کراچی: انسٹیٹیوٹ آف بزنس مینجمنٹ کا25واں کانووکیشن کاانعقاد کیا گیا۔

25ویں سالانہ جلسہ تقسیم اسناد کی تقریب میں گورنرسندھ کامران خان ٹیسوری بطور مہمانِ خصوصی نے شرکت کی۔

کانووکیشن میں چانسلر بشیر جان محمد،صدر انسٹیوٹ آف بزنس مینجمنٹ طالب کریم،ممبرز بورڈ اف گورنر، اساتذہ، طلبہ و طالبا کے والدین نےبھی شرکت تھی۔

کانوکیشن سے خطاب کرتے ہوئےگورنر سند ھ کامران ٹیسوری نے کہا کہ تعلیمی خدمات کے 25 برس مکمل ہونے پر انتظامیہ کو مبارک باد دیتا ہوںکانووکیشن تمام طالب علموں کے لیے خوشی اور فخر کا دن ہے۔اس دن طالب علموں کی محنت کا ثمر اور والدین کی قربانیوں کا صلہ ہوتا ہے۔

انہوں نے مزید کہا کہ بلاشبہ تعلیم وہ قیمتی اثاثہ ہے جو انسان کے بہتر مستقبل کا ضامن ہے۔تعلیم یافتہ نوجوان معاشرہ اور ملک و ملت کا اثاثہ ہوتا ہے۔طلبہ ہمیشہ اپنے والدین کا خیال رکھیں۔ والدین کی دعائیں ہی آ پ کو ہر مشکل سے نکال سکتی ہیں۔ تعلیم یافتہ نوجوان ہی پاکستان کے روشن مستقبل کی ضمانت ہے۔پاکستان کی خوشحالی میں سب سے بڑا کردار نوجوانوں کا سمجھتا ہوں۔

انہوں نے کہاکوشش ہے کہ آپ کے لئے بہتر مواقع پیدا کرسکوں۔ہمیں ان نوجوانوں کے لئے صنعتوں کو ترقی دینی ہے۔ہم سب ملکر محنت سے پاکستان کو ترقی کی جانب لے جائیں گے۔آیئے عہد کریں کہ پاکستان کو کامیابی کی جانب لیکر جائیں گے۔کوشش ہے کہ کراچی میں نئی جامعات کا اضافہ کرسکوں۔نوجوانوں کے لیے ایک سرکاری موبائل اپلیکیشن بنانے کا ارادہ ہے ۔

کراچی: دنیاکےسب سے بڑے سرچ انجن اوردیگرسہولیات کی حامل کمپنی گوگل نےپاکستان میں باضابطہ طورپراپنا دفتر کھولنے کا اعلان کردیا ہے۔

وفاقی وزیر انفارمیشن ٹیکنالوجی امین الحق نے کہا ہے کہ گوگل نے پاکستان میں اپنا دفتر قائم کرنے کا فیصلہ کرلیا ہے اس سلسلے میں ضوابطی کارروائی بھی شروع کردی ہے آفس کا قیام پاکستانی صارفین کیلئے اہم سنگ میل ثابت ہوگا،

انفارمیشن ٹیکنالوجی کے وفاقی وزیرامین الحق اس ضمن میں گوگل انتظامیہ سے جلد ملاقات کریں گے۔ دوسری جانب گوگل ایشیا پیسیفک نے سیکیوریٹیز اینڈ ایکسچینج کمیشن آف پاکستان میں رجسٹریشن بھی کروالی ہے۔

امین الحق کے مطابق گوگل حکام سے رابطے جاری ہیں اور دسمبر کے دوسرے ہفتے میں وفد کی پاکستان آمد متوقع ہے۔ انہوں ںے کہا کہ گوگل کے عہدیداران سے ملاقات میں پالیسی، صارفین کے مسائل ، حکومتی تعاون اور دو طرفہ امور پر گفتگو ہوگی۔ پھر گوگل آفس یوٹیوب سمیت گوگل کی تمام ایپلی کیشنز سے متعلق امور کی نگرانی بھی کرے گا۔

انہوں نے کہا کہ اس طرح گوگل اشتہارات میں مسائل سے متعلق معاملات پرصارفین کو فوری ریسپانس بھی مل سکے گا۔ وزارت برائے آئی ٹی اور ٹیلی کمیونکیشن کی جانب سے گوگل کو بھرپور تعاون بھی حاصل ہوگا۔

وفاقی وزیر نےکہا کہ ٹک ٹاک نے بھی پاکستان میں اپنا رابطہ آفس کھولنے کا اصولی فیصلہ کیا ہے اور امید ہےکہ فیس بک بھی جلد ہی اس ضمن میں اپنا فیصلہ جاری کرے گا۔ انہوں نے بتایا کہ پاکستان بین الاقوامی اداروں کے دفاترملک میں کھولنے کے مسلسل ان سے رابطے میں ہے۔

ملتان : ملتان ٹیسٹ کے دوسرےروز پاکستان پہلےسیشن میں انگلینڈکے281رنزکےجواب میں محض 202 رنز بناکرآل آؤٹ ہوگیا۔

ملتان کرکٹ اسٹیڈیم میں کھیلے جارہے میچ میں قومی ٹیم نے 2 وکٹوں کے نقصان پر 107 سے اننگز کا آغاز کیا تاہم پاکستان کے 8 بلےباز دوسرے روز محض 95 رنز کا اضافہ کرسکے۔

کپتان بابراعظم 142 کے مجموعے پر 75 رنز بناکر پویلین لوٹ گئے جبکہ سعود شکیل کی مزاحمت بھی 63 رنز پر دم توڑ گئی۔ قومی کرکٹ ٹیم کی 4 وکٹیں محض 4 رنز کے اضافے پر گریں، جس میں محمد رضوان 10، آغا سلمان 4، محمد نواز 1 جبکہ محمد علی صفر پر آؤٹ ہوئے، فہیم اشرف 22، زاہد محمود صفر جبکہ ابرار احمد نے ناقابل شکست 7 رنز بنائے۔

انگلینڈ کی جانب سے جیک لیچ نے 4، جو روٹ 2 جبکہ اولی روبنسن اور جیمز اینڈرسن نے ایک ایک وکٹ حاصل کی۔

پہلا روز:
قومی ٹیم کیلئے ڈیبیو کرنے والے ابرار احمد نے انگلش ٹیم کے 7 کھلاڑیوں کو پویلین کی راہ دیکھائی، جس میں زیک کرولی 19، بین ڈکٹ 63، اولی پوپ 60، جو روٹ 8، ہیری بروک 9، کپتان بین اسٹوکس 30، ول جیکس 31 رنز بناکر آؤٹ ہوئے، زاہد محمود نے اولی روبنسن، جک لیچ اور جیمز اینڈرسن کی وکٹیں حاصل کیں۔قومی ٹیم نے بیٹنگ کا آغاز کیا تو اوپنر امام الحق صفر جبکہ عبداللہ شفیق 14پر وکٹ گنوا بیٹھے تھے، کپتان بابراعظم اور سعود شکیل نے 90 رنز کی پارٹنرشپ قائم کی تاہم بابر 75 کے انفرادی اسکور پر روبنسن کا شکار بنے۔

پاکستان کا اسکواڈ
کپتان بابراعظم،عبداللہ شفیق، امام الحق، سعود شکیل، فہیم اشرف،محمد رضوان، آغا سلمان، محمد نواز، زاہد محمود، ابرار احمد اور محمد علی شامل ہیں۔

انگلینڈ کا اسکواڈ:
کپتان بین اسٹوکس، زیک کرولی، بین ڈکٹ، اولی پوپ، جو روٹ، ہیری بروک، ول جیکس، اولی رابنسن، جیک لیچ، مارک ووڈ اور جیمز اینڈرسن شامل ہیں۔

اسلام آباد: پاکستان سمیت دنیابھرمیں انسانی حقوق کاعالمی دن آج منایاجارہاہے۔

رواں سال انسانی حقوق کا عالمی دن عزت، آزادی اور انصاف سب کے لیے۔" کے موضوع پر منایا جارہاہے۔

اعلامیہ اور ڈبلیو ایچ او کا آئین اس بات پر زور دیتا ہے کہ صحت تمام لوگوں کا بنیادی انسانی حق ہے۔

اس دن یونیورسل ڈیکلریشن آن ہیومن رائٹس (UDHR) کو اقوام متحدہ نے عملی جامہ پہنایالیکن 74 سال گزرنے کے باوجود کروڑوں افراد بنیادی حقوق اور آزادی سے محروم ہیں جس میں مقبوضہ کشمیر کی آبادی سر فہرست ہے جو بھارتی ظلم اور جبر کا سات دہائیوں سے سامنا کر رہی ہے۔اس کے علاوہ فلسطین ، شام ،عراق سمیت کئی ممالک اپنی آزادی کےلئے جنگ لڑ رہے ہیں۔

ایک طرف بھارت نے مقبوضہ کشمیر کو دنیا کی سب سے بڑی جیل بنادیا تو دوسری طرف بھارت کے مختلف ریاستوں میں ہندو انتہا پسند اور آر ایس ایس جبری مذہبی تبدیلیوں، مذہبی مقامات کے تقدس کی پامالی اور ان کو منہدم کرنے جیسے واقعات میں ملوث ہے۔

کراچی: جامعہ کراچی کے شعبہ اکنامکس اور اپلائیڈ اکنامکس ریسرچ سینٹر جامعہ کراچی کے زیر اہتمام ٹاک بعنوان: ”بڑھتے ہوئے چیلنجز،فیصلہ کن وقت مشرق وسطیٰ اور وسطی ایشیاء“کل صبح 10:00 بجے اپلائیڈ اکنامکس ریسرچ سینٹر جامعہ کراچی کی سماعت گاہ میں منعقد ہوگی۔

آئی ایم ایف کی نمائندہ ایسٹرپیریزروئز(Esther Perez Ruiz) کلیدی خطاب کریں گی جبکہ شیخ الجامعہ پروفیسر ڈاکٹر خالدمحمود عراقی صدارت کریں گے۔

چیئرپرسن شعبہ اکنامکس جامعہ کراچی ڈاکٹر نورین مجاہد خطبہ استقبالیہ جبکہ ڈاکٹر ذیشان عتیق کلمات تشکر اداکریں گے۔

کراچی: پاکستان انجینئرنگ کونسل کی جانب سے جامعہ کراچی شعبہ کیمیکل انجینئرنگ کا داخلہ ٹیسٹ این ای ڈی یونیورسٹی سے کرانے کی شرط ختم کردی گئی 

کیمیکل انجینئرنگ جامعہ کراچی کا داخلہ ٹیسٹ دیگر شعبہ جات کے ساتھ اتوار11 دسمبر2022 ء کو منعقدہوگاجامعہ کراچی کے رجسٹرار پروفیسر ڈاکٹر عبدالوحید کے مطابق پاکستان انجینئرنگ کونسل کی طرف سے شعبہ کیمیکل انجینئرنگ جامعہ کراچی کا داخلہ ٹیسٹ این ای ڈی یونیورسٹی سے کرانے کی شرط ختم کردی گئی ہے۔

واضح رہے کہ اب ہر سال کی طرح اس سال بھی شعبہ کیمیکل انجینئرنگ جامعہ کراچی کا داخلہ ٹیسٹ دیگر شعبہ جات کے ساتھ اتوار11 دسمبر2022 ء کو منعقدہوگا،لہذا بی ای کیمیکل انجینئرنگ کے تمام امیدواروں کو ہدایت کی جاتی ہے کہ وہ جامعہ کراچی میں 11 دسمبر2022 ء کو منعقد ہونے والے ٹیسٹ میں شرکت کو یقینی بنائیں۔

کراچی: ایچ ای سی اسکالرشپ پراجیکٹ پاک امریکہ نالج کوریڈور کے پراجیکٹ مینجمنٹ یونٹ کی جانب سے ملک کی بڑی جامعات میں آگاہی اورینٹیشن سیشنز کا آغاز8 دسمبر2022 ء کوصبح11:00 بجے کلیہ فنون وسماجی علوم جامعہ کراچی کی سماعت گاہ میں منعقد ہوگی۔

پراجیکٹ مینجرمحمد عاطف انور اور پراجیکٹ مینجراحسان افتخاراسکالرشپ کے حوالے آگاہی فراہم کریں گے۔

تفصیلات کے مطابق ایچ ای سی اس پراجیکٹ کے تحت پاکستانی طلبہ کو 1000 پی ایچ ڈی اسکالرشپ فراہم کی جائے گی جس کا مقصد پاکستانی جامعات کے نان پی ایچ ڈی اساتذہ اور گریجویٹ طلبہ کو انجینئرنگ،ٹیکنالوجی،سوشل سائنسز، میڈیکل سائنسز،ایگریکلچر سائنسز، ویٹرنری سائنسز،بزنس اور انٹرپرینیورشپ کے شعبوں میں امریکہ کی مختلف جامعات میں اس اسکالرشپ کے تحت ڈاکٹریٹ کی تعلیم کے مواقع فراہم کرنا ہے۔

انچارج اسٹوڈنٹس فنائینشل ایڈآفس جامعہ کراچی ڈاکٹر صدف مصطفی کے مطابق جامعہ کراچی کے بی ایس سال اور ماسٹرزسال آخر کے طلبہ کو امریکی جامعات میں پی ایچ ڈی کرنے کے لئے ملنے والی اس اسکالرشپ سے بھر پوراستفادہ کرناچاہیئے۔

دوحا: فیفا ورلڈکپ کے سنسنی خیز میچ میں مراکش نےجیت حاصل کرکے میدان پر فلسطینی پرچم لہرادیئے۔

ایونٹ کے سپر 16 مرحلے کے میچ میں سپین اور مراکش کے مابین سنسنی خیز مقابلہ دیکھنے کو ملا، جہاں اسپین نے میچ کے آغاز سے ہی جارحانہ حکمت عملی اپنائی تاہم مراکش کے دفاعی کھلاڑیوں نے اسپین کو گول کرنے کا موقع فراہم نہ کیا، دونوں ٹیمیں ایک دوسرے کے گول پوسٹ پر تابڑ توڑ حملے کرنے کے باوجود مقررہ وقت تک گول کرنے میں کامیاب نہ ہو سکیں۔

ایجوکیشن سٹی اسٹیڈیم میں کھیلے گئے میچ میں مراکش نے اسپین کو شکست دیکر پہلی بار کواٹر فائنل تک رسائی کا اعزاز حاصل کیا اور سابق عالمی چیمپیئن کو میگا ایونٹ سے باہر کردیا۔

اس کے بعد دونوں ٹیموں کو اضافی وقت دیا گیا تاہم دونوں ٹیمیں سر توڑ کوشش کے باوجود گول کرنے میں ناکام رہیں۔ میچ کو فیصلہ کن بنانے کے لئے دونوں ٹیموں کو پانچ پانچ پینلٹیز دی گئیں۔

اسپین کی ٹیم پہلی تینوں پینلٹیز میں گول کرنے میں ناکام رہی جبکہ مراکش نے چار پینلٹیز میں تین گولز کر کے فتح اپنے نام کی،اسپینش نژاد مراکو کھلاڑی اشرف حکیمی نے وننگ پنالٹی لگا کر ٹیم کو کوارٹر فائنل تک پہنچایا۔

کراچی: ثانوی تعلیمی بورڈکراچی نے سائنس گروپ جماعت دہم سالانہ امتحانات 2020کے (پکا) سرٹیفکیٹ جاری کرنے کا اعلان کر دیا ہے۔

میٹرک بورڈ کے چیئرمین سید شرف علی شاہ نے کہا کہ ابھی صرف سائنس گروپ کے سرٹیفکیٹ جاری کئے جا رہے ہیں جبکہ جنرل گروپ کے سرٹیفکیٹ بھی جلد ہی جاری کر دیئے جائیں گے۔

انہوں نے بتایا کہ طلباء و طالبات کے سرٹیفکیٹ ان کی درسگاہوں کو جاری کئے جا ئیں گے تمام طلباء و طالبات اپنے اپنے اسکولوں سے ہی سرٹیفکیٹ حاصل کر سکتے ہیں۔ اسکولوں کے سربراہان اپنے با اختیار نمائندے یا سینئر اساتذہ کو شناختی کارڈ کی فوٹو کاپی، آفس کارڈ اور اتھارٹی لیٹر کے ساتھ مقررہ تاریخوں میں میٹرک بورڈ کے متعلقہ سیکشن گراؤنڈ فلور کمرہ نمبر23بلاک B میں صبح9:30بجے سے سہ پہر 1بجے تک جبکہ جمعہ کوصبح9:30سے سہ پہر 12:00بجے تک بھیج کر سرٹیفکیٹ حاصل کر سکتے ہیں۔تفصیلات کے مطابق 8دسمبر کو نیو کراچی، نارتھ ناظم آباد، گلبرگ۔9دسمبر کو گلشن اقبال، لیاقت آباد،جمشید ٹاؤن۔12دسمبرکو گارڈن، صدر، لیاری ٹاؤن،کیماڑی، سائٹ، اورنگی ٹاؤن، بلدیہ ٹاؤن، لانڈھی، شاہ فیصل ٹاؤن، کورنگی، ملیر، بن قاسم اور گڈاپ کے سرٹیفکیٹ حاصل کئے جا سکتے ہیں اس کے ساتھ یہ بھی بتایا گیا ہے کہ سرٹیفکیٹ جاری کرتے وقت طلباء وطالبات سے کسی بھی قسم کی فیس نہیں لی جائے۔

یاد رہے کہ بورڈ کے قواعد کے مطابق سرٹیفکیٹ کی جاری کردہ تاریخ کے 6ماہ گزرنے کے بعد بورڈ آفس سے لیٹ فیس کے ساتھ سرٹیفکیٹ جاری کئے جائیں گے۔

اسلام آباد: فیڈرل پبلک سروس کمیشن نےسی ایس ایس 2022کے تحریری امتحان کے نتائج جاری کردیئے۔

مسابقتی امتحانات میں تقریباً 393 امیدواروں نے کامیابی حاصل کی جبکہ منتخب درخواست دہندگان سے اسکریننگ کے اگلے دور کے لیے FPSC کے ذریعے رابطہ کیا جائے گاجس میں طبی ونفسیاتی امتحانات، اور زبانی انٹرویوز شامل ہوں گے

فیڈرل پبلک سروس کمیشن 10 دسمبر سے 26 دسمبر 2022 تک خصوصی امتحان کے لیے MCQs پر مبنی ابتدائی ٹیسٹ (MPT) کے لیے آن لائن درخواستیں قبول کرنا شروع کر ے گا۔ MPT کا انعقاد 31 جنوری 2023 کو ہوگا، جس کے نتائج 15 فروری 2023 کو جاری کیے جائیں گے۔

واضح رہےفیڈرل پبلک کمیشن نے پہلے خصوصی CSS امتحان کا اعلان کیا تھاجو 4 مئی 2023 کومنعقد ہوگا، اور اسے امیدواروں کی چوتھی (اضافی) کوشش تصور کیا جائے گا۔

کمیشن نے یہ کارروائی ان عہدوں کو پر کرنے کے لیے کی جو پرائمری CSS امتحان میں پاس ہونے کی شرح بہت کم ہونے کی وجہ سے کچھ عرصے سے خالی تھیں۔

امیدواروں کوہدایت دی جاتی ہے کہ وہ اپ ڈیٹس کے لیے FPSC کی ویب سائٹ پر وقتافوقتاً چیک کریں اور کسی بھی سوال کے ساتھ 051-111-000-248 پر ڈائل کریں۔