ایمز ٹی وی (کراچی /تعلیم ) صاف پانی ہے نہ بجلی، فرنیچر بھی میسر نہیں ، بچوں کودریاں بچھا کر زمین پر بٹھایا جاتا ہے

ایجوکیشن آفیسر کمپیوٹرلیب بھی فراہم کریں، اعجازاعوان،حامد کریم ودیگر کاخطاب ضلع کورنگی میں سرکاری سیکنڈری اسکولوں کی حالت اورمعیارتعلیم کوبہتربنانے کیلئے گورنمنٹ سیکنڈری اسکول ٹیچرز ایسوسی ایشن (گسٹا) کراچی ڈویژن کے صدر اعجاز حسین اعوان کی ہدایت پرمقامی ریسٹورنٹ گلشن اقبال میں ڈسٹرکٹ آفیسر شبانہ کوثر کے اعزاز میں استقبالیہ تقریب کے موقع پر ایک تعلیمی کانفرنس منعقد کی گئی۔ تقریب میں گسٹا کراچی ڈویژن کے صدر اعجاز حسین اعوان، حامد کریم، ڈاکٹر اعجاز، سلیم مغل اور لانڈھی ٹاؤن کے کو آرڈی نیٹر نعیم احمد حمیدی نے شرکت کی۔

اس تعلیمی کانفرنس سے خطاب کرتے ہوئے گسٹا کراچی کے صدر اعجاز حسین اعوان نے کہا کہ معیاری تعلیم کے سرکاری اسکولوں میں بہتر سہولتیں بھی فراہم کی جانی چاہئیں، اکثر سرکاری سیکنڈری اسکولوں کی حالت نہایت خراب ہے ، بچوں کو بیٹھنے کیلئے فرنیچر میسر نہیں ہے ، دریاں بچھا کر زمین پر بٹھایا جاتا ہے ، پینے کو صاف پانی اور بجلی بھی نہیں ہے جب کہ اکثر اسکول تو عمارت کے لحاظ سے انتہائی خستہ حالت میں ہیں۔ انہوں نے کہا کہ ہمارے پاس بہترین اور باصلاحیت اساتذہ کی کوئی کمی نہیں ہے لیکن بچوں کو اچھی اور معیاری تعلیم دینے اور جدید دور کے تقاضوں سے ہم آہنگ کرنے کے لیے سہولتوں کی فراہمی بھی ضروری ہے ۔

انہوں نے تمام ڈائریکٹرز اور ڈسٹرکٹ ایجوکیشن آفیسر سے درخواست کی وہ نجی اسکولوں کا مقابلہ کرنے کے لیے تمام سرکاری اسکولوں میں کمپیوٹر لیب سمیت تمام ضروری سہولتوں کی فراہمی کو یقینی بنائیں تاکہ غریب اور متوسط طبقے کے بچے بھی زیور تعلیم سے آراستہ ہو سکیں،معیار تعلیم کو بہتر بنانے کے حوالے سے تجاویز پیش کی جائیں گی۔ حامد کریم نے اپنے خطاب میں وقت کی پابندی اور سرکاری اسکولوں میں معیار تعلیم کو بہتر بنانے کے ساتھ ساتھ بچوں کی تعداد بڑھانے پر زور دیا۔ مہمان خصوصی شبانہ کوثر کا کہنا تھا کہ میں سرکاری اسکولوں میں جدید تقاضوں کے مطابق تعلیم کے ذریعے انقلاب لاؤں گی۔