ایمزٹی وی(انٹرنیشنل) مقبوضہ کشمیر میں مظالم اور کنٹرول لائن پر بھارتی جارحیت کے خلاف پاکستانی عوام بدستور سراپا احتجاج ہیں، آج بھی وکلا، ہندوبرادری، سیاسی کارکن اورطالب علم سڑکوں پرنکل آئے اوربھارت مخالف مظاہرے کیے۔

پنجاب بار کونسل کی کال پر آج مختلف شہروں میں وکلاء سراپااحتجاج بنے رہے،ملتان، گوجرانوالہ سمیت کئی شہروں میں وکلاء ماتحت عدالتوں میں پیش نہیں ہوئےاورکشمیریوں سے اظہاریکجہتی کیا۔

سرگودھا میں رکشا ڈرائیوروں نے پاک فوج سے اظہار یکجہتی اور بھارتی ہٹ دھرمی کے خلاف احتجاج کیا۔

سکھر میں جماعت اسلامی کے کارکنوں کی جانب سے قاسم پارک سے پریس کلب تک بھارت مخالف ریلی نکالی گئی، ریلی میں اسکول طلباء نے بھی بڑی تعداد میں شرکت کی۔

نوشکی میں ہندو برادری کی جانب سے بھارت کے خلاف احتجاجی ریلی نکالی گئی، ریلی جناح روڈ سے ہوتے ہوئے پریس کلب پہنچی تو جلسے کی شکل اختیار کرگئی۔

شرکاء سے خطاب کرتے ہوئے مقررین نے کہا کہ پاکستان ہمارا ملک ہے، ہم اس پر مر مٹنے کے لیے تیار ہیں۔

ایمز ٹی وی (کھیل) پاکستان میں خواتین کا کھیلوں میں رجحان بڑھتا جارہا ہے ،کراچی کی ایک طالبہ روزانہ موٹر سائیکل پر کرکٹ کی پریکٹس کرنے جاتی ہے۔

ثناء عروج ،جنہیں کرکٹ سے محبت ہی نہیں بلکہ کرکٹ کھیلنے کا جنون ہے۔ثناء روزانہ لانڈھی سے موٹر سائیکل پر سوار ہو کر تنگ گلیوں اور دشوار گزار راستوں سے ہوتی ہوئی اسٹیدیم پہنچتی ہیں۔

مڈل آرڈر بیٹسمین ثناء ابھی قومی سطح پر اپنی پہنچان تو نہ بنا سکیں لیکن کراچی کی جانب سے سنچری اسکور کرچکی ہیں، اور کسی اچھے چانس کی منتظر ہیں ۔

ایمزٹی وی(انٹرٹینمنٹ) کل تک عام سی لڑکی تھی لیکن آج خاص ہو گئی، مس امریکا کا تاج آرکنساس سے تعلق رکھنے والی طالبہ سیوی شیلڈز کے سر سج گیا۔

سیوی شیلڈز یونی ورسٹی آف آرکنساس کی طالبہ ہیں ۔مقابلے میں انہوں نے ڈونلڈ ٹرمپ کے مہاجرین سے متعلق دیئے گئے متنازع بیانات سمیت کئی سوالات کے جواب دے کر ججز کا دل جیت لیا۔

مس امریکا بننے پر سیوی شیلڈزکو پچاس ہزار امریکی ڈالر کی اسکالر شپ بھی دی جائیگی ۔

ایمزٹی وی(کھیل) ریو اولمپکس میں شرکت کے لیے جانے والے پاکستانی دستے میں شامل دو نشانہ باز کھلاڑیوں نے پاکستان آرمی سے تربیت حاصل کی ہے،دونوں کھلاڑی اپنی جیت کو پاکستان فوج کے نام کرنے کو بے تاب ہیں۔

تفصیلات کے مطابق ریو اولمپکس میں حصہ لینے والے پاکستانی میں شامل دو نشانے باز کھلاڑی 29 سالہ غلام مصطفیٰ بشیر اور 21 سالہ طالبہ منحال سہیل بھی شامل ہیں،دونوں نوجوان ریو اولمپک کے ’’شوٹنگ ایونٹ‘‘ میں پاکستان کی نمائندگی کریں گے جس کے لیے انہوں نے پاکستانی نیوی فوج کے زیر نگرانی نشانے بازی میں مہارت حاصل کی ہے۔

واضح رہے غلام مصطفیٰ بشیر مردوں کے ہونے والے 25 میٹر ’’رپیڈ فائر پستول‘‘ جب کہ منحال سہیل خواتین کے 10 میٹر ’’ایئر رائفل‘‘ میں حصیہ لیں گی،دونوں ماہر نشانہ بازوں کو پاکستان نیوی کی تربیت حاصل ہے۔

غلام مصطفیٰ نیوی کے ملازم ہیں جب کہ منحال سہیل پاکستان نیوی آفیسر کی صاحبزادی ہیں،منحال سہیل نے تربیت نیوی کےگرمیوں کی تعطیلات میں لگائے ایک کیمپ میں حاصل کی،یہ کیمپ پاکستان کے سب سے بڑے شہر کراچی میں لگایا گیا تھا۔کیمپ میں تربیت کے بعد منحال سہیل نے ایشیاء میں ہونے والے کئی مقابلوں میں پاکستان کی نمائندگی کر چکی ہیں،اولمپک کھیلوں میں شرکت کو انہوں نے زندگی کا سب سے حسین اور نادر موقع قرار دیا اسی طرح پاکستانی دستے میں شامل غلام مصطفیٰ نے غیر ملکی خبر رساں ایجینسی سے بات کرتے ہوئے کہا کہ شوٹنگ کے شعبے میں پاکستان نیوی کی خدمات کو سراہا انہوں نے کہا کہ پاکستان نیوی نے اس شعبے میں سب سے پہلے الیکٹرانک ٹارگٹ کی تکنیک کو متعارف کرایا اور گزرتے وقت کے ساتھ ساتھ اس میں جدت لاتے رہے۔

خیال رہے پاک فوج کے ادارے اور اُن کی تربیت مایوس کھلاڑیوں کے لیے واحد امید بنتی جا رہی ہے بالخصوص اُس وقت جب کہ حکومتی اور نجی ادارے ذبوں حالی کا شکار ہیں تو ایسے میں پاک فوج کی تربیت کھلاڑیوں کے بلند حوصلے اور مہارت کا باعث بنتی ہے۔

ایمزٹی وی(صحت)نانیانگ ٹیکنالوجیکل یونیورسٹی کے طالب علم البرٹ ژانگ نے ایک ایسا روبوٹ ایجاد کیا ہے جو مریضوں کی فزیوتھراپی کرنے کے علاوہ مساج پارلر میں آنے والوں کو مشینی مساج کی سہولت بھی دے سکتا ہے۔

سنگاپور میں تیار کیا گیا یہ روبوٹ جس کا نام ’’ایکسپرٹ مینی پیولیٹیو آٹومیشن‘‘ اور مخفف ’’ایما‘‘ (EMMA) ہے، ایک عدد روبوٹ بازو پر مشتمل ہے جسے خصوصی کمپیوٹر سے مربوط کیا گیا ہے۔ ’’ایما‘‘ کو ایک ٹرالی پر رکھا جاتا ہے جب کہ اس کے روبوٹ بازو کا اگلا حصہ، فزیوتھراپی اور مساج کرنے والے خصوصی ساز و سامان سے لیس ہے۔ اس میں تھری ڈی فلم بنانے والا کیمرہ بھی نصب ہے جو بستر پر لیٹے ہوئے فرد کی لمحہ بہ لمحہ پوزیشن سے کمپیوٹر کو خبردار کرتا رہتا ہے۔

بازو کے اگلے حصے میں سینسرز بھی موجود ہیں جو دباؤ میں کمی بیشی کو محسوس کرسکتے ہیں، اسے انسان کی جانب سے صرف اتنی ہدایت کی ضرورت ہوتی ہے کہ کس طرح کا مساج کرنا ہے جس کے بعد باقی تمام کام یہ خود سنبھال لیتا ہے۔

ژانگ نے اس روبوٹ کو مزید بہتر بنانے اور تجارتی پیمانے تک لانے کےلئے ’’اے آئی ٹریٹ‘‘ کے نام سے ایک کمپنی بھی قائم کرلی ہے،فی الحال یہ انسانی طبّی آزمائشوں سے گزر رہا ہے اور اب تک اسے 50 مریضوں پر کامیابی سے آزمایا جاچکا ہے جو کہنی، کمر کے نچلے حصے اور کندھوں اور گردن کی اینٹھن میں مبتلا تھے جب کہ توقع ہے کہ ان آزمائشوں کی کامیاب تکمیل کے بعد یہ 2017ء کے اختتام تک فروخت کےلئے پیش کردیا جائے گا۔

ایمزٹی وی(انٹرنیشنل) اٹلی کے ایک سابق رکن پارلیمنٹ کی بیٹی نے اسلام قبول کرلیا۔ رکن پارلیمنٹ نے بیٹی کے قبول اسلام کو ایک ’شدت پسند مذہب کی طرف رجحان‘ قرار دیتے ہوئے تشویش کا اظہار کیا۔ بائیس سالہ میولا فرانکو باربرٹو لورینٹلے ڈی نپولی یونیورسٹی کی طالبعلم ہیں اور انہوں نے قبول اسلام کے بعد اپنا نام عائشہ رکھا ہے۔ عائشہ کے والد فرانکو باربرٹو نے بیٹی کے اس فیصلہ پر سخت تشویش ظاہر کی۔ میڈیا نمائندوں سے گفتگو کرتے ہوئے انہوں نے اسلام پر بنیاد پرست اور کٹر مذہب ہونے کا الزام عائد کیا۔ انہوں نے کہا، ’یہ تبدیلی نہ صرف بری ہے بلکہ خوفناک بھی ہے، اسلام ایک شدت پسند اور بنیاد پرست مذہب ہے۔ میں دیکھتا ہوں کہ وہ عبادت کرتے ہوئے اپنے بچوں کی طرف بھی دھیان نہیں دیتی چاہے وہ رو ہی کیوں نہ رہے ہوں۔ مجھے اپنی بیٹی کے فیصلے سے سخت تکلیف پہنچی ہے‘۔ عائشہ نے فیس بک اکاؤنٹ پر اپنے خیالات کا اظہار کرتے ہوئے کہا کہ سر ڈھانپنے کو خدا نے میرے لیے منتخب کیا ہے۔ یہ خدا کا قانون ہے۔ میں اسے نہ ماننے والی کون ہوتی ہوں‘۔ رکن پارلیمنٹ کی بیٹی کے قبول اسلام کو ملک بھر میں ناپسندیدگی کی نظر سے دیکھا جارہا ہے اور انہیں سخت تنقید کا سامنا ہے۔ واضح رہے کہ پچھلے کچھ عرصہ میں پیرس، برسلز اور اورلینڈو میں ہونے والے دہشت گردی کے واقعات میں مسلمانوں کے ملوث ہونے کے باعث ایک طرف تو مسلمانوں کو یورپ میں سخت مشکلات کا سامنا ہے دوسری طرف ایسے افراد کی بھی کمی نہیں جو اسلام کی اصل روح کو سمجھ کر دائرہ اسلام میں داخل ہو رہے ہیں۔

ایمزٹی وی(چترال) کیلاش کی 14 سال کی لڑکی رینا کا کہنا ہے اس نے اسلام اپنی مرضی سے قبول کیا اوراس پر اس حوالے سے کوئی دباؤ نہیں تھا۔

چترال پریس کلب میں پریس کانفرنس کرتے ہوئے اسلام قبول کرنے والی 14 سال کی نویں جماعت کی طالبہ رینا کا کہنا تھا کہ میں نے اپنی مرضی سے اسلام قبول کیا کیونکہ میں تعلیم یافتہ ہوں اور میں نےاسلامی مواد کا مطالعہ کیا جس سے متاثر ہوکر اسلام قبول کرلیا۔ لڑکی نے اس بات کی سختی سے تردید کی کہ اس پر مذہب تبدیل کرنے کے لیے کوئی دباؤ ڈالا گیا۔

واضح رہے کہ خیبر پختونخوا کے ضلع چترال میں بمبوریت کے علاقے میں کیلاش قبیلے کی اس لڑکی کی جانب سے مذہب کی تبدیلی پر علاقے میں تنازع کھڑا ہوگیا تھا تاہم اب لڑکی کی جانب سے بیان دیئے جانے کے بعد یہ مسئلہ حل ہوگیا ہے۔

ایمز ٹی وی(کراچی )پولیس نے منگھوپیر کے علاقے میں کارروائی کرتے ہوئے شہر کو بڑی تباہی سے بچا لیا۔ کالعدم تنظیم کے کمانڈر کی کمین گاہ پر چھاپہ مار کر بھاری تعداد میں گولہ بارود اوراسلحہ برآمد کرلیا۔

کراچی میں پریس کانفرنس کرتے ہوئے ایس ایس پی ویسٹ پیر محمد شاہ نے بتایا کہ خفیہ اطلاع پر منگھوپیر سلطانہ آباد میں کالعدم تحریک طالبا ن کے کمانڈراحسان اللہ محسود کی کمین گاہ پر چھاپہ مارا گیا چھاپے کے دوران بھاری مقدار میں اسلحہ اور گولہ بارود برآمد ہوا۔

کارروائی میں حصہ لینے والے ایس ایچ او منگھوپیرغلام حسین کورائی نے بتایا کہ چھاپے کے دوران 6 آر پی جی راکٹ لانچر بھی برآمد ہوئے۔

کالعدم تحریک طالبان کے کمانڈر احسان اللہ محسود کے گھر کے اطراف میں سرچ آپریشن کے دوران 35 مشتبہ افراد کو بھی حراست میں لے لیا گیا۔

ایمزٹی وی (انٹرنیشنل) چلی کے دارالحکومت سان تیاگو میں حکومت کی جانب سے تعلیمی اصلاحات پر عمل درآمد نہ ہونے پر طلباء تنظیموں کی جانب سے شدید احتجاج کیاگیا تفصیلات کےمطابق طلبا تنظمیوں نے بدھ کے روز چلی کے دارالحکومت سان تیاگو میں صدر کی جانب سے تعلیمی اصلاحات پر عمل درآمد نہ ہونے پر احتجاج کیا، صدر نے غریب طلباء کے لیے مراعات، نئے اسکول اور ہر طالب علم کے لیے یونیورسٹی سطح کی تعلیم مفت کرنے کا وعدہ کیا تھا چلی کی طلباء تنظمیوں کےاحتجاج کےدوران میٹرواسٹیشن عارضی طور پر بند کردیا گیا، ناخوش طلباکومنتشرکرنےکیلئے پولیس نے آنسوگیس اور واٹر کینن کا استعمال کیا، پولیس نےمتعدد طلباء کو احتجاج کرنے کے باعث گرفتار کرلیا گذشتہ سال کانگریس نے تعلیمی اصلاحات کی پہلی سیریز کی منظوری دے دی تھی اور سرکاری اسکولوں کی منتخب داخلوں کی پالیسیوں کو ہٹا دیا تھا مظاہرین کا کہنا تھا کہ حکومت کی جانب سے متعارف کی گئی اصلاحات کافی نہیں ہیں، حکومت تمام طالب علموں کو اعلیٰ تعلیم مفت فراہم کرے یاد رہے طلباء کی جانب سے چلی کے تعلیمی نظام کو تبدیل کرنے کے لیے 2011 سے اب تک سینکڑوں احتجاج کئے گئے ہیں، ان مظاہروں میں کئی طلبا جان کی بازی ہار چکے ہیں.

ایمزٹی وی (تعلیم)جامعہ کراچی کے سابق رجسٹرار پروفیسر ڈاکٹر فہیم الدین کے زیر صدارت کراچی کے نجی اسکول میں 27 ویں سالانہ جلسہ تقسیم اسناد کا اہتمام کیا گیا۔ تقریب سے خطاب کرتے ہوئے مہمان خصوصی سابق ڈسٹرکٹ اینڈ سیشن جج ملیر محمد یامین نے کہا ہے کہ طلبہ ملک و قوم کا اثاثہ ہیں اور ان کی بہترین تعلیم و تربیت والدین کے ساتھ ساتھ اساتذہ کی ذمہ داری ہے ۔بہترین تربیت کے بغیر تعلیم کا حصول بے معنی ہوجاتا ہے- اس موقع پرڈاکٹر فہیم الدین نے ’’گھر میں سب سے چھوٹا تھا، میرے حصے میں ماں آئی‘‘ کے عنوان پر خطاب کرتے ہوئے کہا کہ اولاد پر والدین کی فرمانبرداری فرض ہے ۔ماں ہو یا باپ دونوں کی اہمیت اور شان دین اسلام نے بیان کی ہے۔ کوئی ’’مدر یا فادر ڈے‘‘ والدین سے 365دنوں کی محبت کا نعم البدل نہیں ہوسکتا۔طلبہ و طالبات اپنے والدین کی ہمیشہ عزت کریں۔ جبکہ دوسری جانب اسکول پرنسپل پروین شکیل نے کہا کہ المبین اسکول گزشتہ 27 سال سے علاقے میں طلبہ کو سستی معیاری تعلیم کے ساتھ ساتھ تربیت کے اعلیٰ مواقع فراہم کر رہا ہے ۔پروفیسر یعقوب عباسی اور پروفیسرسید شکیل احمد نے طلبہ پر زور دیا کہ وہ حصول علم کے لیے سخت محنت کریں۔آخر میں نمایاں کارکردگی والے بچوں میں انعامات تقسیم کیے گئے۔