کراچی: کراچی سمیت سندھ کے سرکاری وپرائیویٹ میڈیکل وڈینٹل کالجوں میں سال برائے 2019-20 میں داخلوں کے لیےانٹری ٹیسٹ آج ہوگا۔
انٹری ٹیسٹ نیشنل ٹیسٹنگ سروسزکے تحت کراچی میں این ای ڈی یونیورسٹی میں منعقدکیاجائے گا جبکہ صوبے بھرمیں انٹری ٹیسٹ کےلیے6 مرکزبنائے گئے ہیں ان میں حیدرآباد، نوابشاہ، لاڑکانہ، میرپورخاص اور سکھر شامل ہیں۔
سابقہ کمیٹی پاکستان میڈیکل اینڈ ڈینٹل کونسل کے نوٹیفکیشن کے مطابق امسال داخلہ ٹیسٹ میں انٹر سائنس میں 70فیصد مارکس حاصل کرنے والے امیدواروں کو انٹری ٹیسٹ میں شرکت کریں گے، اس سے قبل انٹری ٹیسٹ میں60فیصد نمبر حاصل کرنے والے امیدواروں کو شرکت کی اجازت دیدی جاتی تھی تاہم امسال سے70فیصد مارکس حاصل کرنے والے امیدوار آج ہونے والے انٹری ٹیسٹ میں شرکت کرسکیں گے، امسال صوبے سندھ کے میڈیکل کالجوں میں داخلوں کا عمل جامشورو میں واقع لیاقت میڈیکل یونیورسٹی کو ذمہ داری سونپی گئی ہے۔
واضح رہے کہ 9 ستمبر کو پاکستان میڈیکل اینڈ ڈینٹل کونسل کے آرڈیننس کی مدت ختم ہوچکی ہے اب امسال دوبارہ نیا صدراتی ترمیمی آرڈیننس جاری کیاجائیگا جس کے بعد کونسل فعال ہوسکے گی۔
اسلام آباد: پاکستانی باکسر محمد وسیم دبئی میں منعقدہ پروفیشنل باؤٹ میں کامیابی حاصل کرنے کے بعد وطن واپس پہنچے تو شاندار استقبال کے بجائے انہیں ٹیکسی پر روانہ ہونا پڑ گیا۔
محمد وسیم نے دبئی میں منعقدہ پروفیشنل باؤٹ میں فلپائن کے باکسر کو پہلے ہی راؤنڈ میں ناک آؤٹ کرکے کامیابی حاصل کی تھی ۔ انہوں نے اپنی کامیابی مقبوضہ کشمیر کے عوام کے نام کی تھی۔
محمد وسیم کامیابی کے بعد وطن واپس آئے تو اسلام آباد ایئرپورٹ پر ان کے استقبال کے لیےکوئی حکومتی نمائندہ ہی نہیں پہنچا اور محمد وسیم نجی کمپنی کی ٹیکسی سروس پر روانہ ہوگئے۔
کولمبو: انڈر19 ایشیا کپ کے فائنل میں دفاعی چیمپیئن بھارت نے 106 رنز پر ڈھیر ہونے کے باوجود بنگلہ دیش کو سنسنی خیز مقابلے کے بعد 5 رنز سے شکست دے کر چیمپیئن بننے کا اعزاز حاصل کر لیا۔ سری لنکن دارالحکومت کولمبو میں کھیلے گئے فائنل میں باؤلرز کا راج رہا اور ابرآلود موسم میں دونوں ٹیموں کے بلے باز مجموعی طور پر صرف 207رنز بنا سکے۔ بھارت کی ٹیم نے فائنل میچ میں ٹاس جیت کر پہلے بیٹنگ کا فیصلہ کیا جو تباہ کن ثابت ہوا اور صرف 8 رنز پر اس کے تین ابتدائی بلے باز پویلین لوٹ چکے تھے۔ اس موقع پر کپتان دھروو جوریل نے ششوات راوت کے ساتھ مل کر میچ کی سب سے بڑی 45رنز کی شراکت قائم کی لیکن اس شراکت کے اختتام کے ساتھ ہی ایک مرتبہ پھر بھارتی ٹیم کی وکٹیں گرنے کا سلسلہ شروع ہو گیا۔ دھروو 33 اور ششوات 19 رنز بنا کر آؤٹ ہوئے اور ایک موقع پر بھارتی ٹیم 62 رنز پر 7 وکٹیں گنوا چکی تھی لیکن اس مرحلے پر کرن لال ڈٹ گئے۔ انہوں نے 43 گیندوں پر 37 رنز کی جارحانہ اننگز کھیل کر اپنی ٹیم کی سنچری مکمل کرائی لیکن اس کے باوجود بھارتی ٹیم 33ویں اوور میں 106رنز پر ڈھیر ہو گئی۔ بنگلہ دیش کی جانب سے شمیم حسین اور مریتن جوئے چوہدری نے تین، تین وکٹیں لیں۔ بھارتی ٹیم کے 8 کھلاڑی ڈبل فیگر میں بھی داخل نہ ہو سکے۔ ہدف کے تعاقب میں بنگلہ دیشی ٹیم بھی صرف 16رنز پر 4 وکٹیں گنوا بیٹھی جس کے بعد اکبر علی اور شہادت حسین نے مل کر اسکور 40 تک پہنچایا لیکن پھر شہادت حسین کے بعد شمیم حسین بھی پویلین لوٹ گئے۔ مریتن جوئے چوہدری اور کپتان اکبر علی نے 27رنز کی شراکت قائم کر کے اسکور کو 78 تک پہنچایا ہی تھا کہ دونوں بلے باز تین گیندوں کے فرق سے پویلین لوٹ گئے۔ لو اسکورنگ میچ میں تنظیم حسن ساکب اور راکب الحسن نے نویں وکٹ کے لیے 23 رنز جوڑ کر اپنی ٹیم کو فتح کی دہلیز پر پہنچا دیا لیکن انکولیکر نے ایک ہی اوور میں دو وکٹیں لے کر اپنی ٹیم کو فتح سے ہمکنار کراتے ہوئے انڈر19 چیمپیئن بنوا دیا۔ بنگلہ دیش کی پوری ٹیم 101 رنز بنا کر آؤٹ ہو گئی، کپتان اکبر 21 اور کریتن جوئے 21 رنز کے ساتھ سب سے نمایاں بلے باز رہے۔ بھارت کی جانب سے اتھروا انکولیکر نے پانچ وکٹیں لیں اور میچ کے بہترین کھلاڑی کا اعزاز لے اڑے۔
لاس انجلس: دنیا میں اس وقت ایک ارب سے زائد افراد بجلی کی نعمت سے محروم ہیں۔ اسی کے پیشِ نظر ایک نیا نظام بنایا گیا ہے جو رات کے وقت زمین سے خارج ہونے والی حرارت کو بجلی میں بدلتا ہے اور یوں پہلے مرحلے میں اس سے موبائل فون کے علاوہ ایل ای ڈی لائٹس کو روشن رکھنے والی بیٹریاں چارج کی جاسکتی ہیں۔ یہ آلہ رات کے وقت زمین سے خارج ہونے والی گرمی یا حرارت سے بجلی بناتا ہے۔ اسے یونیورسٹی آف کیلی فورنیا لاس اینجلس کے سائنسداں ڈاکٹر آسوتھ رامن نےاور ان کے ساتھیوں نے بنایا ہے۔ اس ٹیکنالوجی میں تھرمو الیکٹرک اثر سے برق پیدا کی جاتی ہے۔ یہ آلہ تھرمو الیکٹرک اثر استعمال کرتے ہوئے بجلی بناتا ہے۔ عین اسی طرح کارخانوں کے بوائلر، حرارتی پلانٹ اور کاروں کے ایگزاسٹ سے نکلنے والی گرمی کو بجلی میں بدلنے والے آلات اب عام استعمال ہو رہے ہیں۔ ڈاکٹر آسوتھ رامن نے جو نیا طریقہ اختیار کیا ہے اسے ریڈی ایٹو اسکائی کولنگ کا نام دیا گیا ہے۔ اس کے لیے پولی اسٹائرین ڈبے پر ایک سیاہ ڈسک رکھی گئی ہے جس کا رخ آسمان کی جانب ہے اور اس میں المونیم سے بنی ایک رکاوٹ یا بلاک رکھا گیا ہے۔ سیاہ ڈسک زمینی حرارت کو ٹھنڈا کرتی ہے اور المونیم بلاک رات کی ٹھنڈی ہوا کو گرم کرتا ہے۔ اس فرق سے تھرمو الیکٹرک فرق بنتا ہے اور اس سے بجلی کی بڑی مقدار بنتی ہے۔ ابتدائی تجربے میں ایک مربع میٹر سے 25 ملی واٹ بجلی بنتی ہے جو ایک ایل ای ڈی روشن کرنے کے لیے کافی ہے لیکن گرم علاقوں میں بجلی کی پیداوار 20 گنا بڑھ سکتی ہے جہاں درجہ حرارت میں بہت فرق پایا جاتا ہے۔ اس طرح ایک ایل ای ڈی بلب یا موبائل فون آسانی سے چارج کیا جاسکتا ہے۔ اس پورے نظام کی قیمت صرف 30 ڈالر ہے اور یہ غریب ممالک کے لیے کسی نعمت سے کم نہیں ہوگا لیکن اب بھی اس کی کمرشل منزل بہت دور ہے۔
لاہور:میڈیا کی طرف سے معاملہ اٹھانے پر کرکٹ بورڈ نے فوری ایکشن لیتے ہوئے محمد حسنین کا این او سی کینسل کرکے واپس آنے کی ہدایت کردی۔ محمد حسنین سری لنکا کے خلاف سیریز کے بعد قائد اعظم ٹرافی میچز میں حصہ لیں گے، قائد اعظم ٹرافی میں محمد حسنین سندھ ٹیم میں شامل ہیں تاہم بورڈ نے کئیربین پریمیئر لیگ کے پورے سیزن کے لیے این اوسی دے رکھا ہے ۔ محمد حسنین کا قائد اعظم ٹرافی پر لیگ کو ترجیح دینے کا معاملہ میڈیا میں آنے پر پی سی بی نے حسنین کو فوری طور پر پاکستان پہنچنے کی ہدایت کی ہے۔ اس سے پہلے ریٹائرمنٹ لینے والے محمد حفیظ کا نام حیران کن طورپر سدرن پنجاب ٹیم میں شامل کیاگیا تھا ، جس پر سابق کپتان نے بورڈ حکام کو یاد دلایا کہ وہ ریڈ بال کرکٹ چھوڑ چکے، اب ان کا قائد اعظم ٹرافی میں کھیلنا درست نہیں ہوگا، وہ چاہتے ہیں کہ ان کی جگہ کسی نوجوان کرکٹر کو موقع دیاجائے۔ ٹرافی کے میچز ہفتے سے کراچی، لاہور اور ایبٹ آباد سینڑز پر قائد اعظم ٹرافی میچوں کا آغاز ہوچکا ہے۔
لندن: سابق آسٹریلین کپتان اسٹیون اسمتھ اپنے کیریئر کی بہترین فارم میں ہیں اور ایشز سیریز کے دوران شاندار کارکردگی کی بدولت ہر دوسرے دن نت نئے ریکارڈز اپنے نام کرتے جا رہے ہیں۔ سیریز کے پانچ میں سے صرف 4 میچوں میں شرکت کرنے کے باوجود اسمتھ اب تک ایشز سیریز کے دوران 6 اننگز میں 751 رنز اسکور کر چکے ہیں۔ اوول میں کھیلے جا رہے ایشز سیریز کے پانچویں اور آخری میچ میں بھی اسمتھ نے شاندار کارکردگی کا سلسلہ جاری رکھا اور عمدہ کارکردگی دکھاتے ہوئے 80رنز کی اننگز کھیلی۔ 80رنز کی اس اننگز کے دوران انہوں نے قومی ٹیم کے سابق کپتان انضمام الحق کا منفرد ریکارڈ اپنے نام کر لیا۔ انضمام الحق نے انگلینڈ کے خلاف لگاتار 9 نصف سنچریاں اسکور کی تھیں اور وہ ٹیسٹ کرکٹ میں کسی ایک ٹیم کے خلاف مسلسل سب سے زیادہ نصف سنچریاں بنانے والے بلے باز تھے لیکن اب یہ ریکارڈ اسمتھ کے نام ہے۔ 30 سالہ اسمتھ اس سیریز میں شاندار کارکردگی کے ساتھ ساتھ اب تک انگلینڈ کے خلاف ٹیسٹ کرکٹ میں مسلسل 10 نصف سنچری یا اس سے زائد اسکور کر چکے ہیں جو ایک عالمی ریکارڈ ہے۔ ان دونوں کے علاوہ جنوبی افریقہ کے جاک کیلس اور سری لنکا کے کمار سنگاکارا کو بالترتیب پاکستان اور بنگلہ دیش کے خلاف لگاتار 8 میچوں میں نصف سنچری یا اس سے زائد رنز بنانے کا اعزاز حاصل ہے۔ پانچویں ایشز ٹیسٹ میں عمدہ کارکردگی کی بدولت اسٹیون اسمتھ نے سر ایورٹن ویکس کا 70سال پرانا عالمی ریکارڈ بھی برابر کردیا۔ سر ایورٹن ویکس نے 1949 میں مسلسل 6اننگز میں 75 یا اس سے زائد رنز اسکور کیے تھے اور اس سیریز کے دوران اسمتھ بھی مسلسل یہ کارنامہ انجام دے کر اس عالمی ریکارڈ کے مالک بن چکے ہیں۔ اگر اسمتھ اگلی اننگز میں بھی 75 یا اس سے زائد رنز اسکور کرتے ہیں تو وہ ایک اور عالمی ریکارڈ کے مالک بن جائیں گے
کراچی: حمزہ علی عباسی کی اہلیہ اداکارہ نیمل خاور نےسوشل میڈیا پر اپنی خوبصورتی کاراز بتاتے ہوئے خواتین کو جلد کی حفاظت کی ہدایت کی ہے۔
اداکارہ نیمل خاور کی سوشل میڈیا پر ایک ویڈیو وائرل ہورہی ہے جس میں وہ اپنی خوبصورتی کا راز بتاتی ہوئی نظر آرہی ہیں جب کہ اسی ویڈیو میں نیمل خاور اپنی جلد کے حوالے سے پریشان خواتین اور لڑکیوں کو جلد کی حفاظت اور چہرے کو حسین بنانے کے گُر بھی بتاتی ہوئی نظر آرہی ہیں۔حالانکہ یہ ویڈیو کچھ پرانی ہے لیکن سوشل میڈیا پر وائرل ہورہی ہے۔
نیمل خاور نے ویڈیو میں بتایا کہ وہ اپنی جلد کو نرم ملائم رکھنے کے لیے بہت زیادہ مقدار میں پانی پیتی ہیں، نیمل نے کہا کہ پانی سے جلد پر بہت فرق پڑتا ہے، دن میں کم سے کم دو لیٹر پانی تو ضرور پینا چاہئیے۔ جلد کو خوبصورت اور حسین بنانے کا دوسرا گُر بتاتے ہوئے نیمل خاور نے چائے اورکافی تو ترک کرنے کا مشورہ دیا۔
نیمل نے کہا کہ چائے اور کافی میں موجود کیفین چہرے کی جلد کو خشک کرتی ہے جو کہ بہت نقصان دہ ہے لہٰذا چائے کافی کو مکمل ترک کردیں اور اگر یہ نہ کرسکیں تو کم از کم بہت حد تک کم کردیں۔
نیمل نے دلکش چہرے خوبصورت جلد کے لیے ٹپ نمبر تین بتاتے ہوئے کہا کہ خواتین ہمیشہ اپنی جلد کو نم رکھیں۔ خواتین اور لڑکیاں جلد پر لگے میک اپ کو زیادہ سنجیدگی سے نہیں لیتیں اور میک اپ کو چہرے پر لگا رہنے دیتی ہیں جو کہ بہت نقصان دہ بات ہے۔ خواتین کو چاہیے کہ میک اپ کو چہرے سے فوراً صاف کریں۔ نیمل نے بادام، کھوپرے اورزیتون کے خالص تیل کو بھی چہرے کی جلد کے لیے بہت مفید قرار دیا۔
اسلام آباد: وزیراعظم عمران خان کا کہنا ہے کہ پاکستان کشمیریوں کے حقوق کے لئے ہر حد تک جائے گا۔
غیر ملکی خبر رساں ادارے کو انٹریو دیتے ہوئے وزیراعظم عمران خان کا کہنا تھا کہ جب سے ہماری حکومت آئی ہے ہم نے اس بات کو یقیینی بنایا ہے کہ مذہب سے بالا تر ہوکر ہر پاکستانی کو اس کے حقوق دئیے جائیں، ہم نے سکھوں کے جذبات کو مدنظر رکھتے ہوئے کرتارپور راہداری کھولنے کا فیصلہ کیا جب کہ بھارت اقلیتوں کو بھارتی شہری ہونے کے بنیادی حقوق سے محروم رکھتا ہے۔
وزیراعظم نے کہا کہ خراب معیشت کو سہارا دینے کے لیے قرضہ لینا پڑتا ہے، اس کے بعد ہی آمدن کو بڑھایا جاسکتا ہے، اصلاحات کرنے میں وقت لگتا ہے، ہمارے 13 ماہ کی حکومت میں ایک بھی کرپشن اسکینڈل سامنے نہیں آیا، جب میرے 5 سال مکمل ہوجائیں گے تو عوام دیکھے گی کہ یہ آخری آئی ایم ایف پیکج ہے جو پاکستانی حکومت لے گی۔
راولپنڈی: خیبر پختون خوا میں فائرنگ سے پاک فوج کے 4 جوان شہید اور ایک زخمی ہوگیا۔
پاک فوج کے شعبہ تعلقات عامہ آئی ایس پی آر کے مطابق مغربی سرحد پر دو واقعات میں پاک فوج کے 4 جوان شہید ہوگئے۔ شمالی وزیرستان کے علاقے اسپن وام میں گزشتہ رات دیر گئے اباخیل کے قریب سیکیورٹی فورسز کی پارٹی معمول کے گشت پر تھی کہ شرپسندوں نے اس پر فائرنگ کردی۔
فائرنگ کے تبادلے میں پاک فوج کا سپاہی اخترحسین شہید ہوگیا اور جوابی کارروائی میں 2 شرپسند بھی مار ے گئے۔ 23 سالہ سپاہی اختر حسین کا تعلق ڈسٹرکٹ بلتستان سے تھا۔
شہید ہونے والوں میں لانس نائیک سید امین آفریدی، لانس نائیک محمد شعیب سواتی اور سپاہی کاشف علی شامل ہیں۔
