کراچی: محکمہ موسمیات نےشہر قائد میں بارانِ رحمت برسنے کی خوشخبری سنادی۔

موسمیاتی تجزیہ کار جواد میمن کے مطابق راجستھان کے قریب آنے پر ہوا کے کم دباؤ کی شدت بڑھ سکتی ہے جس کے تحت سندھ میں جولائی کے آخری دنوں میں بارشوں کا امکان ہے جو اگست تک جاری رہ سکتاہے۔

جواد میمن نے بتایا کہ کراچی میں 29 یا 30 جولائی سے بارش کا آغاز ہوسکتا ہے، بارش کا سلسلہ وقفے وقفے سے 2 یا 3 اگست تک جاری رہ سکتا ہے۔

موسمیاتی تجزیہ کار کے مطابق کراچی میں معتدل شدت اور کہیں کہیں تیز بارش کا امکان رہے گا جب کہ 6 یا 7 اگست کو ایک اور ہوا کا کم دباؤ خلیج بنگال میں بن سکتا ہے۔

کراچی: پرائم منسٹر یوتھ پروگرام کے چیئرمین رانا مشہود احمد خان نے این ای ڈی کی اسپورٹس سہولتوں کا جائزہ لینے کےلئے دورےکیا۔

اس موقع پر رانا مشہود احمد خان کاکہناتھا کہ کھیل کو انڈسٹری بنائیں گے، طالب علم اسے کیرئیر بنائیں، ڈیجیٹل دور کے تقاضوں کو پورا کرنے کے لیے اب نوجوان بینک سے آسان قرضوں پر من پسند لیپ ٹاپ حاصل کیے کرسکیں گے۔ طالب علم اب کھیلوں کو بحیثیت کیرئیر اپنا سکیں گے۔کھیلوں کی ترقی و ترویج کے ضمن میں رانا مشہود احمد خان کا کہنا تھا کہ حکومت پاکستان کی خصوصی توجہ نوجوانوں پر ہے، دنیا بھر کی طرح ہم اب کھیلوں کو صنعت کا درجہ دینا چاہتے ہیںان کا مزید کہنا تھا کہ وفاقی حکومت دنیا بھر کی طرح ای اسپورٹس فیڈریشن بنانے پر کام کررہی ہے۔ فیڈریشن کے تحت پاکستان بھر میں نوجوانوں کے لیے دس اسپورٹس اکیڈمیاں بنانے جارہے ہیں جس سے باصلاحیت کھلاڑی ابھر کر سامنے آسکیں گے۔

انہیں شیخ الجامعہ ڈاکٹر سروش لودھی نے ہائی پرفارمنس بائیو مکینکس لیب اور اس میں آئندہ نصب کیے جانے والے آلات کا بھی دورہ کروایا۔ اس موقعے پر ڈاکٹر سروش حشمت لودھی کا کہنا تھا کہ حکومت پاکستان حوصلہ افزائی کرے تو این ای ڈی، کھیلوں میں ڈگری دینے کے لیے تیار ہیں.شیخ الجامعہ نے کھیلوں کے فروغ کے لیے انچارج اسپورٹس ایچ ای سی جاوید علی میمن کی کاوشوں کو سراہا۔ انہوں نے مزید کہاکہ این ای ڈی میں ہائر ایجوکیشن کمیشن کے اشتراک سے بننے والی بائیو میکنکس لیب اپنی نوعیت کی منفرد لیبارٹری ہے جس میں آلات اور آرٹی فیشل انٹیلی جنس کے ذریعے کھلاڑیوں کی جسمانی صحت کی جانچ کی جاسکے گی، جس سےکھلاڑیوں کی کارکردگی میں بہتری کے مواقع میسر آئیں گے۔

اس دورے کے موقعے پر سابق سینیٹر نہال ہاشمی، انچارج اسپورٹس ایچ ای سی (اسلام آباد) جاوید علی میمن اور کوآرڈینیٹر پرائم منسٹر یوتھ پروگرام فہد شفیق اور پروجیکٹ مینجر پرائم منسٹر یوتھ پروگرام مدیحہ اسلم بھی ساتھ تھیں۔

کراچی میں 8، 9 اور 10 محرم الحرام کیلیے ٹریفک پولیس نے پلان جاری کر دیا۔

پلان کے مطابق محرم الحرام کا مرکزی جلوس نشتر پارک سے برآمد ہو کر حسینیہ ایرانیاں امام بارگاہ پر اختتام پذیر ہوگا اور اس دوران ٹریفک کو گرومندر چوک سے آگے جلوس کے روٹ پر جانے کی اجازت نہیں ہو گی۔

تمام ٹریفک کو بہادر یار جنگ روڈ سولجر بازار کی طرف موڑ دیا جائے گا۔ جلوس کیلیے اسٹیکر والی گاڑیاں شاہراہ قائدین سوسائٹی لائٹ سگنل سے داخلے ہو سکیں گی۔

محرم میں سکیورٹی وجوہات کی بنا پر ایم اے جناح روڈ گرومندر سے ٹاور تک بند رہے گا۔ ناظم آباد سے آنے والے لسبیلہ چوک سے نشتر روڈ اور گارڈن سے ہو کر منزل کی جانب جا سکتے ہیں۔

لیاقت آباد سے آنے والے تین ہٹی سے لسبیلہ چوک سے بائیں جانب سینٹرل جیل جا سکتے ہیں۔ حسن اسکوائر سے پیپلز چورنگی جانے والے کشمیر روڈ سے شاہراہ قائدین جا سکیں گے۔

حسن اسکوائر سے آنے والے جیل فلائی اوور سے تین ہٹی سے نشتر روڈ جا سکتے ہیں۔ شارع فیصل سے شاہراہ قائدین اور نمائش جانے والے سوسائٹی لائٹ سگنل سے کشمیر روڈ جا سکتے ہیں۔

جمشید روڈ سے گرومندر اور ایم اے جناح روڈ جانے والے گرومندر سے بہاردر یار جنگ روڈ سولجر بازار جا سکتے ہیں۔ گارڈن سے ایم اے جناح روڈ جانے والے انکل سریا سے گل پلازہ اور کوسٹ گارڈ کی جانب جا سکتے ہیں۔

محکمہ تعلیم سندھ نے نجی اسکولوں کی جانب سے 10 فی صد فری شپ کے لیے 4 خصوصی ٹیمیں تشکیل دے دیں.

یہ ٹیمیں نجی اسکولوں کا معائنہ اور ڈیٹا جمع کریں گی۔

تفصیلات کے مطابق سندھ حکومت کی جانب سے نئے فری شپ قانون کے تحت نجی تعلیمی ادارے 10 فی صد طلبہ کو مفت پڑھانے کے پابند ہیں۔

نئے تعلیمی سال کے آغاز پر دس فی صد فری شپ قانون پر سختی سے عمل درآمد کا فیصلہ کیا گیا ہے، محکمہ تعلیم نے اس سلسلے میں چار ٹیمیں تشکیل دے دی ہیں، جو نجی اسکولوں کا معائنہ اور ڈیٹا جمع کریں گی۔

فری شپ قانون پر عمل نہ کرنے پر نجی اسکولوں کی رجسٹریشن معطل یا منسوخ کر دی جائے گی۔

واضح رہے کہ ڈائریکٹوریٹ پرائیویٹ انسٹیٹیوشنز نے سندھ بھر کے نجی اسکولوں کے سربراہوں کو ہدایت نامہ جاری کر دیا ہے، جس میں کہا ہے کہ یکم اگست سے نئے تعلیمی سال پر دس فی صد فری شپ کے فارمولے پر عمل کیا جائے۔ کراچی، حیدرآباد، میرپور خاص، سکھر، لاڑکانہ اور شہید بینظیر آباد کے ریجنل ڈائریکٹر کو بھی خط ارسال کیا گیا ہے۔

خط میں مزید کہا گیا کہ سندھ میں بچوں کے حقوق میں فری اور لازمی تعلیمی ایکٹ 2013 پر عمل کیا جائے، تمام نجی اسکول کے بچوں کی تعداد کے حوالے سے بھی مکمل ڈیٹا فراہم کیا جائے۔

لاہور میں میٹرک کے طالبعلم نے کم نمبر آنے پر خودکشی کرلی۔

پولیس کے مطابق 15 سالہ ارسلان کی خودکشی کا واقعہ لاہور کے سرحدی گاؤں پڈانہ میں پیش آیا۔

پولیس نے بتایاکہ طالب علم میٹرک کے امتحان میں کم نمبر آنے پر دلبرداشتہ تھا اور ارسلان نے پانی کی ٹنکی سے چھلانگ لگا دی۔

پولیس کا کہنا ہے کہ پولیس اور فارنزک ٹیم نے شواہد اکٹھے کر کے کارروائی شروع کر دی۔ خیال رہے کہ پنجاب کے 9 تعلیمی بورڈز کی جانب سے میٹرک کے امتحانات کے نتائج کا اعلان کیا گیا ہے جن میں لاہور بورڈ بھی شامل ہے۔

اسلام آباد: سپریم کورٹ نے میڈیکل کالجز کی فیس سے متعلق  درخواست ناقابل سماعت قرار دیدیا۔ 

سپریم کورٹ کے جسٹس منصورعلی شاہ کی سربراہی میں تین رکنی بینچ نے میڈیکل کالجز میں فیسوں سے متعلق درخواست پر سماعت کی۔

دوران سماعت جسٹس منصورعلی شاہ نے سوال کیا کہ میڈیکل کالجز کی فیس پر کون سا قانون لگتا ہے اور  فیس کی ریگولیٹری کون کرتاہے؟ سپریم کورٹ ایسے تو کیس نہیں سن سکتا۔

جسٹس محمدعلی مظہر نے سوال کیا کہ  آپ نے پاکستان میڈیکل کمیشن سے فیس کے حوالے سے رابطہ کیا؟  اس پر وکیل درخواست گزار نے کہا کہ میں نے وزیراعظم، صدر مملکت کو میڈیکل فیس کےحوالے سے خط لکھا ہے، سپریم کورٹ کے فیصلے کے بعد پاکستان میڈیکل ڈینٹل ایکٹ بنایاگیا اور سپریم کورٹ کے فیصلے کو غلط لیاگیا۔ 

جسٹس منصورعلی شاہ نے کہا آپ ریگولیٹری کے پاس جائیں، سپریم کورٹ کا میڈیکل فیس دیکھنےسے متعلق کیاکام؟ ریگولیٹری جب بنا ہوا ہے تو کیا آپ وہاں گئے ہیں؟ کیا ہم کمیشن بنا سکتے ہیں؟ 

جسٹس محمدعلی مظہر نے ریمارکس دیے کہ یہ  آپ کا ذاتی مسئلہ ہے تو ریگولیٹری سے رجوع کریں۔

بعد ازاں عدالت نے میڈیکل کالجز کی فیس سے متعلق درخواست ناقابلِ سماعت قرار دے کر خارج کردی۔ 

ریاض: سعودی عرب میں یکم محرم الحرام کل ہوگی۔

سعودی سپریم کورٹ کی جانب سے جاری بیان کے مطابق سعودی عرب میں محرم الحرام کا آغاز 7 جولائی کو ہوگا۔

چاند دیکھنے والی کمیٹی نے قمری کلینڈر کے حساب سے فیصلہ کیا ہے کہ ذالحجہ کا مہینہ 30 دن کا ہوگا اوریکم محرم اتوار 7 جولائی کو ہوگی۔

متحدہ عرب امارات اور عمان میں بھی یکم محرم الحرام 7 جولائی کو ہوگی۔ متحدہ عرب امارات اور عمان میں یکم محرم الحرام کو تعطیل کا اعلان بھی کیا گیا ہے۔

 پاکستان اور بھارت کی ٹیمیں ورلڈ چیمپئین شپ آف لیجنڈز کے 8ویں میچ میں ایک دوسرے کے مدمقابل آئیں گی۔

انگلینڈ کے ایجبسٹن کرکٹ اسٹیڈیم میں روایتی حریف پاکستان اور بھارت کی ٹیمیں ٹکرائیں گی، جس میں سابق کرکٹرز شاہد آفریدی، عبدالرزاق، مصباح الحق، سعید اجمل کے علاوہ حریف ٹیم کے یوسف پٹھان، یوراج سنگھ، عرفان پٹھان اِن ایکشن ہوں گے۔

میچ پاکستان کے مقامی وقت کے مطابق رات 8:30 بجے شروع ہوگا۔

قومی ٹیم نے ویسٹ انڈیز اور آسٹریلیا جبکہ بھارتی ٹیم نے انگلیںڈ اور ویسٹ انڈیز کو شکست سے دوچار کیا ہے۔

کراچی: سندھ میں آج رات سے مون سون ہوائیں داخل ہونےکا امکان ہے۔

محکمہ موسمیات نے کراچی میں مون سون بارش برسانے والے سسٹم کے حوالے پیش گوئی کرتے ہوئے کہا مون سون ہوائیں آج شام مشرقی سندھ میں داخل ہوں گی۔

تفصیلات کے مطابق کراچی میں بادلوں کا راج ہے جس سے موسم خوشگوار ہوگیا ہے اور شہر بھر میں سمندری ہوائیں چل رہی ہیں، محکمہ موسمیات کا کہنا ہے کہ شہر کا درجہ حرارت آج چھتیس ڈگری سینٹی گریڈ تک جانے کا امکان ہے۔شہر میں اس وقت درجہ حرارت 33 ڈگری سینٹی گریڈ ہے جبکہ گرمی کی شدت 38 ڈگری تک محسوس کی جارہی ہے۔آج محسوس کیے جانے والا زیادہ سے زیادہ درجہ حرارت 40 ڈگری سے بھی تجاوزکرسکتا ہے تاہم شام یا رات میں بوندا باندی کا امکان ہے۔

موسم کا حال بتانے والوں نے کہا مون سون ہوائیں آج شام مشرقی سندھ میں داخل ہوں گی، کراچی میں مون سون کا پہلا اسپیل 8 جولائی کی شام میں داخل ہوگا، لو پریشر سسٹم کے نمودار ہونے سے کراچی میں بارش ہوسکتی ہے۔

کراچی: جامعہ این ای ڈی کے تحت بتیسویں سینٹ کا اجلاس منعقد کیا گیا۔ جس کی کمان بحیثیت چئیرمین سینٹ شیخ الجامعہ ڈاکٹر سروش حشمت لودھی نے سنبھالی۔

سینٹ کے اس اجلاس میں 23-2022 کے سالانہ اکاؤنٹ کی حتمی رپورٹ کی منظوری 24-2023 کی فائنل ڈیمانڈ کی منظوری جب کہ 25-2024 کا بجٹ بھی پیش کیا گیا۔

اجلاس کا آغاز کرتے ہوئے شیخ الجامعہ پروفیسر ڈاکٹر سروش حشمت لودھی نے بجٹ کے حوالے سے آگاہ کرتے ہوئے بتایا کہ 24-2023 کے بجٹ کاآغاز (266.444) ملین کے خسارے سے ہوا تھا لیکن یونی ورسٹی اسے 1.803 ملین کے سرپلس سے اختتام کررہی ہے جب کہ 25-2024 کا بجٹ 5,172.541 ملین کا ہے، اس بجٹ کی ابتدا، تخمینے کے تحت (320.860)ملین کے خسارے سے ہورہی ہے۔اجلاس سے خطاب کرتے ہوئے ڈاکٹر سروش کا کہنا تھا کہ ہم سندھ حکومت بالخصوص وزیرِ اعلی سندھ سید مراد علی شاہ کی این ای ڈی کے لیے کاوشوں کے ممنون ہیں۔

اس موقعے پر سیکریٹری جامعات و بورڈز عباس بلوچ کا کہنا تھاکہ این ای ڈی کا بڑھتا ہوا معیار اور اس کے فارغ التحصیل انجینئرز پورے ملک کے نوجوانوں کے لیے مثال ہیں۔ پچھلے آٹھ سالہ دور میں جامعہ کا بجٹ سرپلس میں تبدیل کرنے پر شیخ الجامعہ پروفیسر ڈاکٹر سروش حشمت لودھی سمیت تمام ٹیم مبارک باد کی حق دار ہے۔ اجلاس میں ڈین ڈاکٹر سعد قاضی نے سالانہ کارکردگی رپورٹ جب کہ ڈائریکٹر فنانس سجیرالدین نے سالانہ بجٹ پیش کیا۔ بتیسویں سینٹ اجلاس میں پرووائس چانسلر پروفیسر ڈاکٹر محمد طفیل، رجسٹرار سید غضنفر حسین سمیت 75 ممبران نے شرکت کی۔