طائف: ان دنوں سعودی عرب کے تمام علاقوں میں سردی کی لہر آئی ہوئی ہے۔ کہیں شدید اور کہیں ہلکی ہے۔ ملک کا کوئی علاقہ ایسا نہیں جہاں سردی کے آثار نہ پائے جاتے ہوں۔ طائف میں الشفا کا کوہستانی علاقہ شہر کے سرد ترین مقامات میں سے ایک ہے۔ یہ سیاحوں کا مرکز بھی ہے۔

 

اطلاعات کے مطابق سعودی عرب کے شہر طائف میں پہلی بار شہد کی مکھیاں چھتے میں سردی کی شدید لہر سے ٹھٹھر کر مر گئیں۔ یاد رہے کہ آج کل طائف سمیت سعودی عرب کے متعدد شہر شدید سردی سے دوچار ہیں۔

 

ماہر موسمیات ابو عبدالرحمن الحربش الصخری نے بتایا کہ سعودی عرب کے شمالی اور وسطی علاقوں میں سردی کی شدید لہر جمعرات تک جاری رہے گی اس کے بعد رفتہ رفتہ اس کی شدت کم ہوتی چلی جائے گی۔الصخری نے توجہ دلائی کہ جمعہ اور ہفتے کو مملکت کے متعدد علاقوں میں بارش کا قوی امکان ہے۔ ہوسکتا ہے کہ جمعرات کی شام ہی سے بارش کی شروعات ہوجائے۔