ایمزٹی وی (اسلام آباد)الیکشن کمیشن پاکستان نے سیاسی جماعتوں کے اثاثوں کی تفصیلات جاری کردیں ہیں اور ن لیگ میدان مارلیا ہے۔تفصیلات کے مطابق الیکشن کمیشن آف پاکستان نے سیاسی جماعتوں کی فہرست جاری کی جس میں ن لیگ ساڑھے 4 کروڑ روپے اثاثوں کے ساتھ پہلے نمبر پر موجود ہے۔ن لیگ کی آمدن ایک کروڑ 65 لاکھ اور اخراجات 4 کروڑ روپے سے زائد ہے جبکہ حکمران جماعت نے پارٹی اجلاسوں پر ایک لاکھ 35 ہزار روپے خرچ کیے۔ جاری کردہ فہرست میں پاکستان پیپلز پارٹی کا49 لاکھ روپے کے ساتھ دوسرا نمبر ہے۔
پیپلز پارٹی نے 10 کروڑ روپے پیپلز پارٹی پارلیمنٹرینز کو منتقل کردیئے ہیں جبکہ پی پی کی آمدن 2 کروڑ اور اخراجات 12 کروڑ روپے سے زائد ہے۔پاکستان تحریک انصاف کے اثاثے 15 کروڑ روپے ہیں جبکہ پی ٹی آئی نے 2015 ء میں 36 کروڑ 42 لاکھ روپے سے زائد کے اخراجات کئے۔
پاکستان عوامی تحریک کے اثاثوں کی مالیت 11 لاکھ اور 34 ہزار روپے ہے۔شیخ رشید کی عوامی مسلم لیگ ایک لاکھ 38 ہزار روپے کی مالک ہے جبکہ جماعت اسلامی کے اثاثوں کی مالیت 10 کروڑ روپے سے زائد ہے۔ایم کیو ایم کے اثاثوں کی مالیت 4 کروڑ 75 لاکھ روپے سے زائد اور ق لیگ کے اثاثے 5 کروڑ روپے سے زائد کے ہیں۔
ایمزٹی وی(سندھ)پاکستان پیپلز پارٹی کے بانی اور سابق وزیر اعظم ذوالفقار علی بھٹو کی 38 ویں برسی آج منائی جارہی ہے، اس موقع پر سندھ حکومت نے صوبائی سطح پر عام تعطیل کا اعلان کررکھا ہے۔
برسی کی مرکزی تقریب گڑھی خدا بخش میں ہورہی ہے جہاں پیپلز پارٹی کے تمام مرکزی رہنما موجود ہیں جب کہ ملک بھر سے جیالوں کی آمد کا سلسلہ بھی جاری ہے جو ذوالفقار علی بھٹو، نصرت بھٹو، بے نظیر بھٹو اور ان کے دیگر اہل خانہ کی قبروں پر فاتحہ خوانی کررہے ہیں۔
برسی کی مرکزی تقریب سہہ پہر کو ہوگی جس میں پیپلز پارٹی کے دیگر رہنماؤں کے علاوہ پارٹی کے شریک چیئرمین آصف زرداری اور چیرمین بلاول بھٹو زرداری بھی خطاب کریں گے۔
ذوالفقار علی بھٹو کی برسی کے موقع پر گڑھی خدابخش میں سیکیورٹی کے انتہائی سخت انتظامات کیے گئے ہیں،6 ہزار سے زیادہ پولیس اہلکاروں کےعلاوہ رینجرز اوربم ڈسپوزل اسکواڈ بھی اپنے فرائض کی انجام دہی میں مصروف ہیں۔
دوسری جانب گڑھی خدا بخش میں ہی پیپلز پارٹی شہید بھٹو کے زیر اہتمام بھی تقریب کا انعقاد کیا گیا ہے جس میں پارٹی کی چیئرپرسن غنویٰ بھٹو موجود ہیں
ایمزٹی وی(کراچی)حکومت سندھ نے پیپلزپارٹی کے بانی ذوالفقار علی بھٹو کی برسی کے موقع پر 4 اپریل کو صوبے بھر میں عام تعطیل کا اعلان کردیا۔ ذرائع کے مطابق حکومت سندھ نے پیپلزپارٹی کے بانی ذوالفقار علی بھٹو کی 38 ویں برسی کے موقع پر عام تعطیل کا اعلان کردیا ہے اور اس کا باقاعدہ نوٹی فکیشن بھی جاری کردیا گیا ہے۔ نوٹی فکیشن کے مطابق سندھ حکومت کے ماتحت تعلیمی اداروں، سرکاری و نیم سرکاری دفاتر میں 4 اپریل کو عام تعطیل ہوگی۔ پیپلز پارٹی کے بانی کی برسی کے موقع پر پارٹی کی جانب سے 4 اپریل کو گڑھی خدا بخش میں تقریبات منعقد کی جائیں گی جس میں پارٹی کے مرکزی رہ نما، وزرا، سینٹرز، ممبران اسمبلی اور کارکنان شرکت کریں گے۔
ایمزٹی وی(اسلام آباد)وفاقی وزیر خواجہ سعد رفیق نے کہا ہے کہ پیپلز پارٹی سندھ میں بری طرح ناکام ہوگئی ،ہمیں متبادل قیادت دینا ہوگی،پی پی کو صوبے میں آئی جی نہیں منشی چاہیے۔
میڈیا سے گفتگو میں خواجہ سعد رفیق نے کہا کہ آئی جی سندھ اے ڈی خواجہ کا قصور یہ ہے کہ وہ کام کرنا چاہتے ہیں، پی پی حکومت کو گھر کا منشی چاہیے ،انہیں میرٹ پر چلنے والا آئی جی وارا نہیں کھاتا۔انہوں نے کہاکہ عمران خان کے الزامات کی کوئی حیثیت نہیں،پیپلزپارٹی سے نورا نہیں اصل کشتی ہورہی ہے ، سندھ کا کباڑا کرنے والوں کی جگہ متبادل قیادت فراہم کریں گے۔
عمران خان کی آرمی چیف سے ملاقات پر ان کا کہناتھاکہ ہماری اپنی فوج ہے، سب کے رابطے ہونے چاہئیں،ملاقات کے بعد عمران خان نے کافی ہوشمندی میں بیان دیا۔انہوں نے کہا کہ پیپلزپارٹی سے ہماری کوئی ڈیل نہیں ہورہی، نہ ہی پی پی نے کوشش کی،افسوس ہوتا ہے جب بعض سیاستدان لاشوں اور حادثوں پر سیاست کرتے ہیں،نعرے لگانا، باتیں کرنا، تنقید کرنا، جھوٹ بولنا، الزام لگانا سب سے آسان کام ہے۔وفاقی وزیر نے یہ بھی کہا کہ ریلوے بہتر ہوئی یا نہیں ، عوام جانتے ہیں یا صحافی، تنقید کرنے والوں کو کچھ تو چاہیے، ہم چیزوں کو بہتر بنانے کے لیے ایمانداری سے کوشش کررہے ہیں۔
انہوں نے پرویز خٹک کو معتبر آدمی قرار دیا اور کہا کہ ریلوے سے متعلق ان کے بیان پر افسوس ہوا،پشاور میں ریلوے کی زمین سی پیک منصوبے کے باعث میٹروبس کے لیے نہیں دی،قومی ادارے کو ٹارگٹ کرکے اس کی ساکھ مجروح نہ کریں۔سعدرفیق کا مزید کہناتھاکہ ہمارے سامنے مسائل ہی مسائل ہیں،حکومتیں لوٹ مار کرتی رہیں، ریلوے کی طرف کسی نے توجہ نہیں دی۔
ایمز ٹی وی(لاہور) خیبر پختونخوا اسمبلی کے سابق ڈپٹی اسپیکر اکرام اللہ شاہد نے پاکستان پیپلزپارٹی میں شمولیت اختیار کر لی۔بلاول ہاؤس لاہور میں پیپلزپارٹی کے شریک چیئرمین آصف علی زرداری سے سابق ڈپٹی اسپیکر خیبر پختونخوا اکرام اللہ شاہد نے ملاقات کی جس میں خیبر پختونخوا کے پارٹی رہنما خواجہ خان ہوتی، حاجی نواز کھر بھی شریک تھے۔ملاقات کے دوران اکرام اللہ شاہد نے پیپلزپارٹی میں شمولیت کا اعلان کیا۔ آصف علی زرداری نے اکرام اللہ شاہد کی شمولیت کو نیک شگون قرار دیتے ہوئے کہا کہ خیبر پختونخوا کی سیاست کا منظرنامہ بھی جلد تبدیل ہونے والا ہے
ایمزٹی وی(لاہور)سابق صدر آصف علی زرداری نے کہا ہے کہ الیکشن کا وقت قریب ہے اور پیپلز پارٹی الیکشن کیلئے تیار ہے، ان کو پتہ چل جائے گا کہ الیکشن کہتے کسے ہیں۔ پیپلز پارٹی کا ایک وفد تمام پارٹیوں سے مذاکرات کرے گا تاکہ پورے پاکستان، بالخصوص پنجاب اور شہر لاہور میں صاف شفاف الیکشن کرایا جا سکے۔
تفصیلات کے مطابق آصف علی زرداری سینئر پارٹی رہنماءعزیز الرحمان چن کی رہائش گاہ آئے جہاں انہوں نے کارکنوں کیساتھ خطاب کرتے ہوئے کہا کہ آج کارکنوں کا ولولہ، جوش دیکھ کر پتہ لگتا ہے کہ پیپلز پارٹی اور کارکن اب دوبارہ ایک مقابلے کیلئے تیار ہیں، پچھلی دفعہ ہم پر ہتھکڑیاں لگی ہوئی تھیں لیکن اس دفعہ کوئی ہتھکڑی نہیں، میں خود اور بلاول میدان میں ہیں، آپ کی بیٹیاں میدان میں ہیں، ہم سب ساتھ نکل کر میدان میں مقابلہ کریں گے اور ان کو پتہ چل جائے گا کہ الیکشن کسے کہتے ہیں ۔
انہوں نے کہا کہ الیکشن کا وقت آنے والا ہے، ان دوستوں کو اور آپ کو سمجھنا چاہئے کہ پاکستان پیپلز پارٹی نے کبھی بھی شکست نہیں کھائی۔ پیپلز پارٹی نے پنجاب سے کبھی شکست نہیں کھائی البتہ آر او الیکشن سے شکست ضرور کھائی ہے، آر او الیکشن پہلے بھی ہوئے تھے اور اب بھی ہو رہے ہیں لیکن ہم نے ان کا مقابلہ کرنا ہے۔
انہوںنے کہا کہ پاکستان کی تمام سیاسی جماعتوں کے پاس پیپلز پارٹی کا ایک وفد بھیجیں گے جو مذاکرات کرے گا کہ کس طرح پورے پاکستان بالخصوص پنجاب اور شہر لاہور میں صاف اور شفاف الیکشن کر سکیں۔ آپ دوستوں کا ولولہ دیکھا ہے اور قربانیاں بھی یاد ہیں، آج شہیدوں کی بہنیں یہاں موجود ہیں، میں نے وہ دن بھی دیکھے کہ جب بی بی آیا کرتی تھیں تو پورا لاہور بند ہو جایا کرتا تھا، اب بھی ایسا ہی ہو گا، ہم جب نکلیں گے تو پورا لاہور بند ہو گا ۔
ایمزٹی وی(اسلام آباد)وفاقی وزیر داخلہ چوہدری نثارکا کہنا ہے کہ سوشل میڈیا پرمقدس ہستیوں کی توہین کسی صورت برداشت نہیں اگر اس حوالے سے سخت ترین اقدام اٹھانا پڑا تواس سے بھی گریز نہیں کریں گے۔
اسلام آباد میں پریس کانفرنس کرتے ہوئے وفاقی وزیر داخلہ چوہدری نثار کا کہنا
تھا کہ سوشل میڈیا پر کچھ عرصے سے ناپاک جسارت کی جارہی ہے جو ناقابل قبول ہے جب کہ توہین آمیز مواد کا مسئلہ کسی ایک ملک کا نہیں عالم اسلام کا ہے اور ہماری خواہش ہے کہ اس معاملے پر جمعے کو تمام مسلم ممالک کے سفیروں کو بلایا جائے کیوں کہ مسلم ممالک کے مشترکہ لائحہ عمل سے زیادہ مثبت اثر پڑے گا۔
چوہدری نثار کا کہنا تھا کہ توہین آمیزموادکےمعاملے پرعدالتی احکامات کی روشنی میں کردارادا کررہےہیں جب کہ سوشل میڈیا اگراسی راہ پر رہا تو سخت ترین اقدامات کریں گے اور جوسخت ترین قدم اٹھائیں گے وہ سب کے سامنے آجائے گا کیوں کہ سوشل میڈیا مذہب اور ایمان سے زیادہ اہم نہیں اور ہم کسی پر توہین رسالت ﷺکا الزام نہیں لگا رہے لیکن جو اس میں ملوث پایا گیا اس کے خلاف سخت ایکشن لیا جائے گا۔
وفاقی وزیر داخلہ نے پیپلزپارٹی کے رہنما شرجیل میمن کے حوالے سے بات کرتے ہوئے کہا کہ شرجیل میمن صحیح تھے تو دو سال باہر کیوں رہے انہیں سوچنے اور صفائی پیش کرنے میں 2 سال لگ گئے۔ انہوں نے کہا کہ وزرا کے جھرمٹ میں آتے ہیں اور ہیرو بنے پھرتے ہیں، اپنی صفائی پیش نہیں کرتے اور مجھ پر الزامات لگائے جاتے ہیں، کیا ہر کرپٹ آدمی کو پکڑنے کے پیچھے میں ہوں، اگر ایسا ہے تو مجھے خوشی ہوتی ہے۔
چوہدری نثار نے کہا کہ احتساب تب ہوگا جب تمام طبقے اپنی صفوں میں خود احتساب کی روایت ڈالیں گے، پیپلزپارٹی نے اپنے سیاسی ورکر کو چیرمین نیب لگایا جب کہ موجودہ چیرمین نیب اپوزیشن کی مشاورت سے تعینات کیے گئے۔ وزیرداخلہ کا وزیراعلیٰ سندھ کے وفاقی اداروں کو صوبے سے نکالنے کے بیان پر کہنا تھا کہ کوئی صوبہ کسی وزیراعلیٰ کی جاگیر نہیں کہ کس ادارے کو کام کرنا ہے اور کسے نہیں۔
ایمزٹی وی(اسلام آباد)مشیر خارجہ سرتاج عزیز نے کہا ہے کہ پیپلز پارٹی نے اپنے دور میں سفیر کو ویزے جاری کرنے کا اختیار دیا جس کی وجہ سے 6ماہ میں ویزوں کی تعداد معمول سے50فیصدبڑھ گئی۔
حسین حقانی کے مضمون پر سینیٹ اجلاس میں اظہار خیال کرتے ہوئے سرتاج عزیز کا کہنا تھا کہ حسین حقانی کے مضمون کا جائزہ لیا جا رہا ہے، ان کے مضمون میں درج بیشتر باتیں انکشافات نہیں ہیں۔ حسین حقانی کے مضمون کے نتیجے میں پاکستان میں کئی اہم سوالات اٹھائے گئے۔
انہوں نے کہا کہ کسی بھی شخص کو پاکستان کا ویزہ جاری کرنے سے پہلے وزارت داخلہ اور خفیہ اداروں سے این او سی چاہیے ہوتی ہے لیکن پیپلزپارٹی کے دورمیں حکومت نے پالیسی تبدیل کی اور ایک خط کے ذریعے سفیر کو ایک سال دورانیہ کے ویزے جاری کرنے کااختیار دے دیاگیا۔ پالیسی میں تبدیلی کی وجہ سے صرف 6 ماہ میں ویزوں کی تعداد معمول سے50فیصدبڑھ گئی تھی۔
ایمزٹی وی(اسلام آباد)اسلام آباد ہائیکورٹ سے ضمانت کے باوجود شرجیل میمن خوفزدہ رہے اور اپنے وکلا سے پوچھتے رہے کہ نیب والے اب گرفتار تو نہیں کریں گے۔ شرجیل میمن کے وکلا نے کہا پیپلز پارٹی کے کارکن مقدمات سے بھاگتے نہیں، سامنا کرتے ہیں۔
تفصیلات کےمطابق سابق صدر زرداری کے پیر اعجاز نے اسلام آباد ہائیکورٹ میں شرجیل میمن سے ملاقات کی۔ پیر اعجاز نے میڈیا کو بتایا کہ شرجیل کیلئے دعائیں کرنے آیا تھا انہیں کوئی پریشانی نہیں ہو گی۔