کراچی: اعلیٰ ثانوی تعلیمی بورڈ کراچی نے کامرس سال دوم ریگولر کے نتائج کا اعلان کر دیا ہے ۔

مجموعی طور پر 60.30 فیصد طلبہ کامیاب ہوئے ہیں ۔ پہلی تینوں پوزیشنیں کامرس کالج نے اپنے نام کر لی ہیں ۔

تفصیلات کے مطابق امسال انٹر بورڈ میں کامرس سال دوم ریگولر کیلئے 44 ہزار 114 طلباء نے رجسٹریشن کرائی تھی ۔ جس کے بعد 43 ہزار 366 طلباء نے امتحان میں حصہ لیا تھا جب کہ 748 طلباء غیر حاضر رہے ۔ ان میں سے 26 ہزار 151 طلباء کامیاب ہو گئے ہیں ۔ کامیابی کا مجموعی تناسب 60.30 فیصد رہا ہے ۔

انٹر کامرس کال دوم کے 976 طلباء اے ون گریڈ میں ‛ 2648 طلباء A گریڈ میں ‛ 4 ہزار 904 طلباء B گریڈ میں ‛ 7 ہزار 903 طلباء C گریڈ میں 8 ہزار 8661 طلباء D گریڈ میں کامیاب ہوئے ہیں اور 1059 طلباء E گریڈ میں کامیاب ہوئے ہیں ۔

کراچی: اگلے 24 گھنٹوں کے دوران شہرکا درجہ حرارت مزید گرسکتا ہےاور کم سے کم پارہ 10 ڈگری تک گرنے کا امکان ہے۔

محکمہ موسمیات کے مطابق کراچی میں آج کم سے کم درجہ حرارت 11.2 ڈگری ریکارڈ ہوا، صبح کے وقت دھند کی وجہ سے حد نگاہ ڈھائی کلو میٹر رہ گئی تھی۔

آئندہ تین روز کے دوران موسم دن کے وقت خشک اور رات میں سرد رہنے کی توقع ہے جبکہ صوبے کے دیگر اضلاع میں بھی موسم خشک اور بالائی سندھ کے اضلاع میں دھند چھا سکتی ہے۔

بلوچستان کی شمالی مشرقی سمت سے 14 کلومیٹر فی گھنٹہ کی رفتار سے ہوائیں چل رہی ہیں، آئندہ 3 روز کے دوران دن کے وقت شمال مشرقی اور رات میں جنوب مغربی (سمندری) ہوائیں چل سکتی ہیں۔

کیوی کرکٹر کین ولیمسن نے نیوزی لینڈ کی ٹیسٹ ٹیم کی قیادت سےدستبردارہونے کا اعلان کردیا۔

نیوزی لینڈ کرکٹ کے مطابق کین ولیمسن نے نیوزی لینڈ کی ٹیسٹ ٹیم کی قیادت سے دستبردار ہونے کا اعلان کیا ہے تاہم دیگر فارمیٹس میں ٹیم کی کپتانی فرائض سرانجام دیتے رہیں گے۔

کیوی کرکٹر کین ولیمسن ٹیسٹ میچز میں بطور بیٹر شرکت کریں گے، انہوں نے 40 میچز میں نیوزی لینڈ کرکٹ ٹیم کی قیادت کرتے ہوئے 22 میں کامیابی سمیٹی جبکہ 10 میں ناکامی کا منہ دیکھنا پڑا۔

کین ولیمسن کی قیادت میں نیوزی لیںڈ نے پہلی آئی سی سی ٹیسٹ چیمپیئن شپ جیتنے والا ملک بنا، انہوں نے فائنل میں بھارت کو شکست دی تھی۔

ٹیسٹ ٹیم کی کپتانی سے دستبردار ہونے کے بعد ولیمسن نے کہا کہ ورک لوڈ کے باعث وہ کپتانی سے دستبردار ہوئے، البتہ وائٹ بال میں قیادت جاری رکھوں گا۔

دوسری جانب نیوزی لینڈ کرکٹ نے دورہ پاکستان کیلئے ٹِم ساؤتھی نیوزی لینڈ ٹیسٹ ٹیم کی قیادت کریں گے جبکہ ٹوم لیتھم کو کیوی ٹیسٹ ٹیم کا نائب کپتان مقرر کردیا گیا ہے۔

کراچی: دورہ پاکستان کیلئے نیوزی لینڈ کرکٹ ٹیم کا 15 رکنی اسکواڈ کا اعلان ہوگیا۔

اسکواڈ کی قیادت ٹِم ساؤتھی کریں گے۔دونوں ٹیموں کے مابین پہلا ٹیسٹ میچ 26 دسمبر سے کراچی میں شروع ہوگا
دوسرا میچ 3 جنوری سے ملتان میں کھیلا جائے گا۔

اسکواڈ میںٹم ساؤتھی (کپتان)، مائیکل بریسویل، ٹام بلنڈل، ڈیون کونوے، میٹ ہنری، ٹام لیتھم، ڈیرل مچل،
ہنری نکولس، اعجاز پٹیل، گلین فلپس ایش سوڈھی، بلیئر ٹکنر، نیل ویگنر، کین ولیمسن اورول ینگ
شامل کیا گیاہے۔

واضح رہے کین ولیمسن نے ٹیسٹ کی قیادت سے دستبرداری کااعلان کردیا ہے جسکےبعد ٹیم کی قیادت کی زمہ داری ٹم ساؤتھی کے سپرد کی گئی ہے۔

کیوی پیسر ٹرینٹ بولٹ اور کائل جیمیسن (کمر کی انجری) کے باعث اسکواڈ کا نہیں ہیں، البتہ تجربہ کار اسپنر ایش سودھی اور گلین فلپس کو شامل کیا گیا ہے۔

پاکستان میں ہونے والے 2 ٹیسٹ میچز پر مشتمل سیریز نیوزی لینڈ کے لیے اس عرصے کی آخری ورلڈ ٹیسٹ چیمپئن شپ سیریز ہے۔دونوں ٹیموں کے مابین پہلا ٹیسٹ میچ 26 دسمبر سے کراچی میں شروع ہوگا جبکہ دوسرا میچ 3 جنوری سے ملتان میں کھیلا جائے گا۔

کراچی: سرسیدیونیورسٹی آف انجینئرنگ اینڈ ٹیکنالوجی کے شعبہ بزنس ایڈمنسٹریشن اور پروٹوکول کے زیرِ اہتمام ’’اسٹریٹ کرائم سے اپنے آپ کو کیسے بچایا جائے ‘‘ کے موضوع پر ایک لیکچر کا انعقاد کیا گیا .

جس میں سٹیزن پولیس لاءژن کمیٹی ضلع شرقی کے چیف عابدعزیر نے ایک فکر انگیز معلوماتی پریزنٹیشن دی ۔

سٹیزن پولیس لاءژن کمیٹی ضلع مشرقی کے چیف عابدعزیر نے کہا ہے کہ سی پی ایل سی 1989ء میں قائم کی گئی تھی تاکہ کسی بھی مجرمانہ فعل کی شکایت پر فوراََ کاروائی کی جائے اور شکایت کنندہ کی داد رسی کی جائے ۔ سی پی ایل سی ایک منفرد اور کامیاب ماڈل ہے جو قانون نافذکرنے والے اداروں کے ساتھ مل کر جرائم پر قابو پانے اور مجموعی صورتحال کو بہتر بنانے کے لیے فعال و موثر حکمتِ عملی تیار کرتا ہے ۔ سی پی ایل سی نے بروقت کاروائی، مشاورت، ثالثی اور فلاحی سرگرمیوں کے ذریعے نہ صرف عوام میں اعتماد پیدا کیا بلکہ اس کے بہترین نتاءج سامنے آئے ہیں ۔انہوں نے بتایا کہ حالیہ سیلاب جس نے سندھ اور بلوچستان کے متعدد علاقوں کو بری طرح متاثر کیا، اس میں سی پی ایل سی نے گھروں کی تعمیر نوسمیت متاثرہ خاندانوں کو راشن کے تھیلے ، ادویات، پناہ گاہ اور مچھردانی فراہم کرنے میں اہم کردار ادا کیا ۔

کراچی میں رواں سال کرائم انڈیکس 53.31 ہے ۔ 2022 میں بھتہ خوری , دھمکیاں او ر ہراساں کرنے کے 438 ، عام تنازعات کے 397،گمشدہ اور گھروں سے بھاگنے کے 1150،گمشدہ بچوں کے 533 اورسائبر کرائم کے 140 کیس درج ہوئے جبکہ ڈکیتی کی 1249 اور اغوا برائے تاوان کی 6وارداتوں کا اندراج ہوا ۔

اس موقع پر اظہارِ خیال کرتے ہوئے سرسیدیونیورسٹی کے وائس چانسلر پروفیسر ڈاکٹر ولی الدین نے کہا کہ پاکستان میں جرائم کی صورتحال انتہائی تشویشناک رہی ہے ۔ جرائم کا یہ حال تیسری دنیا کے ہر ملک میں ہے ۔ ۔ جس کی وجہ بڑھتی ہوئی آبادی اور صحیح معاشی پالیسیوں کا نہ ہونا ہے ۔ ہمار ا معیار زندگی بہت بلند ہوچکا ہے ۔ بیروزگاری کی انتہا پر اس معیار زندگی کو پانے کے لے لوگ شارٹ کٹ کا سہار ا لیتے ہیں اور اس رجحان کو تقویت اس لیے بھی ملتی ہے کہ ہمارے ملک میں سزا کا کوئی تصور ہی نہیں ہے ۔ سرمایہ کاری اور کاروباری سرگرمیوں کے لئے پُرامن اور سازگار ماحول ضروری ہے ۔

ایسی سرمایہ کاری سے بہتر کوئی سرمایہ کاری نہیں جس کے توسط سے نوجوان معاشرے کا ایک فعال اور موثر فرد بن جائیں ۔ تعلیم نوجوانوں کے لئے پُرکشش ملازمتوں کے دروازے کھولتی ہے جبکہ تربیت انھیں منفی اورتخریبی سرگرمیوں میں ملوث ہونے سے بچاتی ہے اور ایک اچھا شہری بناتی ہے ۔ سی پی ایل سی نے جرائم کے خاتمہ کے لئے بہت موثر اقدامات کئے ۔ انھوں نے بہترین حکمت عملی کے ساتھ جرائم پر بہت حد تک قابو پالیا ہے ۔

اگر معاشرے میں قانون کی بالادستی نہ رہے تو جرائم میں تو اضافہ ہوگا ۔ قانون جتنا سخت اور غیر لچکدار ہوگا لو گ جرائم سے اسی قدر دور رہیں گے ۔قبل ازیں رجسٹرار سید سرفراز علی نے خیرمقدمی کلمات ادا کرتے ہوئے کہا کہ امن ہر شخص کی ضرورت ہے ۔ امن کے بغیر کوئی بھی معاشرہ کامیابی اور ترقی کی راہ پر گامزن نہیں ہوسکتا ۔ پاکستان میں امن و امان کی صورتحال قدرے بہتر ہوئی ہے اور پہلے کے مقابلے میں لوگ اب اپنے آپ کو زیادہ محفوظ تصور کرنے لگے ہیں ۔ دہشت گردی کے واقعات میں نمایاں کمی آئی ہے ۔ اغوا برائے تاوان کی واردتیں نہ ہونے کے برابر ہیں ۔

پاکستان خصوصاََ کراچی کو مستحکم اور پُرامن بنانے کے لیے جہاں پولیس اور قانون نافذ کرنے والے اداروں نے غیرمعمولی کامیابی حاصل کی اور ان کی کوششیں اور کاوشیں ہ میں تحفظ کا احساس دلارہی ہیں ، وہاں مجھے اس بات کا اظہار کرتے ہوئے بڑی خوشی ہورہی ہے کہ کراچی میں امن و امان کی صورتحال کو بہتر بنانے میں سی پی ایل سی کا بہت بڑا کردار ہے ۔

کراچی: بلدیاتی انتخابات کےباعث محکمہ تعلیم سندھ نےٹرانسفروپوسٹنگ پرپابندی عائد کردی۔

تفصیلات کے مطابق بلدیاتی الیکشن کے باعث کراچی اور حیدر آباد میں تدریسی وغیر تدریسی عملے کے ٹرانسفر اور پوسٹنگ پر پابندی ہوگی جسکا نوٹیفکیشن محکمۂ تعلیم سندھ نے جاری کر دیاہے۔

یاد رہے15جنوری کے کراچی اور حیدرآبادمیں بلدیاتی الیکشن ہونگے۔

راولپنڈی : راولپنڈی بورڈآف انٹر میڈیٹ اینڈسکینڈری ایجوکیشن راولپنڈی نےدوسرےسالانہ امتحانات برائے2022کے نتائج کا اعلان کر دیا ہے۔

پروفیسر ناصر محمود اعوان کنٹرولر امتحانات کے مطابق امتحان میٹرک(سیکنڈ اینول) 2022میں 17713امیدواران نے داخلہ لیاجبکہ 17608 امیدواران شامل امتحان ہوئے، مذکورہ امتحان میں 12186 طلباجبکہ5422طالبات نے حصہ لیا،ریگولر امیدواران کی تعداد18اور پرائیویٹ امیدواران کی تعداد17590 تھی۔

انہوں نے بتایا کہ مذکورہ امتحان میں 4087امیدواران کامیاب ہوئے جبکہ13446فیل ہوئے،کامیابی کا تناسب23.22فیصد رہا۔ طالبات کی شرح کامیابی35.29 فیصد جبکہ طلباء کی شرح کامیابی17.85فیصد رہی،102امیدواران غیرحاضر ہوئے۔

ترجمان تعلیمی بورڈ ارسلان چیمہ کے مطابق نتائج بورڈ کی ویب سائٹ  www.biserawalpindi.edu.pk  پربھی ملاحظہ کئے جا سکتے ہیں۔

آئی سی سی کی جانب سےراولپنڈی کی پچ کو'ایوریج سے کم' ریٹنگ ملی ہے۔

پاکستان اور انگلینڈ کے درمیان کھیلے گئے راولپنڈی ٹیسٹ میچ کی پچ کو انٹرنیشنل کرکٹ کونسل ( آئی سی سی) نے 2 منفی پوائنٹس دے دیئے۔

آئی سی سی کی جانب سے راولپنڈی ٹیسٹ میچ کی پچ کو 2 منفی پوائنٹس دیئے گئے ہیں اگر منفی پوائنٹس کی تعداد 5 ہوگئی تو راولپنڈی کرکٹ اسٹیڈیم ایک سال تک کسی بھی بین الااقوامی میچ کی میزبانی نہیں کرسکے گا۔

پاک انگلینڈ سیریز کے پہلے ٹیسٹ میچ میں جہاں انگلش ٹیم نے پاکستان 74 رنز سے شکست وہیں بیٹنگ کے کئی ریکارڈ بھی ٹوٹے، جہاں گیندبازوں کیلئے وکٹ میں بلکل بھی مدد نہیں تھی۔

چیئرمین پی سی بی رمیز راجا نے بھی پچ کو ‘شرمناک’ قرار دیا تھا جبکہ سابق انگلش کپتان ناصر حسین نے راولپنڈی ٹیسٹ میچ کی پچ کو سڑک قرار دیا تھا۔

آئی سی سی امپائر پائکرافٹ نے منگل کو اپنے نتائج جاری کرتے ہوئے کہا کہ پچ اوسط درجے سے کم تھی، جس میں بالرز کیلئے کوئی مدد نہیں تھی، جس کی وجہ سے بلے بازوں نے بہت تیزی سے اسکور کیا اور دونوں اطراف نے زبردست مجموعے بنائے۔

اسلام آباد: وفاقی وزیر تعلیم و پیشہ ورانہ تربیت رانا تنویر حسین نےآکسفورڈ پاکستان پروگرام کےایک وفد سے ملاقات کی۔

ملاقات کے دوران وفاقی وزیر تعلیم نے کہا کہ حکومت پاکستان ملک میں اعلیٰ تعلیم سمیت معیاری تعلیم کے فروغ پر بھرپور توجہ دے رہی ہے۔ پاکستانی طالب علموں میں بڑی صلاحیت ہے، غیر معمولی پاکستانی طالب علموں کے لیے آکسفورڈ میں تعلیم حاصل کرنے کے لیے بہت سے اسکالرشپ قائم کرنے کی ضرورت ہے، خاص طور پر خواتین کو لیڈی مارگریٹ ہال میں جو روایتی طور پر خواتین کا کالج ہے۔

انہوں نے کہا کہ فیکلٹی اور طلبہ کا تبادلہ، طلبہ کے لیے اسکالرشپ، ایک دوسرے کی تعلیمی پالیسیوں اور اقدامات کے بارے میں معلومات اور تجربات کا تبادلہ، سیمینارز اور کانفرنسوں کا انعقاد، مختصر مدت کی تربیت، عملے کی استعداد کار میں اضافہ، عہدیداروں کے باہمی دورے۔

رانا تنویر کو بریفنگ دی گئی کہ او پی پی کے تین بنیادی مقاصد ہیں: آکسفورڈ یونیورسٹی میں پاکستانی اور برٹش پاکستانی طلباء کی کم نمائندگی کو دور کرنا۔ آکسفورڈ یونیورسٹی اور پاکستان کے اعلیٰ تعلیمی اداروں کے درمیان علمی تبادلے کو فروغ دینا اور پاکستان کے بارے میں علمی بات چیت کو سیکورٹی اور جغرافیائی سیاست کی تنگ دستی سے آگے بڑھانا۔

رانا تنویر نے کہا کہ پاکستان میں تقریباً 64 فیصد نوجوان ہیں جو انسانی سرمائے کو ترقی دے کر معیشت کے تمام اہم شعبوں کو سپورٹ کرنے کی خاطر خواہ صلاحیت رکھتے ہیں۔ حکومت پاکستان سمجھتی ہے کہ پاکستان کی سماجی اقتصادی ترقی کے لیے نوجوانوں کو معیاری تعلیم اور مواقع فراہم کرنا ناگزیر ہے۔

چیئرمین ایچ ای سی ڈاکٹر مختار احمد، اے ایس وسیم چوہدری بھی اجلاس میں شریک تھے۔

لاہور: قومی کرکٹ ٹیم کے سابق کپتان اور آل راؤنڈر شیعب ملک نےٹی20 فارمیٹ میں 12 ہزاررنزبنانے کا اعزاز اپنے نام کرلیا۔

قومی کرکٹ ٹیم کے آل راؤنڈر شعیب ملک نے لنکن پریمئیر لیگ میں جافنا کنگز کے لیے کھیلتے ہوئے یہ اعزاز اپنے نام کیا، وہ ایسا کرنے والے دوسرے کھلاڑی بن گئے ہیں۔

اس سے قبل ویسٹ انڈیز کے کرس گیل نے ٹی20 فارمیٹ میں 12 ہزار سے زیادہ رنز بنائے ہیں، شعیب ملک نے یہ سنگ میل اپنے 485 ویں ٹی20 میچ میں حاصل کیا۔

شعیب ملک 2005 سے ٹی20 کرکٹ کھیل رہے ہیں، انہوں نیشنل ٹی20 کپ میں سیالکوٹ اسٹالینز کی قیادت کے فرائض نبھائے جبکہ وہ انڈین پریمیئر لیگ (آئی پی ایل)، بگ بیش لیگ (بی بی ایل)، بنگلہ دیش پریمیئر لیگ، انگلینڈ کی ٹی20 بلاسٹ اور گلوبل ٹی20 لیگ بھی کھیل چکے ہیں۔

سابق کپتان نے سال 2007 کے ٹی20 ورلڈکپ میں پاکستان کی قیادت کی اور 2009 میں فاتح ٹیم کا حصہ رہے، انہوں نے 124 میچوں میں پاکستان کی نمائندگی کرتے ہوئے 2 ہزار 435 رنز بنائے اور 28 وکٹیں حاصل کیں۔