ایمزٹی وی (اسلام آباد)قومی اسمبلی میں اپوزیشن لیڈر خورشید شاہ نے کہا ہے کہ ہم نے ٹی او آرز وزیراعظم کو دے دئیے ہیں۔ ہم سیاسی لوگ ہیں، مسئلے کا سیاسی حل چاہتے ہیں۔ قومی اسمبلی کے باہر میڈیا سے گفتگو کرتے ہوئے خورشید شاہ نے کہا کہ ہم جمہوریت کی مضبوطی کی کوشش کر رہے ہیں، جمہوریت میں ڈائیلاگ نہیں ہے تو پھر وہ جمہوریت نہیں ہے، یہ جتنی دیر کریں گے انہیں اتنا ہی نقصان ہو گا۔ اپوزیشن لیڈر خورشید شاہ کا کہنا تھا کہ ون سائیڈڈ کوئی کارروائی نہیں مانی جاتی۔ وزیراعظم پارلمینٹ میں پانامہ لیکس کی وضاحت پیش کریں۔ خورشید شاہ نے کہا کہ جمہوریت کے اندر کچھ قوانین ہوتے ہیں جنہیں اپنایا نہ جائے تو آمریت اور جمہوریت میں کوئی فرق نہیں رہ جاتا۔

ایمزٹی وی (اسلام اباد)فیڈرل بورڈ آف ریونیو نے آف شور کمپنیز پر تحقیقات شروع کردیں تاہم افسران کا کہنا ہے کہ دو ہزار دس سے پرانا انکم ٹیکس اور ویلتھ ٹیکس کا ڈیٹا قانونی طور پر جمع نہیں کرسکتے ۔ تفصیلات ے مطابق ایف بی آر آف شور کمپنیز کے مالکان کا ڈیٹا اور ٹیکس تفصیلات اکٹھا کر رہا ہے اور ان کے گزشتہ پانچ سال کے ٹیکس ریکارڈ کی جانچ پڑتال ہو رہی ہے ۔ ذرائع کے مطابق قانون 2010سے پرانا ڈیٹا اکٹھا کرنے کا اختیار نہیں دیتا ، اب تک جن مالکان کا ڈیٹا جمع ہوا ہے وہ 9/11 سے بھی پہلے کے ہیں ۔ فیڈرل بورڈ آف ریونیو اس سلسلے میں گزشتہ پانچ سال کی ٹیکس تفصیلات اکٹھا کرے گا ۔ الیکشن کمیشن سے بھی ڈیٹا شیئر کیا جائے گا.

ایمزٹی وی (اسلام آباد)آرمی چیف سے امریکی سنٹرل کمانڈ کے سربراہ کی ملاقات ہوئی۔ ملاقات میں دو طرفہ دفاعی تعلقات اور افغانستان کی صورت حال پر تبادلہ خیال کیا گیا۔ آئی ایس پی آر کے مطابق پاک فوج کے سربراہ اور امریکی جنرل کی ملاقات میں ، باہمی دلچسپی کے امور کے علاوہ خاص طور پر افغانستان میں سیکورٹی صورتحال زیربحث رہی ۔ جنرل جوزف نے خطے میں امن و استحکام کیلئے پاک فوج کے کردار کو سراہا ۔ جنرل جوزف نے جی ایچ کیو میں یادگار شہداء پر پھول چڑھائے ۔ امریکی سینٹرل کمانڈ کے سربراہ سیکرٹری وزارت دفاع سے بھی ملے ۔ ترجمان کے مطابق سیکرٹری دفاع نے ایف 16 کے معاملے پر پاکستان کے تحفظات سے آگاہ کرتے ہوئے کہا کہ طیارے دہشتگردی کیخلاف جنگ کیلئے بہت ضروری ہیں ۔ انہوں نے کولیش سپورٹ فنڈ کا معاملے بھی اٹھایا۔

ایمزٹی وی (باغ) پاکستان پیپلز پارٹی آج باغ میں سیاسی طاقت کا بھرپور مظاہرہ کرے گی ۔ اس حوالے سے پارٹی کارکنوں نے جلسے کی تیاریوں کا آغاز کر دیا ہے ۔ پیپلز پارٹی کی مقامی قیادت کی جانب سے جلسے کو کامیاب بنانے کیلئے کوششیں جاری ہیں ۔ پارٹی کارکنوں کی جانب سے بھرپور مطالبے کے بعد اس بات کا قوی امکان ہے کہ چیئرمین پیپلز پارٹی بلاول بھٹو زرداری بھی جلسے سے خطاب کریں گے ۔

ایمزٹی وی (تعلیم)آزادکشمیر یونیورسٹی میں 95.3ملین مالیت کے گرلز ہاسٹل کا سنگ بنیاد رکھ دیا گیا صدرریاست سردار محمد یعقوب خان ،وائس چانسلرپروفیسر ڈاکٹر خواجہ فاروق احمدنے فیتہ کاٹ کر باقاعدہ سنگ بنیاد رکھا۔ ،ہاسٹل کی تعمیر سے ڈیڑھ سو سے زائد طالبات کو رہائش کی سہولیات میسر آئیں گی۔

ایمزٹی وی (تعلیم) بحریہ یو نیورسٹی اسلام آباد کی ٹیم مشینی لوگ"Machinilog"نے مقامی طور پر بہترین روبوٹ ڈیزائن کرکے روبو کپ @ہوم 2016کے لئے کوا لیفائی کر لیا ۔ اس ٹیم میں انجینئرنگ کے پانچ طلبہ حسیب اسلم ( ٹیم لیڈ ر ) ، طاہر محمو د ، باسط اکرم ، اسامہ احمد ، حمزہ حکیم اور دو اسا تذہ ارسلا ن اختر اور عمار اجمل شامل ہیں ۔ اس موقع پر مشینی لوگ"Machinilog" کے ٹیم لیڈر حسیب اسلم کا کہنا تھا کہ '' روبو کپ @ہوم جیسے مقابلے میں شرکت بلا شبہ ہماری کامیابی کے سفر میں اہم سنگ میل ہے ۔ ہماری ٹیم کی ان تھک محنت اور ہمارے اساتذہ کی رہنما ئی کی بدولت ہم اس مقابلے کے لئے کوا لیفائی کرنے میں کامیاب ہو ئے ہیں ۔

ایمزٹی وی(پشاور) صوبائی الیکشن کمیشن نے تحریک انصاف کے چئیرمین عمران خان کو حلقہ پی کے 8 میں جلسہ کرنے پر نوٹس جاری کردیا جب کہ مولانا فضل الرحمان کو نوٹس جاری کرتے ہوئے تنبیہ کی گئی ہے کہ حلقے میں جلسہ نہ کیا جائے ورنہ قانونی کارروائی کی جائے گی ۔ تفصیلات کے مطابق پشاور کے حلقہ پی کے 8 میں آج تحریک انصاف کی جانب سے جلسے کے اعلان پر ریجنل الیکشن کمشنرنے تحریک انصاف کے چیرمین عمران خان کو نوٹس جاری کرتے ہوئے کہا ہے کہ ضمنی انتخابات میں بڑے جلسے کرنا انتخابی قوانین کی کھلی خلاف ورزی ہے۔ دوسری جانب صوبائی الیکشن کمیشن نے جمعیت علمائے اسلام (ف) کے سربراہ مولانا فضل الرحمان کوبھی حلقہ پی کے 8 میں جلسہ کرنے سے منع کرتے ہوئے نوٹس جاری کردیا، الیکشن کمیشن کی جانب سے جاری بیان میں کہا گیا ہے کہ اگرمولانا فضل الرحمان نے ضابطہ اخلاق کی خلاف ورزی کی توان کے خلاف کارروائی کی جائے گی۔ واضح رہے کہ اس سے قبل الیکشن کمیشن مشیر وزیراعظم انجینئرامیرمقام کو حلقے میں ترقیاتی کاموں کے اعلان پر نوٹس جاری کرچکا ہے جب کہ حلقہ پی کے 8 میں ضمنی انتخاب 12 مئی کو ہوگا۔

ایمزٹی وی(اسلام آباد)سپریم کورٹ کی عمارت میں آگ لگنے کے باعث 2 کمرے اور ان میں رکھا فرنیچر مکمل طور پر جل گیا۔ ذرائع کے مطابق سپریم کورٹ کی عمارت میں آج صبح اچانک لگنے والی آگ نے دیکھتے ہی دیکھتے 2 کمروں کو اپنی لپیٹ میں لے لیا جس کے باعث کمروں میں رکھا تمام فرنیچر اور دیگر سامان مکمل طور پر جل گیا۔ سپریم کورٹ کے سیکیورٹی حکام کا کہنا ہے کہ خوش قسمتی سے سپریم کورٹ کا تمام ریکارڈ محفوظ رہا کیونکہ آگ سپریم کورٹ بار کے کانفرنس روم اور لائبریری کے سامنے والے کمرے میں لگی ۔ فائر بریگیڈ کے عملے نے موقع پر پہنچ کر آگ پر قابوپالیا جب کہ سپریم کورٹ کے عملے کا کہنا ہے کہ آگ کی وجہ شارٹ سرکٹ معلوم ہوتی ہے۔ تحقیقات کے بعد سپریم کورٹ بار میں آگ لگنے کے واقعہ کی ذمہ داری چوہوں پر ڈال دی گئی جب کہ چوہوں کو پکڑنے کے لئے پاکستان ورکرز ڈپارٹمنٹ کا عملہ بھی طلب کر لیا گیا۔ اس کے علاوہ چوہوں کو پکڑنے کے لئے چوہے دان بھی منگوا لئے گئے۔

ایمزٹی وی (تعلیم) صوبائی حکومت نے دوسرے مرحلے میں راولپنڈی ضلع کے کالجز اور ہائرسکینڈری اسکولوں کو مرحلہ وار پنجاب ایجوکیشن فائونڈیشن (پیف) کے حوالے کرنے کا فیصلہ کیا ہے. راولپنڈی کے 7 کالج اور 12ہا ئرسکینڈری aسکول پرائیویٹ پبلک پارٹنر شپ کے تحت چلائے جائیں گے ، صوبائی حکومت نے ناقص نتائج دینے والے پرائمری ،مڈل اورہائی اسکولوں کو مرحلہ وار پنجاب ایجوکیشن فائونڈیشن کے حوالے کردیا اب دوسرے مرحلہ میں صوبہ بھر کی طرح راولپنڈی میں بھی 7 کالج اور 12ہائرسکینڈری اسکول پرائیویٹ پبلک پارٹنر شپ کے تحت چلانے کا فیصلہ کیا گیا ہے۔ اس سلسلے میں ان کالجز اور اسکولوں کو پی ای ایف کے حوالے کرنے کیلئے حکمت عملی طے کرلی گئی ہے جس کے مطابق 2016میں میٹرک اورایف اے کے سالانہ نتائج کو مدنظر رکھ کران کالجز اور اسکولوں کو پی ای ایف کے حوالے کردیا جائے گا ،حکومت کے اس اقدام پر اساتذہ تنظیمیں بے بس نظرآرہی ہیں اور احتجاج کی دھمکیوں تک ہی محدود ہوکررہ گئی ہیں۔

ایمزٹی وی (راولپنڈی)عوامی تحریک نے گذشتہ روز راولپنڈی ڈسٹرکٹ کے صدر سلطان نعیم کیانی کی سربراہی میں راولپنڈی-اسلام آباد پریس کلب کے باہر ایک احتجاجی ریلی نکالی۔ تفصیلات کے مطابق پاکستان عوامی تحریک (پی اے ٹی) نے بھی پاناما پیپرز لیکس کے معاملے پر حکمران جماعت مسلم لیگ (ن) کے خلاف مہم کا آغاز کرتے ہوئے ایک ایسی تنظیم کی تشکیل کا مطالبہ کیا ہے جو پاک فوج کے زیرِ انتظام کام کرے اور وزیراعظم نواز شریف اور ان کے اہلخانہ کے خلاف کرپشن الزامات کی تحقیقات کرے۔ مظاہرین نے حکومت کے خلاف نعرے بازی کی اور نواز شریف اور ان کے اہلخانہ کے خلاف تحقیقات کا مطالبہ کیا۔ عوامی تحریک کے سلطان نعیم کیانی کا کہنا تھا، 'اگر پاناما یپیرز معاملے کی تحقیقات ایک ایسی تنظیم کرے جو فوج کی زیر نگرانی کام کرے، تو وزیراعظم کو استعفیٰ دینے کی کوئی ضرورت نہیں ہے۔ تاہم اگر کوئی دوسری تنظیم اس معاملے کی تحقیقات کر رہی ہے تو وزیراعظم نواز شریف کو تحقیقات کے آغاز سے قبل استعفیٰ دے دینا چاہیے'۔ ان کا مزید کہنا تھا کہ پاناما پیپرز لیکس نے مقامی اشرافیہ کی مالیاتی خردبرد کو بے نقاب کیا ہے، ان کامزید کہنا تھا کہ اب یہی وقت ہے کہ ملکی سیاست کو کرپشن اور نااہلی سے پاک کیا جائے۔ کیانی کا کہنا تھا، 'حکمران خاندان کو عوام کے پیسے سے حاصل کی جانے والی آمدنی اوراس پیسے کی بیرون ملک منتقلی کے حوالے سے جواب دہ ہونا چاہیے۔