دبئی: آئی سی سی نے ورلڈ ٹیسٹ چیمپئن شپ کی رینکنگ جاری کردی

ٹیسٹ رینکنگ میں پاکستانی ٹیم تیسری پوزیشن حاصل کرنے میں کامیاب رہی۔

انٹرنیشنل کرکٹ کونسل کی جانب سے جاری ہونے والی ٹیسٹ سیریز کے پوائنٹس ٹیبل میں سری لنکا 24 پوائنٹس کے ساتھ پہلے نمبر پر ہےجبکہ آسٹریلیا دوسرے نمبر پر ہے جس نے چار میچز میں فتح حاصل کی جبکہ ایک میچ برابر ہوا۔

اسی طرح پوائنٹس ٹیبل پر پاکستان کی تیسری پوزیشن رہی، جس نے تین ٹیسٹ میچز میں سے دو میں فتح حاصل کی جبکہ قومی ٹیم کو ایک میچ میں شکست کا سامنا کرنا پڑا۔

پوائنٹس ٹیبل پر جنوبی افریقا چوتھے، بھارت پانچویں، نیوزی لینڈ چھٹے، بنگلادیش ساتویں، ویسٹ انڈیز آٹھویں اور انگلینڈ کی ٹیم نویں نمبر پر رہی۔

لاہور: وزیرتعلیم پنجاب مراد راس نے اسکول بند نہ کرنے کافیصلہ سنادیا ہے۔

ذرائع کے مطابق میڈیا سے بات کرتے ہوئے وزیرتعلیم پنجاب ڈاکٹر مراد راس کاکہنا تھاکہ تعلیم کا حرج پہلے ہی بہت ہوچکااسکو ل بند ہونے کی بات اب ہونی ہی نہیں چاہیئے اب اسکول بندنہیں ہونگے۔

انہوں نے کہا اسکولز میں 12سال سے زائد عمرکے بچوں کو ویکسنیشن کےبغیر اسکول آنے پر پابندی ہوگی، جبکہ 12 سے کم عمرکےبچوں کو 50 فیصدحاضری کے ساتھ بلایاجاسکتاہے۔ صورتحال خراب ہوتی ہے تو مرحلہ وار اول تا ھشتم تک چلایا جائے گا۔

حکومت نے ویکسینیشن کی استعداد بہت بڑھا دی ہے، اساتذہ کی 100 فیصد ویکسینیشن ہوچکی ہے، جب کہ میٹرک سے انٹر تک کے طلباء کی ویکسینیشن مکمل ہو چکی ہے، ان کے لیے اسکول مستقل کھلے رہیں گے، تاہم ماسک کی پابندی پر سختی سے عملدرآمد کروایا جائے گا۔

اسلام آباد میں ہونے والے این سی او سی کے اجلاس میں تعلیمی اداروں کے حوالےسے خاطر خواہ فیصلہ نہیں ہوپایا۔

وفاقی وزیراور این سی او سی کے سربراہ اسد عمر کی زیرصدارت بین الصوبائی وزرائے تعلیم کااجلاس ہوا جس میں وفاقی وزیر تعلیم شفقت محمود اور صوبائی وزرائے تعلیم و صحت نے شرکت کی۔

اجلاس میں کورونا کی بڑھتی صورتحال اور اضافے کی صورت میں بندشوں پر تبادلہ خیال کیا گیا،فی الوقت ویکسینیشن کے عمل کو تیز کرنے پر اتفاق اور تعلیمی ادارے کھلے رکھنے پر غور کیا گیاہے اس حوالے سے این سی او سی کا کہنا ہے کہ تعلیمی اداروں، تعلیمی سیکٹر کی صورتحال پر بات چیت کے لیے تازہ اعداد و شمار کے ساتھ اجلاس کل دوبارہ ہوگا۔

پاکستان کے وکٹ کیپر بیٹر محمد رضوان نے قومی ٹیم کےسابق بیٹنگ کنسلٹنٹ میتھیو ہیڈن کو قرآن شریف تحفے میں دینے کی وجہ بتادی ۔

سوشل میڈیا پر زیر گردش ایک انٹرویو میں محمد رضوان نے بتایا ہم جب نماز پڑھتے تو وہ ہمیں باجماعت نماز کی ادائیگی کرتے دیکھتے تھے، اللہ تعالیٰ نے ان کے دل میں ہی ایسی چیزیں ڈالیں، وہ ہم سے اس موضوع پر سوال کرتے تھے۔

کرکٹر کا کہنا تھا کہ ورلڈکپ میں پاک بھارت میچ کے دوران بات چیت ہوئی تو میں نے ہیڈن سے کہا کہ اگر تقدیر میں ہوا تو ہم یہ میچ جیت جائیں گے، اگر ہماری محنت کم ہوئی تو بھارت ضرور جیت جائے گا، انہیں یہ سب چیزیں محسوس ہوئیں۔

محمد رضوان نے کہا کہ وہ وقت کچھ مختلف تھا، میں نے ایک شخص سے قرآن مجید منگوایا، جب وہ لے آیا تو میں میتھیو کے کمرے میں گیا اور انہیں یہ تحفے کے طور پر دے دیا، میتھیو کو یہ تحفہ بہت پسند آیا، ہمارے ذمہ یہ کام ہے کہ جو چیز خود کے لیے پسند کریں وہی دوسروں کے لیے بھی منتخب کریں۔

انہوں نے بتایا کہ میری میتھیو سے بات ہوتی ہے تو وہ بتاتے ہیں کہ انہیں بہت مزہ آرہا ہے اور وہ اکثر قرآن شریف کا ترجمہ پڑھتے ہیں۔

انٹرویو کے دوران رضوان نے قوم سے اپیل بھی کی کہ میتھیو ہیڈن کو اپنی دعاؤں میں ضرور یاد رکھیں۔

واضح رہے کہ محمد رضوان نے ٹی ٹوئنٹی ورلڈ کپ میں ٹورنامنٹ میں پاکستان کے بیٹنگ کنسلٹنٹ میتھیو ہیڈن کو قرآن شریف تحفے میں دیا تھا۔

اسلام آباد: مختصر ویڈیو شیئرنگ ایپ لائیکی، بیگو لائیواوراسنیک ویڈیو نے پاکستان میں سروسز جاری رکھنے کے لیے رجسٹریشن حاصل کرلی۔

ذرائع کے مطابق جویو پاکستان پرائیوٹ لمیٹڈ اور بیگو سروس پاکستان پرائیوٹ لمیٹڈ نے پاکستان میں رجسٹریشن کے لیے پی ٹی اے میں درخواست جمع کرائی تھی۔

دونوں کمپنیوں نے اپنی درخواستوں میں اسنیک ویڈیو، بیگو لائیو اور لائیکی ایپلی کیشنز کو رجسٹرڈ کرنے کی استدعا کی تھی جسے پی ٹی اے نے منظورکرلیا۔

کمپنیوں کو ’رجسٹریشن سرٹیفکیٹ‘ جاری کرنے کی تقریب پی ٹی اے کے مرکزی دفتر میں منعقد کی گئی جس میں اتھارٹی کے چیئرمین اور ممبران کے علاوہ متعلقہ ٹیکنالوجی کمپنیوں کے نمائندوں اور پی ٹی اے کے سینئر حکام نے شرکت کی۔

پی ٹی اے کی جانب سے جاری اعلامیے میں کہا گیا ہے کہ غیر قانونی آن لائن مواد کو ہٹانے اور بلاک کرنے (طریقہ کار، نگرانی اور حفاظت) کے قواعد 2021 کے تحت اہم سوشل میڈیا کمپنیوں کے لئے پی ٹی اے کے پاس رجسٹر ہونا ضروری ہے۔

کراچی: اعلیٰ ثانوی تعلیمی بورڈ کراچی نےانٹرمیڈیٹ کے ضمنی /خصوصی امتحانات کیلئے امتحانی فارم جمع کروانے کی تاریخوں کا اعلان کردیا ہے

چیئرمین پروفیسر ڈاکٹر سعید الدین کاکہنا ہے کہ انٹرمیڈیٹ کے تمام گروپس) سائنس پری میڈیکل، پری انجینئرنگ، سائنس جنرل، کامرس، آرٹس، ہوم اکنامکس بشمول امپروومنٹ آف ڈویژن/گریڈ، بینیفٹ کیسز، ایڈیشنل سبجیکٹس اور ڈپلومہ ان فزیکل ایجوکیشن )کے امتحانی فارم بروز 17 جنوری سے 21 جنوری تک وصول کیے جائیں گے۔

تفصیلات کے مطابق ان خصوصی امتحانات میں وہ امیدوار شرکت کرسکتے ہیں جنہوں نے 2018ء سے 2021ء تک امتحانات میں شرکت کی ہو مگر ناکام ہوگئے ہوں، کورونا کی وجہ سے امتحان نہ دینے والے امیدوار بھی اس موقع سے فائدہ اٹھاسکتے ہیں جبکہ کورونا کے دوان تعلیمی سلسلہ متاثر ہونے کی وجہ سے جن طلبہ و طالبات کے نمبرز کم آئے انہیں بھی گریڈ بہتر کرنے کیلئے خصوصی موقع دیاجارہاہے۔

چیئرمین انٹربورڈ نے بتایاکہ طلبہ امتحانی فارم اور فیس واؤچر انٹربورڈ کی ویب سائٹ www.biek.edu.pk  سے ڈاؤن لوڈ کر کے امتحانی فارم بورڈ آفس میں جمع کرواسکتے ہیں۔

علاوہ ازیں امتحانات میں شرکت کے خواہشمند ریگولر میدوار اپنے کالج سے امتحانی فارم کی تصدیق کروائیں گے جبکہ امپروومنٹ آف ڈویژن اور ناکام رہ جانے والے طلبہ اپنے امتحانی فارم کی تصدیق گریڈ 17کے گزیٹڈ افسرسے کروانے کے پابند ہیں۔

لاہور: پنجاب یونیورسٹی اسکول آف کمیونیکیشن اسٹڈیز نےداخلہ ٹیسٹ منسوخ کردیا۔

پنجاب یونیورسٹی اسکول آف کمیونیکیشن اسٹڈیز میں پی ایچ ڈی اور ایم فل کمیونیکیشن اسٹڈیز پروفیشنل ٹریک میں داخلوں کیلئے 17جنوری 2022ء کو ہونے والا انٹری ٹیسٹ منسوخ کردیا۔

ترجمان کاکہنا ہے کہ داخلہ ٹیسٹ کی نئی تاریخ کا اعلان جلد کیا جائے گا۔

کراچی: سندھ بھرمیں تعلیمی ادارے بند نہ کرنےکافیصلہ کیا ہے۔

ترجمان وزیراعلیٰ سندھ کے مطابق وزیراعلیٰ مراد علی شاہ کی زیر صدارت کورونا سے متعلق صوبائی ٹاسک فورس کا اجلاس ہوا، جس میں فیصلہ کیا گیا ہے کہ صوبے بھرمیں اسکول کھلے رہیں گے اور تعلیمی سرگرمیاں جاری رہیں گی، عوامی مقامات پر ماسک پہننے کو لازمی قرار دیا گیا ہے، جو سرکاری افسر ماسک نہیں پہنے گا اسکو جرمانہ کیا جائے گا، جرمانے میں ایک دن کی تنخواہ کی کٹوتی کرنے کی تجویز ہے۔

ترجمان وزیراعلیٰ سندھ کے مطابق تمام شادی ہالز، مارکیٹس، عوامی مقامات پر ماسک پہننا لازمی قرار دے دیا گیا ہے، شادی کی تقریبات میں کھانا باکس میں دینے کی ہدایت کی گئی ہے، مارکیٹس میں صرف ویکسینیٹڈ افراد کے داخلے کی اجازت ہوگی، انتظامیہ کو ویکسینیشن کارڈ کا رکارڈ چیک کرنا لازمی ہوگا، تمام سرکاری و نجی اسپتالوں کا سروے کیا جائے گا، جس میں اسپتالوں کی گنجائش کا جائزہ لیا جائے گا، اسپتالوں میں کتنی گنجائش ہے اور مزید کتنی ضرورت ہے بتایا جائے۔

ترجمان کے مطابق حکومت کی ویکسینیشن مہم پورے صوبے میں تیز کرنے کا فیصلہ کیا گیا، ایس او پیز پر سختی سے عملدرآمد کرانے کا فیصلہ کیا گیا، کورونا کیسز میں اضافہ احتیاتی تدابیر نہ اپنانے کا نتیجہ ہے، عوام تعاون کریں گے تو اس جاری کورونا لہر پر بھی کنٹرول ہوجائے گا۔

واضح رہے کہ ملک بھر میں کورونا کی بلند ترین شرح کراچی میں ریکارڈ ہوئی ہے۔ 24 گھنٹے میں کراچی میں کورونا کی شرح 35.30 فیصد ریکارڈ ہوئی۔

بہاولپور: تیز رفتار ٹرالر نےبچوں کو اسکول لےجانےوالےرکشہ کوروند ڈالا

ذرائع کے مطابق بہاولپور کے علاقے مسافر خانہ کے قریب تیز رفتار ٹرالر اسکول کے بچوں کے رکشہ سے ٹکرا گیا، جس کے نتیجے میں رکشے میں سوار 4 بچے جاں بحق اور 10 زخمی ہوگئے۔

ریسکیو حکام کے مطابق واقعے کی اطلاع ملتے ہی رضارکاروں اور پولیس کی ٹیمیں جائے حادثہ پر پہنچ گئیں، اور لاشوں اور زخمیوں کو اسپتال منتقل کردیا گیا۔

ریسکیو ذرائع کا کہنا ہے کہ اسکول کے بچے رکشہ پر پڑھنے جا رہے تھے کہ راستے میں حادثے کا شکار ہو گئے، بچوں کی شناخت کی جارہی ہے، اور اسکول میں اطلاع دے دی گئی ہے تاکہ جاں بحق اور زخمی ہونے والے طلبا کے والدین اسپتال سے اپنے پیاروں کی لاشیں لے جائیں۔

اسلام آباد: این سی او سی نے صوبائی وزرائے تعلیم کااجلاس 17 جنوری کو طلب کرلیا۔

نیشنل کمانڈ اینڈ آپریشن سینٹر (این سی او سی) کے اجلاس میں بیماری کے ٹرینڈز کا جائزہ لیا گیا، جس میں کورونا کی بڑھتی صورتحال اور اضافے کی صورت میں مجوزہ بندشوں پر تبادلہ خیال کیا گیا، جب کہ صوبوں خصوصا سندھ کے ساتھ بڑھتی وباء کے کنٹرول کے لیے رابطے بڑھانے کا فیصلہ کیا گیا ہے، اور موجودہ این پی آئیز کا بھی جائزہ لیا گیا۔

این سی او سی کی جانب سے دوران پرواز کھانے کی تقسیم پر بھی پابندی عائد کردی گئی، سول ایوی ایشن کو دوران پرواز ماسک کا استعمال اور دیگر این پی آئیز پر عمل درآمد یقینی بنانے کی ہدایت کی گئی، جبکہ 17 جنوری سے پبلک ٹرانسپورٹ میں بھی سنیکس اور کھانا تقسیم کرنے پر پابندی ہوگی، این سی او سی کی جانب سے تمام صوبوں کو ایس او پیز پر عمل درآمد کے لیے سخت اقدامات کی ہدایت بھی کی گئی ہے۔

این سی اوسی کے مطابق اجلاس میں کی جانب سے تعلیمی اداروں، عوامی اجتماعات اور شادی ہالز میں این پی آئیز کے حوالے سے 17 جنوری کو خصوصی اجلاس طلب کیا گیا ہے، جس میں صوبائی وزرائے تعلیم و صحت شرکت کریں گے۔