ایمزٹی وی(بزنس)سونے کی فی تولہ قیمت طویل مدت کے بعد 51ہزار روپے کی حد عبور کر گئی، بین الاقوامی بلین مارکیٹ میں سونے کی قیمت 11ڈالر کے اضافے سے 1359 ڈالر فی اونس کی سطح پر پہنچنے کے باعث پیر کو سونے کی تولہ قیمت 550 روپے اور 10 گرام 471 روپے بڑھ گئی۔ جس کے نتیجے میں ملک بھر میں سونے کی تولہ قیمت 51ہزار 500 اور 10 گرام 44ہزار 142 روپے ہوگئی تاہم چاندی کی قیمتوں میں کمی ہوئی، چاندی کی تولہ قیمت 10 روپے گھٹ کر 710 اور 10 گرام 8.56روپے کی کمی سے 608 روپے 57 پیسے ہو گئی، چاندی کی عالمی قیمت 20.44 ڈالر فی اونس ریکارڈ کی گئی۔ واضح رہے کہ برطانیہ کے یورپی یونین چھوڑنے کے فیصلے کی وجہ سے عالمی معاشی بے یقینی بڑھنے کے باعث سرمایہ کار اپنے سرمائے کو ڈوبنے سے بچانے کی فکر میں لگ گئے ہیں اور منافع بخش سرمایہ کاری کے لیے سونا خرید رہے ہیں جس کی وجہ سے سونے کی قیمتوں میں اضافہ ریکارڈ کیا جا رہا ہے۔