ایمزٹی وی(اسلام آباد) متحدہ قومی موومنٹ کے سینیئر رہنما ڈاکٹر عمران فاروق قتل کیس میں 3ملزمان کو 7 روزہ جسمانی ریمانڈ پر وفاقی تحقیقاتی ادارے (ایف آئی اے) کے حوالے کردیا گیا۔تفصیلات کے مطابق عمران فاروق قتل کیس میں ایف آئی اے کے انسداد دہشت گردی ونگ نے 3 ملزمان معظم علی، محسن علی، اور خالد شمیم کو اسلام آباد کی انسداد دہشت گردی کی خصوصی عدالت جج کوثر عباسی زیدی کے روبرو پیش کیا۔ واضح رہے کہ عمران فاروق قتل کیس میں دو روز قبل ایف آئی اے کے محکمہ انسداد دہشت گردی کے ڈائریکٹر انعام غنی کی مدعیت میں ان تینوں ملزمان کے علاوہ ایم کیو ایم کے قائد الطاف حسین اور رہنما محمد انور سمیت دیگر کے خلاف انسداد دہشت گردی کی دفعات کے تحت قتل، سازش اور معاونت کا مقدمہ درج کیا گیا تھا۔