم کے تجربہ کار بلے باز کا کہنا ہے کہ روایتی حریف سے مقابلے میں کھلاڑیوں پر نفسیاتی دباؤ ہوتا ہے مگر اب روایت بدل دیں گے یونس خان نے کہا کہ گذشتہ دنوں ون ڈے کرکٹ میں 5 سال بعد سنچری بنائی مگر اب بڑا وقفہ نہیں آنے دوں گا،ورلڈ کپ کے پہلے ہی میچ میں تھری فیگراننگز سجانے کی خواہش ہے۔

یونس خان نے ملک میں انٹرنیشنل کرکٹ کی واپسی کے سوال پرکہا کہ پی سی بی اور آئی سی سی سے اپیل ہے کہ اس حوالے سے فعال کردار ادا کریں کیونکہ پاکستانی عوام کرکٹ سے والہانہ محبت کرتے ہیں، شاہد آفرید ی کی ورلڈکپ کے بعد ون ڈے سے ریٹائرمنٹ پر انھوں نے کہا کہ یہ آل راؤنڈر کا ذاتی فیصلہ ہے جس کا احترام کرنا چاہیے۔ یونس خان نے کہا کہ میدان میں ہم سندھی، بلوچی، پٹھان یا پنجابی نہیں بلکہ پاکستانی کی حیثیت سے اترتے ہیں، کھلاڑیوں میں اختلافات کی خبریں من گھڑت ہیں، ہم غلطیاں کرتے اور ان سے سیکھتے بھی ہیں، انھوں نے کہا کہ متعلقہ حکام کو چاہیے کہ وہ چھوٹے شہروں میں بھی کرکٹ کھیلنے کے یکسر مواقع فراہم کریں۔

ایمز ٹی وی (لاہور) جسٹس عبدالسمیع خان اور جسٹس سردار طارق مسعود پر مشتمل دو رکنی بینچ نے فیض احمد کے وکیل کی ایک درخواست پر یہ حکم جاری کیا۔اس سے پہلے 24 دسمبر کو ایک انسداد دہشت گردی عدالت نے فیصل آباد جیل کے سپریٹنڈنٹ کی درخواست پر احمد کے ڈیتھ وارنٹ جاری کیے تھے۔وکیل عبدالخالق نے اپنی درخواست میں موقف اختیار کیا تھا کہ فیض کی سزائے موت کے خلاف 2009 سے سپریم کورٹ میں اپیل دائر ہے لہذا ان کے ڈیتھ وارنٹ منسوخ کیے جائیں۔سپریٹنڈنٹ کا کہنا تھا کہ احمد کو ننکانہ صاحب میں لائنس طارق محمود کے قتل پر 2006 میں موت کی سزا سنائی گئی تھی۔بینچ نے سزا پر عمل درآمد روکتے ہوئے کہا کہ انسداد دہشت گردی کی عدالت کو جواب دینا ہو گا کہ معاملہ سپریم کورٹ میں ہونے کے باوجود اس نے ڈیتھ وارنٹ کیسے جاری کیے۔

ایمز ٹی وی (کراچی) دستی بم حملہ نامعلوم افراد کی جانب سے کیا گیا اور موٹر سائیکل سوار ملزمان لیاری کے کمیلہ اسٹاپ پر دستی بم پھینک کر فرار ہوگئے جس کے نتیجے میں خاتون جاں بحق اور ایک بچی سمیت 2 افراد زخمی ہوئے، واقعے کے بعد پولیس کی نفری نے جائے وقوعہ پر پہنچ شواہد اکٹھے کرنا شروع کردیئے جبکہ لاش اور زخمیوں کو ریسکیو ٹیموں نے سول اسپتال منتقل کردیا جہاں زخمیوں کو طِبی امداد فراہم کی جارہی ہے۔

ایمز ٹی وی(نیوز ڈیسک) ہنگو کے اسکول پر خود کش حملے کو ناکام بنانے کی کوشش میں جان کی بازی ہارنے والے 16 سالہ طالبعلم اعتزاز حسن کو سال 2014 کے لیے ’ہیرالڈ‘ کی بہترین شخصیت منتخب کیا گیا ہے۔

گزشتہ سال جنوری میں ہنگو کے اسکول پر خود کش حمہ کرنے کی کوشش کی گئی لیکن جانباز اعتزاز نے حملہ ناکام بنانے کے لیے اپنی جان کی بازی لگا دی۔

ہیرالڈ کی سال کی بہترین شخصیت کا ایوارڈ اس پاکستانی شخصیت کو دیا جاتا ہے جو سال بھر خبروں کی دنیا پر چھائے رہے اور انہوں نے اس سال کوئی اہم کام کیا ہو۔

16 دسمبر کو پشاور اسکول پر کیے گئے بہیمانہ حملے کے بعد اعتزاز کی قربانی کو مزید سراہا گیا اور وہ تین طرز کے ووٹنگ کے عمل کے فاتح ٹھہرے۔

ووٹنگ کے لیے آن لائن، بذریعہ پوسٹ اور 10 نامور پاکستانیوں پر مشتمل پینل کی رائے کو مدنظر رکھا گیا۔

حتمی نتیجے میں اعتزاز 24.1 فیصد ووٹ لے کر سرفہرست رہے جبکہ چیئرمین تحریک انصاف عمران خان محض چند ووٹ کی کمی سے دوسرے نمبر پر رہے۔

عمران خان کو سال 2014 میں ملک کی سب سے بڑی سیاسی تحریک چلانے پر اس فہرست کا حصہ بنایا گیا تھا۔

اس فہرست میں شامل دیگر امیدواروں میں توہین مذہب مقدمے کی پیروی کے دوران قتل کیے جانے والے راشد رحمان کے ساتھ اسٹریٹ چائلڈ فٹبال ورلڈ کپ میں تیسرے نمبر پر آنے والے لیاری کے فٹبالر بھی شامل تھے۔

ہیرالڈ کی سال کی بہترین شخصیات کی نامزدگیوں میں ایک اور قابل ذکر نام لاپتہ بلوچ کی واپسی کے لیے مہم چلانے والے ماما قدیر کا ہے جبکہ امن کے نوبیل انعام حاصل کرنے والی ملالہ یوسفزئی بھی امیدواروں میں شامل تھیں۔

دیگر شخصیات میں آرمی چیف جنرل راحیل شریف، ٹی وی کے نامور میزبان حامد میر، تجربہ کار کرکٹر یونس خان اور رواں سال مقامی فلموں میں ڈیبیوں کرنے والے ڈائریکٹرز شامل ہیں۔

نوبیل انعام یافتہ اور 2012 میں ہیرالڈ کی بہترین شخصیت کا اعزاز حاصل کرنے والی ملالہ یوسفزئی نے اعتزاز حسن کو خراج تحسین پیش کرتے ہوئے کہا کہ ہمارے ملک میں بہادر لوگوں کی کمی نہیں، اعتزاز کی کہانی ہمت، بہادری اور جرات کی تابندہ مثال ہے