کراچی: ثانوی تعلیمی بورڈکراچی نے سائنس گروپ جماعت دہم سالانہ امتحانات 2020کے (پکا) سرٹیفکیٹ جاری کرنے کا اعلان کر دیا ہے۔

میٹرک بورڈ کے چیئرمین سید شرف علی شاہ نے کہا کہ ابھی صرف سائنس گروپ کے سرٹیفکیٹ جاری کئے جا رہے ہیں جبکہ جنرل گروپ کے سرٹیفکیٹ بھی جلد ہی جاری کر دیئے جائیں گے۔

انہوں نے بتایا کہ طلباء و طالبات کے سرٹیفکیٹ ان کی درسگاہوں کو جاری کئے جا ئیں گے تمام طلباء و طالبات اپنے اپنے اسکولوں سے ہی سرٹیفکیٹ حاصل کر سکتے ہیں۔ اسکولوں کے سربراہان اپنے با اختیار نمائندے یا سینئر اساتذہ کو شناختی کارڈ کی فوٹو کاپی، آفس کارڈ اور اتھارٹی لیٹر کے ساتھ مقررہ تاریخوں میں میٹرک بورڈ کے متعلقہ سیکشن گراؤنڈ فلور کمرہ نمبر23بلاک B میں صبح9:30بجے سے سہ پہر 1بجے تک جبکہ جمعہ کوصبح9:30سے سہ پہر 12:00بجے تک بھیج کر سرٹیفکیٹ حاصل کر سکتے ہیں۔تفصیلات کے مطابق 8دسمبر کو نیو کراچی، نارتھ ناظم آباد، گلبرگ۔9دسمبر کو گلشن اقبال، لیاقت آباد،جمشید ٹاؤن۔12دسمبرکو گارڈن، صدر، لیاری ٹاؤن،کیماڑی، سائٹ، اورنگی ٹاؤن، بلدیہ ٹاؤن، لانڈھی، شاہ فیصل ٹاؤن، کورنگی، ملیر، بن قاسم اور گڈاپ کے سرٹیفکیٹ حاصل کئے جا سکتے ہیں اس کے ساتھ یہ بھی بتایا گیا ہے کہ سرٹیفکیٹ جاری کرتے وقت طلباء وطالبات سے کسی بھی قسم کی فیس نہیں لی جائے۔

یاد رہے کہ بورڈ کے قواعد کے مطابق سرٹیفکیٹ کی جاری کردہ تاریخ کے 6ماہ گزرنے کے بعد بورڈ آفس سے لیٹ فیس کے ساتھ سرٹیفکیٹ جاری کئے جائیں گے۔

اسلام آباد: فیڈرل پبلک سروس کمیشن نےسی ایس ایس 2022کے تحریری امتحان کے نتائج جاری کردیئے۔

مسابقتی امتحانات میں تقریباً 393 امیدواروں نے کامیابی حاصل کی جبکہ منتخب درخواست دہندگان سے اسکریننگ کے اگلے دور کے لیے FPSC کے ذریعے رابطہ کیا جائے گاجس میں طبی ونفسیاتی امتحانات، اور زبانی انٹرویوز شامل ہوں گے

فیڈرل پبلک سروس کمیشن 10 دسمبر سے 26 دسمبر 2022 تک خصوصی امتحان کے لیے MCQs پر مبنی ابتدائی ٹیسٹ (MPT) کے لیے آن لائن درخواستیں قبول کرنا شروع کر ے گا۔ MPT کا انعقاد 31 جنوری 2023 کو ہوگا، جس کے نتائج 15 فروری 2023 کو جاری کیے جائیں گے۔

واضح رہےفیڈرل پبلک کمیشن نے پہلے خصوصی CSS امتحان کا اعلان کیا تھاجو 4 مئی 2023 کومنعقد ہوگا، اور اسے امیدواروں کی چوتھی (اضافی) کوشش تصور کیا جائے گا۔

کمیشن نے یہ کارروائی ان عہدوں کو پر کرنے کے لیے کی جو پرائمری CSS امتحان میں پاس ہونے کی شرح بہت کم ہونے کی وجہ سے کچھ عرصے سے خالی تھیں۔

امیدواروں کوہدایت دی جاتی ہے کہ وہ اپ ڈیٹس کے لیے FPSC کی ویب سائٹ پر وقتافوقتاً چیک کریں اور کسی بھی سوال کے ساتھ 051-111-000-248 پر ڈائل کریں۔

لاہور: چیئرمین پی سی بی رمیز راجا نے پنڈی ٹیسٹ ہارنے پر مایوسی کا اظہار کیا ہے۔

ذرائع کے مطابق رمیز راجا نے پنڈی ٹیسٹ میں قومی ٹیم کی حکمت عملی اور شکست پر مایوسی کا اظہار کیا اور ٹیسٹ میچ میں اٹیکنگ گیم کھیلنےکی ہدایت کی۔

ذرائع کے مطابق رمیز راجا نے کہا کہ جس طرح انگلینڈ کھیلا اس سے ایک ہاتھ آگے آپ کوکھیلنا ہوگا، ملتان ٹیسٹ میں انگلینڈ کے خلاف سب پلیئرز جان ماریں۔

چیئرمین پی سی بی کا کہنا تھا کہ انگلینڈ کے خلاف ٹیسٹ میچ جیتاجاسکتا تھا، کھلاڑی تھوڑی اور جان مارتے تو رزلٹ مختلف ہوتا، فاسٹ بولرزکو اپنا رول ادا کرنا ہوگا۔

کراچی: جامعہ این ای ڈی کے شعبہ یونی ورسٹی ایڈوانسمنٹ اینڈ فنانشل اسسٹنس کے تحت جاری "ا ُن کیمپس نیوز پیپر NEDian's کی ٹیم سمیت صحافتی اُمور میں دل چسپی رکھنے والے طالب علموں کے لیے ایک روزہ ورکشاپ کا انعقاد کیا گیا.

جس کے ٹرینر یونی ورسٹی ایڈوانسمنٹ اینڈ فنانشل اسسٹنس کے ڈائریکٹر پروفیسر ڈاکٹر نعمان احمد تھے.
جزل سیکرٹری کراچی یونین آف جرنلسٹ اور بیورو چیف جیو نیوز فہیم صدیقی، اسکرپٹ ہیڈ اے آر وائی/ معروف شاعر عمران شمشاد نرمی، سینئر صحافی وائس آف امریکہ رانا محمد آصف، کمیونیکیشن مینجر اوریک این ای ڈی یونی فروا حسن، سب ایڈیٹر دی نیوز بزنس ڈیسک عندلیب رضوی، سینیر رپورٹر سماء سیدہ زینت اور سینئر رپورٹر 24 نیوز ایچ ڈی امتیاز علی مستوئی نے طالب علموں کو صحافتی اُمور کی بہتر انجام دہی کی تربیت فراہم کی.

اس موقع پر گفتگو کرتے ہوئے بیورو چیف جیو نیوز فہیم صدیقی کا کہنا تھا کہ صحافی معاشرے سے جذب کرتا ہے اور اخبار یا چینل کے ذریعے بیک وقت لاکھوں افراد کی رائے سازی کرتا ہے. انہوں نے این ای ڈی کے اِن کیمپس نیوز پیپر کی کاوشوں کو بھی سراہا. ورکشاپ کے شرکا طالب علموں سے گفتگو کرتے ہوئے اسکرپٹ ہیڈ اے آر وائی عمران شمشاد کا کہنا تھا کہ لکھنے میں جمالیات کے عنصر ہونا ضروری ہے جب کہ مثبت رپورٹنگ وقت کی اہم ضرورت ہے.

سینئر صحافی وائس آف امریکہ رانا محمد آصف اور سب ایڈیٹر دی نیوز عندلیب رضوی نے کہا یہ لاکھوں افراد کی ذمے داری ہے جو صحافی کے کاندھوں پر ہے تو رپورٹنگ ہو یا سب ایڈٹینگ انہیں معاشرتی فریضہ سمجھ کر انجام دینا صحافت ہے. کمیونیکیشن مینجر اوریک فروا حسن کا کہنا تھا کہ آج کے دور میں جب کہ نوجوان سوشل میڈیا کی قید میں ہے، انجینئر طالب علموں کی اخبار سے رغبت اور جامعہ کی مثبت سرگرمیوں نکالا جانے والا یہ میگزین خوش آئند ہے.

سینئر صحافی سیدہ زینت اور سنیئر رپورٹر امتیاز مستوئی نے اپنی فیلڈ کی مشکلات کا ذکر کیا. ان کا کہنا تھا کہ صحافت صفت سے نہیں ہوتی، کام کرنے والا لڑکا ہو یا لڑکی فیلڈ میں سب برابر ہوتے ہیں. جامعہ ترجمان کے مطابق رجسٹرار این ای ڈی غضنفر حسین نقوی سمیت بڑی تعداد میں طالب علموں نے اس ایک روزہ ورکشاپ میں شرکت کی. ورکشاپ کے اختتام پر مہمان صحافیوں کو سکّہ(این ای ڈی کے سوبرس مکمل ہونے پر جاری کردہ سکّہ) بطور سوینیر دیا گیا.

انگلینڈ کے خلاف قومی کرکٹر حارث رؤف ٹیسٹ سیریز سے باہر ہوگئے۔

پاکستان کرکٹ بورڈ کی جانب سے جاری بیان میں فاسٹ بولر حارث رؤف کے پاک انگلینڈ ٹیسٹ سیریز سے باہر ہونے کی تصدیق کی گئی ہے۔

پی سی بی نے کہا ہےکہ حارث رؤف کو ٹانگ کی دائیں جانب دباؤ محسوس ہورہا ہے، راولپنڈی ٹیسٹ کے پہلے روز حارث کے ایم آر آئی اسکین کیے گئے تھے۔

پی سی بی کے مطابق حارث رؤف جلد لاہور میں ری ہیب پروگرام شروع کریں گے۔

دوسری جانب ذرائع کا کہنا ہےکہ اسکواڈ میں حارث رؤف کے متبادل فاسٹ بولر کا فیصلہ جلد کیا جائے گا اور محمد عباس کو متبادل کے طور پر ٹیسٹ اسکواڈ میں شامل کیے جانے کا امکان ہے۔

کراچی: فرسٹ ایئر کے تمام طلباءخبردارہوجائیں گورنمنٹ کالجز میں ڈیجیٹل حاضری کا آغازہوگیا ہے۔

تفصیلات کے مطابق محکمہ تعلیم سندھ نےانٹر میڈیٹ کے طلباوطالبات کو ہدایت جاری کرتے ہوئے کہا ہے کہ طلبا اپنی حاضری یقینی بنائیں سالانہ امتحانات میں شرکت کے لئے 75فیصد حاضری لازمی ہے۔

75فیصد سے کم حاضری والے طلبا امتحانی فارم جمع کرانےسے قاصررہیں گے اس ضمن میں محکمہ تعلیم سندھ نے ڈیجیٹل شناختی کارڈ جاری کردیا ہے تمام ط طلباء اپنا ڈیجیٹل شناختی کارڈ حاصل کریں۔

کراچی: وفاقی اردو یونیورسٹی برائے فنون سائنس و ٹیکنالوجی میں مستقل وائس چانسلر کی تقرری کے سلسلے میں تلاش کمیٹی میں 2اساتذہ کی نمائندگی کیلئے سینیٹ کا اجلاس طلب کرلیا۔

ڈپٹی چیئر سینیٹ اے کیو خلیل کی زیر ِ صدارت اجلاس بدھ 7؍ دسمبر کوہوگا۔

یونیورسٹی کی سنڈیکیٹ نے تلاش کمیٹی میں دو اساتذہ شعبہ حیوانیات کے سید اخلاق حسین اور شعبہ کمپیوٹر سائنس کے شیخ کاشف رفعت کے ناموں کی منظوریدی تھی جن کے ناموں کی اب توثیق سینیٹ سے کی جائے گی۔ اجلاس میں سینیٹ کے 6؍ نئے ارکان کے تقرر کے ناموں کی بھی منظوری دی جائے گی ان 6؍ ارکان کیلئے تقرر کے لیے تین تین ناموں پر مشتمل پینلز کا انتخاب نامزد کمیٹی پہلے کرچکی ہے۔

پہلے پینل میں اے کیو خلیل، احمد شاہ، سعید اللہ والا کے نام شامل ہیں۔ دوسرے پینل میںڈاکٹر ریاض شیخ، آصف زبیری اور شکیل الرحمٰن شامل ہیں۔ تیسرے پینل میں زہیر عشیر شمیم احمد اورمہناز رحمان شامل ہیں اور چوتھے پینل میں ڈاکٹر ہما بقائی ڈاکٹر جنید زیدی اور جسٹس(ر) فہیم صدیقی شامل ہیں۔

جبکہ اساتذہ کے دو پینلز میں شیخ کاشف رفعت ، ڈاکٹر سید اخلاق حسین اور محمد صارف شامل ہیں ، دوسرا پینل روشن علی، ڈاکٹر عمران انور منیر اور ڈاکٹر کمال حیدرپر مشتمل ہے۔

یاد رہے کہ سینیٹ کے 6؍ ارکان ڈاکٹر توصیف احمد، ڈاکٹر اے کیو خلیل، شکیل الرحمان، صادق صلاح الدین، ڈاکٹر عرفان اور ڈاکٹر طاہر علی کی مدت 9دسمبر کو مکمل ہوجائے گی۔ اجلاس میں 2؍ ارکان سنڈیکٹ ڈاکٹر شاہد اقبال اور ڈاکٹر حافظ عبدالرشید کے ناموں کی توثیق بھی کی جائے گی ۔ ٹائم پے اسکیل کیلئے قائم کی گئی کمیٹی کی سفارشات کی بھی منظوری دی جائے گی۔

لاہور: پاکستا ن کرکٹ بورڈ انگلینڈ کے خلاف ٹیسٹ سیریز میں راولپنڈی اسٹیڈیم میں بنائے گئے پچ پر دبائو میں آگیا۔

تفصیلات کے مطا بق ناقص پچ کے باعث پاکستانی ٹیم کاانگلینڈ کے خلاف ٹیسٹ سیریزکا جیتنا مشکل ہوگیا ہے ٹیم کی جارحانہ بیٹنگ کے باعث پنڈی ٹیسٹ دلچسپ مرحلے میں ہے

راولپنڈی اسٹیڈیم کے پچ کے بعدپی سی بی حکام کو اب ملتان ٹیسٹ کی فکر لاحق ہوگئی ہے۔

جس کے نتیجے میں ہیڈکوچ ثقلین مشتاق اور کپتان بابر اعظم کے کہنے پر مشن ایمپوسیبل کے لیے ملتان پہنچ گئے ہیں جب کہ پاکستان اور انگلینڈ کی ٹیمیں منگل کو ملتان پہنچیں گی، مشن کامقصد پچ بناؤ ،میچ بچاؤ ہے۔

مصدقہ ذرائع کا کہنا ہے کہ سابق کپتان یوسف پچ کی تیاری میں چیف کیوریٹر آغا زاہد اور مقامی کیوریٹر کو اپنی رائے سے آگاہ کریں گے۔

پنڈی ٹیسٹ میں پچ پر ہونے والی تنقید کے بعد پی سی بی پر کافی دباؤ ہے، ٹیم انتظامیہ اور پی سی بی ایسی پچ بنانا چاہتے ہیں جس پر پاکستانی بولروں کو ایڈوانٹیج ملے۔

راولپنڈی: انگلینڈاورپاکستان کےدرمیان سیریزکے پہلے ٹیسٹ کے تیسرے روز قومی ٹیم کی بیٹنگ جاری ہے۔

ٹیسٹ کےتیسرے روزقومی ٹیم کے اوپنرز عبداللہ شفیق اور امام الحق جبکہ کپتان بابراعظم سنچری مکمل کرنے میں کامیاب ہوگئے۔کپتان بابراعظم نے ٹیسٹ کرکٹ کی 8 ویں سنچری مکمل کی۔

امام الحق نے 121 ، عبداللہ شفیق نے 114 ، اظہر علی 27 ، سعود شکیل 37 ، بابر اعظم نے 136 رنز بنائے۔

وِل جیکس نے عبداللہ شفیق کو 114رنز پر آؤٹ کرکے اپنی پہلی ٹیسٹ وکٹ لی۔ امام الحق 121 رنز بنا کر لیچ کی گیند پر رابنسن کے ہاتھوں کیچ آؤٹ ہوگئے۔

اظہر علی 27رنز بنا کر جیک لیچ کی گیند پر ایل بی ڈبلیو ہو گئے۔ کھانے کے وقفے تک پاکستان نے 3 وکٹوں کے نقصان پر 298رنز بنالیے۔

وقفے کے بعد پہلا ٹیسٹ کھیلنے والے سعود شکیل 37 رنز بنا کر کیچ آؤٹ ہوگئے۔ بابر اعظم 136 رنز بنا کر ول جیکس کی گیند پر کیچ آؤٹ ہوگئے۔

کراچی: جامعہ اردو نے ایم فل، ایم ایس اور پی ایچ ڈی میں داخلوں کےلئےانٹری ٹیسٹ کی تاریخ کااعلان کردیا۔

وفاقی اردو یونیورسٹی کے ڈائریکٹر ایڈمشن ڈاکٹرسید اخلاق حسین کے مطابق ایم ایس، ایم فل اور پی ایچ ڈی کے انٹری ٹیسٹ(داخلہ2023) 10دسمبر بروزہفتہ وفاقی اردو یونیورسٹی کے ایم ایس سی بلاک گلشن اقبال میں منعقدہوں گے۔

انہوں نے مزید بتایا کہ رپورٹنگ ٹائم صبح10 بجےہے۔

انٹری ٹیسٹ کے امیدواراپنا ایڈمٹ کارڈجامعہ اردو کی ویب سائٹ www.fuuast.edu.pk  سے7دسمبرکو ڈائون لوڈ کرسکیں گے۔