کراچی: سندھ مدرستہ السلام یونیورسٹی ملیر ایجوکیشن سٹی کیمپس کو سرسبز و شاداب اور ماحول دوست بنانے کےلئے شجرکاری مہم شروع کردی گئی ہے، شجرکاری مہم کے تحت کیمپس میں چار ہزار پودے لگائے جائیں گے تفصیلات کے مطابق جامعہ کو سرسبز و شاداب بنانے کےلئے سندھ مدرستہ السلام یونیورسٹی کے طلبا اور فیکلٹی ممبران نے شجرکاری مہم میں حصہ لیا۔

 

اس موقع پر طالب علموں نے اپنے حصے کا ایک ایک پودا لگایا اور ان پودوں کو پانی بھی ڈالا، طالب علموں نے عہد کیا کہ وہ نا صرف جامعہ بلکہ اپنے ارد گرد کی جگہوں پر بھی پودے لگائیں گے۔

 

 

چیئرمین شعبہ ماحولیاتیات ڈاکٹر ہاشم زبیری نے طلبا کو بریفنگ دی کہ اس مہم کا مقصد دوستانہ ماحول پیدا کرنا ہے اس سلسلے میں ہر طالب علم کو اپنا کردار ادا کرنا چاہئے، موسمیاتی تبدیلی دنیا بھر کےلئے سخت چیلنج بنی ہوئی ہے اور آب و ہوا کی تبدیلی کا خطرہ دن بہ دن تیزی سے بڑھتا جارہا ہے پاکستان اس خطے کا ایک ایسا ملک ہے جو گذشتہ کئی برسوں کے دوران  آب و ہوا کی تبدیلی سے سب سے زیادہ

متاثر ہوا ہے۔

 

 

انہوں نے کہا کہ یہ مہم ابھی شروع ہوئی ہے اور جامعہ کے ایجوکیشن سٹی کیمپس کی اس زمین پر چار ہزار پودے لگائے جائیں گے۔ پروفیسر ڈاکٹر حنا شہناز نے کہا کہ یہ شجرکاری مہم  پاکستان کو سر سبز ملک بنانے  میں معاون کردار ادا کرح گی۔شہر میں بڑھتے ہوئے درجہ حرارت کو  درخت لگا کر  کم کیا جاسکتا ہے۔ آج جو لوگ درخت لگارہے ہیں بیس تیس سال بعد وہ یہاں آکر دیکھیں گے تو یہ پودے تناور درخت بن چکے ہوں گے۔