کراچی: سندھ سمیت پورے ملک میں میٹرک اورانٹرکےسالانہ امتحانات برائے سال 2023 بالترتیب 8 مئی اور 22 مئی سے منعقدہوں گے۔

نئے پیٹرن کے مطابق نویں دسویں اور گیارہویں و بارہویں جماعتوں میں ایم سی کیوز کا حصہ 40 فیصد سے کم کرکے 20 فیصد کر دیا گیا۔ گزشتہ میٹرک اور انٹر کے منعقدہ امتحانات میں ایم سی کیوز کا 40 فیصد حصہ تھا لیکن اب کیے گئے فیصلے کے مطابق مختصر جوابات اور تفصیلی جوابات کو باقی پرچے میں 40/40 فیصد کا حصہ دے دیا گیا۔

سیکریٹری اسکول ایجوکیشن سندھ غلام اکبر لغاری کی زیر صدارت اسٹیئرنگ کمیٹی کی زیلی کمیٹی کے منعقدہ اجلاس میں یہ فیصلہ کیا گیا۔ اجلاس میں سیکریٹری کالجز احمد بخش ناریجو، چیئرمینز بورڈز کے علاوہ قائم مقام ڈائریکٹر پرائیویٹ انسٹیٹیوشنز سندھ پروفیسر افضال احمد اور پرائیویٹ اسکولز ایسوسی ایشن کے رہنما طارق شاہ بھی شریک ہوئے۔

طارق شاہ نے اجلاس کے بعد میڈیا کو بتایا کہ اجلاس میں میٹرک کے امتحانات عید الفطر کے فوری بعد 28 اپریل سے شروع کرنے کی گزشتہ تجویز کو مسترد کر دیا گیا ہےچھٹی سے آٹھویں جماعتوں کے امتحانات عیدکےبعد منعقد کئےجائیں گے لہٰذا ان امتحانات کے بعد 8 مئی سے پورے صوبے میں میٹرک کے امتحانات شروع کیے جائیں اور انٹر کے امتحانات 23 مئی سے شروع ہوں۔

اجلاس میں آئندہ تعلیمی سال 2023 یکم اگست سے شروع کرنے کا بھی فیصلہ کیا گیا جبکہ رواں سال 2022 کی موسم سرما کی تعطیلات 22 دسمبر سے 31 دسمبر تک کرنے کا فیصلہ کیا گیا جبکہ اتوار یکم جنوری کے بعد پیر 2 جنوری 2023 سے تعلیمی ادارے کھول دیے جائیں گے۔

ملتان: ملتان ٹیسٹ میں پاکستان ہدف کےتعاقب میں مشکلات کا شکارہےجب کہ پہلےسیشن کااختتام ہوکرکھانےکاوقفہ ہوچکا ہے۔

پاکستان کو جیت کے لیے اب بھی 64 رنز درکار ہیں جب کہ 7 وکٹیں گر چکی ہیں۔

پاکستان نے چوتھے روز اپنی اننگز کا آغازچار وکٹوں کے نقصان پر 198 رنز سے کیا تھا،اس وقت کریز پرآغا سلمان اور ابرار احمد موجود ہیں۔

چوتھے روز پاکستان کو فہیم اشرف،محمد نواز اور سعود شکیل کی صورت میں دو نقصان اٹھانا پڑے۔

ملتان ٹیسٹ جیتنے کے لیے مہمان ٹیم انگلینڈ کو مزید 6 وکٹ درکار ہیں جب کہ پاکستان کو فتح حاصل کرنے کے ساتھ سیریز برابر کرنے کے لیے 157 رنز درکار ہیں

کراچی: جامعہ کراچی نےمخصوص نشستوں پرداخلوں کےلئے فارم جمع کرانےکی تاریخ کا اعلان کردیا۔

انچارج ڈائریکٹوریٹ آف ایڈمیشنز جامعہ کراچی ڈاکٹر صائمہ اختر کے مطابق تعلیمی سال 2023 ء کے لئے مخصوص نشستوں (Reserved Seats)پر داخلوں کے لئے فارم 21 دسمبر2022 ء تک جمع کرائے جاسکتے ہیں۔

مخصوص نشستوں میں اسپورٹس،کراچی یونیورسٹی ایمپلائز،معذورافراد(اسپیشل پرسنز)،آرمڈ فورسز،وکلا کے بچے،فاٹا،شمالی علاقہ جات وآزاد جموں کشمیر،اندرون سندھ اور بلوچستان کی نشستیں شامل ہیں۔طلبہ تمام معلومات بمعہ آن لائن داخلہ فارم،فیس واؤچر اور پراسپیکٹس کے حصول کے لئے  www.uokadmission.edu.pk  پررابطہ کرسکتے ہیں،جہاں تمام معلومات موجودہیں۔ داخلہ فارم کی پروسیسنگ فیس 2000 روپے کا واؤچر جمع کرانے کے بعد آن لائن داخلہ فارم جمع کرایا جاسکتا ہے۔

واضح رہے کہ ایسے شعبہ جات جہاں داخلہ ٹیسٹ کا اطلاق ہوتاہے،ان شعبہ جات کا انتخاب صرف وہ ہی طلبہ کرسکتے ہیں جنہوں نے داخلہ ٹیسٹ والے شعبہ جات کا فارم جمع کرایا ہے اور داخلہ ٹیسٹ میں بھی شرکت کی ہے۔ داخلے پالیسی کے مطابق دیئے جائیں گے۔

کراچی: جامعہ کراچی میں داخلے برائے سال 2023ء کے لئے داخلہ ٹیسٹ کا انعقادکیا گیا۔

جامعہ کراچی کے تحت ڈاکٹر آف فارمیسی،ڈاکٹر آف فزیکل تھراپی، بی ای،بی ایس اوربی ایڈ(آنرز) پروگرام کا داخلہ ٹیسٹ منعقد کئے گئے۔داخلہ ٹیسٹ میں 11 ہزار سے زائد امیدواروں نے شرکت کی۔

طلباوطالبات اور ان کے والدین کو داخلی دروازوں سے امتحانی مراکز تک پوائنٹس بسوں کے ذریعے پہنچایا گیا۔ داخلہ ٹیسٹ کے لئے جامعہ کراچی کے مختلف شعبہ جات میں 28 امتحانی مراکز قائم کئے گئے ہیں۔

داخلہ ٹیسٹ کے دوران وائس چانسلر پروفیسر ڈاکٹر خالد محمودعراقی کا مختلف امتحانی مراکز کا دورہ کرتے ہوئےانتظامات پر اطمینان کا اظہارکیا ۔

داخلہ ٹیسٹ میں شرکت کرنے والے امیدواروں اور ان کے والدین کی رہنمائی کے لئے جامعہ کے مختلف مقامات پر ہیلپ ڈیسک قائم کئے گئے تھے۔

لاہور: ناصر حسین بھی ابراراحمد کی صلاحیتوں کےگرویدہ ہوگئے۔

سابق انگلش کپتان نے بہترین اسپنر کو پہلے ٹیسٹ کیلیے میدان میں نہ اتارنے پر سوال اٹھادیا،ان کا کہنا ہے کہ ابرار احمد روایتی لیگ اسپنر نہیں ہیں، وہ اپنی انگلیوں سے گیند کو منفرد انداز میں فلک کرتے ہیں جس کو سمجھنے میں مشکل پیش آتی ہے،امید ہے کہ انگلش بیٹرز مقامی چینلز سے درخواست کرنا چاہیں گے کہ ابرار احمد کی گیندوں کو سپر سلو موشن میں مختلف زاویے سے دکھائیں۔

انھوں نے کہا کہ بین ڈکٹ نے اسپنر کیخلاف اپنے اسٹروکس بہتر انداز میں استعمال کیے مگر دیگر بیٹرز کو پلان میں بہتری لانا ہوگی۔

لاہور: ابراراحمد ٹیسٹ ڈیبیو پر10وکٹیں حاصل کرنے والے پہلے پاکستانی اسپنر بن گئے۔

ملتان ٹیسٹ کی پہلی اننگز میں ابرار احمد نے 7شکار کیے تھے، دوسری میں اب تک 3بیٹرز کو پویلین کی راہ دکھاچکے ہیں،اس قبل عبدالرحمان نے اپنے ڈیبیو میچ کی دونوں اننگز میں 4،4کھلاڑیوں کو آؤٹ کیا تھا۔

یاد رہے پہلے ٹیسٹ میں سب سے زیادہ وکٹیں اڑانے کا پاکستانی ریکارڈ محمد زاہد کا ہے،پیسر نے مجموعی طور پر میچ میں 11شکار کیے تھے۔

کراچی: اگلے 3 روز کے دوران دن کے وقت شہرکاموسم خشک جبکہ راتیں سردرہنےکاامکان ہے۔

محکمہ موسمیات ارلی وارننگ سینٹر پیش گوئی کے مطابق اس دوران سمندر کی جنوب مغربی ہوائیں غیر فعال رہے گی اور کراچی بلوچستان کی شمال مشرقی ہواؤں کے زیر اثر رہے گا۔

آئندہ 3 روز کے دوران کم سے کم پارہ 15 سے 17 ڈگری کے درمیان ریکارڈ ہوسکتا ہے۔ بالائی سندھ کے اضلاع میں صبح کے وقت دھند چھا سکتی ہے۔

سنگاپور سٹی: پاکستانی فیس بک صارفین نئے فیچر اسٹار کی بدولت مونی ٹائزیشن کے بعد اپنی تخلیقات کا معاوضہ حاصل کرسکیں گے۔

وزیر خارجہ بلاول بھٹو زرداری نے سنگاپور میں میٹا(فیس بک) ایشیا پیسیفک ہیڈکوارٹر کا دورہ کیا اور میٹا کے نمائندگان سے ملاقات کی جس میں پاکستان کے صارفین کے حوالے سے ایک خوش خبری بھی سننے کو ملی۔

وزیر خارجہ بلاول بھٹو نے ٹوئٹر پر اپنے ویڈیو پیغام میں بتایا کہ پاکستان کو ایک اور اعزاز حاصل ہوگیا۔ اب میٹا کمپنی کی ایپ فیس بک سے پاکستانی شناختی کارڈ کے حامل صارفین بھی اپنی تخلیقات (Content) کو ذريعہ آمدن بنا سکیں گے۔

بلاول بھٹو زرداری نے مزید بتایا کہ انسٹاگرام اور فیس بک کی مالک کمپنی میٹا جلد پاکستان میں سرمایہ کاری کرے گی جب کہ پاکستان میں مونی ٹائزیشن کے لیے “اسٹارز پروگرام” کا آغاز بھی کر دیا گیا۔

وزیر خارجہ نے بتایا کہ“اسٹارز پروگرام” کے تحت جو بھی پاکستانی صارفین فیس بک پر اپنی تخلیقات ویڈیو کی صورت میں شیئر کریں گے اور دیکھنے والے انھیں جتنے اسٹارز دیں گے اس حساب سے ویڈیو اپ لوڈ کرنے والے کو پیسے ملیں گے۔

بلاول بھٹو نے اس امید کا بھی اظہار کیا کہ پاکستانی نوجوان اس موقع سے فائدہ اُٹھاتے ہوئے سوشل میڈیا پلیٹ فارمز کو مثبت کاموں کے لیے استعمال کریں گے اور اپنی آمدنی میں اضافہ کرسکیں گے۔

وزیر خارجہ نے مزید کہا کہ اس سہولت سے سب سے زیادہ فائدہ خواتین اُٹھاسکتی ہیں جو گھر بیٹھے اپنی آمدنی میں اضافہ کرسکتی ہیں۔

کراچی: جامعہ کراچی کے تحت بی ایس تھرڈایئرکےلئے داخلہ ٹیسٹ منعقد کیا گیا۔

جامعہ کراچی کے شعبہ کمپیوٹرسائنس، شعبہ پبلک ایڈمنسٹریشن اوربزنس ایڈمنسٹریشن بی ایس تھرڈایئرمیں داخلوں کے لئے داخلہ ٹیسٹ آج شعبہ معاشیات جامعہ کراچی میں منعقد ہوا۔

داخلہ ٹیسٹ میں 189 طلبہ شریک ہوئے،رجسٹرار جامعہ کراچی پروفیسر ڈاکٹر عبدالوحید،رئیسہ کلیہ فنون وسماجی علوم جامعہ کراچی پروفیسر ڈاکٹر نصرت ادریس،انچارج ڈائریکٹوریٹ آف ایڈمیشنز جامعہ کراچی ڈاکٹر صائمہ اختر،پروفیسر ڈاکٹر انیلاامبر ملک اور ڈاکٹر سید ظفرحسین نے امتحانی مراکز کا دورہ کیا۔

کیلیفورنیا: ٹوئٹر کے سربراہ ایلون مسک نے سوشل میڈیا پلیٹ فارم پر موجود غیر فعال اکاؤنٹس کو ختم کرنے کا اعلان کردیا۔

گزشتہ روز ایلون مسک کا ایک ٹوئٹر پیغام میں کہنا تھا کہ ٹوئٹر جلد ہی ڈیڑھ ارب اکاؤنٹس کی جگہ خالی کرنا شروع کرنے والا ہے۔

انہوں نےواضح کیا کہ ٹوئٹر کی جانب سے وہ اکاؤنٹ ختم کیے جانے والے ہیں جن سے کافی عرصے سے کوئی ٹوئٹ نہیں ہوئی اور وہ سالوں سے لاگ اِن نہیں ہوئے۔