ایمز ٹی وی (فارن ڈیسک) امریکہ کے پہلے سیاہ فام سینیٹر ایڈورڈ بروک 95 برس کی عمر میں انتقال کر گئے ہیں۔ایڈورڈ بروک 1966 میں میسی چیوسٹ سے کانگرس کے رکن منتخب ہوئے تھے اُس وقت ملک میں وسیع پیمانے پر نسلی بدامنی پائی جاتی تھی۔ایک قانون دان ہونے کے ناطے وہ پہلے افریقی امریکی تھے جنہوں نے کسی ریاست میں اٹارنی جنرل کی ذمہ داریاں بھی سنمبھالی ہوئی ہوں۔سینیٹر بروک سنہ 1979 تک سینٹ کے رکن رہے اور براک اوباما سمیت وہ اُن نو افریقی امریکیوں میں شامل ہیں جن کو یہ اعزاز حاصل ہو چکا ہے۔سنہ 2002 میں ان کو چھاتی کا سرطان ہو گیا۔چھاتی کا کینسر اکثر خواتین کو ہوتا ہے لیکن مردوں میں اس بیماری کے بارے میں آگاہی پیدا کرنے سے انھیں ایک قومی ہیرو کی حیثیت حاصل ہو گئی۔

 ایمز ٹی وی (فارن ڈیسک ) ترکی کے علاقائی گورنر نے سرکاری عمارتوں میں پہلی تین منزلوں تک پہنچنے کے لیے لفٹس کے استعمال پر پابندی لگا دی ۔روزنامہ صباح کی ویب سائٹ نے رپورٹ کیا ہے کہ مغربی صوبے ’ایڈرن‘ کے گورنر علی شاہین درسن نے موٹاپا کے خلاف ایک مہم کے حصے کے طور حکم جاری کیا ہے کہ لوگ سیڑھیوں کا استعمال کریں۔اس پابندی سے ہسپتالوں اور نرسنگ ہومز کی عمارتیں مستثنٰی ہوں گی جبکہ بیمار اور بوڑھے لوگوں کو بھی اس پابندی کا سامنا نہیں ہوگا

ایمز ٹی وی (فارن ڈیسک) بنگلہ دیشی وزیراعظم شیخ حسینہ واجد کے حکم پر پولیس نے اپوزیشن رہنما اور سابق وزیراعظم خالدہ ضیاء کو ان کے دفتر میں نظر بند کر دیا ہے جب کہ ملک بھر میں کارکنوں کی گرفتاری کا سلسلہ بھی جاری ہے۔ دارالحکومت میں تمام احتجاجی مظاہروں پر پابندی لگا دی ہے۔ خالدہ ضیا نے گزشتہ ہفتے حکومت سے سیاسی قیدیوں کی رہائی اور ملک میں نئے انتخابات کرانے کا مطالبہ کیا تھا۔ خالدہ ضیا نے ایک بڑے حکومت مخالف مظاہرے کی قیادت کرنے تھی لیکن ہفتے کی شام ان کو اپنے آفس سے نکلنے کی اجازت نہیں دی گئی۔

ایمز ٹی وی (کراچی) پاکستان تحریک انصاف کراچی ریجن کے صدر علی زیدی نے کہا ہے کہ سندھ حکومت عوامی مسائل کو حل کرنے کی اہلیت نہیں رکھتی ، کئی دفعہ پیٹرولیم مصنوعات کی قیمتوں میں کافی کمی کے باوجود عام لوگوں کو ریلیف نہیں مل سکا ۔ حکومتی ادارے اور صوبائی وزراءصرف بیانات اور نوٹیفکیشن جاری کر کے غریب عوام کو جھوٹی تسلیاں دے رہی ہیں ویسے تو کراچی شہر صوبائی حکومت کی نااہلی کی وجہ سے مسائلستان بنا ہوا ہے اور عوام یہ سوچنے پر مجبور ہیں کہ یہ کیسے حکمران ہیں جنہیں عوامی مسائل سے کوئی سروکار نہیں ، کراچی شہر میں پبلک ٹرانسپورٹ نے بھی ایک مافیا کی شکل اختیار کرلی ہے ۔ یہ باتیں انہوں نے تحریک انصاف کے مرکزی میڈیا سیل کراچی میں صحافیوں کے ایک وفد سے ملاقات کے موقع پر بات چیت کرتے ہوئے کہیں ۔ علی زیدی نے مزید کہا کہ حکومت سندھ کے محکمہ ٹرانسپورٹ نے دو دفعہ کرایوں کی کمی میں صرف نوٹیفکیشن جاری کیا لیکن اس نوٹیفکیشن پر کسی بھی قسم کی عمل درآمد نظر نہیں آرہی ۔ کراچی میں پبلک ٹرانسپورٹ ایسوسی ایشن کی جانب سے پبلک ٹرانسپورٹ کے کرایوں میں کمی نہ کرنا غریب شہریوں کے ساتھ سراسر ظلم و زیادتی ہے ، صوبائی حکومت اگر اپنے آپ کو عوامی نمائندہ سمجھتی ہے تو فوری طور پر ٹرانسپورٹ مافیا کے خلاف ایکشن لیں اور پبلک ٹرانسپورٹ کے کرایوں میں واضح حد کمی کی جائے ۔ علی زیدی نے مزید کہا کہ ٹرانسپورٹ مافیا بھی ہوش کے ناخن لیں اور سی این جی کی بندش کے دوران عوام سے پورا کرایہ وصول کر کے انہیں آدھے راستے میں اتار نے والے ہتھکنڈوں سے باز رہیں بصورت دیگر ٹرانسپورٹ مافیا کو عوام کے غیض و غضب کا سامنا کرنا پڑے گا اور حالات کے خرابی کی تمام تر ذمہ داریاں ٹرانسپورٹ مافیا کے ساتھ ساتھ حکومت سندھ پر عائد ہوگی