ایمز ٹی وی ( انٹرنیشنل) بنگلادیش کی سپریم کورٹ نے جنگی جرائم کے الزام میں گرفتار جماعت اسلامی کے امیر مطیع الرحمان نظامی کی سزائے موت کے خلاف اپیل مسترد کردی۔
غیر ملکی خبر رساں ادارے کے مطابق جماعت اسلامی بنگلادیش کے امیر نے جنگی جرائم کی تحقیقات کے لئے بنائے گئے ٹریبونل کے فیصلے کو سپریم کورٹ میں چیلنج کیا تھا تاہم بنگلادیش کی اعلیٰ عدالت نے مطیع الرحمان نظامی کی درخواست مسترد کرتے ہوئے ٹریبونل کے سزائے موت کے فیصلے کو برقرار رکھا۔
سپریم کورٹ کی جانب سے سزائے موت کے خلاف اپیل مسترد ہونے کے بعد امیر جماعت اسلامی کے پاس اب واحد راستہ صدر سے رحم کی اپیل ہے، اگر صدر بھی ان کی رحم کی اپیل مسترد کردیتے ہیں تو پھر انھیں تختہ دار پر لٹکا دیا جائے گا۔ دوسری جانب ناقدین کا کہنا ہے کہ حکومت جنگی جرائم کے ٹریبونل کو سیاسی مخالفین کے خلاف استعمال کر رہی ہے جب کہ ہیومن رائٹس واچ بھی کہہ چکا ہے کہ تحقیقات کے لئے عدلیہ کا طریقہ بین الاقوامی معیار پر پورا نہیں اترتا۔
واضح رہے کہ امیر جماعت اسلامی پر 1971 میں مخالفین کو قتل کرنے، لڑکیوں کو زیادتی کا نشانہ بنانے اور تشدد کے الزامات عائد کئے گئے تھے۔ بنگلادیش کی سیکولر وزیراعظم حسینہ واجد نے جنگی جرائم کی تحقیقات کے لئے 2010 میں ایک ٹریبونل تشکیل دیا تھا جس کے فیصلوں پر عمل درآمد کرتے ہوئے اب تک 4 سیاستدانوں کو سزائے موت دی جا چکی ہے

ایمز ٹی وی (کراچی) اہم شخصیات اورپولیس افسران کے نام نکالنے کے بعدایس ایس پی سٹی فداحسین جانوری نے منگل کی شب لیاری گینگ وار کے گرفتارملزم عذیر بلوچ کی جوائنٹ انٹیروگیشن رپورٹ فائنل کرکے دستخط کردیے جس کے فوری بعدرینجرزکے اختیارات میں اضافے کانوٹیفکیشن بھی جاری کردیاگیا۔
جے آئی ٹی رپورٹ میں اہم سیاسی شخصیات اورپولیس افسران کے نام شامل تھے جبکہ رپورٹ میں ایک حساس ادارے کے افسر کا نام بھی شامل تھا۔ذرائع نے بتایا کہ عذیر بلوچ کی جے آئی ٹی رپورٹ میں شامل کچھ اہم شخصیات کے ناموں پرخدشات کے باعث سندھ حکومت رینجرز کے اختیارات میں اضافے کے نوٹیفکیشن میں دیر کر رہی تھی تاہم گزشتہ روزایک وفاقی وزیر کی مداخلت پر رپورٹ میں سے مبینہ طورپراہم شخصیات و پولیس افسران کے نام نکال دیے گئے جبکہ سیاسی شخصیات اورپولیس افسران کے نام نکالنے پرحساس ادارے کے افسرکانام بھی رپورٹ میں سے نکال دیاگیا۔
جس کے بعد منگل کی ایس ایس پی فدا حسین جانوری نے جوائنٹ انٹروگیشن رپورٹ پر اپنے دستخط کردیے جبکہ اسی وقت رینجرزکے اختیارات میں اضافے کا نوٹیفکیشن بھی جاری کر دیا گیا۔پولیس کے تفتیشی افسرنے بتایا کہ عذیر بلوچ سے تفتیش کے لیے ڈی ایس پی علی انور شاہ رینجرزکے آفس گئے تھے تاہم رینجرز نے ڈی ایس پی کوعذیر بلوچ کے قریب جانے کی اجازت نہیں دی اور دور سے ہی دکھا دیا۔ابھی ڈی ایس پی عذیرسے ملاقات کرنے کے لیے بات چیت کر رہے تھے کہ انھیں مبینہ طور پر ایس پی سٹی فدا حسین جانوری کا فون آیا اور ان سے فوری طور پر سخت لہجے میں واپس آنے کی ہدایت کی گئی جس پر وہ خاموشی سے واپس آگئے۔تفتیشی افسر نے بتایا کہ عذیربلوچ کو11 مئی کو پہلی پیشی پرہی جوڈیشنل ریمانڈ پرجیل کسٹڈی کردیاجائے گا۔
تفتیشی افسر نے مزیدبتایاکہ سال2011 سے 2014 کے دوران لیاری ٹاؤن کے تھانوں میں تعینات ایس ایچ اوز کو عذیر بلوچ 35 لاکھ روپے ماہانہ دیا کرتا تھاجبکہ ان ایس ایچ اوز کو اس بات کی بھی یقین دہانی کرائی گئی تھی کہ ان کا تبادلہ نہیں کیا جائے گا اوروہ جتنی چاہیں رشوت وصول کرسکتے ہیں،ان تمام مراعات کے بدلے عذیربلوچ کے کمانڈر اور دیگر کارندے رات کی تاریکی پھیلتے ہی پولیس کی وردیاں پہن کرپولیس کی موبائلوں میں سوار ہو کرعلاقے کا گشت کرتے تھے جبکہ پولیس تھانوں تک محدودہوجاتی تھی۔

ایمز ٹی وی (کھیل) پی ایس ایل میں چھٹی ٹیم قبول نہیں، فرنچائزز اپنے موقف پر ڈٹ گئیں، پشاور زلمی کے سوا سب نے تجویز کی مخالفت کر دی۔ تفصیلات کے مطابق گذشتہ روز لاہور میں پی ایس ایل ورکشاپ کے پہلے دن اگلے ایڈیشن میں چھٹی ٹیم کی شمولیت کا معاملہ چھایا رہا، پشاور زلمی کے سوا کوئی بھی اس کے حق میں نہیں ہے، گذشتہ روز چاروں مخالف فرنچائزز کے آفیشلز نے فیصلے پر احتجاج کیا، ڈیڈ لاک برقرار اور معاملے پر جمعرات کو مزید تبادلہ خیال ہو گا۔دریں اثنا پی ایس ایل میں شریک کھلاڑیوں کے معاوضوں میں اضافہ کر دیا گیا، پلاٹینم کیٹیگری کے پلیئر کو10ہزار کے اضافے سے اب ایک لاکھ50 ہزار ڈالر ملیں گے،ڈائمنڈ میں موجود کھلاڑی 5ہزارزیادہ 75 ہزار ڈالر وصول کرے گا، اسی طرح گولڈ اور سلور میں بھی رقم بڑھائی گئی ہے۔اگلے سیزن کیلیے28اگست سے ٹرانسفر ونڈو کھلے گی، فرنچائزز جنھیں ریلیز کریں گی ان کے ساتھ نئے پلیئرز ڈرافٹ میں شامل ہوں گے، ایک دوسرے سے ازخود بھی کھلاڑی خریدے جا سکیں گے۔ ڈرافٹ میں پلیئرز چننے کے نمبر پر بھی گذشتہ روز بعض فرنچائزز نے احتجاج کیا، منتظمین کے اختیار کردہ طریقہ کار کے مطابق گذشتہ ایڈیشن میں آخری نمبر پر رہنے والی ٹیم لاہور قلندرز کو اس بار سب سے پہلے پلیئرز چننے کا حق حاصل ہوگا، اس کے بعد کراچی کنگز اور پھر پشاور زلمی کا نمبر آئے گا، فاتح اسلام آباد یونائٹیڈ اور رنرز اپ کوئٹہ گلیڈی ایٹرز کو آخر میں موقع ملے گا، اس حوالے سے ٹیموں نے احتجاج کیا کہ ایسے تو تمام اچھے پلیئرز لاہور کو مل جائیں گے، اس معاملے پر بھی جمعرات کو مزید بحث ہوگی۔

ایمز ٹی وی (کراچی) رات گئے شارع فیصل پر ائیرپورٹ کے سامنے درختوں کی کٹائی کر دی گئی ۔ شہر میں ہیٹ اسٹروک کے باوجود درختوں کی کٹائی کا سلسلہ جاری ہے ۔ ایک طرف شہر میں ہیٹ آسٹروک سے لوگ ہلاک ہو رہے ہیں تو دوسری جانب کراچی میں درختوں کی کٹائی کا سلسلہ بھی جاری ہے ۔
رات گئے کراچی کی شارع فیصل کی سینٹرل بیلٹ پر لگے 4 گھنے درخت کاٹ دئیے گئے ۔ کٹائی کے دوران پولیس کی نفری بھی موجود رہی ۔ انتظامیہ کا کہنا ہے کہ گھنے درختوں کے باعث ٹریفک کی روانی متاثر ہو رہی تھی جس کے باعث گرین بیلٹ پر لگے چند درختوں کی کٹائی گئی ہے ۔

ایمز ٹی وی (خیبر پختونخواہ )پاکستان کے صوبہ خیبر پختونخواہ اسمبلی کے اقلیتی رکن اور وزیراعلیٰ کے مشیر برائے اقلیتی امور سردار سورن سنگھ کے قتل میں ملوث دو ملزمان نے مقامی مجسٹریٹ کے سامنے اقبالِ جرم کر لیا ہے۔
ذرائع کے مطابق مرکزی ملزم بلدیو کمار سمیت چھ ملزمان کو مقامی عدالت میں پیش کیا گیا تو ملزم بہروز اور شانگلہ کے تحصیل نائب ناظم عالم خان نے اقبال جرم کرتے ہوئے قتل کے محرکات سے پردہ اٹھایا۔
سورن سنگھ کے قتل کی وجہ سیاسی رنجش تھی‘ سورن سنگھ کی آخری رسومات ادا، مسلمان بھی شریک .تاہم بلدیو کمار سمیت باقی چار تحریک انصاف میں شامل ملزمان نے جرم کا اقرار نہیں کیا۔
بونیر کے ضلعی پولیس افسر خالد ہمدانی نے بتایا کہ ان تمام ملزمان کو دس روزہ جسمانی ریمانڈ پر پولیس کے حوالے کیاگیا تھا جس کے بعد ان تمام ملزمان کو بونیر کے مقامی عدالت میں پیش کیاگیا جن میں دو ملزمان نے رضاکارانہ طور پر اقبال جرم کر لیا۔
یاد رہے کہ چند دن قبل سردار سورن سنگھ کو بونیر کے علاقے پیربابا میں گولیاں مار کر ہلاک کیاگیا تھا جس کے بعد پولیس نے کارروائی کرتے ہوئے قتل میں ملوث ملزمان کو گرفتار کر کے عدالت میں پیش کیا تھاہلاک ہونے والے سردار سورن سنگھ پانچ سال قبل پاکستان ہوگئے تھے۔

ایمز ٹی وی (بزنس)نیپرا کی جانب سے جاری اعلامیے کے مطابق کے الیکٹرک کیلئے بجلی کی قیمت میں کمی فروری کی فیول ایڈجسٹمنٹ کی مد میں کی گئی ہے۔ نیپرا کا کہنا ہے کہ کے الیکٹرک نے چوالیس پیسے فی یونٹ کمی کی درخواست کی تھی تاہم فروری میں کے الیکٹرک نے اپنے پاور پلانٹس سے کم بجلی پیدا کی اور آئی پی پی پیز سے بجلی خریداری کی وجہ سے صارفین پر اضافی بوجھ پڑا جس کی وجہ سے قیمت میں پچھتر پیسے فی یونٹ کمی کی گئی۔ ماہانہ تین سو یونٹ استعمال کرنے والے صارفین ریلیف سے محروم رہیں گے۔

ایمز ٹی وی (کوئٹہ) وفاقی تحقیقاتی ادارے نے کوئٹہ کے ڈبل روڈ پر واقع نادرا کے دفتر پر چھاپہ مار کر 9 افراد کو حراست میں لے لیا۔ گرفتار ہونیوالے نادرا ملازمین میں 2 ڈی ای او خالد اور ظہیر، تین سیکیورٹی اہلکار، 2 خواتین ڈی ای او اور نادرا کے 2 ملازمین شامل ہیں۔

ان افراد پر عوام سے رشوت لینے کا الزام ہے جس پر انہیں گرفتار کیا گیا اور تفتیش کی جا رہی ہے -

ایمزٹی وی (اسلام آباد)سپریم کورٹ نے شہر قائد کی تمام قومی شاہراؤں، فلائی اوورز اور گرین بیلٹ پر لگے سائن بورڈ کو 15 روز میں ہٹانے کا حکم دے دیا۔ ذرائع کے مطابق سپریم کورٹ کراچی رجسٹری میں جسٹس امیر ہانی مسلم کی سربراہی میں عدالت عظمیٰ کے 2 رکنی بینچ نے کراچی میں لگے غیرقانونی بل بورڈز اورسائن بورڈز کے خلاف کیس کی سماعت کی۔ دوران سماعت عدالت نے اپنے ریمارکس میں کہا کہ کراچی میں ہیوی بل بورڈز لگائے گئے ہیں اگر یہ کسی پر گر گئے تو بہت بڑا جانی نقصان ہوسکتا ہے،سائن بورڈ نہ ہٹائے گئے تو ذمے داروں کے خلاف توہین عدالت کی کارروائی کی جائے گی جب کہ سائن بورڈ کے معاملے پر بلدیہ عظمی کراچی کے جواب سے مطمئن نہیں ہیں۔ عدالت نے شہر کی تمام قومی شاہراؤں، فلائی اوورز، گرین بیلٹ پرلگے غیرقانونی سائن بورڈ کو 15 روز میں ہٹانے کا حکم دیتے ہوئے قرار دیا کہ کئی ایسے علاقے ہیں جہاں بل بورڈ اور سائن بورڈ لگانے کی ضرورت بھی نہیں تھی وہاں بل بورڈ لگادیئے گئے، گرین بیلٹ، فٹ پاتھوں اور شاہراؤں پرلگے 90 فیصد بل بورڈزغیرقانونی ہیں جنہیں 15 روز کے اندر ہٹایا جائے۔ واضح رہے کہ 11 مارچ کو عدالت نے تمام اسٹیک ہولڈرز کو 15 روز میں تمام بل بورڈز ہٹانے کا حکم دیتے ہوئے رپورٹ پیش کرنے کی ہدایت کی تھی جس کے باوجود شہر قائد سے غیرقانونی سائن بورڈز نہیں ہٹائے گئے۔

ایمزٹی وی (اسلام آباد)قومی اسمبلی میں قائد حزب اختلاف خورشید شاہ نے پاناما لیکس کی تحقیقات کے لئے اپوزیشن جماعتوں کے مشترکہ ٹی او آرز وزیراعظم نواز شریف کو بھجوا دیئے۔ زرائع کے مطابق اپوزیشن لیڈ کی جانب سے وزیراعظم کو بھیجے گئے خط میں لکھا گیا کہ ٹی او آرز تمام اپوزیشن جماعتوں نے مشترکہ طور پر تیار کئے ہیں لہذا حکومت ان ٹی او آرز پر عمل درآمد کے لئے ضروری اقدامات یقینی بنائے۔ واضح رہے کہ پاکستان تحریک انصاف، پیپلزپارٹی اور جماعت اسلامی سمیت پارلیمنٹ میں موجود دیگر اپوزیشن جماعتوں نے پاناما لیکس کی تحقیقات کے لئے بنائے گئے جوڈیشل کمیشن کے ٹی او آرز میں سب سے پہلے وزیراعظم نواز شریف اور ان کے اہل خانہ کے احتساب کا مطالبہ کیا ہے۔

ایمزٹی وی (کراچی) کراچی کےعلاقےعزیزآباد کے شہدا قبرستان کے قریب قانون نافذ کرنے والے ادارے نےکارروائی کرتےہوئےقبرستان کے گورکن کو حراست میں لے لیا۔ تفصیلات کےمطابق کراچی کے علاقے عزیز آباد کے شہدا قبرستان کے قریب حساس اداروں نے کارروائی کرتےہوئے قبرستان کے گورکن کو حراست میں لے لیا ہے ۔گورکن کو مزید تفتیش کیلئے نامعلوم مقام پر منتقل کر دیا گیا ہے ۔ واضح رہے کہ چندروزقبل بھی رینجرزنےقبرستان میں چھاپہ ماراتھاجہاں اسے رینجرز کے ہاتھ بھاری مقدار میں اسلحہ لگا تھا.